ព្រះសពសម្ដេចក្រុមព្រះ នរោត្ដម រណឫទ្ធិ ត្រូវបានធ្វើពិធីថ្វាយព្រះភ្លើងនៅព្រឹកថ្ងៃទី៨ ខែធ្នូនេះ។ ព្រះសពរបស់ទ្រង់ ត្រូវបានដង្ហែចេញពីព្រះដំណាក់ចាស់មកកាន់ព្រះមេរុ មុខវត្តបទុមវត្តី រាជធានីភ្នំពេញ ដើម្បីធ្វើពិធីថ្វាយព្រះភ្លើងក្រោមព្រះរាជាធិបតីព្រះមហាក្សត្រ។
ព្រះមហាក្សត្រ ព្រះបាទ នរោត្ដម សីហមុនី បានយាងជាអធិបតីក្នុងពិធីនេះ ដោយមានការយាងនិងអញ្ជើញចូលរួមពីព្រះមហាក្សត្រី នរោត្ដម មុនីនាថ សីហនុ រាជវង្សានុវង្ស លោកនាយករដ្ឋមន្ត្រី ហ៊ុន សែន ប្រធានព្រឹទ្ធសភាលោក សាយ ឈុំ ប្រធានរដ្ឋសភាលោក ហេង សំរិន មេដឹកនាំបក្សប្រឆាំងលោក កឹម សុខា ព្រមទាំងមន្ត្រីជាន់ខ្ពស់រដ្ឋាភិបាលក្រុងភ្នំពេញ មន្ត្រីរាជការ និងប្រជាពលរដ្ឋជាច្រើននាក់ទៀតចូលរួមដង្ហែព្រះសព។
ជាមួយគ្នានេះរដ្ឋាភិបាលបានកំណត់យកថ្ងៃទី៨ ខែធ្នូនេះ ជាថ្ងៃកាន់ព្រះមរណទុក្ខផ្លូវការទូទាំងប្រទេស ដោយកំណត់ឱ្យបង្ហូតទង់ជាតិត្រឹមពាក់កណ្តាលដង នៅតាមស្ថាប័នរដ្ឋ និងឯកជន។ បន្ថែមលើនេះ គ្រប់ស្ថានីយ៍វិទ្យុ និងទូរទស្សន៍ជាតិ និងឯកជន ទាំងអស់ត្រូវផ្អាកការសម្តែង និងចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយ គគ្រឹកគគ្រេងផងដែរ។
សម្ដេចក្រុមព្រះ នរោត្ដម រណឫទ្ធិ បានយាងចូលព្រះទិវង្គត នៅថ្ងៃទី២៨ ខែវិច្ឆិកា ក្នុងជន្មាយុ ៧៧ ព្រះវស្សា ដោយព្រះរាគាពាធ។ នៅព្រឹកថ្ងៃទី៥ ខែធ្នូ ព្រះសពព្រះអង្គត្រូវបានយាងដង្ហែពីប្រទេសបារាំងមកកម្ពុជាវិញ។
កាលនៅមានព្រះជនសម្តេចក្រុមព្រះ នរោត្តម រណឫទ្ធិ បានប្រឡូកក្នុងឆាកនយោបាយ នៅឆ្នាំ១៩៨៩ ក្នុងតួនាទីអគ្គលេខាធិការគណបក្សហ្វ៊ុនស៊ិនប៉ិចមុននឹងឡើងជាប្រធានបក្សនៅឆ្នាំ១៩៩២។ ព្រះអង្គធ្លាប់កាន់តំណែងជានាយករដ្ឋមន្ត្រីទីមួយពីឆ្នាំ១៩៩៣ ដល់ឆ្នាំ១៩៩៧ មុននឹងត្រូវលោកនាយករដ្ឋមន្ត្រីធ្វើរដ្ឋប្រហារទម្លាក់ព្រះអង្គពីតំណែង។ ព្រះអង្គធ្វើជាប្រធានរដ្ឋសភាចន្លោះឆ្នាំ១៩៩៨ ដល់ឆ្នាំ២០០៦ និងតំណែងចុងក្រោយធ្វើជាប្រធានឧត្តមក្រុមប្រឹក្សាព្រះមហាក្សត្រខ្មែរហូតដល់ថ្ងៃទីវង្គត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។