លោក ហ៊ុន សែន និង​លោក សម រង្ស៊ី រង​ការ​រិះគន់​ដែល​យក​សេរីភាព​លោក កឹម សុខា ភ្នាល់​គ្នា

ដោយ សេក បណ្ឌិត
2018-11-11
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន (ឆ្វេង) និង​លោក សម រង្ស៊ី អតីត​ប្រធាន​គណបក្ស​សង្គ្រោះជាតិ។
លោក​នាយករដ្ឋមន្ត្រី ហ៊ុន សែន (ឆ្វេង) និង​លោក សម រង្ស៊ី អតីត​ប្រធាន​គណបក្ស​សង្គ្រោះជាតិ។
Photo: RFA

អ្នកវិភាគ និង​អ្នក​ដែល​ធ្លាប់​ជាប់​ពន្ធនាគារ​ដោយ​អយុត្តិធម៌​រិះគន់​លោក ហ៊ុន សែន និង​លោក សម រង្ស៊ី ដែល​យក​សេរីភាព​របស់​លោក កឹម សុខា មក​ធ្វើជា​ល្បែងភ្នាល់​គ្នា។ ពួកគាត់​ស្នើ​ទៅ​អ្នក​នយោបាយ​កុំ​យក​រឿង​ជាតិ​មក​ធ្វើជា​ល្បែងភ្នាល់​គ្នា។

ប្រតិកម្ម​របស់​ពី​មជ្ឈដ្ឋាន​នានា​រួម​ទាំង​ហ្វេសប៊ុក (Facebook) របស់​លោក កឹម សុខា ផង បង្ហាញ​ការ​មិន​ពេញចិត្ត​នៃ​ល្បែង​នយោបាយ​របស់​លោក ហ៊ុន សែន និង​លោក សម រង្ស៊ី ដែល​យក​សេរីភាព​របស់​លោក កឹម សុខា មក​ភ្នាល់​គ្នា។

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ លោក វន់ ពៅ ដែល​ធ្លាប់​ជាប់​ពន្ធនាគារ​ព្រោះ​វិបត្តិ​នយោបាយ​បាន​សរសេរ​នៅ​លើ​ហ្វេសប៊ុក​របស់​លោក​ថា៖ «យុត្តិធម៌ និង​សេរីភាព​មិនមែន​ជា​រឿង​ភ្នាល់​គ្នា​នោះ​ទេ​!!! លោក​បន្ត​ថា​ពេល​បាន​ស្ដាប់​ឮ និង​ដឹង​រឿង​នេះ​ហើយ​នឹក​សែន​ហួសចិត្ត​មែនទែន​!!!»​

រីឯ​អគ្គលេខាធិការ​សម្ព័ន្ធ​សហគមន៍​កសិករ​កម្ពុជា លោក ថេង សាវឿន ដែល​ធ្វើ​ការងារ​ទាក់ទង​នឹង​កសិករ និង​ធ្លាប់​ជាប់​ពន្ធនាគា​រទាំង​អយុត្តិធម៌​ដែរ​នោះ ក៏បាន​ឲ្យ​អាស៊ីសេរី​ដឹង​ថា ការ​យក​សេរីភាព​និង​ជីវិត​មនុស្ស​មក​ធ្វើជា​ល្បែងភ្នាល់​គ្នា​គឺជា​ការ​បង្ហាញ​អំពី​ការ​មិន​ផ្ដល់​តម្លៃ សេចក្ដីថ្លៃថ្នូរ និង​ការ​គោរព​ជីវិត​ឯកជន​នៃ​បុគ្គល​ដែល​ត្រូវ​គេ​យក​ភ្នាល់​គ្នា។ លោក​លើកឡើង​ថា ក្នុងនាម​លោក​ជា​ជន​ធ្លាប់​ជាប់ឃុំ​គឺ​មាន​ការ​ឈឺ​ចិត្ត ឬ​ប៉ះទង្គិច​ផ្លូវចិត្ត​នៅ​ពេល​សេរីភាព​របស់​ខ្លួន​ត្រូវ​បាន​បុគ្គល​ណា​ម្នាក់ ឬ​អ្នកនយោបាយ​យក​មក​ធ្វើជា​ល្បែងភ្នាល់​គ្នា​បែប​នេះ៖ «សម្រាប់​ការ​ភ្នាល់​ដោយ​ប្រើ​ប្រាស់​មនុស្ស​ជា​ចំណាប់ខ្មាំង ឬក៏​ជា​វត្ថុបំណង​នៃ​ការ​ភ្នាល់​ដើម្បី​ចាញ់​ឈ្នះ​ខ្ញុំ​គិត​ថា​រឿង​នេះ​ជា​រឿង​មួយ​ហាក់បីដូចជា​មិនបាន​គិត​គូ​ពី​សេចក្ដីថ្លៃថ្នូរ​នៃ​មនុស្ស»

ក្រៅពី​សកម្មជន​សិទ្ធិមនុស្ស​ពីរ​រូប​នេះ អ្នក​សិក្សា​ការ​អភិវឌ្ឍ​សង្គម​លោក​បណ្ឌិត មាស នី ក៏​មិន​ពេញចិត្ត​ចំពោះ​ល្បែង​នយោបាយ​របស់​លោក ហ៊ុន សែន និង​លោក សម រង្ស៊ី ដែរ។ លោក​បណ្ឌិត មាស នី បាន​សរសេរ​នៅ​លើ​ហ្វេសប៊ុក​របស់​លោក​ថា ការ​បបួល​របស់​លោក សម រង្ស៊ី ហៅ​លោក ហ៊ុន សែន ភ្នាល់​គ្នា រឿង​ដោះលែង​លោក កឹម សុខា ជា​កំហុស​ដដែលៗ និង​បាន​ហៅ​ការ​ឆ្លើយ​របស់​លោក ហ៊ុន សែន ទៅ​លោក សម រង្ស៊ី វិញ​ថា ជា​នយោបាយ​មាត់​អត់​គម្រប ។ លោក​បណ្ឌិត​ថែមទាំង​លើកឡើង​ថា បើ​លោក​ជា​សហគមន៍​អន្តរជាតិ​លោក​ពិតជា​មានការ​ខកចិត្ត​និង​ធុញទ្រាន់​លើ​របៀប​ដែល​បងប្អូន​ពីរ​នាក់​នេះ​ឈ្លោះ​គ្នា​ណាស់។

ការរិះគន់​របស់​អ្នកឃ្លាំមើល​សង្គម​បែបនេះ ខណៈ​លោក ហ៊ុន សែន និង លោក សម រង្ស៊ី បាន​យក​សេរីភាព​របស់​លោក កឹម សុខា ដែល​កំពុង​ជាប់ឃុំ​នៅ​ក្នុង​ផ្ទះ​ធ្វើជា​អា​យ៉ៃ​ឆ្លើយឆ្លង។ អ្នក​ទាំងពីរ​ព្រមព្រៀង​ភ្នាល់​រឿង​ដោះលែង ឬ​មិន​ដោះលែង​លោក កឹម សុខា មុន​ថ្ងៃ​ទី​៣ ខែមីនា ឆ្នាំ​ក្រោយ​។

លោក សម រង្ស៊ី ជា​អ្នក​ផ្ដើម​រឿង​នេះ​មុន​លោក ហ៊ុន សែន កាលពី​ថ្ងៃទី​៩ ខែ​វិច្ឆិកា ដោយ​អតីត​ប្រធាន​គណបក្ស​សង្គ្រោះជាតិ​រូប​នេះ បាន​សរសេរ​លើ​ហ្វេសប៊ុក​របស់​លោក​ថា លោក សុខចិត្ត​ដើរចូល​ឲ្យ​លោក ហ៊ុន សែន ចាប់ បើ​លោក កឹម សុខា មិន​ត្រូវ​ដោះលែង​មុន​ថ្ងៃ​ទី​៣ ខែ​មីនា​ខាងមុខ។

បន្តិចក្រោយមក​លោក ហ៊ុន សែន ក៏​ឆ្លើយតប​តាមរយៈ​ប្រព័ន្ធ​ឃោសនា​របស់​លោក​គឺ​សារព័ត៌មាន “​ហ្វ្រេសញូវ (Fresh News) ថា លោក​ព្រម​ភ្នាល់។ មិនទាន់​ចប់​ត្រឹម​ប៉ុណ្ណឹង​ទេ នៅ​ថ្ងៃ​ទី​១០ ខែ​វិច្ឆិកា លោក ហ៊ុន សែន បន្ត​ប្រាប់​ទៅ​ប្រព័ន្ធ​ឃោសនា​របស់​លោក​ដោយ​ស្នើ​ទៅ​ក្រុម​គ្រួសារ​លោក កឹម សុខា កុំ​ឲ្យ​បន្ទោស​លោក​ដែល​សម្លាប់​ជីវិត​នយោបាយ​លោក កឹម សុខា នេះ​ក៏​មក​តែ​ពី​លោក សម រង្ស៊ី រុញ​លោក​ឲ្យ​ផ្ទប់​នឹង​ជញ្ជាំង​ដើម្បី​ទទួល​បានការ​ភ្នាល់​នេះ។

ប៉ុន្តែ​ក្រោយមក​លោក សម រង្ស៊ី បាន​ផ្តល់​បទ​សម្ភាស​ដល់​អាស៊ីសេរី​ថា គ្រាន់តែ​លោក ហ៊ុន សែន ព្រម​ភ្នាល់​ជាមួយ​លោក គឺ​លោក ហ៊ុន សែន បាន​ចាញ់​លោក​ទៅ​ហើយ។ លោក​បន្ត​ទៀត​ថា នេះ​ជា​ការ​បង្ហាញ​ប្រាប់​ពិភពលោក​ថា លោក ហ៊ុន សែន យក​សិទ្ធិ​អំណាច​របស់​ខ្លួន​មក​បញ្ជា​តុលាការ៖ «នាយករដ្ឋមន្ត្រី​ក៏ដោយ​ហេតុ​អី​ក៏​លោក​អះអាង​ថា​គាត់​សម្រេច​ជំនួស​តុលាការ​អ៊ីចឹង​ទេ គ្រាន់តែ​លោក ហ៊ុន សែន យល់ព្រម​ភ្នាល់​ជាមួយ​ខ្ញុំ​គាត់​ចាញ់​ខ្ញុំ​ស្រេច​ទៅ​ហើយ»

សមាជិក​ក្រុម​អ្នកវិភាគ​វ័យក្មេង​លោក បុង ដែត សង្កេត​ឃើញ​ថា អ្នកនយោបាយ​ខ្មែរ​តែង​យក​រឿង​ប្រទេសជាតិ​មក​ធ្វើជា​ល្បែងភ្នាល់​គ្នា​ជា​ញឹកញាប់។ អ្នកវិភាគ​វ័យក្មេង​រូប​នេះ ស្នើ​ទៅ​អ្នកនយោបាយ​ចាស់​វស្សា​ទាំងពីរ​ឲ្យ​បញ្ឈប់​យក​បញ្ហា​ជាតិ​មក​ធ្វើជា​ល្បែងភ្នាល់​គ្នា និង​ងាក​មក​រក​ការចរចា​គ្នា​ដែល​មជ្ឈដ្ឋាន​ជាតិ និង​អន្តរជាតិ​ចង់​ឃើញ៖ «វប្បធម៌​ទាំងអស់​នេះ​គួរតែ​លុបចោល​ទាំងអស់​ទៅ​ការ​ភ្នាល់​អីណឹង​ខាង​រដ្ឋាភិបាល​ដាក់ខ្លួន​ចុះ​យើង​មិន​អាច​ខ្វះ​គណបក្សប្រឆាំង​បានទេ»

លោក កឹម សុខា ត្រូវ​របប​លោក ហ៊ុន សែន ចាប់ខ្លួន​កាលពី​ថ្ងៃ​ទី​៣ ខែ​កញ្ញា ឆ្នាំ​២០១៧ ដោយ ចោទ​ប្រកាន់​ពី​បទ​ក្បត់ជាតិ។ កាលពី​ថ្ងៃ​ទី​១០ ខែ​កញ្ញា លោក​ត្រូវ​បាន​សមត្ថកិច្ច​នាំ​ខ្លួន​ពី​ពន្ធនាគារ​ត្រពាំង​ផ្លុង​មក​ឃុំ​ក្នុង​ផ្ទះ​វិញ​ម្ដង។ ខណៈ​លោក ហ៊ុន សែន និង​លោក សម រង្ស៊ី បាន​យក​សេរីភាព​របស់​លោក​មក​ភ្នាល់​គ្នា​បែបនេះ ហ្វេសប៊ុក​របស់​លោក កឹម សុខា បាន​សរសេរ​ពាក្យ​មួយ​ថា៖ «គាត់​មិន​មាន​សេរីភាព​មែន តែ​គាត់​មាន​សម្បជញ្ញៈ ដឹង​ថា​អ្នក​កំពុង​ធ្វើ​អ្វី​មក​លើ រូប​គាត់​និង​ប្រទេសជាតិ»

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល