នៅថ្ងៃបិទបញ្ចប់ការចុះឈ្មោះបញ្ជីបេក្ខជននៃគណបក្សនយោបាយឈរឈ្មោះបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដែលមានរយៈពេល៣ថ្ងៃ គឺចាប់ពីថ្ងៃទី៤ ដល់ថ្ងៃទី៦ ខែមីនានេះ គណបក្សភ្លើងទៀន បានដាក់បេក្ខជនជាង ១.៦០០ ឃុំសង្កាត់នៅ ២៥ខេត្តក្រុង ក្នុងចំណោមឃុំសង្កាត់ ១.៦៥២ ដែលចំនួននេះគឺនៅក្រោមតែគណបក្សប្រជាជនកម្ពុជាមួយប៉ុណ្ណោះ។
ប្រធានស្តីទីគណបក្សភ្លើងទៀនលោក ថាច់ សេដ្ឋា ប្រាប់វិទ្យុអាស៊ីសេរីនៅថ្ងៃអាទិត្រ ទី៦ ខែមីនានេះថាការណ៍ដែលគណបក្សភ្លើងទៀនអាចដាក់បេក្ខជនបាននៅគ្រប់ខេត្តក្រុងនៅទូទាំងប្រទេសក្នុងរយៈពេលដ៏ខ្លីបែបនេះគឺលោកអះអាងថាដោយសារប្រជាពលរដ្ឋគាំទ្រគណបក្សភ្លើងទៀនយ៉ាងសស្រាក់សស្រាំ និងពេញចិត្តចូលរួមបន្តសកម្មភាពនយោបាយជាមួយគណបក្សនេះ ដើម្បីឲ្យមានការផ្លាស់ប្តូរជាវិជ្ជមាន និងពិតប្រាកដមួយនៅកម្ពុជា។ លោកបន្ថែមថាភាពអំណោយផលមួយទៀតគឺគណបក្សភ្លើងទៀនមានរចនាសម្ព័ន្ធមូលដ្ឋានស្រាប់ ព្រមទាំងមានបេក្ខជនពីគណបក្សនយោបាយផ្សេងៗ រួមទាំងពីគណបក្សប្រជាជនកម្ពុជាផងមកចូលរួមឈរឈ្មោះជាបេក្ខជនក្រុមប្រឹក្សាឃុំសង្កាត់ឲ្យគណបក្សភ្លើងទៀន។
យោងតាម សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប គិតមកត្រឹមម៉ោង ៥:៣០នាទី ល្ងាចថ្ងៃទី៦ ខែមីនា គណបក្សនយោបាយ ដែលបានដាក់បេក្ខជនឈរឈ្មោះសម្រាប់ការបោះឆ្នោតក្រុមប្រឹក្សាឃុំសង្កាត់នៅអាណត្តិនេះមានចំនួន ១៧គណបក្ស ក្នុងចំណោម ៤៥គណបក្ស។
ក្នុងចំណោមនោះមានតែ ៤គណបក្សប៉ុណ្ណោះដែលមានបេក្ខជនឈរឈ្មោះនៅគ្រប់ ២៥ខេត្តក្រុង។ ក្នុង ៤គណបក្សនោះ មានគណបក្សតែ ២ប៉ុណ្ណោះគឺគណបក្សប្រជាជនកម្ពុជារបស់លោក ហ៊ុន សែន ដែលដាក់បេក្ខជនបាន គ្រប់ ១០០% និងគណបក្សភ្លើងទៀនបានដាក់បេក្ខជនជិតគ្រប់ ១០០% នៅខ្វះពីរបីឃុំនៅតំបន់ដាច់ស្រយាលខ្លាំង ដូចជា នៅខេត្តរតនៈគិរី និងមណ្ឌលគិរី។ គណបក្សដែលដាក់បេក្ខជនបានច្រើនបន្ទាប់ពីគណបក្សភ្លើងទៀនគឺគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។
ការបោះឆ្នោតឃុំសង្កាត់អាណត្តិទី៥ នេះ នឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។