តុលាការ​ក្រុង​​ភ្នំពេញ សម្រេច​ដាក់​ពន្ធនាគារ​លោក ម៉ៃ ហុងស្រៀង ១៨ខែ ពី​បទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជា​អាទិ៍​

ដោយ ទីន ហ្សាការីយ៉ា
2019-10-11
អ៊ីម៉ែល
មតិ
Share
បោះពុម្ព
លោក ម៉ៃ ហុងស្រៀង សកម្មជន​គណបក្ស​សង្គ្រោះ​ជាតិ ក្រុង​ព្រះសីហនុ។
លោក ម៉ៃ ហុងស្រៀង សកម្មជន​គណបក្ស​សង្គ្រោះ​ជាតិ ក្រុង​ព្រះសីហនុ។
រូប៖ ហ្វេសប៊ុក Kea Sisokunthy

ចៅក្រម​សាលា​ដំបូង​រាជធានី​ភ្នំពេញ សម្រេច​ឲ្យ​សកម្មជន​បក្ស​ប្រឆាំង​ក្រុង​ព្រះសីហនុ ខេត្ត​ព្រះសីហនុ​ម្នាក់ គឺ​លោក ម៉ៃ ហុងស្រៀង ជាប់​ពន្ធនាគារ ១៨ខែ ពី​បទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជា​អាទិ។ អ្នក​ឃ្លាំមើល​សិទ្ធិ​មនុស្ស ​ចាត់​ទុក​ការ​សម្រេច​នេះ​ថា ធ្ងន់ធ្ងរ និង​ធ្វើ​ឲ្យ​ប៉ះពាល់​ដល់​សេរីភាព​បញ្ចេញ​មតិ​ពលរដ្ឋ។

មេធាវី​ការពារ​ក្ដី​ឲ្យ​សកម្មជន​បក្ស​ប្រឆាំង លោក ម៉ៃ ហុងស្រៀង គឺ​លោក​មេធាវី​ កែត ឃី ប្រាប់​ថា ដំបូង តុលាការ​បាន​ចោទ​ ២បទ​ល្មើស គឺ​បទ​ញុះញង់​ឲ្យ​មាន​ការ​រើស​អើង និង​ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ៍។ តែ​ក្រោយ​មក គឺ​ក្នុង​សវនាការ​ព្រឹក​ថ្ងៃ​ទី១០ តុលា ​ចៅក្រម​​សម្រេច​ចោទ​តែ​មួយ​បទ​ចោទ​​វិញ គឺ​បទ​ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ៍ និង​សម្រេច​ដាក់​ពន្ធនាគារ ​១៨​ខែ គិត​ពី​ថ្ងៃ​ឃុំ​ខ្លួន​មក។

លោក​មេធាវី​ប្រាប់​ថា កូន​ក្ដី គឺ​លោក ម៉ៃ ហុងស្រៀង ចាត់​ទុក​ការ​សម្រេច​ក្ដី​នេះ​ ជា​រឿង​អយុត្តិធម៌ ទើប​​​ផ្ដិត​មេដៃ​ប្រគល់​សិទ្ធិ​ឲ្យ​លោក​ប្ដឹង​ទៅ​សាលា​ឧទ្ធរណ៍ ចំពោះ​ការ​ចោទ​ប្រកាន់​នេះ​ទៀត។ លោក មេធាវី កែត ឃី ​បន្ត​ថា លោក​បាន​ត្រៀម​ពាក្យ​ប្ដឹង​​សាលា​ឧទ្ធរណ៍​ឲ្យ​កូន​ក្ដី តាំង​ពី​មិន​ទាន់​សវនាការ​មក​ម្ល៉េះ «អយុត្តិធម៌​ចំពោះ​គាត់ គាត់​មិន​បាន​ប្រព្រឹត្តិ​​ដូច​ការ​ចោទ​ប្រកាន់​ អ៊ីចឹង យើង​ក៏​បាន​រៀបចំ ហើយ​យើង​ក៏​បាន​ដឹង​មុន​ដែរ តុលាការ​នឹង​ជំនុំ​សម្រេច​ផ្ដន្ទាទោស​គាត់​ហើយ។ អ៊ីចឹង ខ្ញុំ​ក៏​រៀប​ចំ​ពាក្យ​ប្ដឹង​ឧទ្ធរណ៍​នេះ​ឲ្យ​ហើយ នៅ​ពេល​ទៅ​ដល់​គឺ​យើង​រង់ចាំ​តែ​ចប់​ ចេញ​សាល​ក្រម​ទៅ ឲ្យ​គាត់​ផ្ដិត​មេដៃ»

សកម្មជន​គណបក្ស​សង្គ្រោះ​ជាតិ ក្រុង​ព្រះសីហនុ លោក ម៉ៃ ហុងស្រៀង ត្រូវ​បាន​សមត្ថកិច្ច​របប​ក្រុង​ភ្នំពេញ​ចាប់​ខ្លួន នៅ​តាម​បណ្ដោយ​ផ្លូវ​លេខ​២០០៤ ខណ្ឌ​ពោធិ៍​សែន​ជ័យ រាជធានី​ភ្នំពេញ កាល​ពី​ចុង​ខែ​កក្កដា ក្រោយ​ពេល​លោក​រត់​​ភៀស​ខ្លួន ចេញ​ពី​ការ​ឡោម​ព័ទ្ធ ​របស់​​កម្លាំង​អាជ្ញាធរ​ខេត្ត​ព្រះសីហនុ។ របប​ក្រុង​ភ្នំពេញ បាន​ចោទ​ប្រកាន់​ លោក ម៉ៃ ហុងស្រៀង ថា បាន​បង្ហោះ​សារ​ក្នុង​ហ្វេសប៊ុក (facebook) ជេរ​ប្រមាថ​ថ្នាក់​ដឹកនាំ​កំពូលៗ ក្នុង​របប​នេះ។

បន្ទាប់​មក​ ចៅក្រម​ស៊ើបសួរ​កាន់​សំណុំ​រឿង​នេះ គឺ​លោក រៀល សុភិន បាន​ចោទ​ប្រកាន់​សកម្មជន​បក្ស​ប្រឆាំង​រូប​នេះ ពី​បទ​ជេរ​ប្រមាថ​របប​ក្រុងភ្នំពេញ​ និង​ញុះញង់ តាម​បណ្ដាញ​សង្គម​ហ្វេសប៊ុក ​(Facebook) ហើយ​បាន​បញ្ជា​ឲ្យ​សមត្ថកិច្ច​ឃុំ​ខ្លួន លោក ម៉ៃ ហុងស្រៀង បណ្ដោះអាសន្ន​នៅ​ពន្ធនាគារ​​ព្រៃ​ស កាល​ពី​ថ្ងៃ​ទី១ សីហា។

មុន​ពេល​ត្រូវ​បាន​ចាប់​ខ្លួន លោក ម៉ៃ ហុងស្រៀង ធ្លាប់​បាន​ភៀស​ខ្លួន​ទៅ​ប្រទេស​ថៃ​ម្ដង ដោយសារ​បារម្ភ​ពី​ការ​ធ្វើ​ទុក្ខ​បុក​ម្នេញ​ពី​របប​ក្រុង​ភ្នំពេញ។ ក្រោយ​ភៀស​ខ្លួន​ច្រើន​ខែ លោក​បាន​វិល​ត្រឡប់​​ចូល​​ប្រទេស​កម្ពុជា​វិញ ដោយ​សង្ឃឹម​ថា អាច​រស់​នៅ​សុខសាន្ត​ជា​មួយ​ប្រពន្ធ​កូន។ តែ​សមត្ថកិច្ច​នៃ​របប​ក្រុង​ភ្នំពេញ បាន​បន្ត​ឡោមព័ទ្ធ​ និង​តាម​ចាប់​លោក​ទៀត ដោយសារ​លោក​​នៅ​បង្ហោះ​សារ​រិះគន់​របប​ក្រុង​ភ្នំពេញ។

ភរិយា​របស់​លោក ម៉ៃ ហុងស្រៀង គឺ​លោកស្រី គា ស៊ីសុគន្ធី ប្រាប់​ថា បើ​ទោះ​តុលាការ​សម្រេច​ក្ដី ​​អយុត្តិធម៌​បែប​នេះ​​ ក៏​លោកស្រី​មិន​ហ៊ាន​ប្រកែក និង​មិន​ហ៊ាន​​តវ៉ា​​ដែរ​ ដោយ​​សារ​លោកស្រី ជា​គ្រូ​បង្រៀន ខ្លាច​ត្រូវ​គេ​ធ្វើ​បាប។ លោកស្រី​ថ្លែង​បន្ត​ថា នៅ​ពេល​នេះ លោកស្រី និង​កូន​តូច ៣នាក់ មិន​អាច​ធ្វើ​អ្វី​បាន​ ក្រៅ​ពី​នាំ​គ្នា​អង្គុយ​យំ សម្ដែង​ការ​សោកស្ដាយ​ ចំពោះ​ការ​សម្រេច​ក្ដី​អយុត្តិធម៌​នេះ «បើ​សិន​ជា​ខ្ញុំ​ទៅ ខ្ញុំ​ក៏​មិន​ដឹង​ជួយ​អ្វី​បាន​ដែរ បាន​ត្រឹម​ទឹក​ភ្នែក។ អ៊ីចឹង ខ្ញុំ​គិត​ថា មិន​ទៅ​លើក​នេះ ក៏​ល្អ​ម្យ៉ាង​ដែរ ហើយ​ខ្ញុំ​គិត​ថា​ ទង្វើ​ដែល​គេ​ដាក់​ទោស​គាត់​ ដល់​មួយ​ឆ្នាំ​កន្លះ គឺ​វា​អយុត្តិធម៌​បំផុត ព្រោះ​អ្វី គាត់​មិន​បាន​ធ្វើ​អ្វី​ខុស​ផង គ្រាន់​បាន​បញ្ចេញ​មតិ​​សោះ គ្មាន​បាន​ធ្វើ​អ្វី​ខុស​សោះ។ បើ​នៅ​ខាង​ក្រៅ​ប្រទេស​គេ​មិន​ដាក់​ទោស​ពៃ​អ្វី​ទេ គេ​ជា​សិទ្ធិ​របស់​គេ លើក​លែង​តែ​ស្រុក​ខ្មែរ​យើង។ វា​មាន​អ្វី ក្រៅ​ពី​អយុត្តិធម៌​ទេ ប៉ុន្តែ​ខ្ញុំ​​អត់​ហ៊ាន​វាយ​ប្រហារ​ខ្លាំងៗ ព្រោះ​អ្វី​ខ្ញុំ​គ្រូ​បង្រៀន។ ខ្ញុំ​ធម្មតា ខ្លាច​គេ​ធ្វើ​បាប អត់​មាន​អ្វី​ ចិញ្ចឹម​កូន»

លោកស្រី​មាន​ប្រសាសន៍​ទៀត​ថា ​ស្ថានភាព​ការ​រស់​នៅ​ក្នុង​ពន្ធនាគារ​ព្រៃស គឺ​លោក​ ម៉ៃ ហុងស្រៀង មាន​សុខភាព​ល្អ​​ មិន​ទ្រុឌទ្រោម​ទេ តែ​លោក​​ឡើង​​កន្ទួល​រមាស់​ពេញ​ខ្លួន។ លោក​ទទួល​បាន​ថ្នាំ​ព្យាបាល​កន្ទួល​រមាស់​ខ្លះ ពី​គ្រូ​ពេទ្យ​អង្គការ​សិទ្ធិ​មនុស្ស​ លីកាដូ។ ចំណែក​ថ្លៃ​ចំណាយ​​លុយ​ ក្នុង​ពន្ធនាគារ​វិញ គឺ​ចាយ​អស់​ច្រើន ដោយសារ​ទំនិញ​ក្នុង​ពន្ធនាគារ​មាន​តម្លៃ​ថ្លៃ។ លោកស្រី ត្រូវ​ផ្ញើ​លុយ​ឲ្យ​ស្វាមី​ចាយ​ក្នុង​ពន្ធនាគារ​រៀង​រាល់​ខែ។

នាយក​រង​ទទួល​បន្ទុក​ឃ្លាំមើល​សិទ្ធិ​មនុស្ស​នៃ​អង្គការ​ លីកាដូ លោក អំ សំអាត យល់​ថា ការ​សម្រេច​ក្ដី​នេះ ជា​រឿង​ធ្ងន់ធ្ងរ​សម្រាប់​​​លោក ម៉ៃ ហុងស្រៀង ខណៈ​បទ​ចោទ​ញុះញង់​ឲ្យ​ប្រព្រឹត្តិ​បទ​ឧក្រិដ្ឋ​ជា​អាទិ​នេះ ​មាន​ភាព​ស្រពិចស្រពិល​ សម្រាប់​សេរីភាព​បញ្ចេញ​មតិ។ លោក​បន្ត​ថា​ ការ​សម្រេច​ធ្ងន់ធ្ងរ​បែប​នេះ ធ្វើ​ឲ្យ​ប៉ះពាល់​ដល់​សិទ្ធិ​សេរីភាព​បញ្ចេញ​មតិ​របស់​ពលរដ្ឋ​ខ្មែរ«ការ​សម្រេច​នេះ វា​​មាន​លក្ខណៈ​ធ្ងន់ធ្ងរ​សម្រាប់​គាត់ ហើយ​កម្រិត​ទោស​ទាំង​អស់​នេះ ហើយ​អា​នេះ ក៏​វា​ធ្វើ​ឲ្យ​ប៉ះពាល់​​មួយ​ដែរ សម្រាប់​អ្នក​ដែល​បញ្ចេញ​មតិ​ដទៃ​ទៀត។ អ៊ីចឹង គិត​ថា អ្នក​ដែល​ចង់​បញ្ចេញ​មតិ​តាម​បណ្ដាញ​សង្គម​ផ្សេងៗ គាត់​ត្រូវ​កម្រិត​នៃ​ការ​បញ្ចេញ​មតិ​របស់​គាត់ ព្រោះ​ត្រូវ​ខ្លាច​ មាន​ការ​ជាប់​ទោស​ ជាប់​អ្វី បន្ត​ទៅ​ទៀត​​ទៅ អា​ហ្នឹង​ ក៏​វា​ពាក់ព័ន្ធ​ជាមួយ​នឹង​ការ​ប៉ះពាល់​ដល់​សេរីភាព និង​ការ​បញ្ចេញ​មតិ​របស់​ប្រជាពលរដ្ឋ​ដែរ»

​​លោក​មេធាវី កែត ឃី ​បញ្ជាក់​បន្ថែម​ថា យ៉ាង​យូរ​ត្រឹម​សប្ដាហ៍​ក្រោយ លោក​នឹង​ដាក់​ពាក្យ​ប្ដឹង​ឧទ្ធរណ៍​ឲ្យ​កូន​ក្ដី​លោក។ ភរិយា​របស់​លោក ម៉ៃ ហុងស្រៀង សង្ឃឹម​ថា សាលា​ឧទ្ធរណ៍​នឹង​ផ្ដល់​យុត្តិធម៌​ឲ្យ​ស្វាមី​អ្នកស្រី។ ចំណែក​គណបក្ស​សង្គ្រោះ​ជាតិ បាន​ទាមទារ​ឱ្យ​ដោះ​លែង​លោក ម៉ៃ ហុង​ស្រៀង វិញ ដោយ​ឥត​លក្ខខណ្ឌ​ ព្រោះ​គណបក្ស​សង្គ្រោះ​ជាតិ​ចាត់​ទុក​ការ​ចាប់​ខ្លួន​នេះ​ថា ជា​រូបភាព​នយោបាយ គំរាម​កំហែង រំលោភ​សិទ្ធិ​សេរីភាព និង​ជា​​ភាព​គឃ្លើន​ច្បាប់ ពី​សំណាក់​របប​ក្រុង​ភ្នំពេញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល