គណបក្សសង្គ្រោះជាតិបង្ហើបឱ្យដឹងថា ប្រទេសវៀតណាម និងប្រទេសឡាវ មិនមែនជាជម្រើសដែលលោក សម រង្ស៊ី ត្រូវធ្វើដំណើរឆ្លងកាត់ចូលប្រទេសកម្ពុជានៅថ្ងៃទី៩ ខែវិច្ឆិកានោះទេ។ អ្នកនាំពាក្យគណបក្សកាន់អំណាចឆ្លើយតបថា ទោះលោក សម រង្ស៊ី ចូលតាមច្រកណា ឬមធ្យោបាយណា មិនសំខាន់ទេ ប៉ុន្តែអ្វីដែលចាំបាច់នោះ គឺលោក សម រង្ស៊ី ជាន់ទឹកដីខ្មែរពេលណា សមត្ថកិច្ចនឹងចាប់បញ្ជូនទៅឃុំខ្លួនក្នុងពន្ធនាការក្នុងពេលនោះ។
អនុប្រធានគណបក្សសង្គ្រោះជាតិ លោក អេង ឆៃ អ៊ាង អះអាងតាមហ្វេសប៊ុកថ្មីៗនេះថា គណបក្សសង្គ្រោះជាតិមិនជ្រើសរើសយកប្រទេសកុម្មុយនិស្តធ្វើជាផ្លូវឱ្យលោក សម រង្ស៊ី ឆ្លងកាត់នោះទេ។ លោកបន្តថា មានតែប្រទេសវៀតណាម និងប្រទេសឡាវទេ ដែលព្រមអនុវត្តតាមសាលដីកាតុលាការនៃការចាប់ខ្លួនលោក សម រង្ស៊ី ប៉ុន្តែប្រទេសសេរីផ្សេងទៀតក្នុងតំបន់អាស៊ានគេមិនអនុវត្តតាមឡើយ៖ «យើងនឹងជ្រើសរើសចេញពីប្រទេសព្រោះនៅអាស៊ានមានប្រទេសច្រើន ប៉ុន្តែចុះពោះឡាវ និងវៀតណាម យើងមិនដែលគិតដល់ទេព្រោះវៀតណាមជាបងធំរបស់ឡាវ របស់ ហ៊ុន សែន អ៊ីចឹងច្បាស់ជាគេមិនអនុញ្ញាតឱ្យយើងឆ្លងកាត់ទេ»។
ទោះជាយ៉ាងណាលោក អេង ឆៃអ៊ាង មិនទាន់បញ្ជាក់តម្រាយផ្លូវជាក់លាក់ដែលលោក សម រង្ស៊ី និងអ្នកគាំទ្រត្រូវធ្វើដំណើរដើម្បីចូលប្រទេសកម្ពុជានោះទេ។ ក៏ប៉ុន្តែផ្អែកតាមទីតាំងភូមិសាស្ត្រប្រទេសកម្ពុជា មានព្រំដែនជាប់ប្រទេស៣ ប៉ុណ្ណោះ គឺប្រទេសថៃ វៀតណាម និងប្រទេសឡាវ។ លោក អេង ឆៃអ៊ាង ធ្លាប់បានប្រកាសកាលពីចុងខែសីហាថា លោក សម រង្ស៊ី នឹងជ្រើសរើសផ្លូវមួយក្នុងចំណោម ផ្លូវបីទាំងគឺផ្លូវ ទឹក ផ្លូវ គោក និងផ្លូវអាកាសដើម្បីធ្វើដំណើរចូលកម្ពុជា។
ចំណែក លោក សម រង្ស៊ី វិញ បានអំពាវនាវជាថ្មីម្តងទៀតដល់កងកម្លាំងប្រដាប់អាវុធ ឱ្យរើបម្រះខ្លួន និងផ្ដាច់ខ្លួនពីរដ្ឋាភិបាលលោក ហ៊ុន សែន ដែលលោកចាត់ទុកថា ជារបបផ្ដាច់ការ។ លោកអំពាវនាវដល់កងកម្លាំងប្រដាប់អាវុធចូលរួមជាមួយប្រជាពលរដ្ឋ និងគណបក្សសង្គ្រោះជាតិ រួមគ្នាជាធ្លុងមួយ ទាមទារសេរីភាព យុត្តិធម៌ និងលទ្ធិប្រជាធិបតេយ្យ។ ប្រធានស្ដីទីគណបក្សសង្គ្រោះជាតិរូបនេះបង្ហោះសារតាមហ្វេសប៊ុកនៅថ្ងៃទី១៧ កញ្ញាថា មានមូលហេតុបីដែលធ្វើឱ្យកងកម្លាំងចូលរួមផ្តួលរំលំរបបលោក ហ៊ុន សែន គឺអំពើពុករលួយ កងកម្លាំងប្រដាប់អាវុធទទួលបានប្រាក់ខែតិចតួច និងការដំឡើងឋានៈតួនាទីក្នុងជួរកងទ័ពធ្វើតាមសែស្រឡាយបក្សពួកនិយម៖ «កងកម្លាំងប្រដាប់អាវុធជាកងកម្លាំងប្រដាប់អាវុធរបស់ជាតិ មិនមែនរបស់កងកម្លាំងរបស់បក្សណា ឬរបស់បុគ្គលណាទេ ដូច្នេះបើបុគ្គលណាក្រុមណាបញ្ជាបងប្អូនកូនក្មួយទៅបាញ់ប្រហារលើពលរដ្ឋស្លូតត្រង់ដើម្បីឱ្យអ្នកដឹកនាំប្រទេសសព្វថ្ងៃរក្សាអំណាចផ្ដាច់ការ និងអំណាចពុករលួយរបស់គេសូមបងប្អូនកូនក្មួយកុំធ្វើតាមបញ្ជា»។
ទោះជាយ៉ាងណា អ្នកនាំពាក្យគណបក្សប្រជាជនកម្ពុជា យល់ថា នេះសំដីបោកប្រាស់របស់លោក សម រង្ស៊ី។ លោកអះអាងថា គ្មានកងកម្លាំងរូបណាស្ដាប់តាមមេបក្សប្រឆាំងរូបនេះឡើយ ផ្ទុយទៅវិញកងកម្លាំងប្រដាប់អាវុធកំពុង រង់ចាំចាប់ លោក សម រង្ស៊ី យកទៅឃុំខ្លួននៅពន្ធនាគារ។ អ្នកនាំពាក្យរូបនេះ បន្តទៀតថា ទោះលោក សម រង្ស៊ី មកតាមច្រកណាឬមធ្យោបាយណាក៏ដោយ ឱ្យតែជាន់ទឹកដីខ្មែរ គឺនឹងត្រូវសមត្ថកិច្ចចាប់ខ្លួនភ្លាមៗតែម្ដង ព្រោះសមត្ថកិច្ចទទួលបានដីកាពីតុលាការរួចរាល់អស់ហើយដើម្បីចាប់លោក សម រង្ស៊ី ទៅដាក់ពន្ធនាគារ៖ «កុំថាតាមថៃតាមវៀតណាមតាមអីឥឡូវយើងមិនបាច់និយាយទេ តាមណាក៏ដោយ តាមម៉ាឡេស៊ីក៏ដោយ តាមស្អីក៏ដោយ តែចូលដល់ដីខ្មែរគឺពិតជាជាប់ខ្នោះហើយ ទោះ៨ទិសមកតាមណា ហីយកវិធីតេជោដំឌិនក៏ទៅអត់រួចដែរ តែងើបក្បាលមកជាប់ខ្នោះហើយ»។
អ្នកវិភាគបញ្ហានយោបាយលោកដែលកំពុងរស់នៅនិរទេសខ្លួនក្នុងប្រទេសហ្វាំងឡង់ និងដែលហ៊ានរិះគន់លោក ហ៊ុន សែន ឥតសំចៃមាត់ គឺលោក គឹម សុខ យល់ថា ការបង្ហាញតម្រុយខ្លះៗ នៃការធ្វើដំណើរវិលចូលស្រុករបស់លោក សម រង្ស៊ី នេះជាល្បិចនយោបាយរបស់គណបក្សសង្គ្រោះជាតិ។ លោកថា រឿងសំខាន់ដែលគណបក្សប្រឆាំងត្រូវធ្វើ និងអ្វីដែលអ្នកគាំទ្ររបស់ខ្លួនត្រូវផ្ដោតអារម្មណ៍នោះ គឺជាយុទ្ធសាស្ត្រ និងលទ្ធភាពអាចចូលស្រុកបានរបស់លោក សម រង្ស៊ី និងការរៀបចំបណ្ដាញឱ្យអ្នកគាំទ្រនៃគណបក្សនេះអាចចូលស្រុកបាន៖ «ចូលយ៉ាងម៉េចបានហើយរៀបចំបណ្ដាញដោយការចូលដោយសុវត្ថិភាពរបៀបណាដែលអាចឈរជើងនៅប្រទេសកម្ពុជាបាននោះ គឺជាការចាំអបអរសាទររបស់ប្រជាពលរដ្ឋហើយរឿងដែលសំខាន់បំផុត គឺថាកាលណាគេនិយាយការរៀបចំបណ្ដាញសន្តិសុខចូលស្រុករបៀបនេះ គឺមានលក្ខណៈនៃការរៀបចំជាសម្ងាត់ហើយប្រសិនបើមានការលើកឡើងថា មិនចូលច្រកនេះ ឬចូលច្រកនោះគឺជាតាក់តិចរបស់អ្នកនយោបាយទេ»។
គណបក្សសង្គ្រោះជាតិប្រកាសថា លោក សម រង្ស៊ី នឹងធ្វើមាតុភូមិនិវត្តន៍ទៅកម្ពុជាវិញ នៅថ្ងៃទី៩ ខែវិច្ឆិកា ខាងមុខ ដែលចំថ្ងៃបុណ្យឯករាជ្យជាតិ ហើយគិតត្រឹម ថ្ងៃទី១៨ ខែកញ្ញា នៅសល់តែ ៥២ថ្ងៃទៀតទេ ពេលវេលានោះនឹងមកដល់។ ទាក់ទងផែនការសកម្មភាពមាតុភូមិនិវត្តន៍របស់លោក សម រង្ស៊ី នេះ ប្រធានគណៈកម្មាធិការប្រតិបត្តិគណបក្សសង្គ្រោះជាតិ រាជធានីភ្នំពេញ លោក ម៉ន ផល្លា ឱ្យដឹងថា លោកតែងប្រជុំជាទៀងទាត់ជាមួយមន្ត្រីគណបក្សសង្គ្រោះជាតិនៅក្នុងប្រទេសកម្ពុជាតាមប្រព័ន្ធអ៊ីនធឺណិតដើម្បីរៀបចំរចនាសម្ព័ន្ធ ចាប់តាំងពី រាជធានី ខេត្ត ក្រុង ស្រុក ខណ្ឌ រហូតដល់ឃុំសង្កាត់ សម្រាប់ការពារសុវត្ថិភាពជូនលោក សម រង្ស៊ី។
ទោះជាយ៉ាងណា អ្នកឃ្លាំមើលនយោបាយមួយចំនួនមិនទាន់ជឿថា លោក សម រង្ស៊ី នឹងគោរពតាមសន្យានៅឡើយទេ ព្រោះកន្លងមកមេដឹកនាំបក្សប្រឆាំងរូបនេះ មិនបានអនុវត្តតាមសន្យារបស់ខ្លួនឡើយ ជុំវិញដំណើរវិលចូលស្រុកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។