លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
2024.12.09
ប្រធានព្រឹទ្ធសភា លោក ហ៊ុន សែន (ឆ្វេង) ជួបប្រធានសភាព្រះរាជាណាចក្រអារ៉ាប៊ីសាអូឌិត លោក ឌុលឡា ម៉ូហាម៉េដ អ៊ីប្រាហ៊ីម អាល់-សេក្ខ (Abdullah Muhamad Ibrahim Al-Sheikh) (ស្ដាំ) នៅរដ្ឋធានីរីយ៉ាដ នៅថ្ងៃទី៩ ខែធ្នូ ឆ្នាំ២០២៤។
រូប៖ ហ្វេសប៊ុកលោក ហ៊ុន សែន
ប្រធានព្រឹទ្ធសភា លោក ហ៊ុន សែន ចេញទៅបំពេញទស្សនកិច្ចផ្លូវការ នៅតំបន់មជ្ឈិមបូព៌ា រយៈពេល ១សប្ដាហ៍ ចាប់ពីថ្ងៃទី៨ ដល់ថ្ងៃទី១៤ ខែធ្នូ ។ អ្នកឃ្លាំមើលលើកឡើងថា ដំណើរទស្សនកិច្ចរបស់លោក ហ៊ុន សែន នៅពេលនេះ ទំនងចង់ទៅដើរទាក់ទាញវិនិយោគទុននៅកម្ពុជា ខណៈរដ្ឋាភិបាលកំពុងជួបបញ្ហាសេដ្ឋកិច្ច និងរងការព្រមានដាក់ទណ្ឌកម្មនានាពីសហគមន៍អន្តរជាតិ។
ប្រធានព្រឹទ្ធសភា លោក ហ៊ុន សែន នៅព្រឹកថ្ងៃទី៨ ខែធ្នូ បានចេញដំណើរទៅកាន់ប្រទេសក្នុងតំបន់មជ្ឈិមបូព៌ា រួមមានព្រះរាជាណាចក្រអារ៉ាប៊ីសាអ៊ូឌីត (Saudi Arabia) រដ្ឋកាតា (Qatar) សាធារណរដ្ឋតួកគី (Turkye) និងអេមីរ៉ាត អារ៉ាប់រួម (United Arab Emirate)។
សេចក្ដីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា កាលពីថ្ងៃទី៧ ខែធ្នូ ឲ្យដឹងថា ដំណើរទស្សនកិច្ចផ្លូវការរយៈពេលមួយសប្ដាហ៍ ចាប់ពីថ្ងៃទី៨ ដល់ទី១៤ ខែធ្នូ របស់ប្រធានព្រឹទ្ធសភា លោក ហ៊ុន សែន រួមទាំងថ្នាក់ដឹកនាំព្រឹទ្ធសភា រដ្ឋសភា រដ្ឋាភិបាល និងសភាពាណិជ្ជកម្មកម្ពុជា លោក ហ៊ុន សែន នឹងជួបជាមួយប្រធានសភា និងនាយករដ្ឋមន្ត្រីអារ៉ាប៊ីសាអ៊ូឌីត ប្រធានសភា និងនាយករដ្ឋមន្ត្រីនៃរដ្ឋកាតា និងជួបជាមួយប្រធានសភា និងប្រធានាធិបតី នៃប្រទេសពីរផ្សេងទៀត។ ប្រភពដដែលបន្តថា ទស្សនកិច្ចនេះជាការពង្រឹងទំនាក់ទំនងការទូត ដើម្បីពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសក្នុងតំបន់ និងពិភពលោក។
អ្នកអត្ថាធិប្បាយនយោបាយ លោក គឹម សុខ ប្រាប់វិទ្យុអាស៊ីសេរី នៅថ្ងៃទី៨ ខែធ្នូ ថា ដំណើរទស្សនកិច្ចរបស់លោក ហ៊ុន សែន នៅពេលនេះ ទំនងមានហេតុផលចំនួន២សំខាន់ៗ គឺស្វែងរកប្រទេសដៃគូពាណិជ្ជកម្មបន្ថែម ខណៈរដ្ឋាភិបាលកម្ពុជា កំពុងជួបវិបត្តិសេដ្ឋកិច្ច ព្រមទាំងរងការព្រមានដាក់ទណ្ឌកម្មបន្ថែមទៀតពីសហគមន៍អន្តរជាតិ និងការស្វែងរកជំនួសបច្ចេកទេសបូមប្រេងពីតំបន់ ដែលរដ្ឋាភិបាលអះអាងថា ជាតំបន់ត្រួតស៊ីគ្នាជាមួយប្រទេសថៃ នៅតំបន់កោះគជ់។
លោក គឹម សុខ៖ «ទំនងជាផ្ដោតជាសំខាន់ទៅស្វែងរកជំនួយបច្ចេកទេសពីក្រុមហ៊ុនរកស៊ីប្រេងនៅមជ្ឈិមបូព៌ា ដើម្បីទៅដាក់វិនិយោគនៅក្នុងក្របខណ្ឌណាមួយជាមួយរដ្ឋាភិបាលត្រកូល ហ៊ុន ក្នុងការបូមប្រេងនៅក្នុងតំបន់ត្រួតស៊ីគ្នាជាមួយនឹងរដ្ឋាភិបាលត្រកូល ថាក់ស៊ីន ក្នុងការប្រមូលលុយមកចិញ្ចឹមអំណាចជាមួយខ្លួនព្រោះក្នុងកាលៈទេសៈបច្ចុប្បន្នរដ្ឋាភិបាលត្រកូល ហ៊ុន ប្រឈមខ្លាំងណាស់បញ្ហាហិរញ្ញវត្ថុ នៅចំពោះមុខការដាក់ទណ្ឌកម្មដកអ៊ី.ប៊ី.អេ (EBA) ទាំងស្រុងរបស់សហភាពអឺរ៉ុប ហើយអាចដល់កម្រិតទណ្ឌកម្មសេដ្ឋកិច្ចដល់ប្រទេសកម្ពុជា ប្រសិនបើរដ្ឋាភិបាលត្រកូល ហ៊ុន នៅតែមានៈដូចសព្វថ្ងៃ»។
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យអគ្គលេខាធិការ នៃអគ្គលេខាធិការដ្ឋានព្រឹទ្ធសភា លោក ឡាយ សំកុល និងអ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិ លោក ជុំ សន្ទរី និងដើម្បីសុំការឆ្លើយតបជុំវិញ បញ្ហានេះ បាននៅឡើយទេ នៅថ្ងៃទី ៨ ខែធ្នូ។
ទោះយ៉ាងណា លោក គឹម សុខ លើកឡើងថា ដំណើរទស្សនកិច្ចរបស់លោក ហ៊ុន សែន នៅពេលនេះ ទំនងទទួលបានការចាប់អារម្មណ៍ខ្លះដែរ ពីប្រទេសនៅមជ្ឈិមបូព៌ា ដោយលោក អះអាងថា ប្រទេសទាំងនោះ ហាក់ពុំសូវខ្វល់ខ្វាយពីបញ្ហាសិទ្ធិមនុស្សជាចំបងដូចសហភាពអឺរ៉ុប និងសហរដ្ឋអាមេរិកឡើយ។
រដ្ឋលេខាធិការក្រសួងពាណិជ្ជកម្ម អ្នកស្រី តឹងរ៉េត កំរង កាលពីដើមឆ្នាំ២០២៤ ឲ្យដឹងថា កម្ពុជា បានចុះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ជាមួយនឹងអេមីរ៉ាតអារ៉ាប់រួម (Cambodia-UAE CEPA) ដែលអាចឲ្យកម្ពុជា នាំចេញដោយអត្រាពន្ធស្មើសូន្យ លើមុខទំនិញជាច្រើនរួមមាន កាបូបធ្វើដំណើរ ផលិតផលវាយនភណ្ឌ កាត់ដេរ និងសំលៀកបំពាក់ កង់ បន្ទះសូឡា គ្រឿងអេឡិចត្រូនិក និងផលិតផលកសិកម្មជាដើម។ ក្រោយពីកិច្ចព្រមព្រៀងនេះ បានចូលជាធរមានកម្ពុជាបាននាំចេញទំនិញប្រមាណ៥៥លាន ដុល្លារទៅកាន់អេមីរ៉ាតអារ៉ាប់រួម។
ទោះជាយ៉ាងនេះក្ដី អ្នកវិភាគសង្កេតឃើញថា ការប្រឹងប្រែងស្វែងរកដៃគូពាណិជ្ជកម្មបន្ថែមរបស់លោក ហ៊ុន សែន នេះ ធ្វើឡើងស្របពេលសហភាពអឺរ៉ុបព្រមានដកប្រព័ន្ធអនុគ្រោះពន្ធ អ៊ី.ប៊ី.អេ ដែលនៅសេសសល់ចំនួន ៨០ភាគរយ ជាមួយកម្ពុជា និង ពិចារណា ដាក់ទណ្ឌកម្មជាក់លាក់លើក្រុមមន្ត្រីរដ្ឋាភិបាល កម្ពុជា ដោយសារតែរដ្ឋាភិបាលកម្ពុជា មិនស្ដារការគោរពសិទ្ធិមនុស្ស ប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
អត្ថបទពេញនិយម
នយោបាយ
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- តុលាការថៃចេញដីកាចាប់ខ្លួនជនសង្ស័យជនជាតិខ្មែរគឺលោក លី រតនរស្មី ករណីឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
- តុលាការបារាំង បានសាកសួរភរិយាលោក លិម គិមយ៉ា អំពីករណីឃាតកម្មលើលោក លិម គិមយ៉ា
- អាជ្ញាធរត្រៀមបញ្ជូនអតីតឧកញ៉ា ហេង សិទ្ធី មកកម្ពុជា ក្រោយចាប់ខ្លួនបាននៅរុស្ស៊ី