ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានយាងតាមព្រះរាជទីនាំងយន្តហោះពិសេសចេញពីកម្ពុជាទៅកាន់ទីក្រុងប៉ារីស ប្រទេសបារាំងហើយ នៅព្រឹកថ្ងៃទី១០ ខែវិចិ្ឆកានេះ ដើម្បីចូលរួមក្នុងមហាសន្និបាតលើកទី៤១ និងខួបទី៧៥ របស់អង្គការយូណេស្កូ ចាប់ពីថ្ងៃទី១០ ដល់ថ្ងៃទី១៥ ខែវិចិ្ឆកា ឆ្នាំ២០២១នេះ។ ព្រះរាជដំណើរនេះ គឺតបទៅតាមការអញ្ជើញរបស់អគ្គនាយិកានៃអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ)របស់អ្នកស្រី អូដ្រេ អាហ្សូឡេ (Audrey Azoulay)។
ក្រុមមេដឹកនាំកំពូលៗនៃរបបក្រុងភ្នំពេញ រួមមាន ប្រធានព្រឹទ្ធសភា លោក សាយ ឈុំ ប្រធានរដ្ឋសភា លោក ហេង សំរិន និងលោកនាយករដ្ឋមន្ត្រី ហ៊ុន សែន រួមទាំងមន្ត្រីជាន់ខ្ពស់មួយចំនួនទៀត បានទៅជូនព្រះរាជដំណើររបស់ព្រះអង្គនៅវាលយន្តហោះអន្តរជាតិភ្នំពេញ។
ព្រះអង្គនឹងថ្លែងព្រះរាជសុន្ទរកថានៅក្នុងពិធីបើកសម័យប្រជុំជាផ្លូវការនៃមហាសន្និបាតនៅថ្ងៃទី១២ ខែវិច្ឆិកា ដោយផ្ដោតលើសមិទ្ធផលសំខាន់ៗពាក់ព័ន្ធនឹងការចុះបញ្ជីបេតិកភណ្ឌពិភពលោក និងបេតិកភណ្ឌអរូបីមនុស្សជាតិរបស់អង្គការយូណេស្កូនៅក្នុងប្រទេសកម្ពុជា នៅចំពោះមុខវត្តមានរបស់ប្រមុខរដ្ឋ និងរដ្ឋាភិបាលជាច្រើនក្នុងពិភពលោកដែលមកចូលរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។