អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
2024.12.05
លោកនាយករដ្ឋមន្ត្រី ហ៊ុន ម៉ាណែត ថ្លែងសន្ទរកថា ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ ចំនួន ៨.៣៣៩ អង្គ/នាក់ កាលពីថ្ងៃទី២១ ខែវិច្ឆិកា ឆ្នាំ២០២៤។
រូប៖ ហ្វេសប៊ុកលោក ហ៊ុន ម៉ាណែត
លោកនាយករដ្ឋមន្ត្រី ហ៊ុន ម៉ាណែត បានដឹកនាំប្រទេសជាង ១ឆ្នាំហើយ តែលោកមិនទាន់ឆ្លើយសំណួរអ្នកសារព័ត៌មានបាននៅឡើយទេ។ អ្នកឃ្លាំមើលសង្កេតឃើញថា លោក ហ៊ុន ម៉ាណែត ខ្លាចសំណួរអ្នកកាសែតបែបនេះ ព្រោះលោកមិនបានឡើងកាន់អំណាចតាមការបោះឆ្នោត ហើយនាយករដ្ឋមន្ត្រីលើកបន្តុបរូបនេះ មិនមែនជាអ្នកដឹកនាំប្រទេសពិតប្រាកដឡើយ ដោយឪពុករបស់លោក គឺលោក ហ៊ុន សែន ជាបញ្ជានៅពីក្រោយ។
បើទោះជាលោកនាយករដ្ឋមន្ត្រី ហ៊ុន ម៉ាណែត ហ៊ាននិយាយ រាប់ម៉ោងនៅលើវេទិកានៅក្នុងពិធីនានា ក្ដី ក៏នាយករដ្ឋមន្ត្រី ដែលកើតចេញពីការលើកបន្តុបដោយឪពុករូបនេះ មិនទាន់មានភាពក្លាហានគ្រប់គ្រាន់ ក្នុងការធ្វើសន្និសីទកាសែតបើកឱ្យកាសែត អាចសួរសំណួរលោកបាននៅឡើយទេ។
អ្នកឃ្លាំមើល ជំរុញទៅលោកនាយករដ្ឋមន្ត្រី ហ៊ុន ម៉ាណែត ឱ្យហ៊ានចេញមុខលើកឡើងអំពីសមិទ្ធផល ជំហរ និងដំណោះស្រាយ របស់រដ្ឋាភិបាលត្រកូល ហ៊ុន ជំនាន់ទី២ ចំពោះបញ្ហាជាតិ វិបត្តិសង្គម នយោបាយការបរទេស ជាដើម។
នាយកប្រតិបត្តិ នៃសម្ព័ន្ធអ្នកសារព័ត៌មានកម្ពុជា ខេមបូចា (CamboJA) លោក ណុប វី លើកឡើងថា ការផ្ដល់ព័ត៌មានពីរបស់ថ្នាក់ដឹកនាំរដ្ឋាភិបាលទៅកាន់ពលរដ្ឋ មានសារសំខាន់នៅក្នុងសង្គមប្រជាធិបតេយ្យ។ អ្នកធ្វើការវិស័យព័ត៌មានរូបនេះ ចង់ឃើញប្រមុខរដ្ឋាភិបាល ក្រុមអ្នកនាំពាក្យរដ្ឋាភិបាល និងមន្ត្រីពាក់ព័ន្ធធ្វើការជាមួយអ្នកសារព័ត៌មានឱ្យទូលំទូលាយជាងសព្វថ្ងៃ។
ចំណែក អ្នកអត្ថាធិប្បាយនយោបាយ លោក គឹម សុខ លើកឡើងថា ការដឹកនាំប្រទេសជាង ១ឆ្នាំរបស់លោក ហ៊ុន ម៉ាណែត នេះ វិបត្តិនយោបាយ សេដ្ឋកិច្ច នយោបាយការបរទេស និងការចាប់ជំរិតមនុស្សតាមអ៊ីនធើរ៍ណិតជាដើម បន្តកើតឡើងកាន់តែធ្ងន់ធ្ងរៗ ទៅ។ លោកបន្តថា ទំនងបញ្ហានេះហើយ ទើបធ្វើឱ្យលោក ហ៊ុន ម៉ាណែត ខ្លាចសំណួររបស់អ្នកសារព័ត៌មានឯករាជ្យ។ លោកលើកឡើងទៀតថា ចំណុចសំខាន់មួយទៀត អាចមកពីលោក ហ៊ុន ម៉ាណែត មិនមែនជាអ្នកកាន់អំណាចពិតប្រាកដ ដ្បិតលោក ហ៊ុន សែន ឯណោះ ជាអ្នកដឹកនាំប្រទេសដូច្នេះ លោក ហ៊ុន ម៉ាណែត ក៏មិនដឹងត្រូវ និយាយប្រាប់អ្នកកាសែតបែបណាអំពីសមិទ្ធផលរបស់ខ្លួនឡើយ។
បើទោះជាលោក ហ៊ុន ម៉ាណែត កំពុងបំពេញតួនាទីជានាយករដ្ឋមន្ត្រីក្ដី ប៉ុន្តែ កិច្ចការជាតិធំៗ មួយចំនួន ត្រូវបានឪពុករបស់លោក ដែលជាអតីតនាយករដ្ឋមន្ត្រីចេញមុខចាត់ចែងជំនួស។
ជុំវិញរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី កត់សម្គាល់ថា លោក ហ៊ុន ម៉ាណែត ហាក់មិនទាន់មានទំនុកចិត្តក្នុងគ្រប់គ្រងរដ្ឋាភិបាល របស់ខ្លួន។ លោកបន្តថា លោក ហ៊ុន ម៉ាណែត មិនទាន់អាចហ៊ានប្រឈមមុខជាមួយអ្នកកាសែត ឬអ្នកមានមតិផ្ទុយពីលោក ព្រោះនាយករដ្ឋមន្ត្រីរូបនេះ ឡើងតំណែងមិនមែនតាមសមត្ថភាព ប៉ុន្តែ ឡើងកាន់តំណែងតាមការរៀបចំរបស់ឪពុក គឺលោក ហ៊ុន សែន។ ទោះយ៉ាងណាក្ដី អ្នកឃ្លាំមើលរូបនេះយល់ថា សេរីភាពសារព័ត៌មាននៅកម្ពុជា នៅពេលនេះ បើទោះជាលោក ហ៊ុន ម៉ាណែត បើកឱ្យមានវេទិកាជាមួយសារព័ត៌មាន ក៏ពិបាករកសារព័ត៌មានឯករាជ្យ ដែលហ៊ានសួរដេញដោលលោក ហ៊ុន ម៉ាណែត ឱ្យបានស៊ីជម្រៅឡើយ។
មេដឹកនាំប្រទេសលោកសេរីស្ទើរទាំងអស់ តែងតែធ្វើសន្និសីទសារព័ត៌មាន និងបើកឱ្យក្រុមអ្នកសារព័ត៌មានអាចសួរដេញដោលពីការដឹកនាំប្រទេសរបស់ខ្លួន។ ប៉ុន្តែ លោក ហ៊ុន ម៉ាណែត ដែលទទួលបានចំណេះដឹងពីប្រទេសសេរី ហាក់ដឹកនាំប្រទេសតាមលំនាំមេដឹកនាំប្រទេសកុម្មុយនិស្ត ដោយមិនអនុញ្ញាតឱ្យអ្នកសារព័ត៌មានសួរដេញដោលលោកបានឡើយ។
ទាក់ទងរឿងនេះ វិទ្យុអាស៊ីសេរីមិនអាចសុំការបកស្រាយពីអ្នកនាំពាក្យនាយករដ្ឋមន្ត្រី លោក មាស សុភ័ណ្ឌ និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេ នៅថ្ងៃទី៤ ខែធ្នូ។ រីឯ អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា លោក ហ៊ុន ម៉ាណែត តែងតែនិយាយឆ្លើយឆ្លងជាមួយភាគពាក់ព័ន្ធ និងសហគមន៍អន្តរជាតិ។ អ្វីលើសពីនេះ លោក សុខ ឥសាន សុំមិនឆ្លើយតបឡើយ។
អតីតនាយករដ្ឋមន្ត្រី លោក ហ៊ុន សែន ជាញឹកញាប់តែងតែធ្វើសន្និសីទកាសែត ផ្ដល់ឱកាសឱ្យអ្នកសារព័ត៌មានអាចសួរសំណួរលោកខ្លះដែរ លោក ហ៊ុន សែន ក៏បានបង្កើតអង្គភាពប្រតិកម្មរបស់រដ្ឋាភិបាល ដើម្បីប្រតិកម្មទៅនឹងមតិ ដែលប្រឆាំងរដ្ឋាភិបាល និងដើម្បីបង្ហាញជំហររបស់ខ្លួន។ ចំណែករដ្ឋាភិបាលលោក ហ៊ុន ម៉ាណែត បានតែងតាំងមនុស្សមួយចំនួន ឱ្យនិយាយជាមួយអ្នកកាសែតសម្រាប់បង្ហាញអំពីលទ្ធផលការងាររបស់រដ្ឋាភិបាល ប៉ុន្តែ មន្ត្រីទាំងនោះគ្មានភាពក្លាហាននិយាយជាមួយសារព័ត៌មានឯករាជ្យ និងជាមួយវិទ្យុអាស៊ីសេរីឡើយ។ ចំណែកលោកនាយករដ្ឋមន្ត្រី ហ៊ុន ម៉ាណែត កាលពីគម្រប់ខួបមួយឆ្នាំ នៃការកាន់អំណាចរបស់លោក លោកត្រឹមធ្វើសេចក្ដីថ្លែងការណ៍ដោយអានសន្ទរកថា ដែលមានការរៀបចំទុកមុនប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
អត្ថបទពេញនិយម
នយោបាយ
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- តុលាការថៃចេញដីកាចាប់ខ្លួនជនសង្ស័យជនជាតិខ្មែរគឺលោក លី រតនរស្មី ករណីឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
- តុលាការបារាំង បានសាកសួរភរិយាលោក លិម គិមយ៉ា អំពីករណីឃាតកម្មលើលោក លិម គិមយ៉ា
- អាជ្ញាធរត្រៀមបញ្ជូនអតីតឧកញ៉ា ហេង សិទ្ធី មកកម្ពុជា ក្រោយចាប់ខ្លួនបាននៅរុស្ស៊ី