លទ្ធផល​​បោះឆ្នោត​​ផ្លូវការបង្ហាញ​​ថា ​បក្សប្រជាជនកម្ពុជាឈ្នះ​​បក្សភ្លើងទៀន

ដោយ ថា ថៃ
2022.06.26
Share on WhatsApp
Share on WhatsApp
លទ្ធផល​​បោះឆ្នោត​​ផ្លូវការបង្ហាញ​​ថា ​បក្សប្រជាជនកម្ពុជាឈ្នះ​​បក្សភ្លើងទៀន ពិធីករ ពិធីការិនី​របស់​គណៈកម្មាធិការ​ជាតិ​រៀបចំ​ការ​បោះឆ្នោត គ.ជ.ប ប្រកាស​លទ្ធផល​បោះឆ្នោត​ឃុំសង្កាត់​តាម​មណ្ឌល​នានា​នៅ​ទូទាំង​ប្រទេស​នៅ​ថ្ងៃទី២៦ ខែមិថុនា ឆ្នាំ២០២២។
រូប៖ screenshot from NEC

គណៈកម្មាធិការ​​ជាតិ​​រៀបចំ​​ការ​​បោះឆ្នោត (គ.ជ.ប) នៅ​​ថ្ងៃ​ទី​២៦ ខែមិថុនា បាន​​ប្រកាស​​ជា​ផ្លូវការ​​នូវ​​លទ្ធផល​​នៃ​​ការ​​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​​អាណត្តិ​ទី​៥ កាល​ពី​ថ្ងៃ​ទី​៥ ខែ​មិថុនា ឆ្នាំ​២០២២។ លទ្ធផល​ផ្លូវ​ការ​បង្ហាញ​​ថា ​គណ​បក្ស​​ប្រជាជន​​កម្ពុជា ​ឈ្នះ​គណបក្ស​ភ្លើងទៀន។ 

លទ្ធផល​ផ្លូវការ​ពី​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​អាណត្តិ​ទី​៥ ដែល គ..ប ប្រកាស​នៅ​ថ្ងៃ​ទី​២៦ ខែមិថុនា បង្ហាញ​ថា គណបក្ស​ប្រជាជន​កម្ពុជា ឈ្នះ​នាំ​មុខ​គណបក្ស​ផ្សេងៗ​​ ដែល​ទទួល​បាន​តំណែង​មេ​ឃុំ-ចៅ​សង្កាត់​ចំនួន​១​ពាន់​៦រយ​៤៨​នាក់ ​(.៦៤៨)។​ គណបក្ស​ភ្លើងទៀន​ ទទួល​បាន​តំណែង​មេឃុំ​ចំនួន ​៤នាក់នៅខេត្តកំពង់ធំ និងខេត្តកំពង់​ចាម​។ ក្រៅ​ពី​មេ​ឃុំ ​គណបក្ស​ប្រជាជន​កម្ពុជា​មាន​ជំទប់​ទី​១ចំនួន​១​ពាន់​៦រយ​១៨នាក់​ (.៦១៨ជំទប់ទី២ ​ចំនួន​២រយ​៦១នាក់​(២៦១)។ រីឯ​គណបក្ស​ភ្លើងទៀន ​ទទួល​បាន​តំណែង​ជំទប់​ទី​១ ​ចំនួន​២៥នាក់​ ជំទប់ទី២ ​ចំនួន​១ពាន់​៣រយ​៦០នាក់​ (.៣៦០)​។ តួលេខ​នេះ គឺ​គណបក្ស​ភ្លើងទៀន​ ដណ្តើម​​បាន​ជាង​២ពាន់(.១៩៨​)អាសនៈ​ក្រុមប្រឹមប្រឹក្សាឃុំ-សង្កាត់។​

បន្ទាប់​ពី​គណបក្ស​ទាំង​ពីរ ​គណបក្សហ៊្វុនស៊ិនប៉ិច ​ទទួលបានតំណែង​ជំទប់ទី១ចំនួន​៤នាក់ ជំទប់ទី២ ចំនួន​១២​នាក់។ គណបក្សខ្មែររួបរួមជាតិទទួលបានតំណែង​ជំទប់ទី១ ចំនួន១នាក់ និង​ជំទប់ទី២​ចំនួន​១០​នាក់។ គណបក្សប្រជាធិបតេយ្យមូលដ្ឋាន និង​​គណ​បក្សខ្មែរ​ស្រលាញ់​ជាតិ​ទទួលបាន​តំណែង​ជំទប់ទី១​ចំនួន​២នាក់​ ជំទប់ទី២​ចំនួន​២នាក់​ដូចគ្នា។ គណបក្ស​យុវជន​កម្ពុជា​ទទួលបាន​តំណែង​ជំទប់​ទី២​​ ចំនួន៣នាក់។ ទន្ទឹមគ្នានេះ គណ​បក្សកម្ពុជានិយម ​​និងគណបក្សសំបុកឃ្មុំ​សង្គ​ម​ប្រជាធិបតេយ្យ​ទទួល​បាន​តំណែង​ជំទប់ទី២​ ចំនួន១​នាក់​ដូចគ្នា។

ស្របពេល​គ..ប ​ប្រកាស​លទ្ធផល​ផ្លូវការនេះ​ អ្នកនាំពាក្យ​គណបក្ស​ប្រជាជន​កម្ពុជាលោក សុខ ឥសាន ថ្លែងថា​ គណបក្សរបស់លោក ​​ត្រេកអរ​ទទួល​យក​លទ្ធផល​​នេះ ​ហើយ​ចាត់​ទុក​ថា ​បាន​កើត​ចេញ​ពី​ការ​បោះឆ្នោត​ដោយ​សេរីនិងត្រឹមត្រូវពិតប្រាកដ៖ «យើង​យល់ថា​ ការបោះឆ្នោតនេះ​ ប្រព្រឹត្តទៅ​ដោយ​រលូន​ ដោយ​សន្តិវិធី ​ហើយ​មាន​របៀបរៀប​រយក្នុង​បរិយាកាស​មួយ​ដែល​ប្រជាពលរដ្ឋ​ទទួលបាន​ទាំង​អស់​គ្នា។ចំពោះ​អ្នក​ដែល​គេ​យល់​ឃើញ​ថា ​មាន​បញ្ហា​មិនប្រក្រតី​មួយចំនួន​ នោះ​គឺជាការ​យល់ឃើញ​របស់​គេ»

ដោយឡែក ​នៅថ្ងៃ​ប្រកាស​លទ្ធផល​បោះឆ្នោត​នេះ ​គណបក្សភ្លើងទៀន ​បានធ្វើពិធី​សំណេះសំណាលជាមួយ​បេក្ខជន​ដែល​ទើបជាប់ឆ្នោត ​និង​សកម្មជន​របស់​គណបក្ស​រាប់​រយ​នាក់​នៅខេត្តកំពង់ធំ។ ​អនុប្រធាន​​គណបក្សភ្លើងទៀនលោក ថាច់ សេដ្ឋា ​លើក​ឡើងថា ​ប្រសិនបើ​ការបោះឆ្នោត​មាន​បរិយាកាស​នយោបាយ​ល្អ ​គណ​បក្សភ្លើងទៀន​នឹង​ទទួល​បាន​តំណែង​មេឃុំ-ចៅ​សង្កាត់​ច្រើន​ជាង​នេះ។ លោក ​​ស្នើសុំឲ្យ​អាជ្ញាធរ​ពាក់ព័ន្ធ ​បញ្ឈប់ការ​ធ្វើទុក្ខបុកម្នេញ ​ហើយ​ទម្លាក់​ចោល​ការចោទ​ប្រកាន់​ដែល​គ្មាន​មូលដ្ឋាន និង​ប្រគល់​សេរីភាព​ជូន​មេឃុំ​ជាប់ឆ្នោត​របស់​គណបក្សភ្លើងទៀន ​ដើម្បីឲ្យ​ពួកគាត់​អាចបំពេញ​តួនាទី​​បម្រើ​ប្រជាពលរដ្ឋ​ម្ចាស់ឆ្នោត៖ «លទ្ធផល​បោះឆ្នោតនេះ ​យើង​ទទួល​យក​ទៅ​តាម​ឆន្ទៈ​ប្រជាពលរដ្ឋ​ផ្តល់ឲ្យ​យើង​។ ប៉ុន្តែ​រាល់ភាព​មិន​ប្រក្រតី​ ភាព​អសកម្ម​ទាំងឡាយ​ក្នុង​ពេលបោះឆ្នោត ​គឺយើង​ត្រូវតែ​តវ៉ា​ហើយ​ជាពិសេស​សូមឲ្យ​ គ..ប ​ទទួលយក​រាល់​ចំណុចខ្វះខាត​ទាំងអស់​នោះ​ រកការ​ពិត​ពីភាពមិនប្រក្រតីទាំងអស់​នោះ​ ដើម្បី​យកមក​ពិចារណា​គិត​រួមគ្នា​​ ហើយ​កែលម្អ ​គ..ប ​ដើម្បី​ឲ្យ​គូ​ប្រកួត​ទៅ​អនាគត​​មាន​​ការ​ទុកចិត្ត​គ្នា​បាន​​។ ជាពិសេស ​​​​​ទាំង​សហគមន៍ជាតិ​និង​អន្តរជាតិ ​ទទួលយក​បាន​ទាំងអស់​គ្នា»

កាលពីថ្ងៃទី៦ ​ខែមិថុនា ​​គណបក្ស​ភ្លើង​ទៀន ​បាន​ចេញ​សេចក្តី​ថ្លែង​ការណ៍​​​សោក​ស្តាយ​ចំពោះ​លទ្ធផល​នៃ​ការ​បោះ​ឆ្នោត​ឃុំ​សង្កាត់នេះ​ ដោយ​ថា​ «មិន​មាន​ភាព​សេរី​ និង​យុត្តិធម៌» ហើយ​ «មិន​ឆ្លុះ​បញ្ចាំង​ពី​ឆន្ទៈ» របស់​ប្រជាពលរដ្ឋ​ ​ព្រោះ​មិនមាន​បរិយាកាស​ស្មើ​ភាព ​ពលលរដ្ឋ​មិន​មាន​សេរី​ភាព​ក្នុង​ការ​ចូលរួម​កិច្ចការ​នយោបាយ​ និង​ការ​បញ្ចេញ​មតិ​ ខណៈ​ស្ថាប័ន​បោះឆ្នោត​មិន​ទាន់​ឯករាជ្យ។ក្រុម​អង្គការសង្គម​ស៊ីវិល​ឯករាជ្យ ​និង​គណបក្ស​​ន​​យោ​​​​​បាយ​មួយចំនួន​ទៀត​​ដែល​ចូលរួម​ប្រកួតប្រជែង​ ក៏​រិះគន់​​ថា ​ដំណើរការរៀបចំ​ការបោះឆ្នោត​ឃុំ​-សង្កាត់​​លើកនេះ ​មាន​ស្ថានភាព​អាក្រក់​ជាង​ការ​បោះឆ្នោត​អាណត្តិ​មុនៗ។

ប្រធានគណៈកម្មាធិការ​អព្យាក្រឹតនិង​យុត្តិធម៌​ដើម្បី​ការបោះឆ្នោត​ដោយ​សេរី​ និង​ត្រឹមត្រូវ​នៅកម្ពុជា​ហៅកាត់ថា​ និចហ្វិច ​លោក សំ គន្ធាមី ​មានប្រសាសន៍ថា ​គណ​បក្សនយោបាយ​ដែល​ទទួល​យក​លទ្ធផល​បោះឆ្នោត​ ប៉ុន្តែ​រិះគន់​អំពី​ភាព​មិន​ប្រក្រតី​នៃការ​រៀប​ចំការ​បោះឆ្នោត​ គួរតែ​រួមគ្នា​ដាក់​សំណើរ​ទៅ​ គ..ប​ ដើម្បី​ឲ្យ​មានការ​កែ​លម្អ​ចំណុច​ខ្វះខាត​ឡើងវិញ​៖ «យើង​ដាក់​សំណើរ​ទៅ​ គ..ប​ ដើម្បី​សុំធ្វើ​វិសោធនកម្ម​ ដូចជា​ បទបញ្ជារ​ នីតិវិធី​ ច្បាប់បោះឆ្នោត​ដើម្បី​ឲ្យ​ការបោះឆ្នោត​លើក​ក្រោយ​វា​ប្រសើរឡើងវិញ​ កុំឲ្យ​មាន​បញ្ហា​ដូច​លើកនេះ។ ចំណុច​មួយទៀត​ ឃើញ​លទ្ធផល​បោះឆ្នោត​នេះ ​ឃើញ​មាន​គណបក្ស​ច្រើនដែរ​ ៨ទៅ​៩​ដែល​មាន​អាសនៈ​ក្នុង​ក្រុមប្រឹក្សាឃុំ​-សង្កាត់​។ យើង​ឃើញ​មាន​ភាពជឿនលឿន​ច្រើន​ដោយសារ​យើង​ចង់ឃើញ​មាន​គណបក្សចម្រុះនៅ​តាម​បណ្តា​ឃុំ​-សង្កាត់​ជាជាង​មានតែ​គណបក្សមួយ ​ដូច្នេះ​វា​អាច​មាន​ការ​ត្រួតពិនិត្យ ​និង​តុល្យភាព (​Check and Balance)​មានការ​លើកឡើង​មាន​មតិ​ជំទាស់ខ្លះ​បើសិនជា​ការងារខ្លះ ​​ធ្វើទៅ​មាន​ប៉ះពាល់​ផលប្រយោជន៍​ប្រជាពលរដ្ឋ ​និង​វិស័យ​ឃុំ-សង្កាត់»

ក្នុង​ចំណោម​អាសនៈ​ក្រុមប្រឹក្សា​ឃុំសង្កាត់​ចំនួន១ម៉ឺន​១ពាន់​៦រយ៦២​ (១១.៦៦២) ទូទាំង​ប្រទេស ក្នុង​អាណត្តិ​ទី​៥​ មាន​ស្ត្រី​និង​យុវជន​ជាង​​២ពាន់នាក់​ នឹង​ចូល​កាន់​តំណែង​ទាំង​នេះ។

គណបក្ស​ប្រជាជនកម្ពុជា ​និង​គណបក្សភ្លើងទៀន ​ ​អះអាង​ដូចៗ​គ្នា​ថា ​លទ្ធផល​នេះ​ជា​មូលដ្ឋាន​រឹងមាំ​ឈាន​ទៅ​រក​ជ័យជម្នះ​ក្នុង​ការ​បោះឆ្នោត​ជ្រើស​តាំង​តំណាងរាស្ត្រ​អាណត្តិ​ទី​៧ ​នៅ​ឆ្នាំ​២០២៣ ខាង​មុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
លោក ហ៊ុន សែន ទទួល​ស្គាល់​ថា ការ​ដោះ​ស្រាយ​បញ្ហា​ភូមា ដែល​លោក​ធ្វើ​ជា​ប្រធាន​អាស៊ាន​គ្មាន​ភាព​ជឿនលឿន​ទេ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល