លោក ហ៊ុន សែន បាន​ចោទ​មេ​បក្ស​ប្រឆាំង​ជា​ថ្មី​ទៀត​ថា ជា​អ្នក​ប៉ុនប៉ង​បំផ្លាញ​សន្តិភាព

ដោយ ទីន ហ្សាការីយ៉ា
2020-10-07
អ៊ីម៉ែល
មតិ
Share
បោះពុម្ព
លោក ហ៊ុន សែន ប្រធាន​គណបក្ស​ ប្រជាជន​កម្ពុជា និង​លោក សម រង្ស៊ី ប្រធាន​ស្ដីទី​គណបក្ស​ សង្គ្រោះ​ជាតិ។
លោក ហ៊ុន សែន ប្រធាន​គណបក្ស​ ប្រជាជន​កម្ពុជា និង​លោក សម រង្ស៊ី ប្រធាន​ស្ដីទី​គណបក្ស​ សង្គ្រោះ​ជាតិ។
រូប៖ ហ្វេសប៊ុក លោក ហ៊ុន សែន និង RFA/Sorn Chanratha

លោក​នាយក​រដ្ឋមន្រ្តី លោក ហ៊ុន សែន បាន​ប្រកាស​ព្រមាន​ចាប់​ខ្លួន​សកម្មជន​បក្ស​ប្រឆាំង​ជា​ថ្មី​ម្ដង​ទៀត ដោយ​លោក​ចោទ​អ្នក​ទាំង​នោះ​ថា កំពុង​មាន​ផែនការ​ចង់​បំផ្លាញ​សន្តិភាព​របស់​លោក។ ទោះ​ជា​បែប​នេះ​ក្ដី មេ​បក្ស​ប្រឆាំង​ហៅ​សន្តិភាព​នៅ​កម្ពុជា​នេះ ជា​សន្តិភាព​ផ្នូរ​ខ្មោច។

រីឯ​អ្នក​វិភាគ​វិញ អះអាង​ថា លោក ហ៊ុន សែន ប្រើប្រាស់​សន្តិភាព​នេះ ដើម្បី​ចង់​សម្រេច​ផែនការ​ផ្ទេរ​អំណាច​ឲ្យ​កូន​របស់​លោក​តែ​ប៉ុណ្ណោះ។

លោក ហ៊ុន សែន នៅ​ថ្ងៃ​ទី៧ តុលា​នេះ បាន​ចោទ​ប្រកាន់​មេ​ដឹក​នាំ​បក្ស​ប្រឆាំង​នៅ​ក្រៅ​ប្រទេស ដោយ​ទំនង​ជា​លោក​ចង់​សំដៅ​ទៅ​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ​ថា កំពុង​រៀបចំ​ផែនការ​ចង់​ផ្ដួល​រំលំ​របប​លោក ឬ​ចង់​បំផ្លាញ​សន្តិភាព ដែល​លោក​អះអាង​ថា បាន​កសាង​ឡើង​ទំាង​លំបាក។ លោក ហ៊ុន សែន ព្រមាន​ជា​ថ្មី​ទៀត​ថា ងើប​មួយ វាយ​មួយ ចំពោះ​អ្នក​ដែល​ប្រឆាំង​សន្តិភាព ឬ​ប្រឆាំង​នឹង​រូប​លោក៖ «ខ្ញុំ​ដឹង​ទាំង​អស់​អា​ហ្អែង​បញ្ជា​ពី​ក្រៅ​ប្រទេស​ឲ្យ​អ្នក​ខាង​ក្នុង​ធ្វើ​សកម្មភាព​ប្រឆាំង​នឹង​យើង អញ​ដឹង​ទាំង​អស់ ខ្ញុំ​ហៅ​វា​ឧក្រិដ្ឋជន​ រី​ឯ​អា​ពួក​អ្នក​ខ្លះ​លើក​ឡើង​ថា សព្វថ្ងៃ​នេះ មាន​សន្តិភាព​ហើយ តែ​អសន្តិសុខ​ក្នុង​ចិត្ត អើ​បើ​ហ្អែង​ធ្វើ​ខុស​ច្បាប់​ទុក​ឲ្យ​ហ្អែង​ងាប់​អ៊ីចឹង​ទៅ»

ឆ្លើយតប និង​ការ​ចោទ​ប្រកាន់​នេះ លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ បាន​ហៅ​សន្តិភាព​របស់​លោក ហ៊ុន សែន នេះ​ថា ជា​សន្តិភាព​ផ្នូរ​ខ្មោច​ទៅ​វិញ​ទេ។ លោក សម រង្ស៊ី អះអាង​ថា លោក​នឹង​វិល​ចូល​ស្រុក​វិញ​ជា​លើក​ទី២ នៅ​ពេល​ខាង​មុខ ដើម្បី​សង្គ្រោះ​ប្រជាពលរដ្ឋ​ឲ្យ​រួច​ផុត​ពី​សន្តិភាព​ផ្នូរ​ខ្មោច​នេះ៖ «សន្តិភាព​របស់​លោក ហ៊ុន សែន ជា ហ៊ុន សែន ផ្នូរ​ខ្មោច ពី​ព្រោះ​ថា របប​នេះ ជា​របប​ចោរ កាប់​ព្រៃ បណ្ដេញ​ពលរដ្ឋ​ចេញ ចាប់​ដាក់​ពលរដ្ឋ​ដាក់​គុក ដូច្នេះ​សន្តិភាព​នេះ ជា​សន្តិភាព​ចោរ សន្តិភាព​ផ្នូរ​ខ្មោច

លោក ហ៊ុន សែន លើក​ឡើង​ជា​ញឹកញាប់​ថា ទោះ​ក្នុង​តម្លៃ​ណា​ក៏​ដោយ លោក​ត្រូវ​តែ​ការពារ​សន្តិភាព ដែល​លោក​បាន​កសាង​ឡើង​ឱ្យ​បាន។ លោក​តែងតែ​លាប​ពណ៌ ឬ​ចោទ​ប្រកាន់​ក្រុម​អ្នក​មាន​ទស្សនៈ​ផ្ទុយ​ពី​លោក ឬ​អ្នក​តវ៉ា​ប្រឆាំង​អំពើ​អយុត្តិធម៌​សង្គម​ថា ជា​ក្រុម​ចង់​ធ្វើ​បដិវត្តន៍​ពណ៌ និង​ចង់​បំផ្លាញ​សន្តិភាព​ទៅ​វិញ។ លើស​ពី​នេះ លោក ហ៊ុន សែន ថែម​ទាំង​ធ្លាប់​សម្ដែង​ការ​សោក​ស្ដាយ​ដោយ​លោក​មិន​បាន​សម្លាប់​មនុស្ស ១០០នាក់ ឬ ២០០នាក់ កាល​ពី​ឆ្នាំ២០១៤ ដោយ​លោក​ចោទ​ក្រុម​កម្មករ និង បក្ស​ប្រឆាំង​បាតុកម្ម​កាល​ពី​ឆ្នាំ២០១៤ នោះ​ថា ជា​ក្រុម​ចង់​ធ្វើ​បដិវត្តន៍​ពណ៌​ជា​ដើម។

លើស​ពី​នេះ​ទៀត ការ​ប្រកាស​ការពារ​សន្តិភាព​នេះ មិន​មែន​ធ្វើ​ឡើង​តែ​លោក ហ៊ុន សែន តែ​ម្នាក់​ប៉ុណ្ណោះ​ទេ។ រីឯ​កូន​ប្រុស​ច្បង​របស់​លោក​វិញ គឺ​លោក ហ៊ុន ម៉ាណែត ក្នុង​នាម​ជា​មេទ័ព​ផង​នោះ កាល​ពី​ពេល​ថ្មីៗ នេះ បាន​ប្ដេជ្ញា​ថា មិន​ឲ្យ​អ្នក​ណា​បំផ្លាញ​សន្តិភាព​នេះ​បាន​ឡើយ។ លោក ហ៊ុន ម៉ាណែត ថែម​ទាំង​អំពាវនាវ​ឲ្យ​កងទ័ព​ទាំង​អស់​ត្រូវ ការពារ​សន្តិភាព​នេះ​ទៀត​ផង៖ «ខ្ញុំ​មាន​មនសិការ​មាន​ទស្សនៈ មាន​ការ​យល់​ដឹង​របស់​ខ្ញុំ​ហើយ ខ្ញុំ​កាន់​កងទ័ព​ជើង​គោក គឺ​ខ្ញុំ​មាន​ភារកិច្ច​របស់​យើង​រក្សា​សន្តិភាព​មិន​អាច​ឲ្យ​អ្នក​ណា​បំផ្លាញ​បាន​ឡើយ មាន​គោលដៅ​របស់​ខ្ញុំ»

ទាក់ទង​នឹង​បញ្ហា​នេះ អ្នក​វិភាគ​នយោបាយ​ដែល​និរទេស​ខ្លួន​ទៅ​ក្រៅ​ប្រទេស ដែល​ធ្លាប់​ជាប់​ពន្ធនាគារ​ដោយសារ​តែ​របប​លោក ហ៊ុន សែន ចាប់​ដាក់​ពន្ធនាគារ​ផង​នោះ លោក គឹម សុខ មាន​ប្រសាសន៍​ថា ការ​ប្រកាស​ពី​ការ​ប្ដេជ្ញា​ចិត្ត​ការពារ​សន្តិភាព​ទាំង​ឪពុក ទាំង​កូន​នេះ គ្រាន់​តែ​ជា​ល្បែង​នយោបាយ​បិទ​បាំង​អំពី​ផែនការ ការពារ​អំណាច នឹង​បន្ត​ឲ្យ​កូន​ដឹក​នាំ​ប្រទេស មិន​ខុស​ពី​មេ​ដឹក​នាំ​ផ្ដាច់​ការ​កូរ៉េ​ខាង​ជើង​ឡើយ។ លោក គឹម សុខ ថ្លែង​ថា កងទ័ព​ដែល​ការពារ​សន្តិភាព​តាម​បញ្ជា​លោក ហ៊ុន ម៉ាណែត និង​លោក ហ៊ុន សែន នេះ មិន​មែន​ជា​កងទ័ព​របស់​ជាតិ​នោះ​ទេ គឺ​កងទ័ព​របស់​គ្រួសារ​ត្រកូល ហ៊ុន តែ​ប៉ុណ្ណោះ៖ «ខ្ញុំ​មិន​ជឿ​ថា លោក ហ៊ុន ម៉ាណែត ដើរ​ខុស​ពី​គន្លង​ឪពុក​ទេ នៅ​ពេល​កងទ័ព​យួន​មក​ឈ្លានពាន​ព្រំដែន លោក ហ៊ុន ម៉ាណែត បែរ​ជា​លួច​ទៅ​ជួប​ថ្នាក់​ដឹក​នាំ​យួន​ស្ងាត់ៗ ទៅ​វិញ ដើម្បី​សុំ​ឲ្យ​គាំទ្រ​ផែនការ​បន្ត​អំណាច​របស់​ខ្លួន»

រីឯ​ព្រះ​ភិក្ខុ បណ្ឌិត យស ហ៊ុត ព្រះមហាថេរ គង់​នៅ​វត្ត​ធម្ម​រង្សី ទីក្រុង​ប៉ារីស ធ្លាប់​មាន​ថេរ​ដីកា​ថា ព្រះ​អង្គ​មើល​មិន​ឃើញ​មេ​ដឹក​នាំ​សព្វថ្ងៃ​នេះ ជា​មេ​ដឹក​នាំ​ដែល​មាន​ចិត្ត​មេត្តា ករុណា និង​សេចក្ដី​ថ្លៃថ្នូរ​ជា​មេ​ដឹក​នាំ​ដែល​ល្អ​ឡើយ។ ព្រះអង្គ​បន្ថែម​ថា ក្រោម​ការ​ដឹក​នាំ​របស់​លោក ហ៊ុន សែន នេះ គឺ​ធ្វើ​ឲ្យ​ប្រជាពលរដ្ឋ​រស់​នៅ​ក្រោម​ដំបូល​សន្តិភាព​ទុក្ខ​ព្រួយ និង​ភ័យ​ខ្លាច«ហើយ​យើង​រស់​នៅ​ខ្ពស់​ឆ្ងាយ​ដាច់​គេ ប្រើប្រាស់​ធនធាន​ច្រើន​លើស​គេ ជា​មហាសេដ្ឋី បើ​មិន​អ៊ីចឹង​មិន​ដឹង​ជា​នៅ​ឯ​ណា​ទេ មេត្តាធម៌ ករុណា​ធម៌ ហើយ​មិន​មាន​យុត្តិធម៌ មិន​មាន​បែង​ចែក​អំណាច ដូច​នេះ សន្តិភាព​មិន​ដឹង​ជា​នៅ​ឯ​ណា​ទេ សន្តិភាព​ក្រោម​ការ​ភ័យ​ខ្លាច»

ទាក់ទង​និង សន្តិភាព មិន​មែន​និយាយ​ផ្ចង់​ឆ្ពោះ​ទៅ​ត្រឹម​តែ​ការ​ទម្លាក់​អាវុធ​ចុះ​តែ​ម្យ៉ាង​ទេ វា​មាន​ន័យ​ជ្រាលជ្រៅ​ដល់ "ការ​រក្សា​ក្ដី​ស្ងប់ សតិអារម្មណ៍ មិន​ក្ដៅ​ក្រហល់ក្រហាយ​របស់​ប្រជារាស្ត្រ​នៃ​សង្គម​ជាតិ " ថែម​ទៀត​ផង។ ភាព​ស្ងប់​សុខ​ក្នុង​សង្គម​មួយ ដែល​អាច​កើត​មាន​ឡើង​បាន លុះ​ត្រា​តែ "មេ​ដឹក​នាំ ឈប់​លោភលន់ ឈប់​ល្មោភ​អំណាច ឈប់​ដើរ​តួ​កាច​សាហាវ ហើយ​ងាក​មក​ប្រកាន់​នូវ​ទសពិធ​រាជធម៌ " ដែល​ជា​ធម៌​ទាំង១០ ក្នុង​គម្ពីរ ភាព​ជា​អ្នក​ដឹក​នាំ។ល។ ម្យ៉ាងវិញទៀត ន័យ​សន្តិភាព តាម​វចនានុក្រម​ខ្មែរ​ របស់​សម្ដេច​ព្រះ​សង្ឃរាជ ជួន ណាត វិញ​ គឺ​មាន​ន័យ​ថា​ សេចក្ដី​ស្ងប់​ សេចក្ដី​សាន្តត្រាណ​ ដំណើរ​សះ​ជា​នឹង​គ្នា

អ្នកវិភាគ​លើក​ឡើង​ថា ដើម្បី​ឲ្យ​កម្ពុជា​ក្លាយ​ទៅ​ជា​ប្រទេស​មាន​សន្តិភាព​ពិត​ប្រាកដ​នោះ លុះ​ត្រា​ផ្លាស់​ប្ដូរ​លោក ហ៊ុន សែន ចេញ ហើយ​កងទ័ព​ទាំង​អស់ ​លែង​ជា​កងទ័ព​ការពារ​គ្រួសារ​ត្រកូល ហ៊ុន ពោល​គឺ ជា​កងទ័ព​តំណាង​ឲ្យ​ជាតិ​ទាំង​មូល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)
Share
គេហទំព័រ​ទាំងមូល