លោក ហ៊ុន សែន ខឹងច្រឡោតនឹងអ្នកសួររឿងលោកដើរបំបែកបំបាក់ពលរដ្ឋខ្មែរនៅក្រៅប្រទេស
2024.11.11
ប្រធានព្រឹទ្ធសភា លោក ហ៊ុន សែន ចូលរួមកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នៅថ្ងៃទី១១ វិច្ឆិកា ២០២៤។
រូប៖ ហ្វេសប៊ុកលោក ហ៊ុន សែន
ប្រធានគណបក្សប្រជាជនកម្ពុជាលោក ហ៊ុន សែន នៅថ្ងៃទី១០ ខែវិច្ឆិកា បានខឹងច្រឡោតនឹងអ្នកសួរតាមទូរស័ព្ទ រឿងលោកធ្វើបាបពលរដ្ឋ និងធ្វើនយោបាយបំបែកបំបាក់សំឡេងប្រឆាំងនៅក្រៅប្រទេស។ លោកហៅអ្នកអត្ថាធិប្បាយនៅលើទូរទស្សន៍មនសិការខ្មែរអមតៈដែលសន្ទនាជាមួយលោកនោះថា ជាក្មេងពាល។ អ្នកឃ្លាំមើលយល់ថា កាយវិការ និងសំឡេងឆ្លើយតបរបស់លោក ហ៊ុន សែន បានបង្ហាញភាពផ្ដាច់ការ និងមិនសមធ្វើជាមេដឹកនាំទេ។
ទូរស្សន៍មនសិការខ្មែរអមតៈដែលបង្កើតឡើងដោយពលរដ្ឋខ្មែរនៅក្រៅប្រទេសមួយចំនួនដែលតែងតែជជែកអំពីភាពអសកម្មរបស់មេដឹកនាំក្រុងភ្នំពេញកន្លងមក នៅព្រឹកថ្ងៃទី១០ ខែវិច្ឆិកា បានរៀបចំកម្មវិធីមួយដោយហៅទូរស័ព្ទតាមប្រព័ន្ធវ័តអាប់ (WhatsApp) ដើម្បីសួរលោក ហ៊ុន សែន ដោយផ្ទាល់។
ទីបំផុតប្រធានគណបក្សប្រជាជនកម្ពុជារូបនេះក៏បានលើកទូរស័ព្ទ។ តាមរយៈការផ្សាយផ្ទាល់នៅលើបណ្ដាញសង្គមហ្វេសប៊ុក (Facebook) ទូរទស្សន៍មនសិការខ្មែរអមតៈនោះ វាគ្មិនបានសួរលោក ហ៊ុន សែន អំពីល្បិចកលរបស់លោកចង់កម្ទេចទូរទស្សន៍មួយនេះមិនឱ្យផ្សព្វផ្សាយពីបញ្ហាសង្គម និងពលរដ្ឋខ្មែររងគ្រោះ។ ចំណែកលោក ហ៊ុន សែន បានបដិសេធការលើកឡើងនោះ ប៉ុន្តែលោកហាក់ទប់កំហឹងមិនបានដោយនិយាយអាមឹង ខឹងច្រឡោត ហើយគំរាមបង្ហោះសារទាំងនេះនៅលើបណ្តេញសង្គមថែមទៀត។
ប្រធានព្រឹទ្ធសភា និងឪពុកនាយករដ្ឋមន្ត្រី លោក ហ៊ុន សែន បានសរសេរ និងបង្ហោះសារសំឡេងនៅលើហ្វេសប៊ុកផ្ទាល់ខ្លួន បន្ទាប់ពីលោកប៉ះពារពាក្យសម្ដីជាមួយសមាជិកទូរទស្សន៍មនសិការខ្មែរអមតៈ ដោយលោកចោទថា អ្នកទាំងនោះចាក់ផ្សាយសំឡេងសន្ទនាជាមួយលោកមិនបានពេញលេញ។ លោក ហ៊ុន សែន សរសេរបន្តថា បើទោះបីជានៅថ្ងៃទី១០ ខែវិច្ឆិកា លោកកាន់ទុក្ខចំពោះការស្លាប់កូនប្រុសច្បងរបស់លោកឈ្មោះ ហ៊ុន កំសត់ ក្នុងសម័យខ្មែរក្រហមក្តី ក៏លោកត្រូវបង្ហោះសារជាសំឡេងទាំងស្រុង ដោយលោកហៅអ្នកទាំងនោះថា ពួកក្មេងពាលបម្រើឱ្យនយោបាយរបស់មេក្លោងពាលដែលកំសាក។
សំឡេងសន្ទនា៖ «ឥឡូវខ្ញុំចង់សួរពូឱ្យច្បាស់ តើពូមានគំនុំអ្វីចង់មកបំផ្លាញពួកខ្ញុំ (ហ៊ុន សែន)អញមិនដឹងទូរទស្សន៍មនសិការពួកហែងនៅណា។ លោកពូនិយាយជាមួយពួកខ្ញុំឱ្យស្រួលបន្តិចពូ កុំនិយាយអញៗពេកពូ។ (ហ៊ុន សែន)ទេតិចទៀតអញបង្ហោះសំឡេងហ្នឹង ហែងចាំមើលៗ អញបង្ហោះសំឡេងហ្នឹង។ សំឡេងលោកពូក៏ប្រជាពលរដ្ឋយកទៅស្តាប់បានទូទាំងប្រទេសដែរលោកពូ។ (ហ៊ុន សែន)ទេអញឱ្យហែងស្តាប់តើ ពួកហែងហៅមកព្រហើន។ បាទខ្ញុំអត់ព្រហើនទេ ខ្ញុំចង់សួរលោកពូ។ (ហ៊ុន សែន) អាក្មេងព្រហើន »។
ទោះជាលោក ហ៊ុន សែន បង្ហោះសាររបស់លោកទាំងស្រុងពាក់ព័ន្ធការឆ្លើយឆ្លងដែលលាយឡំជាមួយពាក្យពេចន៍អសុរោះយ៉ាងណាក្តី ក៏មន្ត្រីគណបក្សកាន់អំណាច និងមន្ត្រីរដ្ឋាភិបាល ក្រុមតារាមួយចំនួន រួមទាំងកូនប្រុសបង្កើតរបស់លោកផង បានចេញសារបន្ទរ ដោយបង្វែរថាលោក ហ៊ុន សែន ជាជនរងគ្រោះពីការប្រមាថមើលងាយ។ កូនប្រុសពៅរបស់លោក ហ៊ុន សែន គឺលោក ហ៊ុន ម៉ានី បានបង្ហោះសារនៅលើហ្វេសប៊ុកផ្ទាល់ខ្លួន ចាត់ទុករឿងនេះជាការប្រមាថលើឪពុករបស់លោក មិនស្គាល់ចាស់ទុំដែលធ្វើឱ្យលោកមានអារម្មណ៍ក្តៅក្រហាយ និងមានកំហឹង។
ឆ្លើយតបរឿងនេះ សមាជិកទូរទស្សន៍មនសិការខ្មែរអមតៈលោក អ៊ុយ ដាឡេ ប្រាប់វិទ្យុអាស៊ីសេរីថា សំណួរ និងការឆ្លើយឆ្លងនោះមិនបានបង្ហាញថា ពួកលោកមាក់ងាយលើលោក ហ៊ុន សែន នោះទេ។ លោកបញ្ជាក់ថា ដើមហេតុដែលពួកលោកហៅទូរស័ព្ទទៅលោក ហ៊ុន សែន ចង់ដឹងពីមូលហេតុដែលគាត់ដើរបំបែកបំបាក់ ក្រុមការងាររបស់លោកនៅក្រៅប្រទេស និងសួរអំពីបញ្ហាបំបិទសិទ្ធិសេរីភាពពលរដ្ឋ រួមទាំងការចាប់ចងអ្នកដែលមាននិន្នាការផ្ទុយនៅក្នុងប្រទេសដាក់គុកឥតស្រាកស្រាន្តផង។ ផ្ទុយទៅវិញ លោកថាពាក្យសម្ដីអយុត្តិធម៌របស់លោក ហ៊ុន សែន នៅពេលនេះ គឺបង្ហាញកាន់តែច្បាស់ថា គាត់មិនសមជាមេដឹកនាំប្រទេសឡើយ។
លោក អ៊ុយ ដាឡេ៖ «តួនាទី ឋានៈរបស់គាត់ គឺគាត់ប្រើភាសាអសុរោះមែនទែនជារឿងមួយអាម៉ាស់ ហើយខ្ញុំមិននឹកស្មានថា គាត់ហ៊ានបង្ហោះសារនោះជាសាធារណៈទៀត។ ខ្ញុំគិតថាគ្មានមេដឹកនាំពាលណាប្រហែលគាត់ទេ បើយើងស្តាប់សម្ដីគាត់ បើទាំងសកម្មភាព កាយវិការគាត់ប្រើទៅលើអ្នកស្លូតត្រង់ ប្រជាពលរដ្ឋ សូម្បីតែក្មេងដាក់ស្រឡាញ់បរិស្ថានក៏គាត់មិនលើកលែងឱ្យគ្នាផង ខ្ញុំសួរមើលតើអ្នកណាជាជនពាលពិតប្រាកដ»។
ករណីទាំងនេះកើតឡើង ក្រោយពេលលោក ហ៊ុន សែន អូសទាញបានសមាជិក ទូរស្សន៍មនសិការខ្មែរអមតៈ និងជាអ្នកគាំទ្រគណបក្សសង្គ្រោះជាតិនៅប្រទេសអាល្លឺម៉ង់ (Germany)ម្នាក់ គឺលោកស្រី សូហ្វី កន្លងមក។ សារបែកធ្លាយដែលគេបង្ហោះនៅលើបណ្តេញសង្គម កាលពីពេលថ្មីៗនេះ លោក ហ៊ុន សែន បានជំរុញឱ្យលោកស្រី សូហ្វី ឈប់ធ្វើសកម្មភាពនយោបាយ និងឈប់ទាក់ទងជាមួយមេដឹកនាំបក្សប្រឆាំងនៅក្រៅប្រទេសតទៅទៀត។ សារសំឡេងសន្ទនានោះ លោក ហ៊ុន សែន ក៏គ្រោងធ្វើច្បាប់ដាក់ក្រុមអ្នករិះគន់ជាក្រុមភេរវកម្ម ជាឧបករណ៍ ដើម្បីទប់ទល់ចលនាតស៊ូរបស់លោក សម រង្ស៊ី ផងដែរ។
លោក ហ៊ុន សែន៖ «ពូទទួលយកមិនបានសោះតែម្តង ក្មួយ(លោកស្រី សូហ្វី) ចូលឡាយសូ (Liveshow) ជាមួយទូរទស្សន៍មនសិការនេះ ហើយដោយឱ្យធីតា ភូនេះវាយប្រហារ ប្រមាថមើលងាយមកចំពោះពូដែលក្មួយនៅអង្គុយជាមួយគ្នាដែរ»។
ជុំវិញរឿងនេះ ប្រធានអង្គការលទ្ធិប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី(Australia) លោក ស៊ឹង សែនករុណា មើលឃើញថា ល្បែងនយោបាយរបស់លោក ហ៊ុន សែន តែងតែប្រើអំណាចដើរគំរាមកំហែង រំលោភសិទ្ធិមនុស្ស បំបិទសំឡេងដែលមាននិន្នាការផ្ទុយកន្លងមកនេះ មិនអាចយកធ្វើជាគំរូបានទេ ខណៈអ្នកដែលចេញមុខគាំទ្ររឿងមិនត្រឹមត្រូវរបស់លោក ហ៊ុន សែន វិញ គឺដើម្បីរក្សាលាភសក្ការៈ និងតួនាទីតែប៉ុណ្ណោះ។ លោក ស៊ឹង សែនករុណា យល់ថា អ្នកនយោបាយគួរប្រកួតប្រជែងគ្នាដោយថ្លៃថ្នូរ និងជៀសវាងប្រើពាក្យមិនសមរម្យធ្វើឱ្យប៉ះពាល់មុខមាត់របស់ខ្លួន និងកិត្តិយសជាតិ។
លោក ស៊ឹង សែនករុណា៖ «បើសិនប្រើឥរិយាបថរបៀបហ្នឹង អាហ្នឹងជាផលប៉ះពាល់ដល់ទៅលើលោក ហ៊ុន សែន ខ្លួនឯងទៅវិញទេ វាអត់មានអ្វីដែលចំណេញទេ។ ការសាកសួរទៅលោក ហ៊ុន សែន ទាំងនេះ បើយើងពិនិត្យអំពីសកម្មភាពនយោបាយដែលយើងមើលឃើញនៅក្នុងប្រទេសកម្ពុជា គឺជារឿងមួយដែលកំពុងតែកើតមានឡើងជាបន្តបន្ទាប់»។
លោក ហ៊ុន សែន តែងប្រើយុទ្ធវិធីដូចជាការលួងលោមទិញទឹកចិត្ត សម្លុត គំរាមកំហែង ប្រើហិង្សា និងចាប់ដាក់គុក ឬចាប់គ្រួសាររបស់អ្នករិះគន់ធ្វើចំណាប់ខ្មាំង ឬប្រើយុទ្ធសាស្ត្រយកលលកទាក់លលក ដើម្បីបង្ខំឱ្យពលរដ្ឋខ្មែរនៅក្រៅប្រទេសឲ្យងាកទៅគាំទ្របក្សកាន់អំណាច និងក្រុមគ្រួសាររបស់លោក។ ប៉ុន្តែ អ្នកឃ្លាំមើលចាត់ទុកថា នេះជាអំពើស្មោកគ្រោក និងបំពានសិទ្ធិនយោបាយរបស់ពលរដ្ឋធ្ងន់ធ្ងរ ដែលត្រូវបញ្ឈប់ជាបន្ទាន់។ ពួកគាត់ចង់ឃើញអ្នកនយោបាយគួរប្រកួតប្រជែងគ្នាដោយសុចរិត សេចក្តីថ្លៃថ្នូរ ដើម្បីធានាឱ្យសង្គមមានយុត្តិធម៌ ប្រជាធិបតេយ្យ និងការប្រកួតប្រជែងដោយស្មើភាពគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
អត្ថបទពេញនិយម
នយោបាយ
- អ្នកវិភាគថា របបផ្ដាច់ការត្រកូលហ៊ុន នឹងដួលរលំដូចរបបផ្ដាច់ការនៅស៊ីរីដែរ
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ
- អ្នកឃ្លាំមើលនិងបក្សប្រឆាំងថា គម្រោងធ្វើច្បាប់ដាក់មនុស្សមួយក្រុមជាភេរវកម្មនឹងឡងទៅក្រុមលោក ហ៊ុន សែន វិញ
- អ្នកវិភាគថា ការឱ្យនាវាចម្បាំងអាមេរិកចូលកម្ពុជា គឺជាការសម្របនឹងនយោបាយ ប្រធានាធិបតីថ្មីរបស់អាមេរិក