ក្រុម​មេធាវី​ថា បើ​លោក កឹម សុខា ត្រូវ​បាន​ដោះលែង​ឆាប់ៗ​គឺ​ខ្មែរ​ជា​អ្នកឈ្នះ​ទាំងអស់​គ្នា

ដោយ មួង ណារ៉េត
2018-11-10
អ៊ីម៉ែល
មតិ
Share
បោះពុម្ព
លោក កឹម សុខា (ដើរ​មុខ) ប្រធាន​​គណបក្ស​សង្គ្រោះជាតិ នា​ស្នាក់​ការ​កណ្ដាល​គណបក្ស​សង្គ្រោះជាតិ បន្ទាប់​ពី​ប្រជុំ​ផ្ទៃ​ក្នុង​គណបក្ស កាល​ពី​​ថ្ងៃ​ទី​៣ ខែ​មីនា ឆ្នាំ​២០១៦។
លោក កឹម សុខា (ដើរ​មុខ) ប្រធាន​​គណបក្ស​សង្គ្រោះជាតិ នា​ស្នាក់​ការ​កណ្ដាល​គណបក្ស​សង្គ្រោះជាតិ បន្ទាប់​ពី​ប្រជុំ​ផ្ទៃ​ក្នុង​គណបក្ស កាល​ពី​​ថ្ងៃ​ទី​៣ ខែ​មីនា ឆ្នាំ​២០១៦។
Photo: RFA

សហ​មេធាវី​ការពារ​សិទ្ធិ​លោក កឹម សុខា ថាបើ​លោក កឹម សុខា ប្រធាន​គណបក្ស​សង្គ្រោះ​ជាតិ ត្រូវ​បាន​ដោះលែង ឲ្យ​មាន​សេរីភាព​ឆាប់ៗ នោះ​មិន​មាន​ន័យថា លោក ហ៊ុន សែន ចាញ់​ការ​ភ្នាល់​ទេ។

នៅ​ក្នុង​សេចក្ដីថ្លែងការណ៍ កាលពី​ថ្ងៃទី១០ ខែ​វិច្ឆិកា ម្សិលមិញ ក្រុម​មេធាវី​ការពារ​ក្តី​លោក កឹម សុខា សង្ឃឹម​យ៉ាង​មុតមាំ​ថា ពលរដ្ឋ​ខ្មែរ រួម​ទាំង​អ្នកដឹកនាំ​ផង នឹង​មិន​វាយតម្លៃ​លើ​ការ​ភ្នាល់​នេះ​ទេ ហើយក៏​មិន​ទាមទារ​ឲ្យ​អនុវត្ត​តាម​ខសន្យា​ភ្នាល់​នេះ​ដែរ។ ផ្ទុយទៅវិញ គឺ​ចង់បាន​ការ​ផ្សះផ្សា​ជាតិ និង​ការ​បង្រួបបង្រួម​ជាតិខ្មែរ​ទាំងមូល។

សេចក្ដីថ្លែងការណ៍​របស់​ក្រុម​មេធាវី​នេះ ធ្វើឡើង​ក្រោយ​លោក ហ៊ុន សែន ប្រកាស​ហ៊ាន​ភ្នាល់​ជាមួយ​លោក សម រង្ស៊ី ថា​លោក​សុខចិត្ត​ចុះ​ចេញពី​តំណែង បើ​លោក កឹម សុខា ត្រូវ​បាន​ដោះលែង នៅមុន​ថ្ងៃ៣ ខែ​មីនា ឆ្នាំ​២០១៩។ ចំណែក​លោក សម រង្ស៊ី អះអាង​ថា​លោក សុខចិត្ត​ចូលខ្លួន ឲ្យ​អាជ្ញាធរ​របប​លោក ហ៊ុន សែន ចាប់​យក​ទៅ​ដាក់​ឃុំ​ជាមួយ​លោក កឹម សុខា បើ​លោក កឹម សុខា មិន​ត្រូវ​បាន​ដោះលែង យ៉ាង​យូរ​ត្រឹម​ថ្ងៃ​ទី៣ ខែ​មីនា ឆ្នាំ​ក្រោយ​នោះ។

បើ​ទោះ​បី​រឿង​បន្ត​ឃុំខ្លួន ឬ​ត្រូវ​ដោះលែង​លោក កឹម សុខា ឲ្យ​មាន​សេរីភាព​វិញ​នេះ គួរតែ​ជា​កិច្ចការ​របស់​តុលាការ​យ៉ាង​ណាក្តី ក៏​លោក ហ៊ុន សែន ឯណោះ​ទៅវិញ​ទេ ដែល​ជា​អ្នក​ច្បាស់​ក្នុង​ចិត្តខ្លាំង ថា​លោក កឹម សុខា នឹង​មិន​ត្រូវ​បាន​ដោះលែង​នៅ​មុន​ថ្ងៃ​ទី៣ ខែ​មីនា ឆ្នាំ​២០១៩ នោះ​ឡើយ។ មិនតែប៉ុណ្ណោះ លោក ហ៊ុន សែន ថែមទាំង​អះអាង​ទៀត​ថា រឿង​ដោះលែង​លោក កឹម សុខា នេះ គឺ​ទាល់តែ​ចាំ​ដល់​សេះ​ដុះ​ស្នែង​ទៀត​ផង៖ «ឥឡូវ​អ្នកឯង​ចាំ​មើល​ទៅ​! ជាពិសេស​បងប្អូន​អ្នកគាំទ្រ​អាម្សៀ​ហ្នឹង (លោក សម រង្ស៊ី)! ចាំ​មើល​ទៅ​! ខ្ញុំ​ផ្ញើ​សារ​ដ៏​ខ្លី​មួយ ថា​ចាំ​សេះ​ដុះ​ស្នែង បាន​វា​កើត (​ទើប​ដោះលែង​លោក កឹម សុខា)។ គេ​ថា ហ៊ុន សែន ទទួល​សម្ពាធ​អន្តរជាតិ ឲ្យ​ដោះលែង។ ឥឡូវ​អញ​មិន​ដោះ អ្ហែង​ធើ​អី​អញ​! និយាយ​អ៊ីចឹង​ហ្មង​! អ្ហែង​ធើ​អី​អញ! នេះ​កម្ពុជា​ឯករាជ្យ​!»

ទោះជា​យ៉ាង​នេះ​ក្តី សហ​មេធាវី​ការពារ​ក្តី​លោក កឹម សុខា សម្ដែង​ការ​សោកស្ដាយ​យ៉ាង​ខ្លាំង ដែល​អ្នកនយោបាយ​ខ្មែរ យក​សេរីភាព​បុគ្គល​លោក កឹម សុខា មក​ធ្វើជា​ល្បែងភ្នាល់ ដែល​ការណ៍​នេះ ធ្វើ​ឲ្យ​ជាតិ​កាន់តែ​បែកបាក់​ធ្ងន់ធ្ងរ ឈឺផ្សា​ថែមទៀត។ មិនតែប៉ុណ្ណោះ អរិយភាព​នេះ វា​គំរូ​អាក្រក់ និង ក្បត់​ទៅ​នឹង​ការសន្យា​របស់​អ្នកនយោបាយ ដែល​ស្បថ​សច្ចា​ថា ដង្ហែ​តាម​ព្រះរាជ​បន្ទូល​ព្រះមហាក្សត្រ ដែល​ព្រះអង្គ​ស្នើ​ឲ្យ​រាស្ត្រ​ខ្មែរ ចេះ​រួបរួម​គ្នា ក្រោម​ដំបូល​រដ្ឋធម្មនុញ្ញ ដើម្បី​ជាតិខ្មែរ​ខ្លាំង​រឹងមាំ​នោះ។

សហ​មេធាវី​លោក កឹម សុខា ស្នើ​ឲ្យ​អ្នកនយោបាយ​ខ្មែរ ប្រកាន់​នូវ​គុណធម៌ និង​សីលធម៌ ជា​អ្នកនយោបាយ​គំរូ សម្រាប់​ខ្មែរ​បន្តវេន​ជំនាន់​ក្រោយៗ។

បើ​ទោះបី​ជា​ការ​ភ្នាល់​គ្នា​នេះ ផ្ដើម​ចេញ​ពី​អតីតប្រធាន​គណបក្ស​សង្គ្រោះ​ជាតិ​លោក សម រង្ស៊ី អ្នក​អ្នកវិភាគ​នយោបាយ និង​សង្គម​លោក គឹម សុខ ដាក់​បន្ទុក​នេះ​ខ្លាំង​ទៅលើ​លោក ហ៊ុន សែន ដែល​ជា​ប្រធាន​គណបក្ស​ប្រជាជន​កម្ពុជា និង​ជា​មេដឹកនាំ​ចាស់​វស្សា ដែល​គួរតែ​មាន​ភាព​ចាស់ទុំ​ជាង​នេះ និង​មិន​គួរ​បង្ហាញ​អាកប្បកិរិយា​ឆេវឆាវ លុះ​ក្រោម​ការ​ញាក់​ណាមួយ​នោះ​ឡើយ។ លោក គឹម សុខ ចាត់​ទុក​អាកប្បកិរិយា​របស់​លោក ហ៊ុន សែន បែបនេះ ថា​បង្ហាញ​ឲ្យ​ឃើញ​អំពី​ចរិត​មេដឹកនាំ ដែល​មិន​អាច​រក​ប្រយោជន៍​ជូន​ជាតិ និង​មិន​គួរ​កូន​ខ្មែរ​យក​តម្រាប់​តាម​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល