លោក ហ៊ុន សែន អំពាវនាវដល់មេដឹកនាំទាំងអស់ក្នុងពិភពលោក ឲ្យមានសុឆន្ទៈ និងការទទួលខុសត្រូវចំពោះបញ្ហាសង្គ្រាមពាណិជ្ជកម្ម ដែលជាបញ្ហាសកល។
ថ្លែងនៅក្នុងកិច្ចប្រជុំកំពូលអ្នកដឹកនាំវិនិយោគសកល នៃវេទិកាពិភពលោកកាលពីថ្ងៃទី២៣ ខែតុលា នៅក្រុងហ្សឺណែវ ប្រទេសស្វីស លោក ហ៊ុន សែន លើកឡើងថា សង្គ្រាមពាណិជ្ជកម្មដ៏ស្រួចស្រាល់នេះបានជំរុញឲ្យការចរចាពាណិជ្ជកម្ម ក្នុងអង្គការពាណិជ្ជកម្មពិភពលោក ត្រូវជាប់គាំងដោយសារ គោលនយោបាយពន្ធថ្មីៗ ព្រមទាំងការដាក់គំនាប និងទណ្ឌកម្មនានា ជាហេតុធ្វើឲ្យប៉ះពាល់ធ្ងន់ធ្ងរ ដល់ពាណិជ្ជកម្ម ការវិនិយោគ និងការនាំចេញទំនិញ ពីបណ្ដាប្រទេសអភិវឌ្ឍន៍តិចតួច ទៅទីផ្សារអន្តរជាតិ៖ «សកលភាវូបនីយកម្ម ជួយដល់កាត់បន្ថយភាពក្រីក្រ និងការលើកម្ពស់ជីវភាពរស់នៅរបស់ពលរដ្ឋ។ ឈរលើមូលដ្ឋាននេះ ខ្ញុំសូមស្នើឲ្យប្រមុខដឹកនាំទាំងអស់គ្នាសំដែងសុឆន្ទៈ និងការទទួលខុសត្រូវខ្ពស់ ដើម្បីឆ្លើយតបចំពោះបញ្ហាប្រឈមសកលនេះ ដើម្បីរក្សាបាននូវបរិយាកាសវិនិយោគ និងស្ថិរភាពភូមិសាស្ត្រនយោបាយ ក៏ដូចជា បង្កើនការទុកចិត្ត ក្នុងវិស័យហិរញ្ញវត្ថុ និងវិស័យឧស្សាហកម្មផងដែរ»។
លោក ហ៊ុន សែន ក៏បានថ្លែងថា កម្ពុជាត្រៀមខ្លួនជាស្រេចក្នុងការរួមចំណែក ជាមួយដៃគូពាក់ព័ន្ធ ដើម្បីការពារប្រព័ន្ធពាណិជ្ជកម្មសេរី និងធានាដល់វិនិយោគិន ដោយផ្តល់នូវជំនឿទុកចិត្ត ការធានានូវសុខសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងក្របខ័ណ្ឌច្បាប់ ប្រកបដោយតម្លាភាព និងគណនេយ្យភាព។ នៅទន្ទឹមនេះដែរ លោក ហ៊ុន សែន ក៏បានអំពាវនាវដល់ដៃគូអភិវឌ្ឍន៍នានា ផ្ដល់ជំនួយបច្ចេកទេសផ្សេងៗ ដល់ប្រទេសអភិវឌ្ឍន៍តិចតួច ដូចជាកម្ពុជា ដើម្បីជំរុញនូវកំណើនសេដ្ឋកិច្ច ប្រកបដោយប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។