គណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា លទ្ធផលបណ្តោះអាសន្ននៃចំនួនអ្នកបានបោះឆ្នោតគិតត្រឹមម៉ោង ៥ រសៀលថ្ងៃទី ២៩ កក្កដា មានចំនួនជាង ៦ លាន ៨ សែននាក់។ ប្រធានចលនាសង្គ្រោះជាតិ លោក សម រង្ស៊ី ជឿជាក់ថា នេះជាតួលេខបំប៉ោង គ្មានការពិត ព្រោះគ្មានការចូលរួមសង្កេតការណ៍ពីអ្នកជំនាញ និងអង្គការឯករាជ្យ។
ប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក ថ្លែងក្នុងសន្និសីទសារព័ត៌មាននៅរសៀលថ្ងៃទី ២៩ កក្កដា ថា នេះជាជោគជ័យនៃការបោះឆ្នោតដែលមានពលរដ្ឋជាង ៨២ ភាគរយ (៨២,១៧%) នៃអ្នកមានឈ្មោះក្នុងបញ្ជីឈ្មោះបោះឆ្នោតជាង ៨លាន ៣សែននាក់ បានចេញទៅបោះឆ្នោតទៅតាមឆន្ទៈរបស់ខ្លួន។ លោកអះអាងថា តួលេខនេះបង្ហាញឱ្យសហគមន៍អន្តរជាតិដែលមានបំណងដាក់ទណ្ឌកម្មលើកម្ពុជានោះ ឃើញច្បាស់ថា ពលរដ្ឋខ្មែរមានឆន្ទៈពិតប្រាកដក្នុងការលើកស្ទួយប្រជាធិបតេយ្យ៖ «នេះជាចម្លើយហើយ ជាចម្លើយជាមួយមជ្ឈដ្ឋានអន្តរជាតិ ថាតើខ្មែរគេស្រឡាញ់លទ្ធិប្រជាធិបតេយ្យទេ ? ដែលអស់លោកថាវាក្លែងក្លាយនោះ ស្រាប់តែគេចូលរួមយ៉ាងគគ្រឹកគគ្រេងលើសពីការបោះឆ្នោតឆ្នាំ២០១៣ ទៅទៀត។ ហើយបន្ទាប់ពីចេញលទ្ធផលនេះទៅ យើងចាំពិនិត្យមើលពីជំហររបស់អន្តរជាតិ តើគេនៅបន្តធ្វើសកម្មភាពមួយដែលផ្ទុយពីឆន្ទៈរបស់ប្រជាជនខ្មែរទូទាំងប្រទេសរបៀបនេះ ឬយ៉ាងណា ?»។
ឆ្លើយតបនឹងការលើកឡើងនេះ ប្រធានចលនាសង្គ្រោះជាតិ លោក សម រង្ស៊ី ជឿជាក់ថា តួលេខដែល គ.ជ.ប បានប្រកាសនេះ ជាតួលេខដែលគ្មានការពិតឡើយ តែជាតួលេខដែលរបបក្រុងភ្នំពេញបំប៉ោងឡើងប៉ុណ្ណោះ។ ហេតុផលដែលលោកយល់ថានេះ ជាតួលេខក្លែងក្លាយ ដោយសារក្នុងការិល័យបោះឆ្នោតនីមួយៗមិនមានអ្នកសង្កេតការណ៍ឯករាជ្យ និងមិនមានភ្នាក់ងារគណបក្សនយោបាយគ្រប់គ្រាន់។ លោកសង្កត់ធ្ងន់ថា ការបោះឆ្នោតនេះមិនបានឆ្លុះបញ្ចាំងពីឆន្ទៈពិតរបស់ពលរដ្ឋខ្មែរឡើយ ដោយសារអវត្តមានគណបក្សសង្គ្រោះជាតិដែលមានអ្នកគាំទ្ររាប់លាននាក់នៅទូទាំងប្រទេស៖ «គេអាចយកសន្លឹកឆ្នោត យកទៅញាត់ក្នុងហឹបឆ្នោត ហើយថាមានអ្នកបោះឆ្នោតច្រើនណាស់ ពីព្រោះសុទ្ធតែគ្នាគេ មានអ្នកណាមើល ? មានអ្នកណាឃើញ ? គ្មានអ្នកណាថាអ្វីទេ គឺគេញាត់ចូលក្នុងហឹបឆ្នោត គេចង់ញាត់ប៉ុន្មានក្នុងហឹបឆ្នោតស្រេចតែចិត្តរបស់គេ។ គេចង់គូសថា អ្នកនេះបានទៅបោះឆ្នោត អ្នកនោះបានទៅបោះឆ្នោត ទោះជាសាម៉ីខ្លួនមិនបានទៅបោះឆ្នោតទាល់តែសោះ ក៏គេអះអាងអញ្ចឹងបាន ហើយដល់ទីបញ្ចប់គេបង្ហាញតួលេខថា ៧០ ៨០ ៩០ ឬដល់ ១០០ ភាគរយក៏បានដែរ ពីព្រោះអត់មានអ្នកណាទៅតាមដានបាន ដូច្នេះសូមបងប្អូនកុំជឿឱ្យសោះ»។
នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ ២០១៧ កន្លងទៅ ចំនួនពលរដ្ឋចេញទៅបោះឆ្នោតមានប្រហែល ៩០ ភាគរយ ដោយក្នុងនោះប្រហែល ៥០% គាំទ្រគណបក្សប្រជាជនកម្ពុជា និងជិត ៤៤% គាំទ្រគណបក្សសង្គ្រោះជាតិ ក្នុងចំណោមអ្នកមានឈ្មោះបោះឆ្នោតសរុបជាង ៧ លាន ៨ សែននាក់។ ទោះបីជាយ៉ាងណា ឆន្ទៈរបស់ពលរដ្ឋជិតកន្លះប្រទេសដែលស្តែងឡើងតាមរយៈកៅអីតំណាងរាស្ត្រគណបក្សសង្គ្រោះជាតិចំនួន ៥៥ អាសនៈ និងអាសនៈក្រុមប្រឹក្សាឃុំសង្កាត់ជាង ៥ ពាន់អាសនៈ បូករួមទាំងតួនាទីជាសមាជិកក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ ជាច្រើនទៀតផងនោះ ត្រូវបានរបបលោក ហ៊ុន សែន បដិសេធចោលទាំងស្រុងតាមរយៈការរំលាយគណបក្សសង្គ្រោះជាតិ។
អតីតឧបនាយករដ្ឋមន្ត្រីនៃរដ្ឋាភិបាលចម្រុះអាណត្តិទី ៣ ពីខាងគណបក្សរាជានិយមហ្វ៊ុនស៊ិនប៉ិច លោកព្រឹទ្ធាចារ្យ លឺ ឡាយស្រេង មានប្រសាសន៍ថា អ្នកណាក៏ដឹងដែរថា គណបក្សប្រជាជនកម្ពុជារបស់លោក ហ៊ុន សែន នឹងឈ្នះឆ្នោតនៅអាណត្តិនេះបន្តទៀតយ៉ាងងាយស្រួលបំផុត ដោយសារគណបក្សនេះបានកម្ចាត់គណបក្សសង្គ្រោះជាតិដែលជាដៃគូប្រកួតប្រជែងដ៏ស្រួចស្រាល់រួចទៅហើយនោះ។ លោកបន្តថា ទាំងតួលេខនៃអ្នកបានបោះឆ្នោត ទាំងសំឡេងឆ្នោត និងទាំងអាសនៈសភានោះ គណបក្សកាន់អំណាចចង់បានប៉ុន្មានក៏បានដែរ ព្រោះបក្សនេះបានក្តោបក្តាប់ស្ថាប័នជាតិសំខាន់ៗអស់ទៅហើយ ប៉ុន្តែអ្វីដែលបក្សនេះត្រូវការគឺភាពស្របច្បាប់ពីពលរដ្ឋ។ លោកថា ការបង្ហាញឱ្យឃើញពីតួលេខអ្នកចេញទៅបោះឆ្នោតច្រើននេះ គឺដើម្បីឱ្យរបបលោក ហ៊ុន សែន មានលេសយកទៅប្រាប់សហគមន៍អន្តរជាតិថា រដ្ឋាភិបាលថ្មីពិតជាកើតចេញពីការគាំទ្ររបស់ពលរដ្ឋខ្មែរពិតប្រាកដមែន។ ក៏ប៉ុន្តែ ព្រឹទ្ធាចារ្យរូបនេះ ព្រមានថា របបថ្មីរបស់លោក ហ៊ុន សែន នឹងត្រូវប្រឈមមុខនឹងទណ្ឌកម្មពីក្រុមប្រទេសធិបតេយ្យលោកខាងលិចនៅពេលឆាប់ៗខាងមុខ ហើយរបបថ្មីនេះនឹងមិនអាចរស់នៅដោយពឹងផ្អែកតែទៅលើប្រទេសចិនបានឡើយ៖ «ប្រសិនបើប្រកាសរដ្ឋាភិបាលទៅហើយ គេមិនទទួលស្គាល់ នោះជាបញ្ហាហើយ។ ប្រទេសប្រជាធិបតេយ្យគេជួយខ្មែររាប់លាននាក់ក្នុងមួយឆ្នាំៗ ដល់ពេលដែលផ្ដាច់ជំនួយអស់ទៅ យើងមានអ្វីចឹញ្ចឹម ? យើងពឹងតែចិនម្នាក់ឯងអត់កើតនោះទេ។ រឿងចិននេះ ខ្ចីកាន់តែច្រើន ចិនរឹតតែអរទៀត ព្រោះដីយើងនៅទំនេរច្រើនដែរ និយាយកាន់តែច្រើនចិនាន់តែអរទៅទៀត ពីព្រោះដីយើងនៅទំនេរច្រើនដែរ ដូចជា នៅសៀមរាប ជាដើម។ ក្រែងថ្ងៃក្រោយ អត់មានអ្វីសង គេត្រូវយកជាថ្នូរ ថាត្រូវឱ្យសៀមរាបប៉ុន្មានឆ្នាំ ឱ្យក្រុងព្រះសីហនុប៉ុន្មានឆ្នាំអីទៅ»។
គ.ជ.ប ប្រកាសថា លទ្ធផលបណ្តោះអាសន្ននៃការបោះឆ្នោតនេះ នឹងត្រូវផ្សព្វផ្សាយនៅថ្ងៃទី១១ ខែសីហា រីឯលទ្ធផលផ្លូវការនឹងត្រូវផ្សព្វផ្សាយនៅថ្ងៃទី១៥ ខែសីហា ឆ្នាំ ២០១៨ ខាងមុខ ក្នុងករណីគ្មានការបោះឆ្នោតសាជាថ្មីទៀតនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។