លោក ហ៊ុន ម៉ាណែត ថា ការបង្កើតចលនាថ្មីរបស់លោក សម រង្ស៊ី គ្រាន់តែជាការទាញចំណាប់អារម្មណ៍ពីពលរដ្ឋ
2024.11.11
លោកនាយករដ្ឋមន្ត្រី ហ៊ុន ម៉ាណែត (មុខគេ) និងមន្ត្រីជាន់ខ្ពស់រដ្ឋាភិបាល ក្នុងពិធីសម្ពោធផ្លូវឆ្នេរអង្កោល ខេត្តកែប កាលពីថ្ងៃទី១១ ខែវិច្ឆិកា ឆ្នាំ២០២៤។
រួប៖ ហ្វេសប៊ុកលោក ហ៊ុន ម៉ាណែត
លោកនាយករដ្ឋមន្ត្រី ហ៊ុន ម៉ាណែត លើកឡើងថា ចលនាជាតិតស៊ូដែលលោក សម រង្ស៊ី ទើបប្រកាសបង្កើតឡើងនៅក្រៅប្រទេសថ្មីៗនេះ គឺដើម្បីទាក់ទាញចំណាប់របស់ប្រជាពលរដ្ឋតែប៉ុណ្ណោះ បន្ទាប់ពីអតីតសមាជិក និងអ្នកគាំទ្រលោក សម រង្ស៊ី ងាកមកចុះចូលជាមួយគណបក្សប្រជាជនកម្ពុជាជាបន្តបន្ទាប់។ ការលើកឡើងនេះ ធ្វើឡើងក្រោយពីប្រធានស្ដីទីនៃគណបក្សសង្គ្រោះជាតិលោក សម រង្ស៊ី កាលពីថ្ងៃទី៩ ខែវិច្ឆិកា បានប្រកាសអំពីការបង្កើតចលនាជាតិតស៊ូ និងទិសដៅបង្កើតរដ្ឋាភិបាលបណ្ដោះអាសន្ននៅក្រៅប្រទេស ដើម្បីការពារទឹកដីប្រទេសកម្ពុជា និងទាមទារសេរីភាពនិងយុត្តិធម៌សម្រាប់ប្រជារាស្ត្រខ្មែរ។
លោក ហ៊ុន ម៉ាណែត លើកឡើងនៅថ្ងៃទី១១ ខែវិច្ឆិកា ថា ចលនាជាតិតស៊ូដែលលោក សម រង្ស៊ី និងមន្ត្រីជាន់ខ្ពស់បក្សប្រឆាំង ទើបបង្កើតឡើង គឺមិនមានអ្វីចម្លែកនិងថ្មីនោះទេ។ លោកថា ការបង្កើតចលនាថ្មីនេះ ដើម្បីទាញចំណាប់អារម្មណ៍ប្រជាពលរដ្ឋ ខណៈអតីតមន្ត្រី និងអ្នកគាំទ្រគណបក្សប្រឆាំងមួយចំនួន ដែលតែងតែចេញមុខរិះគន់ និងជេររដ្ឋាភិបាល បាននាំគ្នាមកចុះចូលជាមួយរដ្ឋាភិបាល និងគណបក្សប្រជាជនកម្ពុជា។
លោក ហ៊ុន ម៉ាណែត៖ «ឥឡូវសូម្បីអ្នកគាំទ្រពីគាត់ដើរចោលគាត់ អស់ជំនឿអ៊ីចឹងហើយត្រូវតែបង្កើតស្អីថ្មី ដើម្បីទាក់ទាញ ដើម្បីជាចលនាអាចថា ជាការប្រមូលថវិកា ឬប្រមូលបច្ច័យប្រមូលអីខ្ញុំមិនដឹងទេ។ ប៉ុន្តែបង្កើតព្រឹត្តិការណ៍ ហើយវ៉ាត់ឡើង គឺថាយើងលែងជឿលើការបោះឆ្នោតហើយ ព្រោះបោះមិនដែលឈ្នះ។ អ៊ីចឹងគាត់បោះមិនឈ្នះ គាត់ទៅបង្កើតចលនាតាំងខ្លួនគាត់ជាប្រធាន អ្នកខ្លះតាំងខ្លួនជានាយករដ្ឋមន្ត្រី»។
ជាងនេះទៀត លោក ហ៊ុន ម៉ាណែត អួតថា រដ្ឋាភិបាលរបស់លោកកើតចេញពីការបោះឆ្នោតរបស់ប្រជាពលរដ្ឋ ស្របតាមរដ្ឋធម្មនុញ្ញ តែរដ្ឋាភិបាលបណ្ដោះអាសន្ន ដែលលោក សម រង្ស៊ី គ្រោងនឹងបង្កើតឡើង គឺមានតែអ្នកគាំទ្រតាមបណ្ដាញសង្គមហ្វេសប៊ុកនិងតិកតុក (TikTok) តែប៉ុណ្ណោះ។ លោក ហ៊ុន ម៉ាណែត ចាត់ទុកថា ការបង្កើតចលនាជាតិតស៊ូ និងការកៀរគរប្រជាពលរដ្ឋ ឱ្យឈប់ជឿលើរដ្ឋាភិបាលរបស់លោក ថា ធ្វើឡើងក្នុងគោលដៅចង់បានអំណាច និងផ្ដួលរំលំរដ្ឋាភិបាល។
ជុំវិញរឿងនេះ អតីតតំណាងរាស្ត្រគណបក្សសង្គ្រោះជាតិលោក ម៉ែន សុថាវរិន្ទ្រ យល់ថា ការលើកឡើងរបស់លោក ហ៊ុន ម៉ាណែត ដោយសារតែលោកបារម្ភ ខណៈរដ្ឋាភិបាលត្រកូលហ៊ុន ធ្វើទុក្ខបុកម្នេញលើពលរដ្ឋឥតស្រាកស្រាន្ត តាំងពីការឆបោក ការគំរាមកំហែង និងចាប់ពលរដ្ឋដាក់គុកជាដើម។
លោក ម៉ែន សុថាវរិន្ទ្រ ប្រាប់វិទ្យុអាស៊ីសេរីនៅថ្ងៃទី១១ ខែវិច្ឆិកា ថា មន្ត្រីនិងអ្នកគាំទ្រគណបក្សប្រឆាំង ដែលចុះចូលគណបក្សប្រជាជនកម្ពុជាមួយចំនួន គឺធ្វើដោយបង្ខំ ពីព្រោះពួកគាត់រងសម្ពាធ និងរងការធ្វើទុក្ខបុកម្នេញ ការយាយីគ្រប់រូបភាព ពីអាជ្ញាធរក្រោមការដឹកនាំរបស់ឪពុកកូន និងលោក ហ៊ុន សែន និងលោក ហ៊ុន ម៉ាណែត។
លោក ម៉ែន សុថាវរិន្ទ្រ៖ «គាត់បោះឆ្នោតក្លែងក្លាយ ហើយមែនទែនគេបោះឆ្នោតឱ្យលោក ហ៊ុន សែន ដោយសារដាក់គំនាបខ្លាំង ប៉ុន្តែ មិនមែនលោក ហ៊ុន សែន ជានាយករដ្ឋមន្ត្រីទៅដាក់លោក ហ៊ុន ម៉ាណែត ជានាយករដ្ឋមន្ត្រីវិញ ហើយលោក ហ៊ុន ម៉ាណែត និយាយអ៊ីចឹងកើត អត់ចេះខ្មាសគេ ប៉ុន្តែគាត់ចង់និយាយអីក៏ដោយអត់ខ្វល់ទេ។ នេះ ប្រជាពលរដ្ឋគាត់ឃើញទាំងអស់ ឃើញទង្វើដែលធ្វើខុសធ្ងន់ទាំងអស់ហ្នឹង គឺប្រជាពលរដ្ឋមិនអាចអនុញ្ញាតឱ្យគាត់បានទេ ដោយសារតែគាត់មិនអាចឱ្យបោះឆ្នោត ដោយសេរី និងយុត្តិធម៌ទេ។ បើគាត់ធ្វើឱ្យមានការបោះឆ្នោតដោយសេរី យុត្តិធម៌ដូចកិច្ចព្រមព្រៀងទីក្រុងប៉ារីសទៅ អាហ្នឹងអត់អីទេ ធ្វើតាមទង្វើប្រជាពលរដ្ឋហ្នឹង ប៉ុន្តែដោយសារតែ មិនមានការបោះឆ្នោតដោយសេរី និងយុត្តិធម៌ហ្នឹង បានយើងបង្កើត។ លោក សម រង្ស៊ី លោកមិនចង់ទេ ប៉ុន្តែដោយសារតែសំណូមពរខាងក្នុងខ្លាំងមែនទែន»។
ប្រធានស្ដីទីគណបក្សសង្គ្រោះជាតិលោក សម រង្សី ប្រកាសបង្កើត «ចលនាជាតិតស៊ូ» ជាផ្លូវការនៅថ្ងៃទី៩ វិច្ឆិកា ចំថ្ងៃខួបលើកទី៧១ ឆ្នាំនៃទិវាបុណ្យឯករាជ្យជាតិរបស់កម្ពុជា។ លោកថា ការបង្កើតចលនាជាតិតស៊ូ នៅថ្ងៃទី៩ វិច្ឆិកា គឺជានិម្មិតរូប នៃការតស៊ូទាមទារឯករាជ្យ ដណ្ដើមប្រទេសកម្ពុជាពីជនផ្ដាច់ការមកវិញ ដើម្បីឱ្យកម្ពុជាមានអធិបតេយ្យជាតិពេញលេញ មានសិទ្ធិសេរីភាព និងប្រជាធិបតេយ្យពិតប្រាកដ។
ការបង្កើតចលនាជាតិតស៊ូ និងរដ្ឋាភិបាលបណ្ដោះអាសន្ននេះ ប្រជាពលរដ្ឋខ្មែរនៅក្រៅប្រទេសគាំទ្រ និងជំរុញឱ្យលោក សម រង្ស៊ី ពន្លឿនការបង្កើតនេះឱ្យបានឆាប់។ ពួកគាត់ចាត់ទុកចលនាជាតិតស៊ូថា គឺជាចលនារបស់ប្រជាពលរដ្ឋខ្មែរទូទៅ ដើម្បីបញ្ចប់អំណាចផ្ដាច់ការសព្វថ្ងៃ ដែលគ្រួសារត្រកូលហ៊ុន យកប្រទេសកម្ពុជាជាកម្មសិទ្ធិផ្ដាច់មុខ ព្រមទាំងធ្វើបាបប្រជាពលរដ្ឋ សកម្មជនសិទ្ធិមនុស្ស និងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
អត្ថបទពេញនិយម
នយោបាយ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- បទសម្ភាសន៍អ្នកស្រី ធិត គឹមហ៊ុន អំពីការធ្វើសមាជរបស់ពលរដ្ឋខ្មែរ-អាម៉េរិកាំងរឿងកោះគជ់
- អ្នកឃ្លាំមើលនិងបក្សប្រឆាំងថា គម្រោងធ្វើច្បាប់ដាក់មនុស្សមួយក្រុមជាភេរវកម្មនឹងឡងទៅក្រុមលោក ហ៊ុន សែន វិញ
- រដ្ឋាភិបាលថៃទទួលស្គាល់ភាពជាប់គាំងការបង្កើតគណៈកម្មការចរចាតំបន់ត្រួតស៊ីគ្នា ខណៈកម្ពុជាបន្តរក្សាភាពស្ងប់ស្ងាត់សាជាថ្មី