លោក សម រង្ស៊ី ប្រធានស្តីទីគណបក្សសង្គ្រោះជាតិ ជាថ្មីម្តងទៀត អំពាវនាវឱ្យប្រជាពលរដ្ឋខ្មែរទូទៅ គ្រប់ស្រទាប់វណ្ណៈ រួមទាំងកងកម្លាំងប្រដាប់អាវុធផង នាំគ្នាងើបឈរឡើងព្រមគ្នា រើបម្រាស់ប្រឆាំងនឹងរបបលោក ហ៊ុន សែន។ លោកហៅការងើបបះបោរនេះ ថា ជាការតស៊ូ និងជាកាយវិការការពារខ្លួនស្របច្បាប់បែបអហិង្សា ដើម្បីប្រឆាំងនឹងរបបមួយដែលលោកថា កំពុងតែដឹកនាំកម្ពុជាទាំងខុសច្បាប់ និងកំពុងតែនាំកម្ពុជាឆ្ពោះទៅកាន់ភាពមហន្តរាយ៖ «ពេលណាដែលប្រជាពលរដ្ឋងើបឈរគ្រប់ទីកន្លែងព្រមគ្នាទាំងអស់ កម្លាំង ហ៊ុន សែន អត់មានគ្រប់គ្រាន់ទៅទប់ទល់ជាមួយនឹងប្រជាពលរដ្ឋទេ។ បើប្រជាពលរដ្ឋប្រមូលផ្តុំតែមួយកន្លែង គេប្រមូលផ្តុំកម្លាំងគេយកមកទប់ស្កាត់ប្រជាពលរដ្ឋ តែបើប្រជាពលរដ្ឋងើបទាំងអស់គ្នានៅថ្ងៃនោះ ចេញមកក្រៅផ្ទះគ្រប់ផ្ទះគ្រប់ភូមិ គ្រប់ឃុំ គ្រប់ស្រុក គ្រប់ខេត្ត ហើយចេញមកតាមផ្លូវ ចេញមកតាមផ្សារ ចេញមកតាមវត្ត ចេញមកតាមស្រែចម្ការ គ្រប់ទីកន្លែងទាំងអស់ព្រោងព្រាត គឺកម្លាំងដែលស្មោះត្រង់ជាមួយលោក ហ៊ុន សែន នោះ នឹងមិនអាចធ្វើអីប្រជាពលរដ្ឋខ្មែរបានទេ»។
លោក សម រង្ស៊ី ហៅការណ៍ដែលលោក ហ៊ុន សែន ប៉ុនប៉ងទប់ស្កាត់ដំណើរវិលត្រលប់ទៅកាន់កម្ពុជាវិញនៅថ្ងៃទី៩ វិច្ឆិកា ខាងមុខនេះ នឹងពុំមានប្រសិទ្ធភាពអ្វីនោះទេ ព្រោះលោកថា ទាំងប្រជាពលរដ្ឋ ទាំងផ្ទៃក្នុងគណបក្សកាន់អំណាច និងទាំងប្រទេសជិតខាង នឹងមិនធ្វើតាមការចង់បានរបស់លោក ហ៊ុន សែន នោះទេ។ ម្យ៉ាងវិញទៀត លោក សម រង្ស៊ី អះអាងថា ក្រោយគណបក្សសង្គ្រោះជាតិសម្រេចត្រៀមថវិកាសម្រាប់ទុកឱ្យកងទ័ពដែលផ្តាច់ខ្លួនចាំជួយការពារពលរដ្ឋខ្មែរ នៅពេលដែលលោកវិលត្រលប់ទៅកម្ពុជានោះ គណបក្សទទួលបានការចូលរួមឧបត្ថម្ភថវិកាយ៉ាងច្រើនពីគ្រប់មជ្ឈដ្ឋាន។ លោកបន្ថែមថា ខាងអន្តរជាតិក៏មានថវិកាជួយទ្រទ្រង់ប្រជាធិបតេយ្យផងដែរ។ យ៉ាងណាក៏ដោយ លោក សម រង្ស៊ី មិនបានបញ្ជាក់លម្អិតពីចំនួនពិតប្រាកដនៃថវិកាទាំងនេះឡើយ។ លោក សម រង្ស៊ី មករដ្ឋធានីវ៉ាស៊ីនតោន ដើម្បីស្នើឱ្យអាមេរិកផ្ដល់ការពារសុវត្ថិភាពរបស់លោក ពេលលោកចូលស្រុកខ្មែរវិញនៅដើមខែវិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។