មន្ត្រីសង្គមស៊ីវិល និងមន្ត្រីគណបក្សភ្លើងទៀនរិះគន់គណៈកម្មាធិការជាតិរៀបចំការបោះឆ្នោត គ.ជ.បថា បំពេញតួនាទីមិនឯករាជ្យទៅតាមច្បាប់ ដែលចែងនៅក្នុងរដ្ឋធម្មនុញ្ញ។ ការលើកឡើងនេះ បន្ទាប់ពីគ.ជ.ប បានផ្ញើលិខិតអបអរសាទរមួយច្បាប់ជូនលោក ហ៊ុន សែន ដែលទទួលបានពានរង្វាន់សមិទ្ធផលពេញមួយជីវិតរបស់មេដឹកនាំឆ្នើមពិភពលោក។ លិខិតចុះប្រធាន គ.ជ.ប លោក ប្រាជ្ញ ចន្ទ សរសេរលិខិតលើកសរសើរស្នាដៃ និងដឹងគុណចំពោះលោក ហ៊ុន សែន ដែលបានដឹកនាំប្រទេសឱ្យទទួលបានសន្តិភាព និងមានការរីកចម្រើនលើគ្រប់វិស័យជាដើម។ មន្ត្រីជាន់ខ្ពស់ គ.ជ.ប អះអាងថា លិខិតនោះមិនធ្វើឱ្យប៉ះពាល់ដល់ដំណើរបោះឆ្នោត និងឯករាជភាពរបស់គ.ជ.បនោះទេ។
មន្ត្រីសង្គមស៊ីវិល គណបក្សនយោបាយ រួមទាំងសាធារណជនមួយចំនួនលើកឡើងថា គណៈកម្មាធិការជាតិរៀបចំការបោះឆ្នោត ជាស្ថាប័នមួយដើរតួយ៉ាងសំខាន់ ក្នុងការរៀបចំការបោះឆ្នោត ហើយស្ថាប័ន គ.ជ.ប ជាស្ថាប័នមួយឯករាជ្យ មិនត្រូវស្ថិតនៅក្រោមសម្ពាធគណបក្សនយោបាយណាមួយនោះទេ។ ប៉ុន្តែពួកគេថា ការដែលស្ថាប័នគ.ជ.ប លើកសរសើរពីគុណបំណាច់របស់មេដឹកនាំនយោបាយណាម្នាក់ គឺមិនបង្ហាញពីភាពឯករាជក្នុងការបំពេញកិច្ចការរបស់ខ្លួនទេ។
ប្រធានសហភាពសហជីពកម្ពុជា (CCU) អ្នកឃ្លាំមើលកម្ពុជា និងជាអតីតសមាជិកគណៈកម្មាធិការជាតិរៀបចំការបោះឆ្នោត លោក រ៉ុង ឈុន ថ្លែងថា ស្ថាប័ន គ.ជ.ប ដែលជាស្ថាប័នឯករាជ្យមិនគួរចេញលិខិតលើកសរសើរ ឬលើកតម្កើង ចំពោះអ្នកនយោបាយណាម្នាក់នោះទេ ពីព្រោះបញ្ហានេះធ្វើឱ្យពលរដ្ឋមានមន្ទិលសង្ស័យ និងដកសេចក្ដីទុកចិត្ត។ លោកជំរុញដល់គ.ជ.ប ត្រូវអនុវត្តច្បាប់ឱ្យបានត្រឹមត្រូវ និងចេះទទួលយកមតិយោបល់នានា យកពិនិត្យ និងដោះស្រាយ ដោយជៀសវាងការប្ដឹងផ្តល់អ្នករិះគន់រឿងបោះឆ្នោត ដែលផ្តល់គំរូអាក្រក់ដល់ប្រទេសកម្ពុជា។
លោក រ៉ុង ឈុន៖ «គណៈកម្មាធិការជាតិរៀបចំការបោះឆ្នោត ដែលគេចាត់ទុកថា ជាអាជ្ញាកណ្ដាល ហើយជាស្ថាប័នធម្មនុញ្ញ និងឯករាជ្យ តែនៅពេលដែលនិយាយលើកតម្កើងឥស្សរជនណាមួយនៅក្នុងបក្សមួយ ដែលឆ្លុះបញ្ចាំងថា ស្ថាប័នហ្នឹង ហាក់បីដូចជាលម្អៀងទៅភាគីហ្នឹង ហើយដែលធ្វើឱ្យពលរដ្ឋដកសេចក្ដីទុកចិត្ត បាត់បង់ជំនឿទៅលើអាជ្ញាកណ្ដាល ដែលរៀបចំការបោះឆ្នោតខាងមុខនេះ»។
ស្រដៀងគ្នានេះដែរ អនុប្រធានគណបក្សភ្លើងទៀនលោក ថាច់ សេដ្ឋា ថ្លែងថា លើកឡើងថា ក្នុងសង្គមប្រជាធិបតេយ្យបានចែងចែកស្ថាប័នឯករាជ្យស្ថាប័នដាច់ពីអ្នកនយោបាយ ដើម្បីរក្សាអព្យាក្រឹត្យភាពរបស់ខ្លួន និងផ្តល់ទំនុកចិត្តដល់ភាគីពាក់ព័ន្ធទាំងអស់។ ប៉ុន្តែលោកយល់ថា ការណ៍ ដែលគណៈកម្មាធិការជាតិរៀបចំការបោះឆ្នោតបានលើកសរសើរ និងដឹងគុណក្រោមការដឹកនាំលោក ហ៊ុន សែន ជាប្រធានគណបក្សប្រជាជននោះ គឺមិនត្រឹមត្រូវនោះទេ។ លោកបន្តថា សារបែបនេះនឹងធ្វើឱ្យប្រជាពលរដ្ឋ និងសហគមន៍អន្តរជាតិមើលឃើញកាន់តែច្បាស់ថា ស្ថាប័ន គ.ជ.បមិនរក្សាជំហរឯករាជ្យដោយអែបអបអ្នកនយោបាយកាន់អំណាច។
លោក ថាច់ សេដ្ឋា៖ «ឥឡូវយើងធ្វើអ៊ីចឹងទៀត បន្ថែមពីហ្នឹងទៀតកាន់តែឆ្លុះបញ្ចាំងច្បាស់ថា ស្ថាប័នគ.ជ.ប មិនមែនស្ថាប័នឯករាជ្យទេ ដោយនៅតែរណេបរណបអែបអបអ្នកនយោបាយអ៊ីចឹងទៅ លើកជើងបញ្ចើចបញ្ចើអ៊ីចឹងទៅ។ អ៊ីចឹងហើយ បានធ្វើឱ្យការវិនិច្ឆ័យពីមហាជន ក៏ដូចសហគមន៍អន្តរជាតិ នៅតែមានមន្ទិលសង្ស័យថា ស្ថាប័នគ.ជ.បមិនឯករាជ្យហ្នឹងបាទ»។
ការលើកឡើងនេះ ធ្វើឡើងបន្ទាប់ពី ប្រធានគណៈកម្មាធិការជាតិរៀបចំការបោះឆ្នោត គ.ជ.ប គឺលោក ប្រាជ្ញ ចន្ទ កាលពីថ្ងៃទី២០ ខែធ្នូ បានផ្ញើលិខិតអបអរសាទរមួយច្បាប់ជូនលោក ហ៊ុន សែន ដែលទទួលបានពានរង្វាន់សមិទ្ធផលពេញមួយជីវិតរបស់មេដឹកនាំឆ្នើមពិភពលោក។ លិខិតចុះហត្ថលេខាដោយលោក ប្រាជ្ញ ចន្ទ បានកោតសរសើរ និងដឹងគុណចំពោះលោក ហ៊ុន សែន ដែលបានដឹកនាំប្រទេសឱ្យទទួលបានសន្តិភាព និងមានការរីកចម្រើនលើគ្រប់វិស័យ ព្រមទាំងរំឭកពីស្នាដៃតស៊ូរំដោះជាតិពីរបប ប៉ុល ពត និងដឹកនាំបញ្ចប់សង្គ្រាម ដែលធ្វើឱ្យកម្ពុជាមានសុខសន្តិភាពពេញលេញ ការបង្រួបបង្រួមជាតិ ឯកភាពជាតិ ឯកភាពទឹកដី ស្ថិរភាពនយោបាយ សណ្ដាប់ធ្នាប់សង្គម នីតិរដ្ឋជាដើម។
ឆ្លើយតបរឿងនេះ អ្នកនាំពាក្យប្រធានគណៈកម្មាធិការជាតិរៀបចំការបោះឆ្នោត គ.ជ.ប លោក ហង្ស ពុទ្ធា អះអាងថា គ.ជ.ប បំពេញតួនាទីដោយឯករាជ្យតាមច្បាប់កំណត់។ លោកបន្តថា ខ្លឹមសារលិខិត ដែលគ.ជ.បផ្ញើជូនលោកនាយករដ្ឋមន្ត្រី ហ៊ុន សែន កាលពីពេលថ្មីៗ នេះ គឺក្នុងនាមជាខ្មែរដូចគ្នា ដោយលោកថា មិនប៉ះពាល់ដល់ដំណើរការបោះឆ្នោត និងឯករាជភាពរបស់គ.ជ.បនោះទេ។
លោក ហង្ស ពុទ្ធា៖ «ជម្រាបថា គ.ជ.បឯករាជ្យក្នុងតួនាទីស្របតាមច្បាប់ជាធរមាន ហើយការលើកឡើងពាក់ព័ន្ធនឹងលិខិតចេញពីគ.ជ.បគួរតែពិចារណាឡើងវិញ អំពីឈាមជ័យជាខ្មែរ ហើយក្នុងនាមជាខ្មែរឈាមជ័រខ្មែរ គួរតែមានមោទនភាពជាមួយអ្វី ដែលសកលលោកទទួលស្គាល់ខ្មែរបាទ»។
ទន្ទឹមនឹងស្ថាប័នគ.ជ.បរងការរិះគន់ហាក់បង្ហាញជំហរមិនឯករាជ្យនេះដែរ លោកនាយករដ្ឋមន្ត្រី ហ៊ុន សែន កាលពីថ្ងៃទី២២ ខែធ្នូ វិញ បានថ្លែងសារនយោបាយដោយលោកប្ដេជ្ញាលុបបំបាត់វប្បធម៌ក្រោយការបោះឆ្នោតគណបក្សរបស់លោកក្លាយជាចោរ។ លោកព្រមានប្ដឹងទៅតុលាការ ដើម្បីទាមទារសំណងរាប់រយលានរៀលពីអ្នកបញ្ចេញមតិទាំងឡាយណា ដែលហ៊ានចោទប្រកាន់គណបក្សប្រជាជនកម្ពុជាថា លួចសន្លឹងឆ្នោតតទៅទៀត។
លោក ហ៊ុន សែន៖ «អាណានិយាយថា ចោរប្ដឹងអាហ្នឹង ប្ដឹងណាហ្នឹង អត់មានទុកទេ ពីថ្ងៃនេះទៅ លេងអាហ្នឹងហ្មង។ លុបបំបាត់ចោលនូវវប្បធម៌លាបពណ៌ក្រោយការបោះឆ្នោតថា ឯងជាចោរ បើមិនអ៊ីចឹងទេ អាហ្នឹងមិនរាង។ ហ្អែងចង់ស្រែក ទៅស្រែកក្រៅស្រុកទៅ ធ្វើអ្វីហ្អែងមិនកើត តែនៅក្នុងស្រុកអញធ្វើហើយ»។
ទោះយ៉ាងណាក្ដី ក្រុមអ្នកឃ្លាំមើលដំណើរការបោះឆ្នោតនិយាយថា ប្រសិនបើកម្ពុជា មានគណៈកម្មាធិការរៀបចំការបោះឆ្នោតឯករាជ្យពីគណបក្សនយោបាយនោះ នឹងមានភាពជឿជាក់លើប្រព័ន្ធបោះឆ្នោតនៅកម្ពុជា និងមិនមានការរិះគន់បន្តទៀត ចំពោះការបោះឆ្នោតឡើយ ហើយកម្ពុជានឹងមានស្ថិរភាពនយោបាយ ហើយដំណើរសាបព្រោះប្រជាធិបតេយ្យ នឹងមានការរីកចម្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។