លោកនាយករដ្ឋមន្ត្រី ហ៊ុន សែន ប្រកាសថា នៅពេលខាងមុខ បើទោះជាលោក មិនធ្វើជានាយករដ្ឋមន្ត្រីដឹកនាំប្រទេស ប៉ុន្តែលោក លោកនៅតែដឹកនាំនយោបាយដដែលក្នុងនាមជាប្រធានគណបក្សប្រជាជនកម្ពុជា។ អ្នកវិភាគថា យល់ថា ការថ្លែងរបស់លោក ហ៊ុន សែន បែបនេះ ជាការបញ្ជាក់ថា លោក ហ៊ុន សែន មិនទុកចិត្តនៃសមត្ថភាពអ្នកដឹកនាំប្រទេសរបស់លោក ហ៊ុន ម៉ាណែត ដែលជាបេក្ខជននាយករដ្ឋមន្ត្រីរបស់គណបក្សប្រជាជនកម្ពុជានោះទេ។
លោក ហ៊ុន សែន នៅពេលនេះ មិនបានបង្ហាញសញ្ញាណាមួយថា លោកគ្រប់គ្រងប្រទេសយូរអង្វែងក្រោយការបោះឆ្នោតបោះឆ្នោតថ្ងៃទី២៣ ខែកក្កដា ខាងមុខនោះទេ។ នៅរយៈពេលចុងក្រោយនេះ លោក ហ៊ុន សែន តែងតែបង្ហើបពីការដឹកនាំរបស់នាយករដ្ឋមន្ត្រីបន្ទាប់ពីលោក គឺកូនប្រុសច្បងរបស់លោក ហ៊ុន ម៉ាណែត ដែលជាបេក្ខជននាយករដ្ឋមន្ត្រីរបស់គណបក្សប្រជាជនកម្ពុជា។ ទោះយ៉ាងណាក៏ដោយ លោក ហ៊ុន សែន ក៏មិនបណ្ដោយឱ្យកូនប្រុសរបស់លោកមានអំណាចពេញដៃពេកនោះដែរ ដោយលោកប្រកាសថា ការសម្រេចចិត្តផ្នែកនយោបាយ គឺលោកនៅតែដឹកនាំដដែល គឺធ្វើឡើងក្នុងនាមលោកជាប្រធានគណបក្សប្រជាជនកម្ពុជា ដែលជាគណបក្សកាន់អំណាច។
លោក ហ៊ុន សែន៖« ជ្រុលធ្វើបុណ្យហើយ ធ្វើឱ្យចប់ចុងចប់ដើម ទាន់ខ្ញុំករុណាធ្វើជានាយករដ្ឋមន្ត្រី ដល់ខ្ញុំករុណាឈប់ធ្វើនាយករដ្ឋមន្ត្រីទៅ ព្រះតេជព្រះគុណត្រូវបិណ្ឌបាតនាយករដ្ឋមន្ត្រីក្រោយហើយ ប៉ុន្តែករុណាអត់ទាន់ទៅណាទេ បើទោះបីមិនធ្វើនាយករដ្ឋមន្ត្រីក៏នៅតែគ្រប់គ្រងនយោបាយកម្ពុជាដែរក្នុងឋានៈជាមេដឹកនាំគណបក្សប្រជាជន » ។
លោក ហ៊ុន សែន ថ្លែងដូច្នេះក្នុងពិធីសម្ពោធអគារសិក្សានៃពុទ្ធិកសាកលវិទ្យាល័យព្រះសីហមុនីរាជា ថ្ងៃទី៣០ ខែឧសភា នៅក្រុងភ្នំពេញ។ លោក ហ៊ុន សែន ក៏ឆ្លៀតឃោសនារកសំឡេងឆ្នោតមុនរដូវឃោសនាបោះឆ្នោតដែរថា លេខរៀងរបស់គណបក្សប្រជាជនកម្ពុជា ក្នុងសន្លឹកឆ្នោតសម្រាប់ការបោះឆ្នោតខាងមុខ គឺលេខ១៨ ជាលេខល្អ ឬលេខហុងស៊ុយ។
អ្នកវិភាគនយោបាយ លោក គឹម សុខ យល់ថា ការថ្លែងរបស់លោក ហ៊ុន សែន នេះជាការបញ្ជាក់ថា លោក ហ៊ុន សែន មិនទុកចិត្តពីសមត្ថភាពដឹកនាំប្រទេសរបស់លោក ហ៊ុន ម៉ាណែតនោះទេ។ លោកបន្តទៀតថា ប្រទេសកម្ពុជា ក្រោមការដឹកនាំរបស់លោក ហ៊ុន ម៉ាណែត នាពេលខាងមុខ ក៏ទំនងមានការរំលោភសិទ្ធិមនុស្ស ប្រជាធិបតេយ្យ ដូចការដឹកនាំរបស់លោក ហ៊ុន សែន ដដែល ព្រោះអ្វីៗគ្រប់យ៉ាងគឺលោក ហ៊ុន សែន នៅតែជាអ្នកបញ្ជាពីក្រោយដដែល។
លោក គឹម សុខ៖« ពីព្រោះអ្វីដែលជាគន្លឹះសំខាន់នៃការឡើងកាន់អំណាចរបស់ ហ៊ុន ម៉ាណែត គឺការទទួលនូវអំពើបាបកម្ម ដែលឪពុករបស់គាត់បានសាងកន្លងមកច្រើនណាស់។ និយាយត្រឹមតែចុងក្រោយទៅចុះ កម្ទេចផ្ទៃក្នុងខ្លួនឯង កម្ទេចគូប្រជែងទាំងឡាយដោយមិនគោរពរដ្ឋធម្មនុញ្ញ កម្ទេចស្មារតី និងឆន្ទៈរបស់ប្រជាពលរដ្ឋដែលចង់បានយុត្តិធម៌ និងប្រជាធិបតេយ្យ » ។
លោក ហ៊ុន ម៉ាណែត ត្រូវបានគណបក្សប្រជាជនកម្ពុជា បោះឆ្នោតឱ្យធ្វើជាបេក្ខជននាយករដ្ឋមន្ត្រីនៃគណបក្សនេះ បន្តពីឪពុករបស់លោក កាលពីចុងឆ្នាំ២០២២។ លោក ហ៊ុន សែន ក៏តែងតែអួតសរសើរថា កូនប្រុសរបស់មានសមត្ថភាពគ្រប់គ្រាន់ក្នុងការដឹកនាំប្រទេសជំនួសលោក ប៉ុន្តែ លោក ហ៊ុន សែន នៅតែបញ្ជាក់ជំហរម្ដងហើយម្ដងទៀតថា លោកមិនផ្ទេរតំណែងប្រធានគណបក្សប្រជាជនកម្ពុជា ទៅលោក ហ៊ុន ម៉ាណែត ឬទៅអ្នកណាម្នាក់ទេ គឺលោកបន្តដឹកនាំគណបក្សនេះតទៅទៀត។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា យល់ថា តួនាទីដឹកនាំប្រទេសគួរជៀសវាងកុំឱ្យមានជាប់ពាក់ព័ន្ធក្នុងសែស្រឡាយក្នុងក្រុមគ្រួសារ ព្រោះអាចកើតជាទំនាស់ផលប្រយោជន៍។ មន្ត្រីសិទ្ធិមនុស្សរូបនេះ លើកឡើងទៀតថា ប្រសិនបើលោក ហ៊ុន សែន បន្តដឹកនាំគណបក្សប្រជាជនកម្ពុជា នៅពេលកូនប្រុសរបស់លោកធ្វើជានាយករដ្ឋមន្ត្រី នាំឱ្យមានសំនួរចោទសួរថា តើផ្ទៃក្នុងបក្សអាចព្រមតាមការចង់បានរបស់លោក ហ៊ុន សែន ដែរឬទេ?។
លោក រស់ សុដ្ឋា៖ « ប៉ុន្តែទោះបីយ៉ាងណា ធ្ងន់ជាងគេ គឺបញ្ហាគណបក្សប្រជាជនតែម្ដង តើគណបក្សប្រជាជន សមាជិកគណបក្សប្រជាជនអាចទទួលយកបាន ឬអត់តើគណបក្សប្រជាជនអាចទទួលយកបានទេ ដែលថា គ្រួសារសម្ដេចនាយករដ្ឋមន្ត្រី នៅក្នុងបញ្ជាដឹកនាំនយោបាយកម្ពុជា » ។
ក្រុមអ្នកឃ្លាំមើលនយោបាយលើកឡើងថា ប្រសិនបើការបោះឆ្នោតថ្ងៃទី២៣ ខែកក្កដាខាងមុខ គ្មានវត្តមានគណបក្សភ្លើងទៀនចូលរួមការបោះឆ្នោតទេ ទំនងគណបក្សប្រជាជនកម្ពុជា ឈ្នះឆ្នោតដឹកនាំរដ្ឋសភា និងដឹកនាំប្រទេសដោយឯកបក្សដូចការបោះឆ្នោតកាលពីឆ្នាំ២០១៨ ដែលជាការបោះឆ្នោតគ្មានគណបក្សសង្គ្រោះជាតិ ចូលរួមប្រកួតប្រជែង។ ការលើកឡើងដូច្នេះ ខណៈ គ.ជ.ប និងក្រុមប្រឹក្សាធម្មនុញ្ញ ដែលស្ថិតក្រោមឥទ្ធិពលរបស់គណបក្សកាន់អំណាចមិនឱ្យគណបក្សភ្លើងទៀន ដែលមានកម្លាំងនយោបាយប្រហាក់ប្រហែលនឹងគណបក្សកាន់អំណាចអាចចូលរួមការបោះឆ្នោតជាតិនាពេលខាងមុខបាននោះទេ៕
កំណត់ចំណាំចំពោះអ្នកបញ្ចេញមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិ ដែលមិនជេរប្រមាថដល់អ្នកដទៃប៉ុណ្ណោះ។