របប​ភ្នំពេញ​ថា លោក សម រង្ស៊ី ប្រឌិត​រឿង​លោក ហ៊ីង ប៊ុនហៀង ដើម្បី​ចំណេញ​នយោបាយ

ដោយ ទីន ហ្សាការីយ៉ា
2019-05-16
អ៊ីម៉ែល
មតិ
Share
បោះពុម្ព
លោកនាយក​រដ្ឋមន្ត្រី ហ៊ុន សែន (កណ្ដាល) លោក ហ៊ីង ប៊ុនហៀង (ឆ្វេង) អគ្គ​មេបញ្ជាការ​រង​នៃ​កង​យោធពល​ខេមរភូមិន្ទ និង​ជា​មេបញ្ជាការ​នៃ​បញ្ជា​ការដ្ឋាន​អង្គរក្ស​លោក ហ៊ុន សែន ក្នុង​ពិធី​​សម្ពោធ​សមិទ្ធផល​នានា​នៅ​ទី​បញ្ជាការដ្ឋាន​អង្គរក្ស ដែល​មាន​តម្លៃ​ដល់​ទៅ​ជាង ៤​លាន​ដុល្លារ​អាមេរិក កាល​ពី​ថ្ងៃ​ទី២១ ខែ​មិថុនា ឆ្នាំ​២០១៨។
លោកនាយក​រដ្ឋមន្ត្រី ហ៊ុន សែន (កណ្ដាល) លោក ហ៊ីង ប៊ុនហៀង (ឆ្វេង) អគ្គ​មេបញ្ជាការ​រង​នៃ​កង​យោធពល​ខេមរភូមិន្ទ និង​ជា​មេបញ្ជាការ​នៃ​បញ្ជា​ការដ្ឋាន​អង្គរក្ស​លោក ហ៊ុន សែន ក្នុង​ពិធី​​សម្ពោធ​សមិទ្ធផល​នានា​នៅ​ទី​បញ្ជាការដ្ឋាន​អង្គរក្ស ដែល​មាន​តម្លៃ​ដល់​ទៅ​ជាង ៤​លាន​ដុល្លារ​អាមេរិក កាល​ពី​ថ្ងៃ​ទី២១ ខែ​មិថុនា ឆ្នាំ​២០១៨។
Photo courtesy of Hun Sen Facebook Page

មន្ត្រី​នាំ​ពាក្យ​របប​ក្រុងភ្នំពេញ​និយាយ​ថា លោក សម រង្ស៊ី កំពុង​ប្រឌិត​រឿង​ទាំង​ស្រមើស្រមៃ​ចោទ លោក ហ៊ុន សែន ថា ចង់​សម្លាប់ លោក ហ៊ីង ប៊ុនហៀ​ង បំបិទមាត់ ដូច លោក ហុក ឡង់ឌី អតីត​អគ្គស្នងការ​នគរបាល​ជាតិ ដើម្បី​កេង​ចំណេញ​នយោបាយ។ អ្នកវិភាគ​ថា នេះ​មិនមែន​ជា​ការ​ញុះញង់​ទេ តែ​ជា​សារ​ពញ្ញាក់​អារម្មណ៍ ប្រាប់​អ្នក​ដែល​កំពុង​ធ្វើ​ការ​ជាមួយ​មេដឹកនាំ​កុម្មុយនិស្ត។

មន្ត្រី​នាំ​ពាក្យ​ទីស្ដីការគណៈរដ្ឋមន្ត្រី លោក ផៃ ស៊ីផាន ថា លោក សម រង្ស៊ី គ្មាន​សមត្ថភាព​ញុះញង់​រដ្ឋាភិបាល ឱ្យ​បែកបាក់​បាន​ទេ។ លោក​ថា កន្លងមក លោក សម រង្ស៊ី ធ្លាប់​បរាជ័យ​ច្រើនដង​ហើយ និង​កំពុង​ប្រឈម​បញ្ហា​ធ្ងន់ធ្ងរ​ខ្លួនឯង គឺ​ការ​បែកបាក់​ផ្ទៃក្នុង​របស់​គណបក្ស​សង្គ្រោះជាតិ៖ «អាហ្នឹង​ជា​ការ​ប្រឌិត​របស់​គាត់​។ គាត់​គួរតែ​ទទួលស្គាល់​បរាជ័យ​របស់​គាត់»

លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ បាន​បង្ហោះសារ​ក្នុង​ហ្វេសប៊ុក (facebook) កាលពី​ថ្ងៃ​ទី​១៤ ឧសភា ថា លោក ហ៊ុន សែន មេដឹកនាំ​របប​ក្រុងភ្នំពេញ មាន​បំណង​ចង់​សម្លាប់ លោក ហ៊ីង ប៊ុនហៀង មេបញ្ជាការ​កង​អង្គរក្ស ដើម្បី​បំបិទមាត់ ព្រោះ​ដឹង​រឿង​លោក​ច្រើន​ពេក ដូច ករណី​ស្លាប់ ដោយ​មិន​ដឹង​មូលហេតុ​ច្បាស់លាស់ របស់ លោក ហុក ឡង់ឌី កាលពី​ឆ្នាំ​២០០៨។

ក្នុង​សារ​ដដែល លោក សម រង្ស៊ី ជំរុញ​ឱ្យ​លោក ហ៊ីង ប៊ុនហៀង ហ៊ាន​ងើប​ប្រឆាំង​នឹង​លោក ហ៊ុន សែន ព្រោះ​លោក​អះអាង​ថា កងកម្លាំង​ប្រដាប់អាវុធ ស្នេហា​ជាតិ ដែល​បង្កប់​ក្បែរ​ខ្លួន​លោក ហ៊ុន សែន កំពុង​ត្រៀមខ្លួន​គាំទ្រ​វត្តមាន​លោក​វិល​ចូល​កម្ពុជា៖ «ហ៊ុន សែន ដឹង។ ដឹង​ថា ថ្ងៃ​ណាមួយ​គេ (​ប៉ូលិស​អន្តរជាតិ​) នឹង​ចាប់ ហ៊ីង ប៊ុនហៀង។ ហ៊ីង ប៊ុនហៀ​ង ត្រូវ​ឆ្លើយ​ទទួលស្គាល់​ថា ហ៊ុន សែន ជា​អ្នកបញ្ជា។ អ៊ីចឹង ហ៊ុន សែន ដឹង ថា​ថ្ងៃ​ណាមួយ ហ៊ីង ប៊ុនហៀង ឆ្លើយ​ដាក់ ហ៊ុន សែន ហើយ​។ ពេលនោះ ដឹង​អស់ចិត្ត​ហើយ ហ៊ុន សែន ត្រូវ​សម្លាប់ ហ៊ីង ប៊ុនហៀង មុន ហ៊ុន ប៊ុនហៀង និយាយ ដូច ហ៊ុន សែន បាន​សម្លាប់ ហុក ឡង់ឌី មុន ហុក ឡង់ឌី និយាយ។ អ៊ីចឹង បាន​ខ្ញុំ​ប្រាប់ ហ៊ីង ប៊ុនហៀង ថា ចាំ​អ្វី​ទៀត កុំ​ឱ្យ ហ៊ុន សែន វាយ​មុន វាយ ហ៊ុន សែន មុន​ទៅ។ សំឡេង​ទះដៃ​។ វា​ចូល​ដល់​ដំណាក់កាល​ពាល​ស៊ី​ពាល។ យើង​ធ្វើ​ម្ដេច​ឱ្យ​ពាល វា​ស៊ី​ពាល​គ្នា​វា​ទៅ​បងប្អូន»

អតីត​អគ្គស្នងការ​នគរបាល​ជាតិ លោក ហុក ឡង់ឌី ស្លាប់​កាលពី​យប់​ថ្ងៃ​ទី​០៩ វិច្ឆិកា ឆ្នាំ​២០០៨​។ រដ្ឋាភិបាល​អះអាង ការ​ស្លាប់​នោះ ដោយសារ​ផ្ទុះ​ឧទ្ធម្ភាគចក្រ (យន្តហោះ) បន្ទាប់ពី​ត្រូវ​រន្ទះបាញ់ នៅ​ខេត្ត​ស្វាយរៀង។

លោក សម រង្ស៊ី ថា លោក ហ៊ីង ប៊ុនហៀង បាន​ក្លាយ​ជា​ឧបករណ៍ ដើម្បី​សម្លាប់​មនុស្ស​ដូច លោក ហុក ឡង់ឌី និង​ត្រូវ​បាន​សហរដ្ឋអាមេរិក ដាក់ទណ្ឌកម្ម​មិន​ឱ្យ​ចូល​ទឹកដី​អាមេរិក​ដូចគ្នា។

នៅ​ឆ្នាំ​២០០៦ លោក ហុក ឡងឌី ត្រូវ​សហរដ្ឋអាមេរិក​បា​នបដិសេធ​មិន​ព្រម​ផ្ដល់​ទិដ្ឋាការ ឱ្យ​ចូលរួម​ក្នុង​សន្និសីទ​មួយ ដោយសារតែ​មានការ​ចោទ​ថា លោក ហុក ឡងឌី មានការ​ពាក់ព័ន្ធ​ទៅ​នឹង​ការ​ជួញដូរ​មនុស្ស។

នេះ​មិនមែន​ជា​ករណី​ថ្មី ដែល​មន្ត្រី​របប​ក្រុងភ្នំពេញ បដិសេធ​ការ​ចោទ​របស់ លោក សម រង្ស៊ី ទេ​។ កន្លង​ទៅ សូម្បី លោក ហ៊ុន សែន ក៏​ធ្លាប់​អះអាង​ថា លោក សម រង្ស៊ី ប្រឌិត​រឿង ដើម្បី​ញុះញង់​ផ្ទៃក្នុង​គណបក្ស​កាន់អំណាច​ដែរ ដូចជា ករណី លោក សម រង្ស៊ី លើកឡើង​ថា គណបក្ស​ប្រជាជន​កម្ពុជា មាន​បែក​ចែង​ជា ក្រុម លោក ស ខេង ក្រុម លោក ទៀ បាញ់ និង​ក្រុម​អ្នកស្រី ម៉ែន សំអន ជាដើម។

អ្នកវិភាគ​នយោបាយ កំពុង​រស់នៅ​ប្រទេស​ហ្វាំងឡង់ លោក គឹម សុខ យល់ថា បើ​ទោះ​ពិត ឬ​មិន​ពិត តែ​ការ​លើកឡើង​របស់ សម រង្ស៊ី ជា​សារ​ពញ្ញាក់​អារម្មណ៍​ឱ្យ​ពលរដ្ឋ និង​អ្នកស្នេហាជាតិ​ក្នុង​គណបក្ស​កាន់អំណាច បាន​ឃើញ និង​យល់​ពី​របៀប​ដឹកនាំ​របស់​មេដឹកនាំ​កុម្មុយនិស្ត៖ «ឱ្យ​ឃើញ​អំពី​ការពិត​នៅ​ក្នុង​ផ្ទៃក្នុង​គណបក្ស​ប្រជាជន​កម្ពុជា ថា​របៀប​ដឹកនាំ​របស់​គេ គឺ​ដើម្បី​អំណាច ប្រយោជន៍​ក្រុម​គ្រួសារ លោក ហ៊ុន សែន ប៉ុណ្ណឹង»

បើ​ទោះ មន្ត្រី​របប​ក្រុងភ្នំពេញ និង លោក ហ៊ុន សែន អះអាង​ថា គណបក្ស​កាន់អំណាច​នឹង​មិន​បែកបាក់ តាម​ការ​ញុះញង់ តែ​លោក សម រង្ស៊ី អះអាង​ថា ឥឡូវ លោក​ប្រមូល​បាន​កម្លាំង​ជ្រោមជ្រែង​៣​ក្រុម គឺ ក្រុម​អ្នកស្នេហាជាតិ​ផ្ទៃក្នុង​របស់​គណបក្ស​កាន់អំណាច ក្រុម​ពលរដ្ឋ​ទាំង​ក្នុង និង​ក្រៅ​ប្រទេស ដែល​ត្រៀម​ទទួល និង​ត្រៀម​អម​ដំណើរ លោក​វិល​ចូល​ស្រុក និង​រដ្ឋាភិបាល​ប្រទេស​ជិត​កម្ពុជា ដែល​ប្រឆាំង​នយោបាយ​រណប​ចិន ព្រោះ​ប៉ះពាល់​ដល់​សន្តិសុខ និង​ប្រយោជន៍​ប្រទេស​ទាំងនោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល