សកម្មជន​បក្ស​សង្គ្រោះ​ជាតិ និង​សហគមន៍​ខ្មែរ​នៅ​សហរដ្ឋ​អាមេរិក ជួប​ជុំ​គ្នា​បាតុកម្ម​ប្រឆាំង​វត្តមាន​ចិន​នៅ​កម្ពុជា ក្នុង​ខួប ២៩ឆ្នាំ នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស ២៣ តុលា

ដោយ ខែ សុណង
2020-10-23
Share
តវ៉ាមុខស្ថានទូតចិននៅ DC 102320 សកម្មជន​គណបក្ស​សង្គ្រោះ​ជាតិ និង​សហគមន៍​ខ្មែរ​នៅ​បណ្ដា​រដ្ឋ​មួយ​ចំនួន​ក្នុង​សហរដ្ឋ​អាមេរិក មក​ជួបជុំគ្នា​បាតុកម្ម​មុខ​ស្ថានទូត​ចិន​ដាក់​ញត្តិ​ប្រឆាំង​វត្តមាន​ចិន​នៅ​កម្ពុជា នៅ​ថ្ងៃ​ទី២៣ ខែតុលា ដែល​ជា​ខួប ២៩ឆ្នាំ នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស។
រូប៖ RFA/សន ចាន់រដ្ឋា

សកម្មជន​គណបក្ស​សង្គ្រោះ​ជាតិ និង​សហគមន៍​ខ្មែរ​នៅ​បណ្ដា​រដ្ឋ​មួយ​ចំនួន​ក្នុង​សហរដ្ឋ​អាមេរិក បាន​ទៅ​ជួបជុំគ្នា​បាតុកម្ម​មុខ​ស្ថានទូត​ចិន​ដាក់​ញត្តិ​ប្រឆាំង​វត្តមាន​ចិន​នៅ​កម្ពុជា នៅ​ថ្ងៃ​ទី២៣ ខែតុលា ដែល​ជា​ខួប​២៩ឆ្នាំ នៃ​កិច្ចព្រមព្រៀង​សន្តិភាព​ទីក្រុង​ប៉ារីស។

ក្រុម​បាតុករ​ដែល​ទៅ​ជួបជុំ​គ្នា​តវ៉ា​មុខ​ស្ថានទូត​ចិន យល់​ឃើញ​ថា វត្តមាន​ចិន​នៅ​កម្ពុជា បាន​បណ្ដាល​ឲ្យ​មាន​អំពើពុករលួយ ការ​វិនិយោគ​ដោយ​គ្មាន​ភាព​ស្មោះត្រង់ កេង​ប្រវ័ញ្ច ការ​រំលោភ​សិទ្ធិមនុស្ស និង​ដីធ្លី​របស់​ពលរដ្ឋ។ ក្រៅ​ពី​នេះ រួម​ទាំង​ក្ដី​បារម្ភ​ចំពោះ​ឥទ្ធិពល​ចិន ដែល​កំពុង​គ្របដណ្ដប់​លើ​ដែន​អធិបតេយ្យ​របស់​ខ្មែរ។

លោក អេង ឆៃអ៊ាង អនុប្រធាន​គណបក្ស​សង្គ្រោះ​ជាតិ មាន​ប្រសាសន៍​ថា ព័ត៌មាន​ពី​ការ​ប៉ុនប៉ង​បង្កើត​យោធា ឬ​មូលដ្ឋាន​ទ័ព​ចិន​នៅ​កម្ពុជា បង្ក​ឲ្យ​រដ្ឋាភិបាល​កម្ពុជា​រឹត​តែ​មាន​ភាព​លម្អៀង​ទៅ​រក​មហា​​អំណាច​ចិន ​ដែល​នាំ​ហានិភ័យ​ដល់​សន្តិសុខ​តំបន់៖ «ជា​ទម្លាប់​របស់​ចិន​កុម្មុយនិស្ត​មិន​ដែល​បាន​ទទួល​ញត្តិ​ឬ​មតិ​យោបល់​របស់​ប្រជាពលរដ្ឋ​នៃ​ប្រទេស​ដទៃ​ដែល​ខ្លួន​ឯង​រារាំង​នោះ​ទេ កុំ​ថា​ឡើយ​ញត្តិ​ខ្លួនឯង​ក៏​មិន​ដែល​គោរព​ផង​ប៉ុន្តែ​ក៏​យើង​មិន​ចុះ​ញ៉ម​ដែរ យើង​ត្រូវ​តែ​តស៊ូ​ព្យាយាម​ធ្វើ​យ៉ាង​ណា​រហូត​ដល់​ចិន​ហ្នឹង​ដឹង​ហើយ​ដក​ខ្លួន​ចេញ​ពី​កម្ពុជា។ វា​ត្រូវ​តែ​មាន​ប្រយោជន៍​រឿង​ដែល​ចិន​ប៉ុនប៉ង​បង្កើត​មូលដ្ឋាន​សឹក​នៅ​កម្ពុជា​ហ្នឹង គឺ​បណ្ដា​ប្រទេស​នានា​លើ​ពិភពលោក​កំពុង​តែ​តាមដាន​កំពុង​តែ​យក​ចិត្ត​ទុកដាក់​កំពុង​តែ​ចាប់​អារម្មណ៍។ ក្នុង​នាម​យើង​ជា​ពលរដ្ឋ​ខ្មែរ​ក៏​យើង​មិន​ត្រូវ​នៅ​ស្ងៀម​ដែរ យើង​ត្រូវ​ចូលរួម​ជាមួយ​បណ្ដា​ប្រទេស​ជា​មិត្ត​នានា ដែល​គេ​ចង់​ឲ្យ​កម្ពុជា​មាន​អព្យាក្រឹត្យ​ពិតប្រាកដ»

លោក​ថា រីឯ​ក្រុមហ៊ុន​របស់​ចិន​ដែល​មក​បោះ​ទុន​រក​ស៊ី​នៅ​កម្ពុជា​វិញ ខ្លះ​បង្កើត​ទំនាស់​រ៉ាំរ៉ៃ​ជាមួយ​ពលរដ្ឋ​មូលដ្ឋាន ខ្លះ​ទៀត​រង​ការ​ចោទ​ប្រកាន់​រឿង​បំផ្លិចបំផ្លាញ​បរិស្ថាន និង​មួយ​ចំនួន​កំពុង​ជាប់​សង្ស័យ​ពី​រឿង​អនុវត្ត​គម្រោងការណ៍​សម្ងាត់​ឱ្យ​យោធា​ចិន។ ជាឧទាហរណ៍​ ក្រុមហ៊ុន​ យូឌីជី (UDG) កំពុង​ស្ថាបនា​វាល​យន្តហោះ​ខ្នាត​ធំ និង​កំពង់​ផែ​ទឹក​ជ្រៅ​នៅ​ក្នុង​ខេត្ត​កោះកុង ដែល​ត្រូវ​បាន​ក្រុម​អ្នក​ជំនាញ​ផ្នែក​សន្តិសុខ​វាយ​តម្លៃ​ថា ជា​ទីតាំង​ដែល​យន្តហោះ និង​នាវា​ចម្បាំង​របស់​ចិន​អាច​ចូល​ចត​បាន។

ពលរដ្ឋ​ខ្មែរ​អាមេរិកកាំង​នៅ​រដ្ឋ​អូហៃយូ (Ohio) លោក ស៊ុន ធួន ថ្លែង​ថា ទោះ​បី​ជា​ធ្វើ​ដំណើរ​ឆ្ងាយ​ដល់​ទៅ​ជិត​៨​ម៉ោង​តែ​លោក​ត្រូវ​តែ​ចូលរួម។ លោក​ខក​ចិត្ត​ដែល​អាជ្ញាធរ​ខ្មែរ​បាន​រារាំង និង​ចាប់​ពលរដ្ឋ​ដែល​ហ៊ាន​ចេញ​សម្ដែង​មតិ​ប្រឆាំង​វត្តមាន​ចិន នៅ​គ្រា​ដែល​ប្រទេស​ជាតិ​កំពុង​ប្រឈម​គ្រោះ​ថ្នាក់​ និង​កាន់​តែ​លិចលង់ ហើយ​លោក​​មើល​ឃើញ​ថា​អ្នក​ដឹកនាំ​ប្រទេស​រណប​ចិន​ដើម្បី​តែ​រក្សា​អំណាច​របស់​ខ្លួន​ប៉ុណ្ណោះ៖ «ចិន​និង​ហ៊ុន សែន ធ្វើការ​ជាមួយ​គ្នា​ដើម្បី​ពង្រីក​សមុទ្ទ​ខាង​ត្បូង រឿង​នេះ​ឯង​ដែល​ហ៊ុន សែន ផ្ដេកផ្តួល​ទៅ​ខាង​ចិន មិន​ព្រម​ធ្វើការ​ជាមួយ​អាមេរិកាំង​ដើម្បី​ជួយ​ជនជាតិ​ខ្មែរ​យើង​ខុស​ចិន​ផ្ដួល​ទៅ​ខាង​ចិន​រក្សា​រដ្ឋ​អំណាច​របស់​គាត់​ ជនជាតិ​ខ្មែរ​រង​ទុក្ខ​វេទនា​ដោយសារ​គាត់​ម្នាក់»

អ្នក​តវ៉ា​បាន​រំសាយ​ទៅ​វិញ​បន្ទាប់​ពី​បាន​ឈរ​ស្រែក​តវ៉ា និង​លើក​បដា​ប្រមាណ​៣​ម៉ោង តែ​ពុំ​ឃើញ​មាន​មន្ត្រី​តំណាង​ស្ថានទូត​ចិន​ចេញ​មក​ទទួល​ញត្តិ​ពី​ពួកគេ។ ប៉ុន្តែ​ពួកគេ​ថា​នឹង​បញ្ជូន​ញត្តិ​នេះ​ទៅ​តាម​ប្រអប់​សំបុត្រ ធ្វើ​យ៉ាង​ណា​ឲ្យ​សារ​របស់​ពួកគាត់​បាន​លឺ​ទៅ​ដល់​ស្ថានទូត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។