លោក ហ៊ុន ម៉ាណែត អួត​ប្រាប់​ពលករ​ខ្មែរ​នៅ​កូរ៉េ​ថា លោក​ទាក់​ម៉ូយ​អ្នក​រកស៊ី​បាន​ច្រើន

ដោយ យ៉ង ចាន់តារា
2024.05.18
លោក ហ៊ុន ម៉ាណែត អួត​ប្រាប់​ពលករ​ខ្មែរ​នៅ​កូរ៉េ​ថា លោក​ទាក់​ម៉ូយ​អ្នក​រកស៊ី​បាន​ច្រើន លោកនាយករដ្ឋមន្ត្រី ហ៊ុន ម៉ាណែត (ឆ្វេង) និងភរិយា​ អ្នកស្រី ពេជ ចន្ទមុនី ក្នុងពិធីសំណេះសំណាលជាមួយពលរដ្ឋខ្មែរនៅ​ប្រទេស​កូរ៉េខាងត្បូង នៅថ្ងៃទី១៨ ឧសភា ២០២៤។
រូប៖ ហ្វេសប៊ុកលោក ហ៊ុន ម៉ាណែត

លោក ហ៊ុន ម៉ាណែត បាន​ជួប​ពលករ​ខ្មែរ​នៅ​ប្រទេស​កូរ៉េខាងត្បូង ដោយ​លោក​លើក​សរសើរ​រដ្ឋាភិបាល​របស់​លោក​ថា តែងតែ​គិតគូរ​ដល់​ពលករ ដែល​ធ្វើការ​នៅ​ក្រៅ​ប្រទេស។ អ្នកឃ្លាំមើល លើកឡើង​ថា ការ​ថ្លែង​របស់​លោក ហ៊ុន ម៉ាណែត គឺ​ជា​ការ​ធ្វើ​នយោបាយ​ប្រជាភិថុតិ ដើម្បី​ប្រយោជន៍​បក្ស ជាជាង​ប្រយោជន៍​សង្គមជាតិ។

មិន​ខុសពី​ប្រពៃណី​ការទូត​របស់ លោក ហ៊ុន សែន ជា​ឪពុក​ឡើយ ដំណើរ​ទស្សនកិច្ច​ទៅ​ប្រទេស​កូរ៉េខាងត្បូង របស់​លោក ហ៊ុន ម៉ាណែត លើក​នេះ ក្រៅ​តែ​ពី​ថតរូប​ជាមួយ​ថ្នាក់ដឹកនាំ​រដ្ឋ និង​តំណាង​ក្រុមហ៊ុន​បរទេស ដើម្បី​យក​ទៅ​ឡង់សេ​ប្រាប់​ពលរដ្ឋ អំពី​នយោបាយ​ទាក់​ម៉ូយ​ហើយ​នោះ លោក ហ៊ុន ម៉ាណែត មិន​ភ្លេច​នោះ​ទេ ក្នុង​ការ​សណ្ដោង​ក្រុម​មន្ត្រី និង​គណៈប្រតិភូ​ទាំង​ហ្វូង​ទៅ​ជួប​ក្រុម​ពលករ។

នៅ​ក្នុង​ឱកាស​ជួប​សំណេះសំណាល​ជាមួយ​ប្រជាពលរដ្ឋ​ខ្មែរ​រស់នៅ​សាធារណរដ្ឋ​កូរ៉េ នៅ​ថ្ងៃទី​១៨ ខែ​ឧសភា លោកនាយក​រដ្ឋមន្ត្រី ហ៊ុន ម៉ាណែត លើកឡើង​ថា ការ​ធ្វើ​ចំណាកស្រុក​របស់​ពលករ​ខ្មែរ​នៅ​ក្រៅ​ប្រទេស គឺ​មិនមែន​ទៅ​ធ្វើ​កញ្ជះ​គេ​នោះ​ទេ ដោយ​លោក ហ៊ុន ម៉ាណែត អះអាង​ថា ដើម្បី​ជួយ​លើកកម្ពស់​ជីវភាព​រស់​នៅ​របស់​ពលរដ្ឋ។ លោក ហ៊ុន ម៉ាណែត បន្ត​ថា អំឡុង​ពេល​ទស្សនកិច្ច​ផ្លូវការ​ក្នុង​ប្រទេស​កូរ៉េ លោក​បាន​ទាក់​ម៉ូយ​បានជា​ច្រើន ជួយ​ឱ្យ​ប្រជាពលរដ្ឋ​មាន​ការងារ​ធ្វើ និង​មាន ប្រាក់ចំណូល​កាន់តែ​ច្រើន។ «»

ក្នុង​ជំនួប​ជាមួយ​ពលករ​នោះ លោក ហ៊ុន ម៉ាណែត បាន​លើកឡើង ពី​បញ្ហា​វិបត្តិ​អចលនទ្រព្យ ដោយ​លោក​អះអាង​ថា ផ្តើម​ចេញ​ពី​បញ្ហា​ពីរ គឺ​ការ​វាយតម្លៃ​ខុស​រវាង​អតិថិជន និង​ការវាយតម្លៃ​ខុស​នៃ​ការ​វិនិយោគ ហើយ​លោក​បាន​អំពាវនាវ​ដល់​អ្នកទិញ​ផ្ទះ​តាម​គម្រោង ដែល​មាន​ឆន្ទៈ​ច្បាស់លាស់ បើ​មាន​លទ្ធភាព ឱ្យ​បន្ត​បង់​ជូន​ក្រុមហ៊ុន ដើម្បី​មាន​លទ្ធភាព​សង់ផ្ទះ​បន្ត។

យ៉ាងណា​ក៏​ដោយ​ចុះ ការ​ជំរុញ​របស់​លោក ហ៊ុន ម៉ាណែត ឱ្យ​អ្នកទិញ​ផ្ទះ បន្ត​បង់​ជូន​ក្រុមហ៊ុន ហាក់​ឆ្លុះបញ្ចាំង​ឱ្យ​ឃើញ​ពី​ចេតនា​របស់​លោក ហ៊ុន ម៉ាណែត ដើម្បី​ការពារ​ឱ្យ​ក្រុម​ឧកញ៉ា ដែល​រកស៊ី​លក់​ដី និង​ផ្ទះ​ខ្យល់​ឱ្យ​ពលរដ្ឋ គឺ​ឧកញ៉ា ឡេង ណាវ៉ាត្រា និង​ម្ចាស់​បុរី​ពិភព​ថ្មី ដែល​គេ​ស្គាល់​ថា គឺ​ឧកញ៉ា ហុង ពីវ ជាដើម។

កម្ពុជា​ទទួល​ប្រាក់កម្ចី ៣​ពាន់​លាន​ដុល្លារ អំឡុង​ពេល​លោក ហ៊ុន ម៉ាណែត ទៅ​ប្រទេស​កូរ៉េ សម្រាប់​អភិវឌ្ឍន៍​សេដ្ឋកិច្ច ឆ្នាំ​២០២២ ដល់​២០៣០។ ក្នុង​ដំណើរ​ទស្សនកិច្ច ចាប់ពី​ថ្ងៃទី​១៥ ដល់​១៨ ខែ​ឧសភា លោក​បាន​ជួប​ជាមួយ​នឹង​នាយករដ្ឋមន្ត្រី​កូរ៉េខាងត្បូង (South Korea) លោក យូន ស៊កយ៉ល (Yoon Suk Yeol)។ ក្នុង​ជំនួប​នោះ បាន​ចុះ​ព្រមព្រៀងគ្នា​បង្កើន​ភាពជា​ដៃគូ​យុទ្ធសាស្ត្រ ដើម្បី​ពង្រឹង​លើ​វិស័យ​ផ្សេងៗ រួម​ទាំង​វិស័យ​ការពារ​ជាតិ ពាណិជ្ជកម្ម និង​ហេដ្ឋារចនាសម្ព័ន្ធ​ផ្សេងៗ។អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការស្រាវជ្រាវ បណ្ឌិត សេក សុជាតិ សង្កេត​ឃើញ​ថា នយោបាយ​ទាក់​ម៉ូយ របស់​លោក​នាយករដ្ឋមន្ត្រី ហ៊ុន ម៉ាណែត អំឡុង​ពេល​ទស្សនកិច្ច​នៅ​ប្រទេស​កូរ៉េ គឺ​នេះ​ទំនង​មិន​អាច​ទាក់ទាញ​អ្នក​វិនិយោគ​ល្អៗ​មក​រក​ស៊ី​នៅ​កម្ពុជា​បាន​នោះ​ទេ ព្រោះ​កម្ពុជា មាន​បញ្ហា​អំពើពុករលួយ ដែល​ធ្វើ​ឱ្យ​ក្រុមហ៊ុន​ទាំង​នោះ ព្រួយ​បារម្ភ​ពី​ការ​ខាតបង់ ជាជាង​ផល​ចំណេញ។

ជុំវិញ​រឿង​នេះ​ដែរ ប្រធាន​ក្រុមប្រឹក្សា​ឃ្លាំមើល​កម្ពុជា​នៅ​ប្រទេស​ន័រវែស (Norway) លោក ម៉ែន ណាត ប្រាប់​វិទ្យុ​អាស៊ីសេរី នៅ​ថ្ងៃទី​១៨ ខែ​ឧសភា ថា ការ​ថ្លែង​សុន្ទរកថា​របស់​លោក ហ៊ុន ម៉ាណែត នៅ​ចំពោះមុខ​ពលករ​ខ្មែរ​នៅ​ប្រទេស​កូរ៉េខាងត្បូង​នេះ គឺជា​ការ​ធ្វើ​ប្រជាភិថុតិ ដោយ​ខ្វះ​ការ​ទទួលខុសត្រូវ អំពី​អសមត្ថភាព​របស់​រដ្ឋាភិបាល ដែល​មិនអាច​បង្កើត​ការងារ​សមរម្យ និង​បណ្ដាល​ឱ្យ​ពលរដ្ឋ​ធ្វើ​ចំណាកស្រុក​រាប់​លាន​នាក់​។ លោក ម៉ែន ណាត យល់​ឃើញ​ថា ដំណើរ​ទស្សនកិច្ច​របស់ លោក ហ៊ុន ម៉ាណែត នៅ​កូរ៉េខាងត្បូង លើក​នេះ ហាក់​មិន​បាន​ផលប្រយោជន៍​នោះ​ទេ ព្រោះ​លោក​យល់​ថា ក្រុមហ៊ុន​របស់​កូរ៉េ​សំខាន់ៗ ហាក់​គ្មាន​ទំនុកចិត្ត​ធ្វើការ​វិនិយោគ​ជាមួយ​កម្ពុជា​នោះ​ទេ ដោយ​សារភាព​តានតឹង​ផ្នែក​នយោបាយ បន្ទាប់ពី​រដ្ឋាភិបាល​របស់​លោក ហ៊ុន ម៉ាណែត បន្ត​ធ្វើ​ទុក្ខបុកម្នេញ​លើ​បក្ស​ប្រឆាំង និង​សកម្មជន និង​រៀបចំ​ការបោះឆ្នោត​បង្គ្រប់​កិច្ច។

អ្នកឃ្លាំមើល​លើកឡើង​ថា បើ​ចង់ឱ្យ​នយោបាយ​ទាក់​ម៉ូយ​នៅ​ក្រៅ​ប្រទេស​ទទួល​បាន​ជោគជ័យ លុះត្រាតែ លោក ហ៊ុន ម៉ាណែត ផ្លាស់ប្ដូរ​របៀប​ដឹក​នាំ​ឱ្យ​ខុស​ពី​ឪពុក ដោយ​មិន​ត្រូវ​ដើរ​ធ្វើ​ប្រជាភិថុតិ ដើម្បី​កុហក​ពលរដ្ឋ​ខ្លួន​ឯក​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។