សាច់ញាតិមន្ត្រីគណបក្សប្រឆាំងនៅក្រុងប៉ោយប៉ែត លោក ចៅ វាសនា ប្ដឹងទាស់នឹងការសម្រេចរបស់សាលាដំបូងខេត្តបន្ទាយមានជ័យដែលកាត់ក្ដីឱ្យលោកជាប់ពន្ធនាគារ ៣ឆ្នាំទៅសាលាឧទ្ធរណ៍។ មន្ត្រីសង្គមស៊ីវិលចាត់ទុកសាលក្រមលោកចៅ វាសនាជារឿងអយុត្តិធម៌។
កូនស្រីរបស់លោក ចៅ វាសនា គឺអ្នកស្រី ចៅ រតនៈ ប្រាប់វិទ្យុអាស៊ីសេរីនៅថ្ងៃទី១៦កុម្ភៈថា ឪពុករបស់អ្នកស្រីបានផ្ដិតមេដៃលើឯកសារពឹងឱ្យមេធាវីប្ដឹងទាស់នឹងការសម្រេចរបស់សាលាដំបូងខេត្តបន្ទាយមានជ័យទៅសាលាឧទ្ធរណ៍រួចហើយកាលពីថ្ងៃទី៧កុម្ភៈ។អ្នកស្រី បញ្ជាក់ថា ការប្ដឹងនេះមិនរំពឹងទទួលបានជោគជ័យនោះទេ ក៏ប៉ុន្តែដើម្បីបង្ហាញភាពស្អាតស្អំរបស់លោក ចៅ វាសនា ឱ្យសាធារណៈជនដឹងថា ក្ដីក្ដាំនេះជារឿងអយុត្តិធម៌និងជាការធ្វើទុក្ខបុកម្នេញផ្នែកនយោបាយ។
អ្នកស្រី ចៅ រតនៈ៖ «ខ្ញុំដឹងទឹកចិត្តពលរដ្ឋទាំងអស់គាត់អង្វរខ្ញុំ ឃើញខ្ញុំឡើងភ្នំពេញញឹកញាប់គាត់អាណិតខ្ញុំខ្ញុំពន្យល់ប្រាប់គាត់ថា ខ្ញុំចង់បង្ហាញហើយបង្ហាញទៀតឱ្យមហាជនទាំងអស់គ្នាថា តុលាការអត់បានរកយុត្តិធម៌ជូនអ្នកជាប់ឃុំ ដែលរងអំពើអយុត្តិធម៌នេះមិនមែនតែសកម្មជនគណបក្សប្រឆាំងទេ ថ្ងៃខាងមុខនឹងប៉ះដល់បងប្អូនប្រជាពលរដ្ឋ បើសិនជាតុលាការអត់ឯករាជ្យ»។
ការប្ដឹងនេះធ្វើឡើងបន្ទាប់ពីតុលាការខេត្តបន្ទាយមានជ័យបានប្រកាសសាលក្រមលើសំណុំរឿងរបស់ប្រធានគណបក្សភ្លើងទៀនក្រុងប៉ោយប៉ែត លោក ចៅ វាសនា ដោយផ្ដន្ទាទោសលោកឲ្យជាប់ពន្ធនាគារចំនួន ៣ឆ្នាំ និងពិន័យជាប្រាក់ចំនួន ៦លានរៀល ហើយសងសំណងដើមបណ្ដឹងរដ្ឋប្បវេណីចំនួន ៨០លានរៀល ឬប្រមាណ ២ម៉ឺនដុល្លារ។ សាលក្រមនេះ ក៏បានដកហូតសិទ្ធិបោះឆ្នោត និងសិទ្ធិឈរឈ្មោះឲ្យគេបោះឆ្នោតរបស់លោក ចៅ វាសនា រយៈពេល ៥ឆ្នាំផងដែរ។
ជុំវិញរឿងនេះនាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា ការប្ដឹងទាស់ជាសិទ្ធិរបស់លោកចៅ វាសនា ក៏ប៉ុន្តែលោកមិនរំពឹងថា តុលាការជាន់ខ្ពស់មួយនេះនឹងផ្ដល់យុត្តិធម៌តាមចង់បានរបស់ជនជាប់ចោទនោះទេ។
លោក អំ សំអាត៖ «អីចឹងរឿងទាំងអស់នេះយើងឃើញថាពីមុនៗ កន្លងមកនឹងគឺនៅពេលមានការចាប់ជាក្រុមអីចឹងទៅហើយមានការចរចាផ្នែកនយោបាយ ឬក៏អ្នកនយោបាយគាត់ចរចាគ្នាទៅមានការដោះលែង ឬនៅក្រៅឃុំបណ្ដោះអាសន្នអីចឹងទៅ។ តែក្រោយៗ មកយើងឃើញថាសកម្មជនទាំងអស់ហ្នឹងនៅពេលមានការចាប់ខ្លួនហើយអាហ្នឹងតុលាការតែងតែកាត់ទោសអនុវត្តតាមនីតិវិធីហើយតែងតែមានការសម្រេចឱ្យមានទោស»។
អាជ្ញាធរខេត្តបន្ទាយមានជ័យ បានចាប់ខ្លួនប្រធានគណបក្សភ្លើងទៀនក្រុងប៉ោយប៉ែត លោក ចៅ វាសនា ដែលមានដើមកំណើតខ្មែរក្រោម កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ ក្រោមការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង ពាក់ព័ន្ធនឹងធ្វើយុទ្ធនាការអំពាវនាវឱ្យពលរដ្ឋគូសខ្វែងសន្លឹកឆ្នោត តាមបណ្ដាញសង្គមតេឡេក្រាម (Telegram) ក្នុងពេលបោះឆ្នោតជាតិ កាលពីខែកក្កដា ឆ្នាំ២០២៣។ ប៉ុន្តែ លោក ចៅ វាសនា បានច្រាលចោលការចោទប្រកាន់នេះ។ អាជ្ញាធរបានបញ្ជូនលោក ចៅ វាសនា ទៅឃុំខ្លួន នៅពន្ធនាគារខេត្តនេះ កាលពីថ្ងៃទី២៥ ខែកក្កដា ឆ្នាំ២០២៣។
លោក ចៅ វាសនា ធ្លាប់ត្រូវបានតុលាការខេត្តបន្ទាយមានជ័យ កាត់ទោសឲ្យជាប់ពន្ធនាគារម្ដងរួចមកហើយ ពីបទញុះញង់ និងបានចេញពីពន្ធនាគារវិញ កាលពីដើមឆ្នាំ២០២២ បន្ទាប់ពីលោកបានអនុវត្តទោសគ្រប់ចំនួន រយៈពេល ៥ឆ្នាំពេញ ក្នុងពន្ធនាគារ។
កន្លងទៅ មន្ត្រីអង្គការសង្គមស៊ីវិល ចាត់ទុករឿងក្ដីក្ដាំនេះថា ជាការធ្វើទុក្ខបុកម្នេញផ្នែកនយោបាយនិងស្នើឱ្យតុលាការដោះលែងលោក ចៅ វាសនាឱ្យមានសេរីភាពវិញដោយឥតលក្ខខ័ណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។