អ្នកវិភាគសង្គមមើលឃើញថា ត្រកូលហ៊ុននឹងបរាជ័យចំពោះនយោបាយឈ្នះៗព្រោះគោលនយោបាយឈ្នះៗនេះ បានផលប្រយោជន៍សម្រាប់ត្រកូលហ៊ុន និងបក្ខពួកខ្លួនប៉ុណ្ណោះ។
អ្នកអត្ថាធិប្បាយ នយោបាយ ដែលកំពុងភៀសខ្លួននៅក្រៅប្រទេសលើកឡើងថា អតីតនាយករដ្ឋមន្ត្រី លោក ហ៊ុន សែន និងជាប្រធានព្រឹទ្ធសភាកំពុងប្រើនយោបាយ ចងអាឃាត ដោយជ្រកក្រោមស្លាក នយោបាយឈ្នះៗ មកបន្លំភ្នែកមហាជន។
លោក គឹម សុខ ថា នយោបាយចងអាឃាត ធ្វើឡើងសម្រាប់តែការក្រាញអំណាចរបស់ត្រកូលហ៊ុន និងដើម្បីសងសឹកដល់ក្រុមដែលប្រឆាំង ឬរាំងដល់ដំណើរការឡើងកាន់អំណាចតពូជរបស់ត្រកូលហ៊ុន។
ក្រុមដែលជាគោលដៅសងសឹក និងត្រូវតែកម្ចាត់ទាំងនោះរួមមានគណបក្សប្រឆាំង ប្រជាពលរដ្ឋ និងសង្គមស៊ីវិលទាំងឡាយណា ដែលហានចេញមុខប្រឆាំងនឹងផែនការក្រាញអំណាច ការធ្វើបាបប្រជាពលរដ្ឋ និងការធ្វើឲ្យជាតិលិចលង់។
«នយោបាយចងអាឃាត មានតែលទ្ធផលពីរទេ គឺឈ្នះ បើមិនឈ្នះគឺចាញ់អត់មានឈ្នះៗទេ ឈ្នះៗទៅរួចទេ វាលុះត្រាតែភាគីណាឈ្នះក៏ដោយ គឺបានសុខទាំងអស់គ្នា បានផលទៅប្រជាពលរដ្ឋ និងប្រទេសជាតិ ក៏ប៉ុន្តែនយោបាយគំនុំសងសឹកអត់ចេញលទ្ធផលអ៊ីចឹងទេ គឺបានផលតែក្រុមអ្នកឈ្នះគឺត្រកូលហ៊ុន។
ការលើកឡើងនេះ ដោយសារតែ លោក ហ៊ុន សែន ធ្លាប់អះអាងថា លោកជាអ្នកបង្កើតគោលនយោបាយដ៏ឆ្លាតវៃមួយចំនួនក្នុងការដឹកនាំប្រទេស។ ក្នុងនោះ មានគោលនយោបាយមួយដែលលោកហៅថា ជាគោលនយោបាយឈ្នះៗ។ លោកថែមទាំងចាត់ចែងឱ្យគេសង់វិមានកូនកាត់វៀតណាមមួយអស់លុយរាប់លានដុល្លារ ដើម្បីឧទ្ទិសដល់គោលនយោបាយនេះផង។
ទន្ទឹមគ្នានេះ លោកក៏មិនអនុញ្ញាតឲ្យអ្នកណាម្នាក់រួចខ្លួនឡើយ បើអ្នកនោះហាននិយាយរិះគន់នយោបាយនេះឬ រិះគន់ការដឹកនាំរបស់លោក និងក្រុមគ្រួសាររបស់លោក ដោយអ្នកទាំងនោះ អាចស្លាប់ ឬជាប់គុក បើរត់ចេញទៅក្រៅស្រុកមិនទាន់ទេ។
ក្រៅពីនេះទៀត លោក ហ៊ុន សែន បានបង្កើតព័ត៌មានក្លែងក្លាយជាច្រើនទៀត ដើម្បីធ្វើឲ្យស្ថានភាពនយោបាយមានភាពច្របូកច្របល់ ធ្វើពលរដ្ឋលែងអាចទុកចិត្តគ្នាបានដូចក្នុងសម័យខ្មែរក្រហម និងប្រើលុយ មុខដំណែង តួនាទីក្នុងរដ្ឋាភិបាល ដើម្បីអូសទាញ ទិញទឹកចិត្ត អ្នកដែលនិយាយរិះគន់លោកមួយចំនួន ហើយលោកថែមទាំងអះអាងទៀតថា ក្រុមអ្នករិះគន់ទាំងនោះលោកជាអ្នកបង្កើតឡើង។
លោក ហ៊ុន សែន៖ «ទាក់ទងជាមួយនឹងការដែលមិនយល់គ្នា វាជារឿងធម្មតាទេ តាមពិតពួកកូនគឺធ្វើការក្នុងក្រុមតែមួយទេ ប៉ុន្តែជាធម្មតាទេកិច្ចការងារនេះ គឺកាត់ជាកង់ៗ ពីម្នាក់ទៅម្នាក់មិនឲ្យដឹងគ្នាទេ អ៊ីចឹងបានជាមានការភ័ន្តច្រឡំអ្នកនេះចោទអ្នកនោះ អ្នកនោះចោទអ្នកនេះ...»។
ជុំវិញរឿងនេះ អ្នកសិក្សាស្រាវជ្រាវ ការអភិវឌ្ឍសង្គម លោកបណ្ឌិត សេង សារី មានប្រសាសន៍ថា យុទ្ធសាស្ត្រ កម្ទេច ក្រុមប្រឆាំង របស់លោក ហ៊ុន សែន មាន៥ដំណាក់កាល ដូច ជាសម្លុត ទិញ តាមរយៈថវិកា មុខតំណែង តួនាទី បើទិញមិនបានទេ ចរចា ចរចាមិនបានបំបែក បើបំបែកមិនបានទៀត កម្ទេចចោលតែម្ដង។
លោកមើលឃើញទៀតថា យុទ្ធសាស្ត្រទាំងនេះ លោក ហ៊ុន សែន ប្រើបានជោគជ័យ លើ២ដំណាក់កាលធំរួចមកហើយ គឺកម្ទេចចលនាតស៊ូចុងក្រោយរបស់ខ្មែរក្រហម និងក្រុមរាជានិយម ហ៊្វុនស៊ីនប៉ិច ហើយនេះពេលលោកកំពុងប្រើនូវយុទ្ធសាស្ត្រមួយទៀត គឺបង្កើតឲ្យមានការមិនទុកចិត្តគ្នាក្នុងក្រុមប្រឆាំង ឬប្រជាពលរដ្ឋដូចសម័យខ្មែរក្រហមដែរ។
លោក សេង សារី៖ «បង្ហាញទៅឲ្យក្រុមចលនាប្រឆាំង ចលនាប្រជាធិបតេយ្យហ្នឹង មិនទុកចិត្តគ្នា សង្ស័យគ្នាទៅវិញទៅមក លាបពណ៌គ្នា ជេរប្រមាថគ្នា ទាំងនេះជាឆ្អឹងខ្នងនៃយុទ្ធសាស្ត្រនេះហើយ ហើយអានេះក៏ជាមេរៀនសម្រាប់អ្នកតស៊ូលើសង្វៀននយោបាយនៅកម្ពុជាដែរ ដើម្បីទប់នឹងយុទ្ធសាស្ត្រឌីហ្វីដរបស់លោក ហ៊ុន សែន បាននោះ លុះត្រាតែយើងដឹងថា ស្អីជាឆ្អឹងខ្នងយុទ្ធសាស្ត្រនេះ»។
អ្នកអត្ថាធិប្បាយនយោបាយ លោក គឹម សុខ យល់ថា នយោបាយបែបនេះ គឺរស់មិនបានយូរឡើយ។
លោកគឹម សុខ៖ «ដូច្នេះហើយនយោបាយគំនុំសងសឹក ដែលលោក ហ៊ុន សែន កំពុងតែធ្វើនឹងទៅដល់ដំណាក់កាលមួយចាញ់ ពីព្រោះនយោបាយហ្នឹង គ្មានអត្ថន័យគុណធម៌ល្អ ធ្វើឲ្យចំរើនទេ អត់ចំរើនដល់បក្សខ្លួនផង កុំថាឡើយដល់អ្នកដទៃ អត់ចំរើនដល់ប្រទេសជាតិ និងប្រជាពលរដ្ឋទេ ហើយនយោបាយនេះនឹងបង្កើតសត្រូវច្រើនណាស់ ហើយទីបំផុតទៅគ្មានអ្នកណាគេនៅទ្រាំហ្នឹងគ្រួសារមួយនេះទេ...»។
នៅដំណាក់កាលចុងក្រោយនេះ លោក ហ៊ុន សែន បានបន្តចាប់ខ្លួនសាច់ញាតិរបស់អ្នករិះគន់លោកជាថ្នូរឱ្យពួកគេបញ្ឈប់ការរិះគន់លោក។
អ្នកវិភាគសង្គមមើលឃើញថា នយោបាយរបៀបនេះ នឹងមិនអាចឲ្យលោក ហ៊ុន សែន ល្បីឈ្មោះ ឬក្លាយជាជើងឯកខាងនយោបាយឈ្នះៗនោះទេ ផ្ទុយទៅវិញ នឹងធ្វើឱ្យលោក ហ៊ុន សែន ល្បីឈ្មោះ លើគោលនយោបាយ ខឹងគោវាយរទេះ ឬក៏គោលនយោបាយចាប់ជំរិតទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។