បក្សប្រឆាំងនៅតែប្ដេជ្ញារកយុត្តិធម៌ជូនអ្នកស្លាប់ដោយគ្រាប់បែកជាង២០ឆ្នាំមុនឱ្យខាងតែបាន
2019.03.29
គណបក្សសង្គ្រោះជាតិអះអាងថា បាតុករដែលស្លាប់ និងរងរបួសក្នុងព្រឹត្តិការណ៍បោកគ្រាប់បែកលើហ្វូងបាតុករ កាលពីជាង២០ឆ្នាំមុនថា ពួកគេមានវីរភាព ដែលបានពលីកម្មក្នុងការតស៊ូ ដើម្បីបុព្វហេតុលទ្ធិប្រជាធិបតេយ្យ សិទ្ធិសេរីភាព និងយុត្តិធម៌នៅកម្ពុជា។ សេចក្ដីថ្លែងការណ៍របស់គណបក្សនេះឱ្យដឹងថា ថ្ងៃទី៣០ ខែមីនា គឺជាខួបគម្រប់ ២២ឆ្នាំ នៃសោកនាដកម្មនៅមុខរដ្ឋសភាចាស់ ដែលមានការវាយប្រហារដោយគ្រាប់បែកដៃចំនួន ៤គ្រាប់ ទៅលើបាតុករអហិង្សាបណ្ដាលឱ្យមនុស្ស ១៦នាក់ស្លាប់ និងជាង ២០០នាក់របួស។
គណបក្សបក្សនេះលើកឡើងថា រហូតមកដល់ពេលនេះរបប លោក ហ៊ុន សែន មិនបានស្វែងរកជនដៃដល់ និងអ្នកបញ្ជាពីក្រោយ ដើម្បីយកមកផ្ដន្ទាទោសទេ។ លើសពីនេះគណបក្សនេះបញ្ជាក់ជាថ្មីថា តាមរបាយការណ៍របស់ទីភ្នាក់ងារស៊ើបអង្កេតសហរដ្ឋអាមេរិក(FBI ) បានបង្ហាញថា លោក ហ៊ីង ប៊ុនហៀង និងលោក ហ៊ុយ ពិសិដ្ឋ ដែលជាប្រធាន និងអនុប្រធានកងអង្គរក្សផ្ទាល់លោក ហ៊ុន សែន ជាអ្នករៀបចំ និងបញ្ជាផ្ទាល់លើការវាយប្រហារដ៏អមនុស្សធម៌នោះ។
បើទោះជាយ៉ាងណាអ្នកនាំពាក្យក្រសួងយុត្តិធម៌ លោក ជិន ម៉ាលីន បញ្ជាក់ប្រាប់អាស៊ីសេរីកាលពីថ្ងៃទី២៨ មីនា ថា សំណុំរឿងបោកគ្រាប់បែកនេះ តុលាការមិនទាន់បិទការស៊ើបអង្កេតនៅឡើយ។ លោកបញ្ជាក់ពីមូលហេតុ ដែលការស៊ើបអង្កេតអូសបន្លាយពេលយូរនេះ គឺមកពីសំណុំរឿងនេះ មានលក្ខណៈស្មុគស្មាញ។ ទន្ទឹមគ្នានេះ លោក ជិន ម៉ាលីន ក៏ជំរុញឱ្យអ្នកជាប់ពាក់ព័ន្ធទាំងអស់ថា ប្រសិនបើជាមានភស្តុតាងអំពីការបោកគ្រាប់បែកដៃនោះ គួរសហការជាមួយសមត្ថកិច្ច និងតុលាការ។
ក្រៅពីថ្លែងសារគោរពវិញ្ញាណក្ខន្ធបាតុករក្នុងថ្ងៃខួប២២ឆ្នាំនេះ គណបក្សសង្គ្រោះជាតិអះអាងថាគណបក្សនេះប្តេជ្ញាចិត្តស្វែងរកយុត្តិធម៌ជូនជនរងគ្រោះឱ្យខាងតែបាន៕