គណបក្ស​ប្រជាធិបតេយ្យ​​មូលដ្ឋាន ធ្វើ​សន្និសីទ​​សារព័ត៌មាន ប្រកាស​​ជំហរ​​ចូល​រួម​​បោះ​​ឆ្នោត​​ឃុំ​​សង្កាត់​​នៅ​​ពេល​​ខាង​​មុខ

ដោយ ជី វិតា
2022.05.16
Share on WhatsApp
Share on WhatsApp
គណបក្ស​ប្រជាធិបតេយ្យ​​មូលដ្ឋាន ធ្វើ​សន្និសីទ​​សារព័ត៌មាន ប្រកាស​​ជំហរ​​ចូល​រួម​​បោះ​​ឆ្នោត​​ឃុំ​​សង្កាត់​​នៅ​​ពេល​​ខាង​​មុខ (អាវស) លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន (GDP) ធ្វើសន្និសីទ​សារព័ត៌មាន​កាលពីព្រឹកថ្ងៃទី១៦ ខែឧសភា បង្ហាញ​​ពី​​​គោលនយោបាយ​​របស់​​បក្ស​ខ្លួន​​ក្នុងការ​​ចូលរួម​​បោះឆ្នោត​​ឃុំសង្កាត់​​នៅ​​ពេល​​ខាង​​មុខ។
រូប៖ ពលរដ្ឋ​ផ្ដល់​ឲ្យ

គណបក្ស​ប្រជាធិបតេយ្យ​មូលដ្ឋាន​ ធ្វើសន្និសីទ​សារព័ត៌មាន​បង្ហាញ​ពី​គោលនយោបាយ​របស់​បក្ស​ខ្លួន​ក្នុងការ​ចូលរួម​បោះឆ្នោត​ឃុំសង្កាត់​នៅ​ពេល​ខាង​មុខ។ មន្រ្តី​សង្គម​ស៊ីវិល  ចង់ឱ្យ​មាន​ការ​សួរ​ដេញ​ដោល​បេក្ខជន​តាម​ឃុំសង្កាត់ អំពី​គោលនយោបាយ​របស់​គណបក្ស​នីមួយៗ​ ដែល​ចូលរួម​ការ​បោះឆ្នោត​នៅ​ពេល​ខាង​មុខ

គណបក្ស​ប្រជាធិបតេយ្យ​មូលដ្ឋាន ធ្វើ​សន្និសីទ​សារព័ត៌មាន ក្រោម​ប្រធាន​បទ ដំណើរ​ឆ្ពោះ​ទៅ​ការ​កសាង​ឃុំ សង្កាត់​គំរូ ឆ្នាំ​២០២២-២០២៧ នៅថ្ងៃទី១៦ ខែឧសភា ដោយផ្តោត​សំខាន់​ទៅ​នឹង​គោលនយោបាយ ស៥ រួម មាន សេដ្ឋកិច្ច សុខាភិបាល សក្សាធិការ និងយុវជន សង្គមកិច្ច សេវា និង​សម្បត្តិ​សារធារណ:  នៅ​អតីត​ស្នាក់ការ​កណ្តាល​គណបក្ស​នៅ​ភ្នំពេញ ដែលមាន​ការចូលរួម​ពី​បេក្ខជន​ឈរ​ជាមេឃុំ​ប្រមាណ​១00​នាក់​ មកពី ៣២ ឃុំ សង្កាត់ ទូទាំង​ប្រទេស

ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យមូលដ្ឋាន លោក​បណ្ឌិត យ៉ង សាំងកុមារ ថ្លែង​ក្នុង​សន្និសិទ​ថា ការបោះឆ្នោត​ឱ្យ​មាន​តំណាង​របស់ខ្លួន​នៅ​តាម​ឃុំ សង្កាត់ គឺជា​ការជួយ​ដល់​ប្រជាពលរដ្ឋ​ជាច្រើន  ហើយ​លោក​ថា ការ ឈ្នះ ឬចាញ់ មិន​សំខាន់​នោះទេ​ គឺ​ធ្វើយ៉ាងណា​ឱ្យ​ឃុំ សង្កាត់​នៅ​កម្ពុជា ក្លាយ​ជា​ឃុំ សង្កាត់​គំរូ​ប្រសើរ​បំផុត៖ «នៅ​តាមភូមិ​ឃុំ ប្រជាពលរដ្ឋយើង តែង​មាន​ផ្នត់​គំនិត ខំធ្វើអីមិន​ឈ្នះ​គេ​ទេ ឈ្នះក៏ធ្វើអីមិន​កើត ឈ្នះក៏គេ​មិន​ឱ្យ អាផ្នត់គំនិត​ហ្នឹង​សង្គ្រាម​ចិត្តសាស្ត្រ​ទេ អ្នកដែល​និយាយ​ចឹង គាត់ចង់​គាំទ្រ​ឱ្យ​គណបក្ស​កាន់​អំណាច កាន់អំណាច​មួយ​ជីវិតទេ»

វិទ្យុអាស៊ីសេរី​មិន​អាច​ទាក់ទង​អ្នកនាំពាក្យ​គណបក្ស​ប្រជាជន​កម្ពុជា​លោក សុខ ឥសាន ដើម្បី​សុំ​អត្ថាធិប្បាយ ជុំវិញ​រឿង​នេះ​បាន​ទេ​នៅថ្ងៃទី១៦ ខែឧសភា។

កន្លង​មក លោកនាយករដ្ឋមន្ត្រី ហ៊ុន សែន និង រដ្ឋមន្ត្រីក្រសួងមហាផ្ទៃ លោកក៏​បាន​ក្រើន​រម្លឹក​ទៅ​អាជ្ញាធរ​ទាំងអស់​ត្រូវ​បង្ក​លក្ខណៈងាយស្រួល​ដល់​គណបក្ស​នយោបាយ អំឡុងពេល​ឃោសនា​បោះឆ្នោត​ ដោយ​គណបក្ស​ទាំងអស់​មាន​សិទ្ធិដូចៗ​គ្នា​ ដើម្បីជាការ​បង្ហាញ​ពី​បរិយាកាស​នយោបាយ​អព្យាក្រឹត្យ​។

ជុំវិញ​រឿង​នេះ នាយកប្រតិបត្តិ​អង្គការ​និចហ្វិក (NICFEC) លោក សំ គន្ធាមី ថ្លែងថា ការ​បោះឆ្នោត​ក្រុម​ប្រឹក្សា​ឃុំ សង្កាត់ គឺជា​ការ​ផ្ទេរអំណាច​ពីថ្នាក់ជាតិ​ដល់​អាជ្ញាធរ​ថ្នាក់​មូលដ្ឋាន​ក្នុង​ការ​ធ្វើ​សម្រេច​ចិត្ត​ដោយ​ខ្លួន​ឯង​ក្នុង​ការ​អភិវឌ្ឍន៍ ហើយបេក្ខជន​គួរជួប​ប្រជុំ​លើកឡើង​ពី​ចំនុច​នីមួយៗ​ក្នុង​ពេល​គណបក្ស​របស់​ខ្លួន​ជាប់​ឆ្នោត។

លោក សំ គន្ធាមី បន្ថែមទៀតថា គោលនយោបាយ​ការ​អភិវឌ្ឍន៍​ឃុំសង្កាត់​របស់​គណបក្ស​នយោបាយ​នីមួយៗ​មាន​លក្ខណៈ​ដូចគ្នា​ច្រើន តែសំខាន់​ការអនុវត្ត​របស់បេក្ខភាព​ឃុំសង្កាត់​ក្រោយ​ចូល​ធ្វើការ​ហើយ​ក៏​មិន​​មែន​​ជាការ​ចម្លង​គ្នា​នោះ​ទេ៖​ «បរិយាកាស​​ហ្នឹង យើង​​កំពុង​​តែតា​ម​​ដាន​សង្កេត​​រហូត​ហ្នឹង ក្នុង​ដំណើរ​ការ​ តិចទៀត​ឃោសនា​បោះ​ឆ្នោតគឺ​ចាប់​ផ្តើម​ទៀត​ហើយ​ណា តែចាំ​មើល​ដំណាក់​កាល​ឃោសនា​បោះឆ្នោត​ មាន​ការ​គំរាមគំហែង​ ឬ​ក៏ទិញ​សន្លឹក​ឆ្នោត​អី​សព្វ​បែប​យ៉ាង​ហ្នឹង​ណា»

ការបោះ​ឆ្នោត​ក្រុម​ប្រឹក្សាឃុំ សង្កាត់ អាណត្តិទី៥​នេះ នឹង​ប្រព្រឹត្ត​ទៅ​ថ្ងៃអាទិត្យ ទី៥ ខែមិថុនា ដែល​មាន​គណបក្ស​នយោបាយ​ចូលរួម​ការ​បោះឆ្នោត​ចំនួន ១៧ គណបក្ស​នយោបាយ ដែល​ក្នុង​ចំណោម​គណបក្ស​​ទាំង​អស់​នោះ​មាន​គណបក្ស​ធំៗ​ចំនួន ២ មាន​បេក្ខជន​ឈរ​ឈ្មោះ​បោះឆ្នោត​ឃុំ សង្កាត់​ច្រើន​ជាង​គេ  គឺ​គណបក្ស​ប្រជាជន​កម្ពុជា​ដែល​កំពុង​កាន់​អំណាច និង​គណបក្ស​ភ្លើង​ទៀន។ ក្នុងនោះ ​គណបក្ស​ប្រជាជនកម្ពុជា​របស់លោក​នាយករដ្ឋមន្ត្រី ហ៊ុន សែន ដាក់​បេក្ខជន​បាន​មួយ​ភាគ​រយ​លើឃុំសង្កាត់​​ទូទាំងប្រទេស និងគណបក្ស​ភ្លើងទៀន​ដាក់​បេក្ខជន​ជាង​១ពាន់​៦០០​ឃុំ​សង្កាត់

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក ហ៊ុន សែន ទទួល​ស្គាល់​ថា ប្រធានាធិបតី​អាមេរិក​ប្រាប់​ឱ្យ​កែ​លំអ​ស្ថានភាព​សិទ្ធិមនុស្ស មុន​ការ​បោះ​ឆ្នោត​ឆ្នាំ២០២៣ ខាង​មុខ
រឿង​ដែល​គេ​អាន​​ច្រើន​បំផុត
នយោបាយ
ប្រធាន​គណបក្ស​ឆន្ទៈខ្មែរ​លាលែង​ពី​បក្ស​ជា​ផ្លូវ​ការ ដើម្បីទៅ​ចូលរួម​ជាមួយ​បក្ស​ភ្លើង​ទៀន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។