អ្នកឃ្លាំមើល និងសង្គមស៊ីវិល រិះគន់ថារដ្ឋាភិបាលថ្មី គួរយកចិត្តទុកដាក់ដោះស្រាយបញ្ហាចំពោះមុខ បម្រើសង្គមជាតិ ជាជាងចំណាយពេលគិតគូរលើការតែងតាំងមន្ត្រី និងរបៀបហៅគោរមងាររបស់លោក ហ៊ុន ម៉ាណែត។ ពួកគាត់ចាត់ទុកថារឿងទាំងនេះឥតប្រយោជន៍ ខណៈថាគោរមងារខ្ពង់ខ្ពស់មានតម្លៃទៅបានលុះត្រាតែមានការគោរពពីប្រជាពលរដ្ឋ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង យល់ឃើញថា ទន្ទឹមនឹងការចេញលិខិតឱ្យកំណត់ការហៅគោរមងារលោក ហ៊ុន ម៉ាណែត ខុទ្ទកាល័យនាយករដ្ឋមន្ត្រីក៏គួរតែចេញលិខិតបង្ហាញពីការដោះស្រាយបញ្ហាសង្គម ដើម្បីជាប្រយោជន៍ទៅដល់រដ្ឋាភិបាលផងដែរ។ តែយ៉ាងណាលោកថា ការហៅគោរមងាររបស់មន្ត្រីរដ្ឋាភិបាលជាប្រចាំបែបនេះ នឹងបង្ហាញឱ្យឃើញពីគម្លាតសង្គម រវាងថ្នាក់ដឹកនាំ និងពលរដ្ឋ។
លោក យង់ គិមអេង៖ «បើយើងនៅក្នុងសង្គមប្រជាធិបតេយ្យ បើសិនជានៅក្នុងបណ្ដាប្រទេសសេរី គេហៅថាលោក ដើម្បីឱ្យស្មើ កុំឱ្យឆ្ងាយពីពលរដ្ឋ»។
ការរិះគន់នេះ គឺបន្ទាប់ពីខុទ្ទកាល័យនាយករដ្ឋមន្ត្រី កាលពីថ្ងៃទី៤ កញ្ញា បានចេញលិខិតណែនាំដល់មន្ត្រីថ្នាក់ក្រោមអំពីការអាន និងសរសេរនាម គោរមងាររបស់លោក ហ៊ុន ម៉ាណែត ឱ្យបានត្រឹមត្រូវ។
ទោះជាយ៉ាងណា មតិមហាជនយល់ឃើញថា ការឱ្យតម្លៃជ្រុលទៅលើគោរមងាររបស់បុគ្គលអ្នកមានអំណាច នឹងបង្កើតឱ្យមានការរើសអើងឋានៈ បុណ្យស័ក្ដិ ការបែងចែកវណ្ណៈនៅក្នុងសង្គម។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា (CHRAC) លោក រស់ សុដ្ឋា កត់សម្គាល់ឃើញថា មន្ត្រីធំៗ មួយចំនួនកំពុងជាប់ចិត្តជាមួយនឹងតួនាទីឯកឧត្ដម លោកជំទាវ និងសម្ដេច ជាជាងគុណតម្លៃនៃទំនួលខុសត្រូវក្នុងតួនាទី និងកាតព្វកិច្ចក្នុងការបម្រើជាតិមាតុភូមិ។ លោកលើកឡើងថា មន្ត្រីរដ្ឋាភិបាលថ្មី គួរផ្ដោតសំខាន់ទៅលើការដោះស្រាយបញ្ហាសង្គមជាតិ និងជីវភាពប្រជាពលរដ្ឋ ជាជាងការទទួលគោរមងារខណៈដែលមិនទាន់សាងស្នាដៃ ឬគុណសម្បត្តិដល់សង្គមជាតិនៅឡើយ។
លោក រស់ សុដ្ឋា៖ «កុំភ្លេចថា តួនាទីទាំងឡាយទាំងពួងហ្នឹង វាអាចមានយសបាន មានការគោរពពីប្រជារាស្ត្រ និងអ្នកពាក់ព័ន្ធបាន លុះត្រាតែយើងមានស្នាដៃ នៅក្នុងសង្គមជាតិ ការបម្រើប្រជាជាតិ និងប្រជាជនរបស់យើង»។
ក្រោយការឡើងកាន់តំណែងជានាយករដ្ឋមន្ត្រី លោក ហ៊ុន ម៉ាណែត ទទួលរងនូវការរិះគន់ពីប្រជាពលរដ្ឋ និងសហគមន៍អន្តរជាតិ ជាបន្តបន្ទាប់ ដោយសារតែអំណាច របស់លោកទទួលបានដោយមានការជ្រោមជ្រែងពីឪពុក ការបង្កើតគណរដ្ឋមន្ត្រីដែលមានក្បាលធំជាងដងខ្លួន និងការទទួលងារជាសម្ដេចទាំងមិនទាន់កសាងស្នាដៃអ្វីនោះជាដើម។
អ្នកឃ្លាំមើល និងសង្គមស៊ីវិល ទទូចថា ថ្នាក់ដឹកនាំរដ្ឋាភិបាលគួរគិតគូរពីបញ្ហាការបាត់បង់ការងារ បញ្ហាបំណុលពលរដ្ឋ និងសន្តិសុខសង្គម ដើម្បីទទួលបានការគោរព និងឱ្យតម្លៃពីប្រជាពលរដ្ឋ ដែលគុណតម្លៃនេះ ល្អប្រសើរជាងទទួលបានគោរមងារទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។