មន្ត្រី​បក្ស​ប្រឆាំង​ម្នាក់​នៅ​បាត់ដំបង​ត្អូញ​បាត់បង់​សិទ្ធិ​សេរីភាព​ការ​ដើរ​ហើរ បន្ទាប់​ពី​មាន​ដីកា​កោះ​២​លើក​ជាប់​គ្នា

ដោយ ម៉ៅ សុធានី
2019-06-21
អ៊ីម៉ែល
មតិ
Share
បោះពុម្ព
លោក​ ឌឹម សារឿន (អាវទឹកប៊ិច​កណ្ដាល) ជា​សមាជិក​ក្រុម​ប្រឹក្សា​ខេត្ត​បាត់ដំបង​ជាប់​ឆ្នោត​គណបក្ស​ សង្គ្រោះ​ជាតិ និង​សមាជិក​ក្រុម​ប្រឹក្សា​ឃុំ​សង្កាត់ ស្រុក និង​ខេត្ត​បាត់ដំបង ចំនួន ៦នាក់​ផ្សេង​ទៀត ជួប​គ្នា​ពង្រឹង​សាមគ្គីភាព នៅ​ថ្ងៃ​ទី២១ ខែ​មីនា ឆ្នាំ២០១៩។
លោក​ ឌឹម សារឿន (អាវទឹកប៊ិច​កណ្ដាល) ជា​សមាជិក​ក្រុម​ប្រឹក្សា​ខេត្ត​បាត់ដំបង​ជាប់​ឆ្នោត​គណបក្ស​ សង្គ្រោះ​ជាតិ និង​សមាជិក​ក្រុម​ប្រឹក្សា​ឃុំ​សង្កាត់ ស្រុក និង​ខេត្ត​បាត់ដំបង ចំនួន ៦នាក់​ផ្សេង​ទៀត ជួប​គ្នា​ពង្រឹង​សាមគ្គីភាព នៅ​ថ្ងៃ​ទី២១ ខែ​មីនា ឆ្នាំ២០១៩។
Provided photo

មន្ត្រី​ជាន់ខ្ពស់​គណបក្ស​ប្រឆាំង​ប្រចាំ​ខេត្ត​បាត់ដំបង​ម្នាក់​បាន​ត្អូញត្អែរ​អំពី​ការបាត់បង់​សិទ្ធិ​សេរីភាព​ក្នុង​ការ​ដើរ ដោយសារ​មួយ​រយៈ​ចុងក្រោយ​នេះ លោក​ទទួល​បាន​ដីកោះ​ហៅ​ចំនួន ២​លើក​ផ្ទួនៗ​គ្នា​ឱ្យ​ចូល​បំភ្លឺ​នៅ​សាលាដំបូង​ខេត្ត​បាត់ដំបង ក្នុង​សំណុំរឿង​ប្រឆាំង​សាលដីកា​តុលាការ​កំពូល។ មន្ត្រី​អង្គការ​សង្គម​ស៊ីវិល​ធ្វើ​ការងារ​ផ្នែក​សិទ្ធិមនុស្ស​លើកឡើង​ថា ដីកា​នេះ​គឺជា​ការ​គំរាមកំហែង​បិទ​សិទ្ធិ សេរីភាព​ដល់​មន្ត្រី​គណបក្សប្រឆាំង។

សមាជិក​ក្រុមប្រឹក្សា​ខេត្ត​បាត់ដំបង​ជាប់ឆ្នោត​គណបក្ស​សង្គ្រោះជាតិ លោក ឌឹម សារឿន ប្រាប់​អាស៊ីសេរី​នៅ​រសៀល​ថ្ងៃ​ទី​២១ មិថុនា​ថា សិទ្ធិ​សេរីភាព​របស់​លោក​រួញ​តូច​កាន់តែ​ខ្លាំង ដោយសារតែ​មិន​ដល់​២​ខែ​ផង លោក​ទទួល​បាន​ដីកា​កោះហៅ​ចំនួន​២​លើក​រួចមក​ហើយ ឱ្យ​ចូល​បំភ្លឺ​តំណាង​អយ្យកា​នៅ​សាលាដំបូង​ខេត្ត​បាត់ដំបង។ លោក​បន្ត​ថា ដីកា​កោះហៅ​នេះ​ធ្វើ​ឱ្យ​លោក​មិន​អាច​ចេញទៅ​ធ្វើ​ការងារ​ឆ្ងាយ​ពី​ផ្ទះ​បានទេ ព្រោះ​ត្រូវ​ទៅ​ចូល​បំភ្លឺ​តុលាការ៖ «សព្វថ្ងៃ​ខ្ញុំ​ប្រៀប​ដូចជា​ជាប់គុក​ដែរ តែ​ជា​គុក​ឥត​ជញ្ជាំង បាន​ន័យ​ថា បាត់បង់​សេរីភាព​ខ្ញុំ​ដូច​ជាង​ចង​ជើង​ខ្ញុំ​មិន​ឱ្យ​ទៅ​ណា​រួច បាន​ន័យ​ថា​គ្មាន​សេរីភាព​គ្រប់គ្រាន់​ក្នុង​ការ​ដើរហើរ​ជួប​សាច់ញាតិ​និង​មិត្តភ័ក្ដិ​នៅ​ខាងក្រៅ​បាន នេះ​ជា​រូប​មួយ​ដែល​គេ​គំរាមកំហែង​មក​លើ​រូប​ខ្ញុំ»

កាល​ពី​ថ្ងៃ​ទី៩ ឧសភា តំណាង​អយ្យកា​នៃ​សាលាដំបូង​ខេត្ត​បាត់ដំបង លោក គឺ ប៊ុណ្ណារ៉ា បាន​កោះហៅ​លោក ឌឹម សារឿន ឱ្យ​បំភ្លឺ​ម្ដង​រួច​មក​ហើយ ក្រោយ​មក​នៅ​ថ្ងៃ​ទី​២១ មិថុនា មាន​ដីកា​កោះហៅ​មួយទៀត ដោយ​តំណាង​អយ្យកា​សាលាដំបូង​ខេត្ត​បាត់ដំបង​លោក ហេង លុយ កោះហៅ​លោក​ចូល​បំភ្លឺ​សំណុំរឿង​ដូចគ្នា គឺ​ពី​បទ​ប្រឆាំង​សាលដីកា​តុលាការ​កំពូល រឿង​រំលាយ​គណបក្ស​សង្គ្រោះ​ជាតិ កាលពី​ខែ​វិច្ឆិកា​ឆ្នាំ​២០១៧​កន្លងទៅ។

ទោះជា​យ៉ាងណា​លោក ឌឹម សារឿន អះអាង​ថា ដីកា​លើក​ទី​២​នេះ លោក​បាន​ដាក់​ពាក្យសុំ​ពន្យារ​ពេល​ចូល​បំភ្លឺ​រួចហើយ ដោយ​ខាង​តុលាការ​បាន​យល់​ព្រម​ឱ្យ​ពន្យារពេល​តាម​ការ​ស្នើ ប៉ុន្តែ​តុលាការ​នឹង​កោះហៅ​នៅ​ពេល​ក្រោយ​ទៀត។

អាស៊ីសេរី​មិន​អាច​ទាក់ទង​អ្នកនាំពាក្យ​សាលាដំបូង​ខេត្ត​បាត់ដំបង​សាកសួរ​ជុំវិញ​បញ្ហា​នេះ​បានទេ​នៅ​ថ្ងៃ​ទី​២១ មិថុនា ដោយ​ទូរស័ព្ទ​មិន​មាន​អ្នកទទួល។

មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុដ (Adhoc) ខេត្ត​បាត់ដំបង​លោក យិន ម៉េងលី លើកឡើង​ថា ដីកា​ទាំងនេះ គឺជា​រឿង​នយោបាយ​សុទ្ធសាធ ដើម្បី​រារាំង​បំភិតបំភ័យ​ដល់​មន្ត្រី​គណបក្សប្រឆាំង​ឱ្យ​ភ័យខ្លាច ដើម្បី​កុំ​ឱ្យ​ពួកគាត់​ធ្វើ​សកម្មភាព​នយោបាយ​គាំទ្រ​លោក សម រង្ស៊ី នៅ​ថ្ងៃក្រោយ​ទៀត។ លោក​បន្ត​ថា ការ​ធ្វើ​បែបនេះ​បាន​ប៉ះពាល់​ដល់​សិទ្ធិ​សេរីភាព​ក្នុង​ការ​ជួប​ប្រជុំ​ដើម្បី​បញ្ចេញមតិ​របស់​ប្រជាពលរដ្ឋ៖ «គ្រាន់តែ​ប្រើ​ពាក្យ​ថា គាំទ្រ​ទៅលើ​លោក សម រង្ស៊ី គ្រាន់តែ​គាំទ្រ​ឱ្យ​មាន​ការដឹកនាំ គ្រាន់តែ​ថា​លោក កឹម សុខា និង លោក សម រង្ស៊ី ជា​មនុស្ស​តែមួយ​នឹង វា​អត់​មាន​បំពាន​សាលដីកា​តុលាការ​កំពូល​ទេ ព្រោះ​សាលដីកា​អត់​មាន​និយាយ​ហាម​ទេ គឺ​ហាម​យកឈ្មោះ​អ្នកទោស​ឬក៏​យកឈ្មោះ​បក្ស​មក​និយាយ​អត់​មាន​ហាម​ទេ។ អីចឹង​គ្រាន់តែ​និយាយ​នឹង​ការ​បញ្ចេញមតិ​នឹង វា​មិនមែន​ជា​ការ​រំលោភ​ច្បាប់​ទេ អីចឹង​បាន​ខ្ញុំ​ថា រឿង​នេះ​ជា​រឿង​នយោបាយ​មិនមែន​ជា​រឿង​ផ្លូវច្បាប់​ទេ»

កាលពី​ខែ​ឧសភា​កន្លងទៅ សាលាដំបូង​ខេត្ត​បាត់ដំបង បាន​កោះហៅ​មេឃុំ​ចៅសង្កាត់ សមាជិក​ក្រុម​ប្រឹក្សាឃុំ​សង្កាត់ ស្រុក ក្រុង​និង​ក្រុមប្រឹក្សា​ខេត្ត​បាត់ដំបង​ជាប់ឆ្នោត គណបក្ស​សង្គ្រោះ​ជាតិ​ចំនួន ៣៥​នាក់​ហើយ ឱ្យ​ចូល​បំភ្លឺ​តុលាការ​ជា​បន្តបន្ទាប់ ក្នុង​នោះ​មាន​ចៅសង្កាត់​អូរចារ​ជាប់ឆ្នោត គឺ​កញ្ញា ស៊ិន ចាន់ពៅរ៉ូហ្សេត និង​ប្រធាន​គណបក្ស​សង្គ្រោះ​ជាតិ​ខេត្ត​បាត់ដំបង​លោក ជា ជីវ ក៏បាន​ចូល​បំភ្លឺ​រួច​មក​ហើយ​ដែរ៕

 

ព័ត៌មាន (0)
Share
គេហទំព័រ​ទាំងមូល