អ្នកឃ្លាំមើលថា អ្នកជំនាញ​នឹង​ចារ​ជាប្រវត្តិសាស្ត្រ​ចំពោះ​រដ្ឋាភិបាល​​លោក ហ៊ុន សែន ដែល​បណ្តែតបណ្ដោយ​ឱ្យ​មាន​ឧក្រិដ្ឋកម្ម​គ្រឿងញៀន

ដោយ សន ចាន់រដ្ឋា
2022.12.07
Share on WhatsApp
Share on WhatsApp
អ្នកឃ្លាំមើលថា អ្នកជំនាញ​នឹង​ចារ​ជាប្រវត្តិសាស្ត្រ​ចំពោះ​រដ្ឋាភិបាល​​លោក ហ៊ុន សែន ដែល​បណ្តែតបណ្ដោយ​ឱ្យ​មាន​ឧក្រិដ្ឋកម្ម​គ្រឿងញៀន រថយន្តដឹកសារធាតុផ្សំជា​គ្រឿងញៀន​របស់ជនជាតិចិន​នៅក្នុង​ប្រទេសកម្ពុជា​ដែល​អាជ្ញាធរ​បាន​បង្ក្រាប​នាពេល​កន្លង​មក។
រូប៖ អគ្គស្នងការដ្ឋាននគរបាលជាតិ

អ្នកឃ្លាំមើល រិះគន់​រដ្ឋាភិបាលលោក ហ៊ុន សែន ករណី​ជនជាតិចិន​អាច​ដឹកជញ្ជូន​សារធាតុគីមីផ្សំកែច្នៃ​គ្រឿងញៀន និង​បើករោងចក្រ​ផលិត​នៅ​កម្ពុជា។ អ្នកនាំពាក្យ​គណបក្ស​កាន់អំណាច​ទទួលស្គាល់​ថា សមត្ថកិច្ច​នៃស្ថាប័ន​ជំនាញ​នៅ​មាន​ចន្លោះ​ប្រហោង​ច្រើន​ក្នុងការ​បង្ក្រាប​ក្រុមឧក្រិដ្ឋជន​ដែល​ដឹកជញ្ជូន​សារធាតុគីមី​យកមក​ផលិត​គ្រឿងញៀន​នៅកម្ពុជា។

អគ្គលេខាធិការសហព័ន្ធ​និស្សិតបញ្ញវន្ត​កម្ពុជា លោក គៀន ពន្លក សង្កេតឃើញ​ថា បញ្ហា​នៃ​ឧក្រិដ្ឋកម្មគ្រឿងញៀន គឺជារឿងកាន់តែ​ស្មុគស្មាញ និងជាដំបៅ​សង្គម​ធ្ងន់ធ្ងរ​ដែល​បាន​បង្ក​ផលប៉ះពាល់ដល់​ប្រជាពលរដ្ឋ និងសង្គមកម្ពុជា​ជួបបញ្ហា​អសន្តិសុខសង្គម​ជាបន្តបន្ទាប់។ លោកយល់ថា មូលហេតុ​ដែល​រដ្ឋាភិបាល​នៅតែ​មិន​អាចដោះស្រាយ​បញ្ហា​នៃ​ការជួញដូរគ្រឿងញៀន​នេះ គឺដោយសារ​តែ​អំពើពុករលួយ​ជាប្រព័ន្ធ និង​គ្មាន​អនុវត្តច្បាប់​ត្រឹមត្រូវ ឬ​ដាក់ទោសទណ្ឌ​លើ​អ្នកមានលុយ​មានអំណាច​ដែល​រកស៊ី​ជួញដូរ​គ្រឿងញៀន​នេះ៖

«ប្រសិនបើ​រដ្ឋាភិបាល នៅតែ​បណ្តែតបណ្ដោយ​លំហូរ​នៃ​គ្រឿងញៀន​ចូលប្រទេស​កម្ពុជា​កាន់តែច្រើន​ទៅ ប្រវត្តិសាស្ត្រ​នឹង​ចារ​ទុក​ជាក់​ជា​ពុំខាន នៅ​ពេល​ដែរ​គណបក្ស​កាន់អំណាច​អស់​អំណាច។ គេ​នឹង​ចារ​ថា សម័យ​ក្រោមការដឹកនាំ​គណបក្សប្រជាជនកម្ពុជា គឺ​ធ្វើ​ឱ្យ​ប្រទេសកម្ពុជា​បន្ត​មហន្តរាយ បន្ត​គ្រោះថ្នាក់ជាតិ​គឺ​លិចលង់​ដោយ​ការជួញដូរមនុស្ស ការ​លាងលុយ​កខ្វក់ និង​ការជួញដូរគ្រឿងញៀន»

លោក គៀន ពន្លក ចង់ឃើញ​រដ្ឋាភិបាល​រឹតបន្តឹងច្បាប់ និងអនុវត្តប្រកបដោយ​តម្លាភាព​ទោះបីជាពួកគេ​ជា​បុគ្គលមាន​អំណាច​មាន​ឋានន្តរសក្តិយ៉ាងណាក្ដី ប្រសិនបើ​រកឃើញថា ពួកគេ​មានជាប់ព័ន្ធ​បញ្ហាគ្រឿងញៀន គឺ​អាជ្ញាធរ​មានសមត្ថកិច្ច​ត្រូវចាត់វិធានការ​ដាក់ទោសទណ្ឌ​ពួកគេ​ឱ្យបាន​ធ្ងន់ធ្ងរ​តាម​ផ្លូវច្បាប់។

ការ​លើកឡើង​របស់​អ្នកឃ្លាំមើល​បែបនេះ ធ្វើឡើងក្រោយ​អាជ្ញាធរ​បានបង្ក្រាប​ជនជាតិចិន​ដែល​មកបើករោងចក្រផលិតគ្រឿងញៀន​នៅ​កម្ពុជា ជា​បន្តបន្ទាប់ ដោយ​រឹបអូសគ្រឿងញៀន​ម្តងៗ​រាប់រយតោន ហើយ​ថែម​រកឃើញទីតាំងក្រុមឧក្រិដ្ឋជន​បើករោងសិប្បកម្ម​គ្រឿងញៀន​ដូចជា​នៅ​ខេត្តព្រះសីហនុ ស្វាយរៀង ព្រៃវែង រាជធានីភ្នំពេញ និងខេត្តកំពង់ស្ពឺ ជាដើម។

កាលពី​ថ្ងៃទី២៦ ខែមិថុនា អាជ្ញាធរ​ប្រយុទ្ធប្រឆាំងគ្រឿងញៀន​បាន​ដុតបំផ្លាញ​សារធាតុញៀន និង​សារធាតុគីមី សរុបជាង ៦តោន ក្នុង​ចំណោមវត្ថុតាង​គ្រឿងញៀន សារធាតុគីមីផ្សំ និង​សារធាតុគីមី​ពាក់ព័ន្ធផ្សេងៗ ដែល​រឹបអូស​បាន មាន​ទម្ងន់សរុបជិត ១០០តោន។ អាជ្ញាធរ​ឱ្យដឹងទៀត​ថា ក្នុងឆ្នាំ២០២០ និង២០២១ ដែល​មាន​ការរីករាលដាលជំងឺកូវីដ-១៩ សមត្ថកិច្ច​បង្ក្រាប និង​រឹបអូស​គ្រឿងញៀន​បាន​ជិត ១០តោន និង​ឃាត់ខ្លួនជនសង្ស័យបាន​ជាង ៣ម៉ឺននាក់។ ក្នុងនោះ សមត្ថិច្ច​បង្ក្រាប​បទល្មើសគ្រឿងញៀន​បាន​ចំនួន​ជាង ១ម៉ឺនករណី (១០.៤៦១ករណី) ក្នុង​ឆ្នាំ២០២០ និង​ជាង ៦ពាន់ករណី (៦.៣០៨ករណី ទៀត​ក្នុងឆ្នាំ២០២១។

ឆ្លើយតបនឹងរឿងនេះ អ្នកនាំពាក្យ​គណបក្សប្រជាជនកម្ពុជា លោក សុខ ឥសាន ទទួលស្គាល់​ថា សមត្ថកិច្ច​នៃ​ក្រសួងស្ថាប័ន​ផ្នែក​ប្រយុទ្ធប្រឆាំង​គ្រឿងញៀន​នៅ​ខ្វះចន្លោះប្រហោង​ក្នុងការ​បង្រ្កាប​ឧក្រិដ្ឋជន និង​ក្រុមឈ្មួញទុច្ចរិតមួយចំនួន​ដែល​បន្លំសារធាតុគីមី​នាំចូល​កម្ពុជា​ដើម្បី​ផលិត​ជាគ្រឿងញៀន៖ 

«ឧក្រិដ្ឋកម្មគ្រឿងញៀន​នេះ​រាជរដ្ឋាភិបាល មិនចង់​ឃើញ មិនចង់បាន មិនចង់ពាក់ព័ន្ធ​អីទេ ព្រោះ​យើង​មាន​ច្បាប់វិន័យ​តឹងរ៉ឹង ដើម្បី​ទប់ស្កាត់​ករណី​ឧក្រិដ្ឋកម្មគ្រឿងញៀន​ហ្នឹង។ យើង​ដឹង​ហើយថា ចោរ​កាលណា​ម្ចាស់​ប្រឡោះ​ប្រហោង​ប្រការ​ណាមួយ ចោរ​តែង​កើត​មាន​ហើយ ឆ្លៀតឱកាស ឆក់ឱកាស ដើម្បីបង្កើតបញ្ហា ធ្វើជី​សម្រាប់​ស្រោចដំណាំ ទន្ទឹម​នឹង​ធ្វើជាជីសម្រាប់កសិកម្មហ្នឹង​ក៏វាកែច្នៃគ្រឿងញៀន​មួយចំនួន​ដែរ ប្រឡោះ​ត្រង់​ហ្នឹង​ដែល​អាជ្ញាធរ​មាន​សមត្ថកិច្ច​លោក​មិន​បាន​ចាប់​អារម្មណ៍»

ទាក់ទងបញ្ហា​គ្រឿងញៀន​ដែរ ថ្មីៗនេះ​ក៏​មាន​ក្រុមឈ្មួញប្រើប្រាស់​រថយន្ត​មាន​ស្លាក​លេខខេមរភូមិន្ទ​ដឹកជញ្ជូន​គ្រឿងញៀន​ជាង ២រយគីឡូក្រាម ហើយ​ឈ្មួញនោះ​បាន​រត់គេចខ្លួនភ្លាមៗ​ក្រោយ​បើកឡាន​ក្រឡាប់​នៅ​រាជធានីភ្នំពេញ។ មកទល់នឹងពេលនេះ សមត្ថកិច្ចក្រុងភ្នំពេញ​មិនទាន់​បង្ហាញរបាយការណ៍​ស៊ើបអង្កេត​ចុងក្រោយ​ទាក់ទង​នឹង​ការ​តាមចាប់ខ្លួន​ឈ្មួញ​នោះ​នៅ​ឡើយទេ។

វិទ្យុអាស៊ីសេរី​មិនអាច​ទាក់ទង អគ្គស្នងការរងនគរបាលជាតិ​ទទួលបន្ទុកប្រឆាំង​បទល្មើសគ្រឿងញៀន លោក ម៉ក់ ជីតូ ដើម្បី​សាកសួរ​រឿងនេះ​បានទេ​នៅថ្ងៃទី៧ ខែធ្នូ។

ជុំវិញរឿងនេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព (PDP-Center) លោក យង់ គិមអេង មានប្រសាសន៍ថា បញ្ហាគ្រឿងញៀន​នៅកម្ពុជា​ហាក់​រីករាលដាល​ឆាប់រហ័ស​តាំងពីទីក្រុង​រហូតដល់​ទីជនបទ ដែល​ជារឿង​គួរឱ្យព្រួយបារម្ភ​សម្រាប់​យុវជនខ្មែរ​ជំនាន់ក្រោយ។ លោក រិះគន់​ថា ប្រសិនបើរដ្ឋាភិបាល​នៅតែ​គ្មានយន្តការគ្រប់គ្រង​ជនជាតិចិន​មួយចំនួន​ដែល​តែងតែ​ចាត់ទុក​កម្ពុជា​ទីតាំង​ផលិតគ្រឿងញៀន នោះ​លំហូរ​គ្រឿងញៀន​នៅ​កម្ពុជា​កាន់តែកើន​ឡើង​បន្ថែមទៀត និង​ធ្វើ​ឱ្យប៉ះពាល់​សង្គមជាតិ​ធ្ងន់ធ្ងរ៖

«ភាពអវិជ្ជមាន​ពាក់ព័ន្ធ​រឿង​គ្រឿងញៀន​យើង​ឃើញ​មាន​ជា​ហូរហែដែរ កត្តា​នេះ​ដែរ​ធ្វើ​ឱ្យ​មាន​មន្ទិលសង្ស័យ​ទៅ​លើ​ក្រុមហ៊ុនចិន​ថា មិនសូវ​មក​រក​ស៊ី​ត្រឹមត្រូវ​នៅ​ប្រទេសកម្ពុជា។ ប្រសិនជា​ពួកគាត់​មករកស៊ី​មិនត្រឹមត្រូវ​យើង​ខ្វះ​វិធានការ​ច្បាស់លាស់​ជាក់លាក់ ដើម្បី​ចាត់ការ​ទៅលើ​ពួកគាត់​ហ្នឹង នឹង​ធ្វើ​ឱ្យ​យើង​ខាតបង់។ វា​មិន​បាន​ជួយ​លើកកម្ពស់​បញ្ហាសេដ្ឋកិច្ច ផ្ទុយ​ទៅវិញ​វា​អាច​នឹង​ធ្វើ​ឱ្យ​រដ្ឋ​នឹង​ចំណាយ​កាន់តែច្រើន សម្រាប់​ដោះស្រាយ​បញ្ហា​ជនជាតិចិន​នេះបាទ»

កន្លងទៅ រដ្ឋមន្ត្រីក្រសួងមហាផ្ទៃ លោក ស ខេង បាន​ប្រតិកម្មខ្លាំងៗ​ចំពោះ​មន្ត្រី​នៃ​ក្រសួងពាក់ព័ន្ធ​មួយចំនួន​ដែល​បណ្ដែតបណ្ដោយ​ឱ្យ​ជនជាតិចិន​ដឹកជញ្ជូន​សារធាតុគីមីផ្សំ​កែជា​គ្រឿងញៀន​ជាង ១រយតោន (១០០) ចូល​កម្ពុជា​ដោយ​ស្រប​ដោយច្បាប់។ លោក ក៏​បាន​បញ្ជា​ដល់​សមត្ថកិច្ច​ត្រូវ​ស្វែងរក​ឱ្យ​ឃើញ​អ្នក​ដែរ​អនុញ្ញាត​ឱ្យ​ជនជាតិចិន​ដឹកសារធាតុគីមីផ្សំ​កែច្នៃគ្រឿងញៀន​ចូល​កម្ពុជា ប៉ុន្តែ មកទល់​នឹង​ពេលនេះ​សមត្ថកិច្ច​មិនទាន់​បង្ហាញ​មុខ​មន្ត្រីណាមួយ ដើម្បី​ឱ្យ​មក​ទទួល​ខុសត្រូវ​រឿងនេះ​នៅ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
ក្រុម​មន្ត្រី​ជាន់ខ្ពស់​គណបក្ស​កាន់​អំណាច​ប្រតិកម្ម​នឹង​ពលរដ្ឋ​ខ្មែរ​រស់នៅ​ក្រៅ​ប្រទេស ជេរ​ប្រមាថ​លោក ហ៊ុន ម៉ាណែត តាម​បណ្ដាញ​សង្គម
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។