HRW ជំរុញ​​អនុរដ្ឋមន្ត្រី​ការបរទេស​​អាមេរិក ឲ្យ​រិះគន់​​មេដឹកនាំ​​របប​ក្រុង​ភ្នំពេញ​​ជា​សាធារណៈ​រឿង​រម្លាយ​ប្រជាធិបតេយ្យនិង​​សិទ្ធិមនុស្ស​

ដោយ អាស៊ីសេរី
2021-05-31
Share
HRW ជំរុញ​​អនុរដ្ឋមន្ត្រី​ការបរទេស​​អាមេរិក ឲ្យ​រិះគន់​​មេដឹកនាំ​​របប​ក្រុង​ភ្នំពេញ​​ជា​សាធារណៈ​រឿង​រម្លាយ​ប្រជាធិបតេយ្យនិង​​សិទ្ធិមនុស្ស​ លោក ហ្វីល រ៉ូបឺតសុន (Phil Robertson) នាយក​​រង​​ទទួល​​​បន្ទុក​​កិច្ច​ការ​​តំបន់​​​អាស៊ី​នៃ​​អង្គការ​​ឃ្លាំមើល​សិទ្ធិ​មនុស្ស​​អន្តរជាតិ​យូមែន រ៉ៃត៍ វ៉ច្ឆ។​
រូប៖ RFA

អង្គការ​ឃ្លាំមើល​​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ជំរុញ​​អនុរដ្ឋមន្ត្រី​ការបរទេស​អាមេរិក​ឲ្យ​រិះគន់​​មេដឹកនាំ​របបក្រុង​ភ្នំពេញ​​ជា​សាធារណៈ រឿង​រម្លាយប្រជាធិបតេយ្យ រំលោភ​សេរីភាព​​សារព័ត៌មាន និង​​សិទ្ធិមនុស្ស។ ការជំរុញ​នេះ ធ្វើឡើង​នៅក្នុង​​សេចក្តីថ្លែងការណ៍​​ផ្សាយ​ថ្ងៃទី៣១ ឧសភា របស់​​អង្គការ​នេះ នៅ​មុន​​មួយថ្ងៃ​​នៃ​ដំណើរ​​ទស្សនកិច្ច​ដោយ​​ផ្ទាល់​​របស់​​មន្ត្រីជាន់ខ្ពស់​​នៃ​​រដ្ឋបាល​​លោក​​ប្រធានាធិបតី​អាមេរិក ចូបៃ ឌិន (Joe Biden) គឺ​​អនុរដ្ឋមន្ត្រី​ការបរទេសអាមេរិក​អ្នកស្រី វិនឌី ហ្សឺម៉ាន (Wendy Sherman) មក​កាន់​កម្ពុជា​​នៅថ្ងៃទី០១ ខែមិថុនានេះ។

នាយក​​រង​​ទទួល​​​បន្ទុក​​កិច្ច​ការ​​​តំបន់​​​អាស៊ី​នៃ​​អង្គការ​​​ឃ្លាំមើល​​សិទ្ធិ​មនុស្ស​​​អន្តរជាតិ​យូមែន រ៉ៃត៍ វ៉ច្ឆ លោក ហ្វីល រ៉ូបឺតសុន (Phil Robertson) ថ្លែងថា អ្នកស្រី ហ្សឺម៉ាន គួរតែ​ជំរុញ​​នូវ​ការទាមទារ​​ឲ្យ​កម្ពុជា​​បញ្ឈប់​​រាល់​ដំណើរការ​​កាត់ក្តី​បែប​ឆាកល្ខោន​​ប្រឆាំង​​នឹង​​មន្ត្រី​គណបក្ស​​សង្គ្រោះជាតិ ឲ្យ​ដោះលែង​​អ្ន​ក​ទោស​​នយោបាយ​​កំពុងជាប់​ឃុំ​​រាប់សិប​នាក់ និង​​ឲ្យ​ទម្លាក់ចោល​​បទចោទ​​គួរឲ្យ​អស់​សំណើច​​ប្រឆាំង​នឹង​​មេបក្ស​សង្គ្រោះ​ជាតិ​លោក កឹម សុខា។

ទន្ទឹម​នឹងនេះ លោកថា សេរីភាព​នៃ​ការបញ្ចេញ​មតិ​​នៅ​កម្ពុជា​​កំពុងតែ​​ប្រឈម​​នឹង​ការគំរាមកំហែង ជាង​​ពេលណាៗ​​ទាំងអស់ ខណៈ​មាន​​ការ​គ្រប់គ្រង និង​​រឹតត្បិត​សេរីភាព​​ក្នុងការ​​បញ្ចេញ​មតិ​​នៅ​លើ​​ប្រព័ន្ធ​អ៊ិនធឺណិត។ មន្ត្រី​សិទ្ធិ​មនុស្ស​​អន្តរជាតិ​​ដដែល ស្នើឲ្យ​​អនុរដ្ឋមន្ត្រី​​ការបរទេស​អាមេរិក ទាមទារ​​ឲ្យ​រដ្ឋាភិបាល​​បញ្ឈប់​​ការ​រឹត​ត្បិ​ត​​ទាំង​នេះ និង​ការផ្តន្ទាទោស​​មក​លើ​​ក្រុម​អ្នក​រិះគន់។ លោក​ស្នើថា​ អ្នកស្រី ហ្សឺម៉ាន គួរ​អំពាវនាវ​​ជា​សាធារណៈ​ឲ្យ​​រដ្ឋាភិបាល​ស្តារ​ឡើងវិញ​​នូវ​ការគោរព​សិទ្ធិ​​មនុស្ស​​ជា​មូលដ្ឋាន ជា​ពិសេស​ សិទ្ធិពលរដ្ឋ និង​សិទ្ធិនយោបាយ ព្រមទាំង​សិទ្ធិ​តវ៉ា​ដោយ​​សន្តិវិធី ដែល​ត្រូវ​បាន​​រដ្ឋាភិបាល​​បង្ក្រា​ប​​នៅ​​គ្រប់​​ខេត្តក្រុង។

លោក ហ្វីល រ៉ូបឺតសុន ព្រមាន​ថា ប្រឈម​មុខ​​នឹង​​ការ​រំលោភ​បំពាន​​សិទ្ធិមនុស្ស​ជា​​ប្រព័ន្ធ​ដែល​​ប្រព្រឹត្ត​ជារៀងរាល់​​ថ្ងៃ​​នៅ​​ទូទាំង​​ប្រទេស​កម្ពុជា​​ដោយ​​រដ្ឋាភិបាល​​លោក ហ៊ុន សែន បើ​​សហរដ្ឋអាមេរិក​​ប្រើប្រាស់​​វិធីសាស្ត្រ​​បែប​ទន់ភ្លន់​​មក​លើ​​រដ្ឋាភិបាល​​កម្ពុជា វិធីសាស្ត្រ​​បែបនេះ​នឹង​មិន​​ទទួល​បាន​​ផល​អ្វីឡើយ ហើយ​​ក៏គឺ​ជា​​ការ​ប្រាសចាក​​ផ្នែក​​សីលធម៌​​ផងដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល