ពលរដ្ឋ​ខ្មែរ​នៅ​ក្រៅ​ប្រទេស​បន្ត​ធ្វើ​បុណ្យ និង​ប្ដេជ្ញា​រក​យុត្តិធម៌​ជូន​សព​លោក លិម គិមយ៉ា

0:00 / 0:00

ពលរដ្ឋខ្មែរ​នៅ​ក្រៅ​ប្រទេស​បន្ត​ធ្វើ​បុណ្យ​ឧទ្ទិស​កុសល និង​ប្ដេជ្ញា​រួមគ្នា​រក​យុត្តិធម៌​ជូន​សព​អតីត​តំណាងរាស្ត្រ​គណបក្ស​សង្គ្រោះជាតិ​លោក លិម គិមយ៉ា។ ពួកគាត់​ថ្កោលទោស​ចំពោះ​អំពើ​ឃាតកម្ម​លើ​អ្នក​ប្រជាធិបតេយ្យ​ជាបន្តបន្ទាប់​មក​នេះ ដោយ​ចាត់ទុក​ករណី​ទាំង​នេះ​ជា​រឿង​នយោបាយ ហើយ​ទាមទារ​ឱ្យ​រដ្ឋាភិបាល​ត្រកូល​ហ៊ុន​ត្រូវ​ទទួល​ខុសត្រូវ។

ក្រោយពី​មាន​ការ​បាញ់​សម្លាប់​លើ​លោក លិម គិមយ៉ា នៅកណ្តាល​ទីក្រុង​បាងកក កាល​ពី​ថ្ងៃ​ទី០៧ ខែមករា មក ប្រជាពលរដ្ឋ​ខ្មែរ​នៅ​ក្រៅ​ប្រទេស​ស្រុះស្រួល​គ្នា​ធ្វើ​ពិធីបុណ្យ​គោរព​វិញ្ញាណក្ខន្ធ​ជូន​​អតីត​អ្នក​តំណាងរាស្ត្រ​បក្ស​ប្រឆាំង​រូបនេះ​យ៉ាង​ផុលផុស។

ជាក់ស្តែង​សហគមន៍​ខ្មែរ-អាមេរិកកាំង មក​ពី​ទី​ជិតឆ្ងាយ​កំពុង​ជួបជុំគ្នា​ធ្វើ​ពិធីបុណ្យ​ទក្ខិណានុប្បទាន​ជូន​លោក លិប គិមយ៉ា នៅ​ថ្ងៃ​ទី២៦ ខែមករា។ កម្មវិធី​បុណ្យ​នេះ​ប្រព្រឹត្ត​នៅ​វត្ត​ពុទ្ធរង្សី ក្នុង​ទីក្រុង​វូហ៊ី​(Voorhees) រដ្ឋញូជេស៊ី (New Jesey) នៃ​សហរដ្ឋអាមេរិក​(USA)។ ពិធី​តាម​សាសនា​នេះ មាន​ដូចជា​និមន្ត​ព្រះសង្ឃ​សូត្រ​មន្ត​បង្សុកូល គោរពវិញ្ញាណក្ខន្ធ​ដោយ​ដាក់​កម្រងផ្កា ថ្លែង​សារ​រំលែកទុក្ខ និង​រំលឹក​ប្រវត្តិ​តស៊ូ​របស់​លោក លិម គិមយ៉ា ក្នុងនាម​លោក​ជា​អ្នក​ប្រជាធិបតេយ្យ​កន្លងមក។

អ្នក​ផ្តើម​បុណ្យ​គឺ​លោក សេង រតនា ប្រាប់​វិទ្យុអាស៊ីសេរី​ថា ប្រជា​ពលរដ្ឋខ្មែរ​នៅ​ទីនោះ​មូលមតិគ្នា​រៀបចំ​ពិធីបុណ្យ​ឡើង ក្នុង​គោល​បំណង​ឧទ្ទិស​បុណ្យ​កុសល និង​ស្វែងរក​យុត្តិធម៌​ជូន​សព​លោក លិម គិមយ៉ា ដែល​ត្រូវ​ឃាតករ​បាញ់​សម្លាប់​ទាំង​អយុត្តិធម៌។ លោក​ថា​ឃាតកម្ម​នយោបាយ​នេះ​បាន​ដាស់​ស្មារតី​ពលរដ្ឋខ្មែរ​គ្រប់​មជ្ឈដ្ឋាន​ឱ្យ​ប្រែក្លាយ​ពី​ការឈឺចាប់​ទៅ​ជា​កម្លាំង​តស៊ូ​តែមួយ ប្រឆាំង​នឹង​មេដឹកនាំ​ក្រុងភ្នំពេញ ដើម្បី​ការ​ប្តូរផ្តាច់​ជា​វិជ្ជមាន​នៅ​ពេល​ខាងមុខ។

លោក សេង រតនា៖ «យើង​ឃើញ​ថា​គាត់​បាន​ពលិកម្ម​តស៊ូ ដើម្បី​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា។ ការ​ចូលរួមនេះ​ផុសផុល​ជាង​លើក​ណា​ទាំងអស់​ដូច​ជា​ការ​ចូលរួម​ស្រុះ​គ្នា សាមគ្គី​គ្នា​គ្រប់​ប្រទេស​តែម្តង ពួកគាត់​ចង់​ដឹង​រឿង​ជាតិ សម្ដែង​ការឈឺចាប់​ចំពោះ​ការ​បាញ់​សម្លាប់​អ្នក​នយោបាយ​បក្ស​ប្រឆាំង សង្គម​ស៊ីវិល​ផ្សេងៗ គឺ​អត់​មាន​បាក់ស្បាត ឬ​បាក់​ទឹកចិត្ត​អ្វី​ទេ វា​កាន់តែ​ជំរុញ​ទឹកចិត្ត​ប្រជាពលរដ្ឋ​យើង​កាន់តែ​ខ្លាំង​ក្នុង​ការ​តស៊ូ»។

ចំណែក ប្រជា​ពលរដ្ឋខ្មែរ​ធ្វើការ និង​រស់នៅ​ប្រទេស​កូរ៉េ​ខាងត្បូង​(South Korea) វិញ គ្រោង​ប្រារព្ធ​ពិធី​គោរព​វិញ្ញាណក្ខន្ធ​លោក លិម គិមយ៉ា និង​ជន​ស្នេហាជាតិ​ជា​ច្រើន​នាក់​ទៀត​ដែល​រង​ការ​បាញ់សម្លាប់ ក្រោម​អំណាច​ដឹកនាំ​របស់​ត្រកូលហ៊ុន មាន​ដូចជា​បណ្ឌិត កែម ឡី លោក ជា វិជ្ជា លោក ឈុត វុទ្ធី ជាដើម។

តំណាង​អ្នក​រៀបចំ​កម្មវិធី​បុណ្យ​នៅ​ប្រទេស​កូរ៉េ​ខាងត្បូង អ្នកស្រី ឡេង ចិន្តា ប្រាប់​វិទ្យុអាស៊ីសេរី​នៅ​ថ្ងៃ​ទី២៦ ខែ​មករា ថា ពិធីបុណ្យ​នៅពេល​ខាងមុខនេះ រៀបចំ​នៅ​ព្រឹក​ថ្ងៃ​ពុធ ទី២៩ ខែ​មករា នៅ​ទីក្រុង​អានសាន(Ansan)។ លោកស្រី​ឱ្យ​ដឹង​ថា បើ​តាម​គម្រោង​នឹង​មាន​កម្មវិធី​គោរព​វិញ្ញាណក្ខន្ធ និមន្ត​ព្រះសង្ឃ​បង្សុកូល​សម្តែង​ធម៌​អប់រំ​ចិត្ត ប្រគេន​ចង្ហាន់​ព្រះសង្ឃ និង​ការ​សម្តែង​មតិ​ជា​សាធារណៈ​អំពី​បញ្ហា​ជាតិ ដើម្បី​ដាក់​គោលដៅ​ក្នុង​ការ​តស៊ូ​មតិ​ស្វែងរក​ដំណោះស្រាយ។ លោកស្រី​បញ្ជាក់​ថា ការ​ធ្វើ​បុណ្យ​តបស្នង​អ្នកស្នេហាជាតិ​ ដែល​បាន​បូជាជីវិត​សម្រាប់​ជាតិ គឺ​ជា​សារ​មួយ​ដ៏​សំខាន់​ក្នុង​ការស្វែងរក​យុត្តិធម៌​ដល់​ជនរងគ្រោះ និង​បណ្ដុះ​ទឹកចិត្ត​ដល់​យុវជន​ខ្មែរ​ឱ្យ​ចូលរួម​កិច្ច​ការងារ​សង្គម នយោបាយ​ឱ្យ​កាន់តែ​ផុលផុស ដើម្បី​បញ្ចប់​អំពើ​បាញ់សម្លាប់ និង​វប្បធម៌​និទ្ទណ្ឌភាព​នៅ​កម្ពុជា។

អ្នកស្រី ឡេង ចិន្តា៖ «ការណ៍​ដែល​យើង​រំលឹក​ខួប​វីរបុរស អ្នកស្នេហាជាតិ​ដែល​ស្លាប់​ ដោយសារ​បុព្វហេតុ​ជាតិ ជា​រឿង​មួយ​ដាស់តឿន​ស្មារតី​កូនខ្មែរ​ទាំង អ៊ីចឹង​ការ​លះបង់​របស់​គាត់​ គឺ​ធំធេង​សម្រាប់​ប្រទេសជាតិ សម្រាប់​ពួក​យើង​ជាខ្មែរ​ដូចគ្នា អ៊ីចឹង​ហើយ​សូម​ឱ្យ​កូនខ្មែរ​យក​ការឈឺចាប់​នេះ​មក​ជា​ការ​ជួយ​ដល់​ជាតិ​យើង»។

មក​ដល់​ពេល​នេះ សមត្ថកិច្ច​ថៃ​បាន​បង្ហាញមុខ​បុគ្គល​ពាក់ព័ន្ធ ៤នាក់ ក្នុង​អំពើ​ឃាតកម្ម​សម្លាប់​លោក លិម គិមយ៉ា រួមមាន ខ្មាន់កាំភ្លើង​ជនជាតិ​ថៃ​ឈ្មោះ អេកាឡាក់ ផែណយ (Ekkalak Phaenoi) អ្នក​បើកឡាន​ជនជាតិថៃ​ឈ្មោះ ​ឆាឃីត ប៊ួប្លី​(Chakit Buaplee) ដែល​បាន​ដឹក​ខ្មាន់កាំភ្លើង​គេចខ្លួន​ចូល​ទឹកដី​កម្ពុជា។ ក្នុងនោះ​ជនជាតិ​ខ្មែរ​ពីរ​នាក់​ជា​អ្នក​បោះ​តម្រុយ គឺ​លោក ពេជ្រ គឹមស្រ៊ិន និង​ម្នាក់ទៀត​ជា​ទីប្រឹក្សា​របស់​ប្រធាន​គណបក្ស​ប្រជាជន​កម្ពុជា​លោក ហ៊ុន សែន គឺ​លោក លី រតនរស្មី ដែល​បាន​ជាប់​ចោទ​ជា​អ្នកបញ្ជា​ខ្មាន់​កាំភ្លើង​ឱ្យ​បាញ់​សម្លាប់​លោក លិម គិមយ៉ា។

វិទ្យុ​អាស៊ីសេរី​មិន​អាច​ទាក់ទង​ប្រធាន​អង្គភាព​អ្នកនាំពាក្យ​រដ្ឋាភិបាល​លោក ប៉ែន បូណា ដើម្បី​សុំ​ការ​បកស្រាយ​ជុំវិញ​រឿង​នេះ​បាន​ទេ នៅ​ថ្ងៃ​ទី២៦ ខែ​មករា។

ប៉ុន្តែ​លោក​នាយករដ្ឋមន្ត្រី ហ៊ុន ម៉ាណែត កាល​ពី​ថ្ងៃ​ទី២០ ខែ​មករា បាន​ចេញ​ប្រតិកម្ម​ទាំង​កំហឹង ដោយ​បដិសេធ​ថា លោក និង​ឪពុក​របស់​លោក គឺ​លោក ហ៊ុន សែន និង​រដ្ឋាភិបាល​មិន​ជាប់ពាក់ព័ន្ធ​នឹង​ឃាតកម្ម​លើ​លោក លិម គិមយ៉ា នោះ​ទេ។

ទោះបីជា​លោក​នាយករដ្ឋមន្រ្តី ហ៊ុន ម៉ាណែត ថ្លែង​ការពារ​បែបនេះ​ក្តី លោក​មិន​បាន​បង្ហាញ​ជំហរ​ឱ្យ​ច្បាស់លាស់ ក្នុង​ការ​ចាប់បញ្ជូន​ជនសង្ស័យ​ពីរ​នាក់​ទៀត​ជា​ជនជាតិ​ខ្មែរ គឺ​លោក លី រតនរស្មី ដែល​ជាទីប្រឹក្សា​លោក ហ៊ុន សែន និង​លោក ពេជ្រ គឹមស្រ៊ិន ដែល​ជា​មនុស្ស​​របស់​អភិបាល​រាជធានី​ភ្នំពេញ​លោក ឃួង ស្រេង ប្រគល់​ឱ្យ​សមត្ថកិច្ច និង​តុលាការ​ព្រហ្មទណ្ឌ​ប្រទេស​ថៃ ដើម្បី​អនុវត្ត​ច្បាប់​នៅឡើយ។

មន្រ្តី​គណបក្ស​ប្រឆាំង អ្នកឃ្លាំមើល​លើកឡើង​ថា សំណុំរឿង​ឃាតកម្ម​សម្លាប់​លោក លិម គិមយ៉ា មាន​តម្រុយ​ជាច្រើន​ជាប់​ពាក់ព័ន្ធ​អ្នក​កាន់​អំណាច​នៅ​កម្ពុជា៕