អ្នកនយោបាយជើងចាស់ដែលបាត់បង់ដីផ្ទះព្រោះរដ្ឋាភិបាលលោក ហ៊ុន សែន រឹបអូស កាលពីថ្មីៗ នេះ បានលាឈប់ពីគណបក្សភ្លើងទៀនហើយ។ លិខិតមួយច្បាប់របស់លោក គង់ គាំ ចុះកាលពីថ្ងៃទី៣១ ខែមករា តែទើបត្រូវបានផ្សព្វផ្សាយនៅថ្ងៃទី២ ខែកុម្ភៈនេះ ឱ្យដឹងថា លោក គង់ គាំ សម្រេចដូច្នេះ ក្រោយពេលលោកនាយករដ្ឋមន្ត្រី ហ៊ុន សែន ឈប់ប្ដឹងរូបលោក។
មន្ត្រីជាន់ខ្ពស់គណបក្សភ្លើងទៀន គោរពការសម្រេចចិត្តរបស់លោក គង់ គាំ ដែលមិនអាចបន្តដំណើរជាមួយគណបក្សភ្លើងទៀនលើផ្លូវវែងឆ្ងាយតទៅមុខទៀត។ អ្នកនាំពាក្យគណបក្សភ្លើងទៀន លោក គីមសួរ ភីរិទ្ទ ឱ្យវិទ្យុអាស៊ីសេរីដឹងនៅទី០២ ខែកុម្ភៈថា ការលាលែងរបស់លោក គង់ គាំ គឺជាសិទ្ធិនយោបាយរបស់លោក។ ទោះបែបនេះលោកថា គណបក្សភ្លើងទៀនមិនទាន់ទទួលបានលិខិតរបស់លោក គង់ គាំ នៅឡើយទេ។ លោក គីមសួរ ភីរិទ្ទ យល់ថា លោក គង់ គាំ ទំនងមានផលលំបាកផ្ទាល់ខ្លួនទើបសម្រេចចិត្តដូច្នេះ តែទោះបែបនេះក្ដី លោក អរគុណលោក គង់ គាំ ដែលបានលះបង់កម្លាំងកាយចិត្តជាមួយគណបក្សភ្លើងទៀន តាំងពីដើមរហូតមកដល់ពេលនេះ។
លោក គីមសួរ ភីរិទ្ទ៖«ជាសិទ្ធិនយោបាយរបស់បុគ្គលឧទាហរណ៍ថា ខ្ញុំអ៊ីចឹង ខ្ញុំចង់លាលែងក៏គេមិនហាមឃាត់អីដែរ ជួនកាលយើងមានបញ្ហាផ្ទាល់ខ្លួន ជួនកាលយើងមានបញ្ហាសុខភាពដូចលោក គង់ គាំ គាត់ចាស់គាត់មានបញ្ហាសុខភាព អ៊ីចឹងគាត់ទៅណាម្ដងៗកូនទៅតាមថែ ហើយការលាលែងរបស់គាត់យើងអត់មានទៅជំទាស់សិទ្ធិនយោបាយរបស់គាត់ទេ មានតែអរគុណដែលគាត់បានចូលបម្រើចូលជួយគណបក្សដែលធ្វើសកម្មភាពទ្រទ្រង់លទ្ធិប្រជាធិបតេយ្យ»។
ការបញ្ជាក់ជំហររបស់មន្ត្រីគណបក្សភ្លើងទៀនបែបនេះ ក្រោយពេលឧត្ដមទីប្រឹក្សាគណបក្សភ្លើងទៀន លោក គង់ គាំ សរសេរលិខិតមួយច្បាប់ កាលពីថ្ងៃទី៣១ ខែមករា ស្នើសុំបញ្ចប់ជីវភាពនយោបាយពីគណបក្សភ្លើងទៀន។ លិខិតដដែលនោះត្រូវបានចុះផ្សាយដោយប្រព័ន្ធឃោសនាលោក ហ៊ុន សែន ( ហ្វ្រែសញូ) នៅថ្ងៃទី២ ខែកុម្ភៈ។ លោក គង់ គាំ ក៏អរគុណលោកនាយករដ្ឋមន្ត្រី ហ៊ុន សែន ដែលមិនបន្តប្ដឹងរូបលោកតទៅទៀត។ ទោះបែបក្ដី លោក គង់ គាំ ក៏បង្ហាញនូវការសោកស្ដាយនៃការសម្រេចចិត្តទាំងបង្ខំរបស់លោក និងភរិយាដោយបានប្រគល់ដីផ្ទះទំហំជាង៥ពាន់ម៉ែត្រការ៉េនៅកណ្ដាលទីក្រុងភ្នំពេញជូនរដ្ឋាភិបាលកាលពីពេលថ្មីៗ នេះ។
ទាក់ទងនឹងការផ្លាស់ប្ដូរជំហរពេលនេះ វិទ្យុអាស៊ីសេរីមិនអាចសុំបញ្ជាក់បន្ថែមពីលោក គង់ គាំ បានទេ នៅថ្ងៃទី២ ខែកុម្ភៈ។ ចំណែកកូនប្រុសលោក គង់ គាំ គឺលោក គង់ មូនីកា ឱ្យវិទ្យុអាស៊ីសេរីតាមប្រព័ន្ធតេឡេក្រាមយ៉ាងខ្លីថា លិខិតដែលត្រូវបានផ្សព្វផ្សាយនោះជាលិខិតពិតរបស់ឪពុករបស់លោក។
ទាក់ទងការសម្រេចចិត្តរបស់លោក គង់ គាំ នេះដែរ អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ យល់ថា ជាការសម្រេចចិត្តដោយបុគ្គលរបស់លោក គង់ គាំ ដោយគ្មានអ្នកណាមកបង្ខិតបង្ខំនោះទេ។ អ្នកនាំពាក្យគណបក្សកាន់អំណាចរូបនេះលើកឡើងទៀតថា បើទោះជាលោក គង់ គាំ ឈប់ពីគណបក្សភ្លើងទៀន ក៏មិនបានផ្ដល់ចំណេញអ្វីដល់គណបក្សប្រជាជនកម្ពុជាឡើយ។
លោក ឈឹម ផលវរុណ៖«ទំនាក់ទំនងក្នុងភាពជាមនុស្ស ដែលមានការប្រស្រ័យទាក់ទងគ្នាជាមួយគុណធម៌ទៅវិញទៅមក ជារឿងធម្មតាទេ ឯរឿងគាត់(លោក គង់ គាំ)ឈប់ធ្វើនយោបាយចូលនិវត្តន៍ក៏ជាការសម្រេចចិត្តរបស់បុគ្គល»។
លោក គង់ គាំ ទើបបាត់បង់ដីផ្ទះតម្លៃរាប់លានដុល្លារ កាលពីថ្ងៃទី១២ មករា ក្រោយពេលរដ្ឋាភិបាល បានប្រើប្រាស់ស្ទើរគ្រប់មធ្យោបាយដើម្បីរឹបអូសយក។ លោក គង់ គាំ ក៏នៅជាប់បណ្ដឹងមួយទៀតរបស់គណបក្សប្រជាជនកម្ពុជាប្រចាំខេត្តត្បូងឃ្មុំដែរ។គណបក្សនេះចោទប្រកាន់ថា ការនិយាយរបស់លោកពីនិយាយពីដើមកំណើតបក្សប្រជាជនកម្ពុជា ជាប់ពាក់ព័ន្ធនឹងវៀតណាម គឺជាចេតនា ក្នុងគោលបំណងទុច្ចរិត ញុះញង់បង្កឱ្យមានភាពវឹកវរចលាចលអសន្តិសុខសង្គម។
អ្នកវិភាគនយោបាយលោក គឹម សុខ យល់ថា ការសម្រេចចិត្តរបស់លោក គង់ គាំ ពេលនេះ ទំនងអ្នកនយោបាយជើងចាស់រូបនេះ រងការគំរាមកំហែងធ្ងន់ធ្ងរពីរដ្ឋាភិបាល លោក ហ៊ុន សែន។ អ្នកវិភាគនយោបាយរូបនេះ បន្តទៀតថា ទោះលោក គង់ គាំ ចាកចេញពីគណបក្សភ្លើងទៀនក្ដី តែមិនប៉ះពាល់ផ្លូវចិត្តអ្នកគាំទ្រ គណបក្សភ្លើងទៀនទេ បើទោះជាករណីលោក គង់ គាំ នេះអាចធ្វើឱ្យមេដឹកនាំគណបក្សភ្លើងទៀនមួយចំនួន មានការព្រួយបារម្ភ ក្នុងការធ្វើសកម្មភាពនយោបាយរបស់ខ្លួនក្ដី។
លោក គឹម សុខ៖«មែនទែនទៅមិនមែនជារឿងបាត់ទ្រព្យសម្បត្តិប៉ុណ្ណឹងទេ យើងពិនិត្យពិចារណា ដល់កម្រិតលោក គង់ គាំ មិននិយាយអ្វីច្រើនផង ហើយនាំភរិយារបស់គាត់ទៅផ្ដិតមេដៃប្រគល់ដី និងផ្ទះវាល់លានដុល្លារទៅឱ្យគេ(រដ្ឋាភិបាល)ភ្លាមៗនោះមានន័យច្បាស់ណាស់ថា ពាក់ព័ន្ធសុវត្ថិភាពធ្ងន់ធ្ងរណាស់គឺគំរាមកំហែងយ៉ាងធ្ងន់ធ្ងរដល់សុវត្ថិភាពមិនត្រឹមតែជីវិតរបស់លោក គង់ គាំ ទេ ប៉ុន្តែយើងពិបាកបរិយាយណាស់ថា ធ្ងន់ធ្ងរនោះកម្រិតណាទើបធ្វើឱ្យលោក គង់ គាំ សម្រេចលាឈប់ហ្នឹង»។
ចាប់តាំងពីគណបក្សភ្លើងទៀន វិលចូលឆាកនយោបាយជាថ្មីវិញកាលពីឆ្នាំ២០២២ អ្នកគាំទ្រ និងសកម្មជនគណបក្សនេះ ត្រូវតុលាការនៃរដ្ឋាភិបាលលោក ហ៊ុន សែន ចោទប្រកាន់និងចាប់ខ្លួនជាបន្តបន្ទាប់ ហើយចុងក្រោយនេះ ថ្នាក់ដឹកនាំគណបក្សនេះ ក៏ជាប់បណ្ដឹងនៅតុលាការ និងកំពុងជាប់ឃុំនៅពន្ធនាគារផងដែរ។ ក្រុមអ្នកឃ្លាំមើលសង្គមបារម្ភថា បើគណបក្សភ្លើងទៀន នៅតែរងការធ្វើទុក្ខបុកម្នេញបែបនេះតទៅទៀត ការបោះឆ្នោតជាតិ នាខែកក្កដាខាងមុខ មិនអាចប្រព្រឹត្តិទៅដោយ ភាពសេរី ត្រឹមត្រូវ និងយុត្តិធម៌ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។