នៅព្រឹកថ្ងៃទី២១ សីហា នេះ ព្រះមហាក្សត្រព្រះបាទសម្ដេច នរោត្តម សីហមុនី នឹងយាងជាអធិបតីក្នុងពិធីបើកសម័យប្រជុំដំបូងរបស់រដ្ឋសភានីតិកាលទី៧ ដើម្បីប្រកាសពីសុពលភាពក្រុមសមាជិកសភាថ្មី និងអនុម័តបទបញ្ជាផ្ទៃក្នុងរបស់រដ្ឋសភា។
សម័យប្រជុំលើកដំបូងនេះ នឹងធ្វើឡើង ទោះជាមតិជាតិ និងអន្តរជាតិនាំគ្នារិះគន់ថា ជាក្រុមសមាជិកសភាដែលកើតចេញពីការបោះឆ្នោតមិនស្របតាមច្បាប់ជាតិ និងអន្តរជាតិ ផ្ទុយពីគោលការណ៍របបលទ្ធិប្រជាធិបតេយ្យយ៉ាងណាក៏ដោយចុះ។
ពិធីប្រកាសសុពលភាពក្រុមសមាជិកសភាទាំង១២៥រូប ដែលមកពីគណបក្សប្រជាជនកម្ពុជា១២០រូប និងគណបក្សហ៊្វុនស៊ិនប៉ិច ៥រូប នឹងធ្វើឡើងនៅពេលព្រឹក ហើយនៅពេលរសៀល ពួកគេនឹងធ្វើដំណើរ ទៅស្បថនៅព្រះបរមរាជវាំង។
សេចក្ដីជូនដំណឹងរបស់អ្នកនាំពាក្យរដ្ឋសភាកាលពីថ្ងៃទី១១ សីហា បញ្ជាក់ថា លុះនៅថ្ងៃទី២២ សីហា សម័យប្រជុំលើកដំបូងក្នុងនីតិកាលទី៧ នឹងបន្តបោះឆ្នោតគាំទ្រប្រធានរដ្ឋសភា អនុប្រធានរដ្ឋសភា ប្រធាននិងអនុប្រធានគណៈកម្មការជំនាញទាំងអស់ ហើយបន្ទាប់មក នឹងប្រកាសផ្ដល់សេចក្ដីទុកចិត្តដល់រដ្ឋាភិបាលថ្មី ដឹកនាំដោយកូនប្រុសលោក ហ៊ុន សែន គឺលោក ហ៊ុន ម៉ាណែត ដែលរងការរិះគន់ថា បានក្លាយជានាយករដ្ឋមន្ត្រីស៊ីកេរ្តិ៍ពីឪពុក ឬឡើងតាមជើងខោឪ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។