អ្នកវិភាគ និងអ្នកឃ្លាំមើលរំពឹងថា លោក កឹម សុខា នឹងលើកយកបញ្ហានយោបាយកំពុងជាប់គាំងពេលចូលរួមបុណ្យបងប្រុសលោក ហ៊ុន សែន
2022.05.07
អ្នកវិភាគ និងអ្នកឃ្លាំមើលរំពឹងថា លោក កឹម សុខា នឹងលើកយកបញ្ហានយោបាយដែលកំពុងជាប់គាំងទៅនិយាយជាមួយលោកនាយករដ្ឋមន្ត្រី ហ៊ុន សែន ពេលលោកទៅចូលរួមពិធីបុណ្យសព បងប្រុសលោក ហ៊ុន សែន។ ការលើកឡើងបែបនេះរបស់អ្នកវិភាគ និងអ្នកឃ្លាំមើល ក្រោយពេលមេបក្សប្រឆាំង លោក កឹម សុខា មានគម្រោងទៅគោរពវិញ្ញាណក្ខន្ធ លោក ហ៊ុន ណេង ដែលកំពុងតម្កល់ធ្វើបុណ្យនៅខេត្តក្រុងកំពង់ចាម។
អ្នកវិភាគនិង អ្នកឃ្លាំមើលរំពឹងថា ពេលលោក កឹម សុខា គោរពវិញ្ញាណក្ខន្ធ លោក ហ៊ុន ណេង ដែលជាបងប្រុសលោក ហ៊ុន សែន លោក កឹម សុខា នឹងមានឱកាសបានជួបលោកនាយករដ្ឋមន្ត្រី ហ៊ុន សែន ក្នុងពិធីនោះ។ ពួកគេយល់ថា ទោះតិចឬច្រើន អ្នកនយោបាយជាន់ខ្ពស់ទាំងពីររូប នឹងលើកឡើងពីវិបត្តិនយោបាយដែលកំពុងជាប់គាំងជិត៥ឆ្នាំមកនេះ។
អ្នកវិភាគនយោបាយ ដែលកំពុងភៀសខ្លួននៅប្រទេសហ្វាំងឡង់ (Finland) លោក គឹម សុខ យល់ថា ក្នុងពិធីរំលែកទុក្ខបែបនេះ លោក កឹម សុខា ទំនងពិបាកនិយាយរឿងនយោបាយជាមួយលោក ហ៊ុន សែន។ ទោះយ៉ាងណា លោកថា ប្រសិនលោក កឹម សុខា លើកឡើងពីការបញ្ចប់ជម្លោះនយោបាយ ឬការរកផ្លូវនយោបាយសម្រាប់អ្នកជំនាន់ក្រោយ ក៏ជារឿងល្អមួយដែល លោក កឹម សុខា គួរព្យាយាមលើកឡើងជាមួយលោក ហ៊ុន សែន៖ «ពិធីបែបហ្នឹង ខ្ញុំគិតថា ទំនងពិបាកនិយាយរឿងនយោបាយ ក៏ប៉ុន្តែបើសិនជាអាចឆ្លៀតនិយាយដល់នយោបាយជាតិ ក៏ជារឿងល្អប្រសើរដែរបានន័យថា ជួបគ្នា ឆ្លៀតនិយាយគ្នា ដើម្បីរំលឹកជម្លោះរវាងគ្នាក្នុងផ្ទៃក្នុងជាតិ ចម្រើនដល់ជាតិក៏ជាការគាប់ប្រសើរសម្រាប់ជាតិដែរ»។
ចំណែក ប្រធានក្រុមប្រឹក្សាឃ្លាំមើលកម្ពុជានៅប្រទេសណ័រវ៉េ (Norway) លោក ម៉ែន ណាត ក៏ចង់ឃើញលោក កឹម សុខា លើកឡើងពីការផ្សះផ្សានយោបាយឡើងវិញក្នុងពេលនោះដែរ។ លោកយល់ថា លោក ហ៊ុន សែន អាចនឹងស្រាយចំណងវិបត្តិនយោបាយខ្លះៗ ដើម្បីឲ្យលោក ហ៊ុន សែន យកអ្វីដែលបានជជែកលោក កឹម សុខា ទៅអួតអាងប្រាប់សហគមន៍អន្តរជាតិក្នុងកិច្ចប្រជុំកំពូលអាស៊ាននិងសហរដ្ឋអាមេរិកខាងពេលខាងមុខ។
ទោះបែបនេះក្ដី លោកមិនរំពឹងថា លោក ហ៊ុន សែន នឹងយល់ព្រមដោះស្រាយជម្លោះនយោបាយទាំងស្រុងនោះទេ ព្រោះលោក ហ៊ុន សែន ហ៊ានផ្ដល់សិទ្ធិឲ្យលោក កឹម សុខា អាចធ្វើនយោបាយឡើងវិញ គឺប៉ះពាល់ដល់ផែនការផ្ទេរអំណាចដល់កូនប្រុសលោក គឺ លោក ហ៊ុន ម៉ាណែត៖ «អត់ទេមានអីផ្លាស់ប្ដូរ ទោះបីជាលោក កឹម សុខា ទៅនិយាយ ហើយលោក ហ៊ុន សែន បង្ហាញឥរិយាបថផ្អែមល្ហែមជាមួយលោក កឹម សុខា យ៉ាងណាក៏ដោយ ប៉ុន្តែនៅក្នុងទឹកចិត្តរាប់អានប្រាកដជានិយាយថា ជាការរាប់អាន ជាការរកមធ្យោបាយសម្របសម្រួលអីអ៊ីចឹងទៅ គាត់ចែតែនិយាយចោលអ៊ីចឹងទៅ ប៉ុន្តែ ក្នុងចិត្តគាត់គាត់មានធ្វើអ៊ីចឹងឯណា ពួកដឹកនាំកុម្មុយនីស្ត នយោបាយគំនិតទុច្ចរិត ខិលខូចពូកែសឹងអី»។
ការលើកឡើងបែបនេះរបស់អ្នកវិភាគ និងអ្នកឃ្លាំមើល ក្រោយលោក កឹម សុខា មានគម្រោង គោរពវិញ្ញាណក្ខន្ធ លោក ហ៊ុន ណេង ដែលកំពុងតម្កល់ធ្វើបុណ្យ នៅក្រុងកំពង់ចាម ខេត្តកំពង់ចាម។
ជំនួយការលោក កឹម សុខា គឺលោក មុត ចន្ថា ប្រាប់សារព័ត៌មានក្នុងស្រុក ( វិទ្យុវីអូឌី និងសារព័ត៌មានថ្មីៗ) ថា លោក កឹម សុខា គ្រោងទៅគោរពវិញ្ញាណក្ខន្ធ លោក ហ៊ុន ណេង នៅចុងសប្ដាហ៍នេះ។ លោកថា ការចូលរួមពិធីបុណ្យនេះ គឺជាការចូលរួមនៃការចែករំលែកទុក្ខក្នុងនាមជាខ្មែរដូចគ្នា។
លោក ហ៊ុន ណេង បងប្រុសបង្កើតរបស់លោក ហ៊ុន សែន បានទទួលមរណភាព ក្នុងអាយុ ៧២ឆ្នាំ កាលពីថ្ងៃទី៥ ខែឧសភា ដោយជំងឺគាំងបេះដូង។ លោក ហ៊ុន ណេង ធ្លាប់ជាសមាជិកអចិន្ត្រៃយ៍រដ្ឋសភា ជាអ្នកតំណាងរាស្ត្រមណ្ឌលកំពង់ចាមនៃគណបក្សប្រជាជនកម្ពុជា និងជាអតីតអភិបាលខេត្តកំពង់ចាម និងខេត្តស្វាយរៀង។
សពលោក ហ៊ុន ណេង នឹងត្រូវក្រុមគ្រួសារ យកទៅបញ្ចុះនៅវត្តសុវណ្ណគិរីរតនៈ ភ្នំប្រុស ខេត្តកំពង់ចាម ថ្ងៃទី៩ ខែឧសភាខាងមុខ។
លោក ហ៊ុន សែន និងលោក កឹម សុខា បានឆ្លើយឆ្លងគ្នាក្នុងសាររំលែកទុក្ខមរណភាពលោក ហ៊ុន ណេង ម្ដងរួចហើយ មុនពេលមានគម្រោងទៅចូលរួមផ្ទាល់ក្នុងពិធីបុណ្យនេះ។
ទាក់ទងរឿងនេះដែរ វិទ្យុអាស៊ីសេរីមិនអាចសុំបញ្ជាក់បន្ថែមពីជំនួយការលោក កឹម សុខា គឺលោក មុត ចន្ថា និងក្រុមមេធាវីលោក កឹម សុខា បានទេនៅថ្ងៃទី៧ ខែឧសភា។
ចំណែកអ្នកនាំពាក្យរដ្ឋសភា លោក ឡេង ប៉េងឡុង ឲ្យវិទ្យុអាស៊ីសេរីដឹងនៅថ្ងៃទី៧ ខែឧសភា ថា ពិធីបុណ្យសពលោក ហ៊ុន ណេង គឺរដ្ឋសភាបានរៀបចំឲ្យមានគណៈកម្មការរៀបចំបុណ្យ និងរៀបចំឲ្យមានមន្ត្រីរាជការចូលរួមពិធីបុណ្យនេះដែរ។ លោកបន្តថា អ្នកដែលចង់ទៅ គោរពវិញ្ញាណក្ខន្ធ លោក ហ៊ុន ណេង អាចទាក់ទងទៅសាច់ញាតិសព ឬគណៈកម្មការបុណ្យដែលរដ្ឋសភារៀបចំ។ ចំពោះគម្រោងលោក កឹម សុខា ដែលគម្រោងទៅគោរពវិញ្ញាណក្ខន្ធ លោក ហ៊ុន ណេង លោក ឡេង ប៉េងឡុង យល់ថា គឺជារឿងធម្មតាសម្រាប់ពលរដ្ឋខ្មែរតែងតែធ្វើបែបនេះនៅពេលក្រុមគ្រួសារអ្នកណានរណាម្នាក់បាត់បង់សាច់ញាតិ៖ «បាទទាក់ទងគណៈកម្មការមកមុនក៏បានហើយអាចទាក់ទងសម្ដេចនាយក ហ៊ុន សែន ក៏បានព្រោះលោកជាអ្នករៀបចំបុណ្យហ្នឹងដែរបាទ»។
កាលពីថ្ងៃទី៥ ខែឧសភា ឆ្នាំ២០២០ លោក ហ៊ុន សែន និងលោក កឹម សុខា ធ្លាប់បានជជែកគ្នារយៈពេលជិត១ម៉ោង នៅពេលលោក កឹម សុខា ទៅដាក់កម្រងផ្កាគោរពវិញ្ញាណក្ខន្ធ ថ្ងៃបុណ្យសព ម្តាយក្មេក លោក ហ៊ុន សែន។ ក្រោយមកគេឃើញលោក លោក កឹម សុខា បានប្រើប្រាស់សេរីភាពរបស់ខ្លួនបានទូលំទូលាយជាងមុនបន្តិច ដោយលោក កឹម សុខា អាចចុះមូលដ្ឋានចែកអំណោយ និងជួបពលរដ្ឋ ប៉ុន្តែ ជម្លោះនយោបាយនៅតែបន្តជាប់គាំងដដែល ដោយមេបក្សប្រឆាំងរូបនេះ មិនអាចធ្វើនយោបាយ និងចេញក្រៅប្រទេសបាននោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។