អាជ្ញាធរខេត្តកណ្ដាល ចាប់ខ្លួនបេក្ខជនមេឃុំពុកឫស្សី ខេត្តកណ្ដាល នៃគណបក្សខ្មែរស្រលាញ់ជាតិ កាលពីថ្ងៃសៅរ៍ ទី៥ ខែមីនា ពាក់ព័ន្ធនឹងវិវាទដីធ្លី។
អគ្គហិរញ្ញិកនៃគណបក្សខ្មែរស្រឡាញ់ជាតិ លោក សៀវ វិសុទ្ធ ឲ្យដឹងកាលពីយប់ថ្ងៃសៅរ៍ ទី៥ មីនា ថា អាជ្ញាធរបានចាប់បេក្ខជនមេឃុំពុកឫស្សី ស្រុកខ្សាច់កណ្ដាល លោក ជាម សុខុម យកទៅសាកសួរនិងឃុំខ្លួននៅអធិការដ្ឋានស្រុកខ្សាច់កណ្ដាល រហូតដល់យប់ថ្ងៃដដែលមិនទាន់ដោះលែងនោះទេ។ លោកយល់ថា នេះគឺជាការគំរាមកំហែងថ្មីមួយទៀតមកលើសកម្មជនគណបក្សលោក ពីព្រោះលោក ជាម សុខុម តែងចូលរួមធ្វើសកម្មភាពការពារប្រយោជន៍របស់សហគមន៍៖ « នៅតំបន់ហ្នឹងគាត់គឺជាមនុស្សដែលមានប្រជាប្រិយភាពខ្លាំងរឿងហ្នឹងក៏ទាក់ទងនឹងរឿងនយោបាយច្រើនជាងរឿងបញ្ហាដីធ្លី។ ខ្ញុំបានសួរប៉ូលិសស្រុកហ្នឹង គេថានឹងបញ្ជូនគាត់មកលើ»។
កាលពីថ្ងៃសៅរ៍ទី៥ មីនា អាជ្ញាធរឃាត់ខ្លួនលោក ជាម សុខុមដែល ជាអនុប្រធានគណបក្សខ្មែរស្រលាញ់ជាតិស្រុកខ្សាច់កណ្ដាល ក្នុងពេលដែលលោក និងពលរដ្ឋបានទៅរារាំងគ្រឿងចក្រមិនឲ្យឈូសឆាយដីជម្លោះក្នុងបរិវេណវត្តមុនីរង្សី ហៅវត្តទួលគោកសង្កែ ចំនួន៣ហិកតារ ដែលអ្នកភូមិរក្សានិងការពារទុកជាសម្បត្តិរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។