អ្នកឃ្លាំមើលសង្កេតឃើញថា រដ្ឋសភានីតិកាលទី៧ ហាក់អសកម្មក្នុងការដោះស្រាយបញ្ហារបស់ប្រជាពលរដ្ឋដែលកំពុងជួបប្រទះការលំបាក ក្នុងជីវភាពរស់នៅប្រចាំថ្ងៃ និងខ្លះទៀតទទួលរងភាពអយុត្តិធម៌ក្នុងសង្គម។ ពួកគាត់ថា ភាពអសកម្មនេះ កើតឡើងដោយសារតំណាងរាស្ត្រមកពីគណបក្សនយោបាយ ដើរតាមគន្លងគោលនយោបាយគណបក្សរបស់ខ្លួន ជាជាងការអនុវត្តទៅតាមតួនាទី ក្នុងនាមជាតំណាងរាស្ត្រ។
អតីតមន្ត្រីគណបក្សប្រឆាំងលើកឡើងថា រដ្ឋសភានីតិកាលទី៧ ហាក់ដើរផ្ទុយពីតួនាទីរបស់ខ្លួន ក្នុងនោះ តំណាងរាស្ត្រភាគច្រើន នៅតែរក្សាភាពស្ងៀមស្ងាត់ និងចាំតែអនុម័ត លើការសម្រេចរបស់ថ្នាក់ដឹកនាំ នៃគណបក្សប្រជាជនកម្ពុជា ដែលជាគណបក្សមានសំឡេងភាគច្រើននៅក្នុងរដ្ឋសភាតែប៉ុណ្ណោះ។
មន្ត្រីជាន់ខ្ពស់គណបក្សសង្គ្រោះជាតិលោក ម៉ែន សុថាវរិន្ទ្រ សង្កេតឃើញថា តំណាងរាស្ត្រនៅតាមមណ្ឌលខេត្តមួយចំនួន អនុវត្តតួនាទីមានភាពច្របូកច្របល់ ដោយសារពួកគេក្ដោបក្ដាប់តំណែង និងតួនាទីច្រើនស្អេកស្កះ និងខ្លះទៀត រវល់តែគិតគូរតែលើរឿងមុខរបររកស៊ីផ្ទាល់ខ្លួន។ លោកបន្តថា ជាក់ស្ដែង រដ្ឋមន្ត្រីក្រសួងការពារជាតិ លោក ទៀ សីហា និងជាតំណាងរាស្ត្រខេត្តសៀមរាប មកពីគណបក្សប្រជាជនកម្ពុជា ហាក់សកម្មលើកិច្ចការកងទ័ព ជាងតួនាទីជាតំណាងរាស្ត្រ។ ចំណែក តំណាងរាស្ត្រខេត្តបាត់ដំបង និងជាអគ្គនាយកក្រុមហ៊ុនបៃតងកម្ពុជា លោក ភូ ពុយ ដែលមានកូតាមកពីគណបក្សប្រជាជនកម្ពុជាដែរនោះ ច្រើនតែរវល់ជាមួយការងារក្រុមហ៊ុន និងការវិនិយោគរបស់លោក លើវិស័យអចលនទ្រព្យ និងផ្សារទំនើប ជាជាងការដោះស្រាយបញ្ហាជូនពលរដ្ឋ ដូចជា បញ្ហាខ្វះទឹកធ្វើស្រែជាដើម។
លោក ម៉ែន សុថាវរិន្ទ្រ៖ «អត់ខ្វល់ទេ ព្រោះគាត់(គណបក្សកាន់អំណាច)អត់មានគូប្រជែង។ ហើយក្នុងតួនាទីនេះ អ្នកស្រី ឃួន សុដារី គាត់អត់មានគិតគូររឿងនីតិប្បញ្ញត្តិ អ្វីនោះទេ មានន័យថា គាត់ធ្វើតែតាមបញ្ជារបស់អំណាចនីតិប្រតិបត្តិ ដែលគេដាក់ឱ្យប៉ុណ្ណោះ»។
ប្រតិកម្មនេះ ធ្វើឡើងបន្ទាប់ពីការលើកឡើងរបស់រដ្ឋសភានីតិកាលទី៧ នៅថ្ងៃទី១៥ ខែកុម្ភៈ ថា ទទួលបានលទ្ធផលផ្លែផ្កាគួរជាទីមោទនៈ ក្នុងការបម្រើប្រជាពលរដ្ឋ និងប្រទេសជាតិលើការបំពេញមុខងារទាំងបី របស់រដ្ឋសភារួមមាន មុខងារនីតិកម្ម តាមដានការអនុវត្តច្បាប់ និងភាពជាតំណាង។ ក្នុងនោះរដ្ឋសភា បានបង្ហាញពីលទ្ធផលការងារ ក្នុងរយៈពេល ៦ខែមកនេះ ថា គណៈកម្មការនានានៃរដ្ឋសភា បានអញ្ជើញសមាជិករាជរដ្ឋាភិបាល និងប្រធានស្ថាប័ននានា និងអង្គភាព ឱ្យមកប្រជុំពិភាក្សាការងារ ដើម្បីសិក្សាស្វែងយល់អំពីការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧។
តំណាងរាស្ត្រមណ្ឌលខេត្តកំពង់ធំ មកពីគណបក្សហ៊្វុនស៊ិនប៉ិច លោក នាង ចាន់ណាក់ ប្រាប់វិទ្យុអាស៊ីសេរី ថា សមាជិករដ្ឋសភា នីតិកាលទី៧ បានបំពេញការងាររបស់ខ្លួន យ៉ាងសកម្ម មានដូចជា ការចូលរួមប្រជុំអនុម័ត តាមសំណើរបស់រដ្ឋាភិបាល និងចុះដោះស្រាយបញ្ហាជូនពលរដ្ឋជាដើម។
លោក នាង ចាន់ណាក់៖ «ប៉ុន្តែមកដល់ពេលនេះ ដូចជាមានករណីខ្លះ វាមាន(រឿង)នៅពីក្រោយខ្នង ដែលយើងពិបាកនិយាយមែនទែន។ អ៊ីចឹង ការដោះស្រាយ និងសិទ្ធិក្នុងការដោះស្រាយ ក៏យើងនៅមានកម្រិតដែរ»។
ក៏ប៉ុន្តែ នៅលើគេហទំព័រ និងទំព័របណ្ដាញសង្គមផ្លូវការរបស់រដ្ឋសភា មិនបានបង្ហាញពីសកម្មភាព រួមចំណែកក្នុងការដោះស្រាយបញ្ហាសង្គម មានដូចជា វិវាទដីធ្លី ការរំលោភសិទ្ធិការងារ ការរំលោភសិទ្ធិមនុស្ស និងអំពើអយុត្តិធម៌សង្គម របស់តំណាងរាស្ត្រនោះទេ។ នៅលើប្រព័ន្ធផ្សព្វផ្សាយព័ត៌មានរបស់សភា បានបង្ហាញសកម្មភាពឯកជនរបស់តំណាងរាស្ត្រចូលរួមក្នុងកិច្ចប្រជុំមួយចំនួនជាមួយមន្ត្រីមូលដ្ឋាន ចេញលិខិតអបអរសាទរប្រមុខថ្នាក់ដឹកនាំ ជួបជាមួយតំណាងការទូតបរទេស និងការប្រជុំពិភាក្សាអនុម័តសេចក្ដីព្រាងច្បាប់មួយចំនួន។
ទោះជាបែបនេះក្ដី សមិទ្ធផលការងាររបស់រដ្ឋសភា ដែលល្បីជាងគេ គឺនៅពេលដែលប្រធានសភា អ្នកស្រី ឃួន សុដារី បានសន្យាចំពោះមុខប្រធានរដ្ឋសភាវៀតណាម លោក វឿង ឌិញហ្វេ (VUONG DINH HUE)ក្នុងជំនួបទ្វេភាគី កាលពីថ្ងៃទី១ ខែធ្នូ ឆ្នាំ២០២៣ ថា នឹងបន្តជួយពលរដ្ឋវៀតណាម ដែលមករស់នៅកម្ពុជាដោយខុសច្បាប់។
វិទ្យុអាស៊ីសេរី មិនអាចទាក់ទង អ្នកនាំពាក្យរដ្ឋសភា លោក ឡេង ប៉េងឡុង និងប្រធានរដ្ឋសភា អ្នកស្រី ឃួន សុដារី ដើម្បីសុំសួរពីបញ្ហានេះបានទេ នៅថ្ងៃទី១៥ ខែកុម្ភៈ។
ជុំវិញរឿងនេះ អ្នកសិក្សាផ្នែកច្បាប់ លោក វ៉ន ចាន់ឡូត លើកឡើងថា ទោះបីរដ្ឋសភានីតិកាលទី៧ កើតឡើងចេញពីការបោះឆ្នោតក្ដី ក៏ការបោះឆ្នោតនោះ ខ្វះការប្រកួតប្រជែង និងខ្វះតំណាងសំឡេងភាគតិច ដែលធ្វើឱ្យការបំពេញតួនាទីរបស់រដ្ឋសភាមិនសូវមានឥទ្ធិពល និងការផ្លាស់ប្ដូរតុល្យភាពនៃអំណាច រវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិឡើយ។
លោក វ៉ន ចាន់ឡូត៖«រដ្ឋសភានៅក្នុងនីតិកាលទី៧ នេះ ជាមួយរដ្ឋសភា ក្នុងនីតិកាលទី៥ ដែលកាលនោះ មានវត្តមានគណបក្សសង្គ្រោះជាតិ គឺខុសគ្នាស្រឡះ។ ក្នុងអាណត្តិទី៥ រដ្ឋសភាជាតិ គឺមានសំឡេង២ គឺសំឡេងតំណាងភាគច្រើន និងតំណាងភាគតិច ដែលជំរុញឱ្យរដ្ឋសភា សកម្មក្នុងការបំពេញតួនាទីរបស់ខ្លួន ដូចជាការពិនិត្យទៅលើច្បាប់នានា ដែលចេញពីគណៈរដ្ឋមន្ត្រី ពិនិត្យទៅលើការចាយវាយថវិកា របស់ជាតិ»។
រដ្ឋសភានីតិកាលទី៧ បានចាប់ផ្ដើមដំណើរការចាប់ពីថ្ងៃទី២២ ខែសីហា ឆ្នាំ២០២៣ ដោយមានគណបក្សនយោបាយ២ ដែលទទួលបានអាសនៈក្រោយការបោះឆ្នោតថ្នាក់ជាតិ ដែល គ.ជ.ប មិនឱ្យគណបក្សប្រឆាំងចូលរួមប្រកួតប្រជែង កាលពីថ្ងៃទី២២ ខែកក្កដា គឺគណបក្សប្រជាជនកម្ពុជារបស់លោក ហ៊ុន សែន ទទួលបានអាសនៈចំនួន១២០ និងគណបក្សហ៊្វុនស៊ិនប៉ិច របស់ព្រះអង្គម្ចាស់នរោត្ដម ចក្រាវុធ ទទួលបានតែអាសនៈចំនួន ៥។
អ្នកឃ្លាំមើលបញ្ហាសង្គមស្នើឱ្យតំណាងរាស្ត្រ ដែលអង្គុយក្នុងរដ្ឋសភាអនុវត្តតួនាទី និងភារកិច្ចរបស់ខ្លួន ក្នុងអាណត្តិ៥ឆ្នាំនេះ ឱ្យមានតម្លៃ និងលើកយកបញ្ហាសង្គមមកពិភាក្សា ដើម្បីរកដំណោះស្រាយ ដោយមិនរើសអើងពីនិន្នាការនយោបាយ និងប្រកាន់បក្ខពួកឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។