សាច់​ញាតិ​សង្ឃឹម​ថា ​ក្រសួង​យុត្តិធម៌​​នឹង​​ដោះ​លែង​អ្នក​ជាប់​ចោទ​នយោបាយ​​ ខណៈសម្រេច​បន្ធូរ​បន្ថយ និង​លើកលែង​ទោស​​ទណ្ឌិត ៥១២​នាក់ពេល​​បុណ្យ​អុំទូក

ដោយ ស្ងួន អមរា
2019-10-23
អ៊ីម៉ែល
មតិ
Share
បោះពុម្ព
លោក ឈុន ថៃ ជំទប់​ទី​១ ជាប់​ឆ្នោត​នៅ​ឃុំ​ព្រែក​ស្ដី ស្រុក​ស្អាង ខេត្ត​កណ្ដាល
លោក ឈុន ថៃ ជំទប់​ទី​១ ជាប់​ឆ្នោត​នៅ​ឃុំ​ព្រែក​ស្ដី ស្រុក​ស្អាង ខេត្ត​កណ្ដាល
រូប៖ ហ្វេសប៊ុក ឈុន ថៃយុទ្ធ

សាច់​ញាតិ​​របស់​ជន​រងគ្រោះ​ពី​​យុទ្ធនាការ​បង្ក្រាប​លើ​គណ​បក្ស​ប្រឆាំង​​សង្ឃឹម​ថា នឹង​មាន​ការ​ដោះលែង​អ្នក​ជាប់​ចោទ​​នយោបាយ​ទាំង​អស់​​ ក្រោយ​​ពេល​​ពួកគេ​ទទួល​ដំណឹង​ថា ក្រសួង​យុត្តិធម៌​សម្រេច​បន្ធូរ​បន្ថយ​ និង​លើក​លែង​ទោស​ឲ្យ​ទណ្ឌិត ចំនួន​៥១២​នាក់ នៅ​ទូទាំង​ប្រទេស ក្នុង​ឱកាស​​ព្រះរាជ​ពិធី​បុណ្យ​អុំ​ទូក។

ក្រុម​គ្រួសារ​របស់​​មន្ត្រី និង​សកម្មជន​បក្ស​ប្រឆាំង ចង់​ឲ្យ​​របប​ក្រុង​ភ្នំពេញ អន្តរាគមន៍​ដោះលែង​អ្នក​​ទោស​​នយោបាយ ក្នុង​​ឱកាស​​បុណ្យ​​អុំទូក​ខាង​មុខ។ កូន​ប្រុស​របស់​ជំទប់​ទី​១ ជាប់​ឆ្នោត នៅ​ឃុំ​ព្រែក​ស្ដី ស្រុក​ស្អាង ខេត្ត​កណ្ដាល លោក ឈុន ថៃ គឺ​លោក ថៃ សែន​កុសល ប្រាប់​ថា លោក​ចង់​ឲ្យ​រដ្ឋាភិបាល ដោះលែង​​ឪពុក​​របស់​លោក​​ដែរ ព្រោះ​ពេល​នេះ ឪពុក​របស់​លោក​ធ្លាក់​ខ្លួន​ឈឺ​ខ្លាំង​ក្នុង​ពន្ធនាគារ គឺ​ដើរ​លែង​រួច។

លោក​ថា លោក ឈុន ថៃ ត្រូវ​បាន​​មន្ត្រី​ពន្ធនាគារ​អៀវ និង​ពេល​ខ្លះ ត្រូវ​​សែង​​មក​ជួប​លោក នៅ​កន្លែង​ជួប​សាច់​ញាតិ​ក្នុង​ពន្ធនាគារ ខណៈ​ខាង​​​ពន្ធនាគារ​អនុញ្ញាត​ឲ្យ​លោក​ជួប​ឪពុក​បាន​២​ដង ក្នុង​មួយ​សប្ដាហ៍។ លោក​អង្វរ​ឲ្យ​ រដ្ឋាភិបាល​ដោះលែង​​​ឪពុក ទាំង​មុន ឬ​កំឡុង​ពេល​បុណ្យ​អុំទូក​ ដើម្បី​ឲ្យ​បាន​ទៅ​សម្រាក​ព្យាបាល​នៅ​មន្ទីរ​ពេទ្យ​ត្រឹមត្រូវ៖ «ឥឡូវ​ គាត់​ដើរ​លែង​រួច​ហើយ​បង។ គាត់​មក​ជួប​ខ្ញុំ​ ក៏​គេ​អៀវ គេ​សែង​ដែរ​ អ៊ីចឹង​ណា​បង។ គាត់​មាន​ជំងឺ​អា​រលាក​សន្លាក់​ហ្នឹង វា​ធ្ងន់ធ្ងរ​។ គាត់​ហើម​ជើង ហើយ​នឹង​ឆ្អឹង​សន្លាក់​ហ្នឹង ហើយ​នឹង​ឆ្អឹង​ចង្កេះ​គាត់ ដែល​ខុស​ប្រក្រតី។ ឥឡូវ​​ឈឺ​ធ្ងន់ធ្ងរ​ ហើយ​គាត់​ខំ​ប្រឹង​ព្យាយាម​ទប់​ចិត្ត​ ទប់​អារម្មណ៍ ហើយ​ឈឺ​លំបាក​ណាស់ បាន​តែ​ថ្នាំ​លេប»

រដ្ឋ​មន្ត្រី​ក្រសួង​យុត្តិធម៌ ​លោក អង្គ​វង្ស វឌ្ឍនា ​បាន​សម្រេច​ថា នឹង​ស្នើ​សុំ ទៅ​មេដឹកនាំ​របប​ក្រុង​ភ្នំពេញ ឲ្យ​ថ្វាយ​ព្រះ​មហាក្សត្រ​ បន្ធូរ​បន្ថយ​ទោស និង​លើកលែង​ទោស ឲ្យ​ទណ្ឌិត​ចំនួន​ ៥១២​នាក់ ក្នុង​ឱកាស​បុណ្យ​អុំទូក បណ្ដែត​ប្រទីប សំពះ​ព្រះខែ និង​អកអំបុក ​​ឆ្នាំ​២០១៩​នេះ។ ហ្វេសប៊ុក​ (facebook) ​របស់​ក្រសួង​យុត្តិធម៌ សរសេរ​ថា អ្នក​ទោស ដែល​ត្រូវ​​ស្នើសុំ​បន្ធូរ​បន្ថយ​ទោស និង​លើកលែង​ទោស​ មក​ពី​ពន្ធនាគារ​រាជធានី ខេត្ត ចំនួន​២៣ និង​មក​ពី​មណ្ឌល​អប់រំ​កែប្រែ​ចំនួន​៤។ ការ​សម្រេច​នេះ ធ្វើ​ឡើង​ក្រោយ​ពេល លោក អង្គ​វង្ស វឌ្ឍនា បាន​ពិនិត្យ​មើល​បញ្ជី​ឈ្មោះ អ្នក​ទោស​ទាំង​នេះ កាល​ពី​ថ្ងៃ​ទី២១ តុលា។

អាស៊ី​សេរី មិន​អាច​សុំ​ការ​បញ្ជាក់​ពី​ក្រុម​អ្នក​នាំ​ពាក្យ​ក្រសួង​យុត្តិធម៌​បាន​ទេ នៅ​ថ្ងៃ​ទី២២ តុលា ដោយសារ​​ទូរស័ព្ទ​លោក ជិន ម៉ាលីន មិន​អាច​ទាក់​ទង​បាន។ រីឯ​លោក គឹម សន្តិភាព ចុច​បិទ​ ពេល​ទូរស័ព្ទ​ចូល។ ចំណែក​អគ្គ​នាយក​រង ​នៃ​អគ្គនាយកដ្ឋាន​កិច្ច​ការ​អយ្យការ នៃ​ក្រសួង​យុត្តិធម៌ លោក សុច សុផាន់​ណារ៉ា ប្រាប់​ថា កំពុង​រវល់​ប្រជុំ ដោយ​ឲ្យ​ទូរស័ព្ទ​ទៅ​ពេល​ក្រោយ តែ​លោក មិន​ទទួល​​ទូរស័ព្ទ នៅ​ពេល​ទាក់​ទង​ទៅ​ម្ដង​ទៀត។

តែ​យ៉ាង​ណា លោក សុច សុផាន់ណារ៉ា ប្រាប់​សារព័ត៌មាន​ក្នុង​ស្រុក (VOD) ថា​ អ្នក​​​ត្រូវ​​បន្ធូរ​បន្ថយ​ទោស និង​លើកលែង​ទោស​ទាំង ​៥១២​នាក់​ គឺ​​ជា​​ទណ្ឌិត​កំពុង​​ជាប់​​គ្រប់​ពន្ធនាគារ​​​ ហើយ​​ក្នុង​ចំណោម​នោះ មាន​ទណ្ឌិត​ជា​ជន​បរទេស គឺ​ជនជាតិ​វៀតណាម ជនជាតិ​ចិន និង​ជនជាតិ​ដទៃ​ទៀត ប្រមាណ​ពី​ ១០​ ទៅ ​១៥​ភាគ​រយ។ លោក​បញ្ជាក់​​ថា ទណ្ឌិត​ដែល​​ត្រូវ​បន្ធូរ​បន្ថយ​ទោស​ និង​លើក​លែង​ទោស ត្រូវ​​តែ​ជា​អ្នក​ទោស​ មាន​ការ​ប្រកាស​សាលក្រម​ស្ថាពរ​រួចរាល់​ ទើប​អាច​ទទួល​បាន​ការ​លើកលែង​ពិសេស ក្នុង​ពិធី​បុណ្យ​អុំ​ទូក​ខាងមុខ។​

បច្ចុប្បន្ន ចំនួន​អ្នក​ទោស​កំពុង​ជាប់​ពន្ធនាគារ​​​ទូទាំង​​ប្រទេស​ មាន​​​ចំនួន​​ប្រមាណ​​​ជាង ​៣​ម៉ឺន (៣៤.០០០) នាក់​ ​ក្នុង​​នោះ​​មាន​​ស្រ្តី​​ជាង​​ ១​ពាន់ (១.០០០) នាក់​។ ចំណែក​​អ្នក​​ជាប់​ពន្ធនាគារ ​ជា​ជន​ជាតិ​បរទេស ​ចំនួន​ជាង ១​ពាន់ (១.០០០) នាក់។

ការ​ស្នើ​សុំ​លើក​លែង​ទោស និង​បន្ធូរ​បន្ថយ​ទោស គឺ​ត្រូវ​អនុវត្ត​តាម​នីតិវិធី​ច្បាប់​ធ្វើ​​ឡើង​តែ​ចំពោះ​ទណ្ឌិត​ទាំង​ឡាយ​ណា​ ដែល​អនុវត្ត​ទោស​បាន​មួយ​ភាគ​បី (/) នៃ​ទោស​ជាប់​ពន្ធនាគារ ទើប​អាច​ស្នើសុំ​បន្ធូរបន្ថយ​ទោស​បាន។ ចំណែក​អ្នក​ទោស ដែល​បាន​អនុវត្ត​ទោស​ជាប់​ពន្ធនាគារ​បាន​ពីរ​ភាគ​បី (/) នៃ​ទោស​ អាច​ស្នើសុំ​លើក​លែង​ទោស​បាន។ ក៏​ប៉ុន្តែ​មិន​មែន​គ្រប់​ទណ្ឌិត ដែល​មាន​លក្ខខណ្ឌ​ទាំង​ពីរ​នេះ​ សុទ្ធតែ​ត្រូវ​ទទួល​ការ​បន្ធូរ​បន្ថយ​ទោស និង​លើក​លែង​ទោស​ទេ គឺ​ទាក់ទង​ទៅ​នឹង​អត្តចរិត​ ចំពោះ​ការ​កែប្រែ​ខ្លួន នៅ​ក្នុង​ពន្ធនាគារ​ដែរ។ ចំណែក​ប្រមុខ​រដ្ឋាភិបាល​ មាន​សិទ្ធិ​ពិសេស អាច​ស្នើ​ថ្វាយ​ព្រះ​មហាក្សត្រ​លើក​លែង​ទោស​ទណ្ឌិត​បាន​គ្រប់​ពេល​វេលា។

នាយក​ប្រតិបត្តិ​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា លោក សន ជ័យ សង្កេត​ឃើញ​ថា ក្រោយ​មាន​ការ​រិះគន់​ខ្លាំងៗ​មក​ ការ​បន្ធូរ​បន្ថយ​ទោស និង​លើក​លែង​ទោស ដល់​ទណ្ឌិត មាន​ការ​វិវត្តន៍​ជា​វិជ្ជមាន​ច្រើន ដែល​ផ្ទុយ​ពី​ពេល​មុន មាន​ភាព​មិន​ប្រក្រតី ឬ អំពើ​ពុក​រលួយ​នៅ​ពេល​ស្នើសុំ​បន្ធូរ​បន្ថយ និង​លើក​លែង​ទោស​ម្ដងៗ។

លោក​ សន ជ័យ យល់​ថា បើ​ទោះ​ច្បាប់​ មិន​បើក​ផ្លូវ​ឲ្យ​អ្នក​ទោស​នយោបាយ ឬ​អ្នក​ទោស​មនសិការ ​​​​ដែល​មិន​​ទាន់​មាន​សាលក្រម អាច​ស្នើ​សុំ​បន្ធូរ​បន្ថយ និង​លើកលែង​ទោស ឬ​លើក​លែង​ការ​ចោទ​ប្រកាន់​បាន​​មែន តែ​បើ​មាន​ឆន្ទៈ​នយោបាយ​ ឬ ចង់​ឲ្យ​ស្ថានភាព​នយោបាយ​ធូរ​ស្រាល រដ្ឋាភិបាល​នៅ​តែ​អាច​ធ្វើ​បាន ​តាម​រយៈ​រូបភាព​ផ្សេងៗ​បាន៖ «អាច​ថា​រូបភាព ដែល​រដ្ឋាភិបាល​ស្នើ​ទៅ​ព្រះ​មហាក្សត្រ ហើយ​និង​មធ្យោបាយ​ផ្សេងៗ​ទៀត ដែល​គេ​អាច​ធ្វើ​ទៅ​បាន នៅ​ក្នុង​ក្រប​ខណ្ឌ​ច្បាប់​។ ទោះ​បី​យើង​មើល​ទៅ​សម្រាប់​អ្នក​ទោស​មនសិការ​ ឬ​ក៏​អ្នក​ទោស​នយោបាយ​ ក៏​នៅ​តែ​មាន​ច្រក​ចេញ​ដែរ បើ​សិន​គេ​ហៅ ថា ជា​ការ​ចង់​បន្ធូរ​បន្ថយ​នូវ​បរិយាកាស​នយោបាយ ជា​ពិសេស​សំណុំ​រឿង​ទាក់ទង​នឹង​អ្នក​នយោបាយ។ អ្នក​ដែល​ត្រូវ​គេ​ឃុំ​ខ្លួន​បណ្ដោះ​អាសន្ន​អ្វី​ជា​ដើម​ហ្នឹង គួរ​តែ​មាន​ច្រក​ចេញ​ដែរ​ មិន​អត់​ទេ ដរាប​ណា​ភាគី​អនុវត្ត​ច្បាប់​ហ្នឹង មាន​ឆន្ទៈ​ពិត​ប្រាកដ»

ច្បាប់​ស្ដីពី​ក្រម​ព្រហ្មទណ្ឌ និង​ច្បាប់​ស្ដីពី​ពន្ធនាគារ​ ចែង​ក្នុង​ន័យ​ថា​​ ការ​បន្ធូរ​បន្ថយ និង​លើក​លែង​ទោស អាច​ធ្វើ​ឡើង​បាន​៣ដង​ក្នុង​មួយ​ឆ្នាំ គឺ​ក្នុង​ពិធី​បុណ្យ​ចូល​ឆ្នាំ​​ប្រពៃណី បុណ្យ​ពិសាខ​បូជា និង​ព្រះ​រាជ​ពិធី​បុណ្យ​អុំទូក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល