សកម្មជនបក្សប្រឆាំងភៀសខ្លួននៅថៃ ស្វាគមន៍ឱ្យលោក ហ៊ុន សែន ដែលទៅចាប់ពួកគាត់នៅបាងកក
2019.10.10
សកម្មជនបក្សប្រឆាំងមួយចំនួន ដែលភៀសខ្លួននៅប្រទេសថៃ អះអាងថា ពួកគេមិនខ្លាចមេដឹកនាំរបបក្រុងភ្នំពេញលោក ហ៊ុន សែន គំរាមចាប់ខ្លួននោះទេ។ ពួកគាត់បញ្ជាក់ថា មូលហេតុដែលភៀសខ្លួន ដោយសារមិនចង់ឱ្យបាត់បង់ធនធានមនុស្ស ដើម្បីដឹកនាំប្រជាពលរដ្ឋទៅចូលរួមអមដំណើរប្រធានស្ដីទីគណបក្សសង្គ្រោះជាតិ លោក សម រង្ស៊ី វិលចូលស្រុកវិញនៅពេលខាងមុខ។
សកម្មជនគណបក្សសង្គ្រោះជាតិ ដែលភៀសខ្លួនទៅប្រទេសថៃ ថ្លែងថា មេដឹកនាំរបបក្រុងភ្នំពេញប្រហែលជាភ័យខ្លាចកម្លាំងមហាជនតវ៉ាទាមទារយកអំណាចពីរបបដឹកនាំសព្វថ្ងៃហើយ បានជាលោក ហ៊ុន សែន គំរាមចាប់សកម្មជនបក្សពួកលោកម្ដងហើយម្ដងទៀតនេះ។
សមាជិកប្រតិបត្តិគណបក្សសង្គ្រោះជាតិរាជធានីភ្នំពេញលោក ស៊ន សុវណ្ណថេត ឱ្យដឹងនៅថ្ងៃទី១០តុលាថា សកម្មជនដែលភៀសខ្លួននៅប្រទេសថៃនៅពេលនេះសុខចិត្តជាប់គុក ដោយមិនទៅចុះញ៉មតាមការគំរាមកំហែងរបស់លោកហ៊ុន សែន នោះឡើយ។ លោកបញ្ជាក់ថា បើទោះបីជាមួយ រយៈនេះ អាជ្ញាធររបបក្រុងភ្នំពេញចាប់ខ្លួនសកម្មជនបក្សប្រឆាំងជាបន្តបន្ទាប់ក្ដី ក៏ពួកគេមិនបោះបង់គម្រោងទៅអមដំណើរប្រធានស្ដីគណបក្សសង្គ្រោះជាតិ លោក សម រង្ស៊ី វិលចូលស្រុកវិញដែរ ពីព្រោះលោកមានជំនឿថា ការធ្វើមាតុភូមិនិវត្តនេះ គឺជាក្ដីសង្ឃឹមចុងក្រោយរបស់ប្រជាពលរដ្ឋ ដែលអាចស្ដារវិបត្តិនយោបាយនៅកម្ពុជាបាននៅពេលខាងមុខ៖ «នៅសល់តែ ៣០ថ្ងៃទៀត យើងវិលទៅស្រុកវិញ បើទោះបីរបបលោក ហ៊ុន សែន ខំប្រឹងបង្កើត ឥទ្ធិពលពង្រីកកម្លាំងរបស់ខ្លួនយ៉ាងណា ក៏មិនអាចទប់ទល់នឹងកម្លាំងមហាជនបានដែរហើយ រឿងចុងក្រោយដែលពលរដ្ឋត្រូវតែងើបឈរដោយសារចុងក្រោយនេះលោក ហ៊ុន សែន កាត់ទឹកដីឱ្យទៅវៀតណាមដោយខុសច្បាប់ ព្រោះរបបដឹកនាំសព្វថ្ងៃនេះជារបបខុសច្បាប់មិនមែនជារបបត្រូវច្បាប់ទេ។ អីចឹងហេតុអីបានលោកហ៊ុន សែនទៅចុះហត្ថលេខាកាត់ដីឱ្យបរទេសបែបនេះ»។
រីឯសមាជិកប្រតិបត្តិគណបក្សសង្គ្រោះជាតិខេត្តកំពង់ចាមឯណោះវិញ លោក គង់ ស៊ីវង្ស ថ្លែងថា ប្រសិនបើលោក ហ៊ុន សែន ចង់ចាប់អ្នកភៀសខ្លួននៅបាងកក គឺពួកគាត់ស្វាគមន៍គ្រប់ពេល ពីព្រោះមកដល់ដំណាក់កាលនេះហើយ បើទោះបីជារត់ក៏គ្មានប្រយោជន៍ដែរ។ លោកបញ្ជាក់ថា សកម្មជនបក្សប្រឆាំងនៅប្រទេសថៃរឹងមាំជានិច្ច ដោយមិនត្រឡប់ថយក្រោយឡើយ។ ផ្ទុយទៅវិញពួកគេបានត្រៀមកម្លាំងរួចហើយ ដើម្បីរួមកម្លាំងជាមួយអ្នកប្រជាធិបតេយ្យដទៃទៀត ត្រឡប់ទៅមាតុភូមិវិញ ស្ដារប្រជាធិបតេយ្យនៅពេលខាងមុខ៖ «ខ្ញុំសួរថាពលរដ្ឋសព្វថ្ងៃបានសេចក្ដីអត់ទេ? ហើយទឹកដីបានគង់វង្សទេសព្វថ្ងៃនេះ? រួចបើយើងទៅចុះចូលជាមួយលោក ហ៊ុន សែន បានន័យថាយើងចូលរួមបំផ្លាញជាតិ ចូលរួមធ្វើឱ្យពលរដ្ឋទឹកដែរ។ អីចឹងក្នុងនាមយើងជាពលរដ្ឋដែលស្រលាញ់ជាតិ តើយើងអាចយកខ្លួនយើងទៅឱ្យហ៊ុន សែន ប្រើគ្រប់បែបយ៉ាងដើម្បីមហិច្ឆតាលោភលន់របស់គាត់ដើម្បីបំពេញត្រូវការរបស់បរទេសបានទេ?»។
ប្រតិកម្មរបស់សកម្មជនបក្សប្រឆាំងនេះ គឺដោយសារពួកគេមិនពេញចិត្តនឹងលោក ហ៊ុន សែន ដែលបានគំរាមចាប់ដាក់គុកជាបន្តបន្ទាប់។
នៅពេលជួបសំណេះសំណាលជាមួយសិស្សប្រឡងជាប់បាក់ឌុប និទ្ទេសអេ (A) នៅវិមានសន្តិភាព រាជធានីភ្នំពេញ កាលពីព្រឹកថ្ងៃទី៧ តុលា លោកហ៊ុន សែន មានប្រសាសន៍ថា សកម្មជនបក្សប្រឆាំងទាំងឡាយ ដែលធ្វើសកម្មភាពចូលរួមយុទ្ធនាការអមដំណើរលោក សម រង្ស៊ី វិលចូលស្រុក គឺជាជនក្បត់ជាតិ ហើយសមត្ថកិច្ចរបស់លោក ក៏នឹងតាមចាប់ពួកគេដាក់គុកទាំងអស់ ដោយមិនឱ្យរួចខ្លួននរណាម្នាក់ឡើយ៖ «អារត់ពីកំពង់ចាមថ្ងៃទីមុន ក៏ទៅចាប់នៅប៉ោយប៉ែតដែរ។ កុំភ្លេចថា សំណាញ់របស់គេញឹកណាស់ ហើយអាអ្នកនៅបាងកកមិនប្រាកដថាអ្នកឯងមានសុវត្ថិភាពទេ អញតាមយកបីហ្នុងមកទៀត អញនិយាយត្រង់អីចឹងហ្មង។ ទោះអ្នកឯងនៅបាងកក ក៏ប៉ុន្តែកុំភ្លេចថា កម្ពុជានឹងថៃសហប្រតិបត្តិការជាមួយគ្នា»។
មន្ត្រីអង្គការស៊ីវិលបានលើកឡើងថា អាជ្ញាធរតាមធ្វើទុក្ខបុកម្នេញមកលើសកម្មជនបក្សប្រឆាំងជាបន្តបន្ទាប់នេះ ជារឿងនយោបាយ ដោយសារពួកគេគាំទ្រដំណើរវិលចូលស្រុកវិញរបស់លោក សម រង្ស៊ី។
ទោះជាយ៉ាងណាក្ដី នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត មានប្រសាសន៍ថា ការគំរាម និងចាប់ចងសកម្មជនបក្សប្រឆាំងជាហូរហែមកនេះ មិនមែនជាដំណោះស្រាយនយោបាយនោះទេ។ ផ្ទុយទៅវិញ វាកាន់តែធ្វើឱ្យមានស្ថានការណ៍អាក្រក់ដល់កម្ពុជា។ មន្ត្រីសង្គមស៊ីវិលរូបនេះ គូសបញ្ជាក់ថា សព្វថ្ងៃគណបក្សប្រឆាំងមានពលរដ្ឋគាំទ្រច្រើនមិនទាន់ថយចុះនៅឡើយទេ ហើយពួកគេអាចនឹងងើបតវ៉ាប្រឆាំងនឹងរដ្ឋាភិបាលនៅពេលខាងមុខ៖ «គឺយើងបានការបារម្ភ ហើយមួយទៀតការធ្វើនេះ គឺបង្ហាញថា យើងកំពុងតែរឹតត្បិតសេរីភាពក្នុងការ ដែលមាត្រទី៣៥ នៃរដ្ឋធម្មនុញ្ញថា ប្រជាពលរដ្ឋមានសិទ្ធិយ៉ាងសកម្មក្នុងការចូលរួមជីវភាពនយោបាយសេដ្ឋកិច្ច សង្គម និងវប្បធម៌ ហើយរដ្ឋធម្មនុញ្ញបានទទួលស្គាល់បទដ្ឋានទាំងឡាយនៃអន្តរជាតិ ដែលជាសិទ្ធិមនុស្ស ជាពិសេសគឺ សិទ្ធិនិងសិទ្ធិនយោបាយ។ អ៊ីចឹងវាហាក់មានការរឹតបន្តឹង ជាពិសេស ទៅលើអ្នកគាំទ្របក្សប្រឆាំងហ្នឹង»។
មន្ត្រីសង្គមស៊ីវិលរូបនេះ នៅតែទទូចដល់មេដឹកគណបក្សកាន់អំណាច និងគណបក្សប្រឆាំង ឈប់ឌឺដងដាក់គ្នា នាំឱ្យខាតបង់ដល់សេដ្ឋកិច្ចជាតិ ជាពិសេសកម្មកររោងចក្រអត់ការងារធ្វើ ដោយសារសហភាពអឺរ៉ុបផ្ដាច់ការអនុគ្រោះពន្ធEBA ។ លោក អំ សំអាត បញ្ជាក់បន្ថែមថា ដើម្បីកុំឱ្យមានបញ្ហានេះកើតឡើង មានតែមេដឹកនាំគណបក្សទាំង២ ងាកមករកតុចរចាគ្នាបញ្ចប់វិបត្តិនយោបាយនៅកម្ពុជាឱ្យបានឆាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។