នាយករដ្ឋមន្ត្រី​ជប៉ុន ចង់​ឃើញ​ការ​បោះឆ្នោត​នៅ​កម្ពុជា​ឆ្នាំ២០២៣ ដំណើរការ​ទៅ​ដោយ​សេរី ត្រឹមត្រូវ និងយុត្តិធម៌

នាយករដ្ឋមន្ត្រីជប៉ុន​លោក ហ្វូមីអូ គីស៊ីដា (KISHIDA Fumio) ចង់ឃើញ​ការ​បោះឆ្នោត​នៅ​កម្ពុជា​នៅ​ក្នុង​ឆ្នាំ២០២៣ ខាងមុខ ដំណើរការ​ទៅ​ដោយ​សេរី ត្រឹមត្រូវ និងយុត្តិធម៌ និង​ឆ្លុះបញ្ចាំង​ពី​សំឡេង​ចម្រុះ​របស់​ពលរដ្ឋ​កម្ពុជា។

លោក​នាយករដ្ឋមន្ត្រីជប៉ុន​បាន​លើកឡើង​បែបនេះ​នៅក្នុង​ជំនួប​ទ្វេភាគី​ជាមួយ​សមភាគី​របស់​លោកគឺ​លោកនាយករដ្ឋមន្ត្រី ហ៊ុន សែន កាលពីថ្ងៃទី១២ ខែវិច្ឆិកា ស្របពេល​ដែលលោក​មក​ចូលរួម​កិច្ចប្រជុំ​កំពូល​អាស៊ាននិង​កិច្ចប្រជុំ​ពាក់ព័ន្ធ​ដែល​កម្ពុជា​ធ្វើជា​ម្ចាស់​ផ្ទះ។

ក្នុង​ជំនួប​នោះ លោក គីស៊ីដា បញ្ជាក់ថា រដ្ឋាភិបាលជប៉ុន​នឹង​បន្តជួយ​ជ្រោមជ្រែង​កម្ពុជា​ក្នុងការ​រៀបចំការ​បោះឆ្នោត​ជាតិដោយផ្ដោត​លើការ​អភិវឌ្ឍន៍​ដំណើរការ​ប្រជាធិបតេយ្យ​នៅក្នុង​កម្ពុជា។

សេចក្ដីថ្លែងការណ៍​ពី​លទ្ធផល​កិច្ចប្រជុំដែលចេញ​ដោយក្រសួងការបរទេស​ជប៉ុន​បញ្ជាក់ថា ក្នុងពេល​នោះ លោកនាយករដ្ឋមន្ត្រី ហ៊ុន សែន បានឆ្លើយតប​ទៅ​លោក គីស៊ីដា វិញថា លោកនឹង​ប្រឹងប្រែង​ធានា​ឱ្យ​ការ​បោះឆ្នោត​នៅពេលខាងមុខនេះ ជាការ​បោះឆ្នោតដែល​សេរី ត្រឹមត្រូវ និង​យុត្តិធម៌។

ក្នុង​ជំនួប​នោះ​ដែរលោក គីស៊ីដា ក៏បានបញ្ជាក់​ពីបំណង​របស់​រដ្ឋាភិបាល​ជប៉ុន​ក្នុងការ​បញ្ជូន​នាវា​ស្វ័យការពារ​ជើងទឹក​ជប៉ុន​មក​ចូល​ចត​នៅ​កំពង់ផែ​កម្ពុជានិងលើក​កម្ពស់ឱ្យ​មាន​ទស្សនកិច្ច​របស់​កងស្វ័យ​ការពារជើងទឹក​ជប៉ុននៅ កំពង់ផែ កងទ័ពជើងទឹករាម​និង​សហការ​ហ្វឹកហ្វឺន​កងទ័ព​ដោយ​សុឆន្ទៈ។

ឆ្លើយតប​រឿង​នេះ លោកនាយករដ្ឋមន្ត្រី ហ៊ុន សែន បានអះអាង​នៅក្នុង​សន្និសីទ​សារព័ត៌មាន​កាលពីល្ងាច​ថ្ងៃទី១៣ ខែវិច្ឆិកា នៅពេលបិទ​បញ្ចប់​កិច្ចប្រជុំកំពូល​អាស៊ានថា អាជ្ញាធរ​កម្ពុជា​កំពុង​រៀបចំការ​ងារ​មួយ​ចំនួនដើម្បី​ឱ្យនាវា​ស្វ័យការពារ​ជើងទឹក​ជប៉ុន​មក​ចូលចត​នៅកំពង់ផែ​កម្ពុជា​ម្ដង​ទៀត​នៅ​ពេល​ខាង​មុខ។ លោក ហ៊ុន សែន ថែមទាំងអះអាងថា លោក បើកចំហ​ឱ្យបណ្ដា​ប្រទេស​ដទៃដែលចង់​ឱ្យ​នាវា​កងទ័ព​មក​ចូលចត​នៅ​កម្ពុជាមកពិនិត្យ​កំពង់ផែ​កម្ពុជាឬ​មកធ្វើ​សមយុទ្ធ​រួមគ្នា​គឺ​អាច​មក​បាន។

បើទោះជា​យ៉ាងណាបណ្ដាប្រទេស​និយមប្រជាធិបតេយ្យ​ជាពិសេស​ប្រទេស​សម្ព័ន្ធមិត្ត​អាមេរិក​ដែល​បារម្ភពី​សន្តិសុខ​ក្នុង​តំបន់​អាស៊ី នៅតែ សង្ស័យ​នៅ​ឡើយ​ពី​បញ្ហា​កំពង់ផែកងទ័ពជើង​ទឹក​រាមទាក់ទង​នឹង​វត្តមាន​កងទ័ព​ប្រជាជន​ចិននិង​ការណ៍ដែល​ប្រទេស​ចិន​អាច​បម្លែង​កំពង់ផែរាម​ទៅ​ជា​មូលដ្ឋាន​ទ័ព​របស់​ខ្លួន។

កន្លងទៅ​អាជ្ញាធរកម្ពុជា​រងការរិះគន់ថា បានរារាំង​ក្រុមការងារ​របស់​អាមេរិក​ក្នុងការ​ចុះទៅ​ពិនិត្យ​ស្ថានភាព​កំពង់ផែ​កងទ័ពជើងទឹក​រាមមិន​ឱ្យ​ទៅ​ពិនិត្យ​ទី​តាំងដែល​ពួកគេ​មាន​ការ​សង្ស័យ​ឡើយ។

ទាក់​ទង​នឹង​រឿង​នេះ​ដែរប្រធានាធិបតី​អាមេរិក​ក៏បានលើកឡើង​ពីកង្វល់​ទាក់ទង​នឹង​ស្ថានការណ៍​នៅ​មូលដ្ឋាន​ទ័ពជើងទឹក​រាម​នៅ​ខេត្តព្រះសីហនុនេះ​ដែរក្នុង​ជំនួបទ្វេភាគី​ដ៏កម្រ​មួយ​ជាមួយ​នឹង​លោកនាយករដ្ឋមន្ត្រី ហ៊ុន សែន កាលពីថ្ងៃទី១២ ខែវិច្ឆិកា។

លោកប្រធានាធិបតី ចូ បៃឌិន (Joseph R. Biden Jr.) ក៏បាន​ជំរុញ​ឲ្យ​លោកនាយករដ្ឋមន្ត្រី ហ៊ុន សែន បើក​ឡើងវិញ​នូវ​លំហ​សេរីភាព​ពលរដ្ឋនិង​នយោបាយនៅមុន​ការ​បោះឆ្នោត​ឆ្នាំ២០២៣​ខាងមុខដោះលែងសកម្មជន​ដែលត្រូវបាន​តុលាការឃុំខ្លួន​ពីបទចោទ​ប្រកាន់​នយោបាយ​រួមទាំង​ពលរដ្ឋខ្មែរ​សញ្ជាតិ​អាមេរិក​កញ្ញា សេង ធារី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។