គជប​ក្នុង​រយៈ​ពេល​១៩​ថ្ងៃ​មាន​ប្រជាពលរដ្ឋ​ចុះ​ឈ្មោះ​ថ្មី​មាន​ចំនួន​ជាង​២​សែន​នាក់

ហេង រស្មី
2020-10-28
Share
nec75 nec
Photo: RFA

គណៈកម្មាធិការ​ជាតិ​រៀប​ចំ​ការ​បោះ​ឆ្នោតហៅ​កាត់​ថា​ គជប​​ប្រកាស​ថា​ ក្នុង​​រយៈ​ពេល​១៩​ថ្ងៃ​គឺ​ចាប់​ពី​ថ្ងៃទី​ចាប់​ពី​ថ្ងៃទី​១​ ដល់​ថ្ងៃ​ទី​១៩​ តុលា​កន្លង​ទៅ​នេះ​ចំនួន​អ្នក​ចុះ​ឈ្មោះ​ថ្មី​ មាន​ចំនួន​ជាង​២​សែន​នាក់​(​២៦៨៥៥៣​នាក់)​ គឺ​ស្មើ​នឹង​៨៩,៤​ភាគ​រយ។​

អ្នក​នាំ​ពាក្យ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​លោក​ ហង្ស ពុទ្ធា ប្រាប់​អាស៊ីសេរីថា​ តាម​ប្រតិទិន​គ​ជ​ប នឹង​ធ្វើការ​បិទផ្សាយ​បញ្ជី​ឈ្មោះ​បោះ​ឆ្នោត​ដំបូង​ នៅ​ថ្ងៃ​ទី​២៧​ វិច្ឆិកា​ ឆ្នាំ២០២០​ និង​បិទ​ផ្សាយ​បញ្ជី​ឈ្មោះ​បោះ​ឆ្នោត​ដែល​ត្រូវ​លុប​ចេញ​ ពី​បញ្ជី​ឈ្មោះ​បោះ​ឆ្នោត​ចុង​ក្រោយ​ឆ្នាំ​២០១៩។

បញ្ជី​ឈ្មោះ​បោះឆ្នោត​ចុង​ក្រោយ​ដែល​ត្រូវ​បាន​លុប​មាន​ចំនួន​ជាង​១​សែន​នាក់​(១៥២០០៤​នាក់) និង​អ្នកត្រូវ​លុប​ឈ្មោះ​ថ្មី​ឆ្នាំ​២០២០​សរុប​មាន​ចំនួន​ជិត​២៧​ម៉ឺន​នាក់​(២៦៨៥៥៣​នាក់)។​​

គិត​ត្រឹម​ថ្ងៃ​ទី​២៧​ តុលា​ ចំនួន​តួលេខ​សរុប​ដែល​មាន​ឈ្មោះ​ក្នុង​បញ្ជី​បោះ​ឆ្នោត​ឆ្នាំ​២០២០​ គិត​ទាំង​ថ្មី​ និង​ចាស់​មាន​ចំនួន​ជិត​៩​លាន​នាក់​(៨៨៣៤៧៥២នាក់)។​

លោក​ថា​ ប្រជាពលរដ្ឋ​មាន​សិទ្ធិ​ប្តឹង​ទៅ​គជប​ ប្រសិន​បើ​មិន​ពេញ​ចិត្ត​ចំពោះ​ការ​ចុះ​បញ្ជី​ថ្មី​នេះ​ ហើយ​បណ្តឹង​ទាំង​នោះ​ចែក​ចេញ​ជាពីរ​ប្រភេទ​ គឺ​បណ្តឹង​កែតម្រូវ​ទិន្នន័យ​ ខុស​តួអក្សរ​ ខុស​ថ្ងៃ​ខែ​ ឆ្នាំ​កំណើត​ និង​បណ្ដឹង​បដិសេធ​ខុស​លក្ខខណ្ឌ​ដែល​មិន​ទាន់​គ្រប់​អាយុ​១៨​ឆ្នាំ​ មាន​ឈ្មោះ​ក្នុង​បញ្ជី​ឈ្មោះ​បោះ​ឆ្នោត។​

លោក​ អេង ឆៃអ៊ាង អនុប្រធាន​គណបក្ស​សង្គ្រោះជាតិ​មិន​ចាប់​អារម្មណ៍​នឹង​ការ​ចុះ​ឈ្មោះ​បោះ​ឆ្នោត​នេះ​ទេ។​លោក​ថា​ របប​ក្រុង​ភ្នំពេញ​ត្រូវ​តែ​ស្តារ​ប្រជាធិបតេយ្យ​ និង​ការ​គោរព​សិទ្ធិមនុស្ស​ ហើយ​ប្រគល់​គណបក្ស​សង្គ្រោះ​ជាតិ មក​​វិញ​ ទើប​បក្ស​ប្រឆាំង​មួយ​នេះ​អាច​ចូល​រួម​បោះ​ឆ្នោត​បាន៖«​ព្រោះ​ជា​ធម្មតា​ ការ​ចុះ​ឈ្មោះ​ដើម្បី​ឲ្យ​មនុស្ស​បាន​ទៅ​បោះ​ឆ្នោត​ហ្នឹង​ ឥឡូវ​ហ្នឹង​បោះ​ឆ្នោត​យក​អី​។បើ​ហ៊ុន សែន​ ជា​អ្នក​កំណត់​អ្វី​ទាំង​អស់​ យើង​ធម្មតា​ធ្វើ​យ៉ាង​ណា​?​ ពី​ព្រោះ​ឥឡូវ​គណបក្ស​ធំ​មួយ​ ហ៊ុន​ សែន​ រំលាយ​បាត់​ទៅ​ហើយ​ៗ​ បោះ​ឆ្នោត​យ៉ាង​ម៉េច​?​ទាល់​តែ​យើង​រួម​គ្នា​មក​ស្តាលទ្ធិ​ប្រជាធិប​តេយ្យ ដើម្បី​បង្ខំ​ឲ្យ​​លោក​ ហ៊ុន សែន​ ត្រូវ​តែ​ដោះ​លែង​មក​វិញ​ជាមួយ​នឹង​សហគមន៍​អន្តរ​ជាតិ»។​​​

គជប​ជា​រៀង​រាល់​ឆ្នាំ​មាន​ដំណើរ​ការ​ពិនិត្យ​បញ្ជី​ឈ្មោះ​ និង​ចុះ​ឈ្មោះ​បោះ​ឆ្នោត​ប្រចាំ​ឆ្នាំ​ ដើម្បី​ធ្វើ​បច្ចុប្បន្ន​ភាព​បញ្ជី​ឈ្មោះ​បោះ​ឆ្នោត​ ហើយ​ដំណើរ​ការ​នេះ​មាន​រយៈ​ពេល​បី​ខែ​។​ប៉ុន្តែ​គជប​ទទួល​ការ​ចុះ​ឈ្មោះ​បោះ​ឆ្នោត​ថ្មី​តែ​១៩​ថ្ងៃ​ប៉ុណ្ណោះ​ គឺ​បាន​ចាប់​ផ្តើម​ឡើង​កាល​​ពី​ថ្ងៃ​ទី​១​ ដល់​ថ្ងៃ​ទី​១៩​ ខែតុលា​។​ចំណែក​ថ្ងៃ​ដែល​នៅ​សេស​សល់​គឺ ជា​ដំណើរ​ការ​ទទួល​ពាក្យ​បណ្ដឹង​ និង​ដោះ​ស្រាយ​បណ្ដឹង​ពី​ប្រជាពលរដ្ឋ​ និង​ដំណើរ​ការ​រដ្ឋបាល​ផ្សេងៗ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។