សាច់ញាតិ និងយុវជនចោទតុលាការកំពូលថា លាក់បាំងសវនាការបណ្ដឹងសុំនៅក្រៅឃុំរបស់លោក កើត សារ៉ាយ
2024.08.02
លោក កើត សារ៉ាយ ប្រធានសមាគមសម្ពន្ធនិស្សិតបញ្ញវន្តខ្មែរ (KSILA) កាលពីពេលមិនទាន់ជាប់ឃុំក្នុងពន្ធនាគារ។
រូប៖ ហ្វេសប៊ុក
សាច់ញាតិ និងក្រុមការងារសមាគមសម្ពន្ធនិស្សិតបញ្ញវន្តខ្មែរ (KSILA) រិះគន់តុលាការកំពូលថា បើកសវនាការលើបណ្ដឹងសុំនៅក្រៅឃុំរបស់លោក កើត សារ៉ាយ ដោយមិនបានជូនដំណឹងដល់មេធាវីការពារក្ដី និងសាច់ញាតិ។ ពួកគាត់យល់ឃើញថា តុលាការកំពូលកំពុងរំលោភសិទ្ធិលើជនជាប់ឃុំ និងក្រុមគ្រួសារ។
គ្រួសារ និងក្រុមការងារដែលបានទៅជួបសួរសុខទុក្ខលោក កើត សារ៉ាយ នៅពន្ធនាគារព្រៃស (ម១) អះអាងថា ការណ៍ដែលតុលាការកំពូលបានបើកសវនាលើបណ្ដឹងសុំនៅក្រៅឃុំរបស់លោក កើត សារ៉ាយ តែម្នាក់ឯង ដោយគ្មានដីកាកោះហៅមេធាវីការពារក្ដី ឱ្យចូលសវនាការបែបនេះ គឺតុលាការមានចេតនាលាក់បាំងព័ត៌មាន និងចង់ដាក់បន្ទុកទៅលើជនជាប់ឃុំបន្ថែម។
គូដណ្ដឹងលោក កើត សារ៉ាយ គឺកញ្ញា នឿន ស្រីណែត ប្រាប់វិទ្យុអាស៊ីសេរីថា កញ្ញាបានទៅជួបសួរសុខទុក្ខលោក កើត សារ៉ាយ កាលពីថ្ងៃទី១ ខែសីហា បន្ទាប់ពីកញ្ញាទទួលដំណឹងថា តុលាការកំពូលបានកោះហៅ លោកកើត សារ៉ាយ ឱ្យចូលសវនាការភ្លាមៗទាំងមិនមានលិខិតកោះហៅពីតុលាការ។ កញ្ញាបន្តថា លោក កើត សារ៉ាយ បានសួរចៅក្រមស៊ើបសួរអំពីមេធាវីការក្ដីរបស់លោកថា ហេតុអ្វីមិនឃើញមេធាវីការពារក្ដីរបស់លោកមក ប៉ុន្តែចៅក្រមស៊ើបសួរមិនឆ្លើយនឹងសំណួរលោក ឡើយដោយចៅក្រមស៊ើបសួរអះអាងថា នេះគ្រាន់តែជាសំណុំរឿងសុំនៅក្រៅឃុំ។
កញ្ញា នឿន ស្រីណែត៖ «ទាក់ទងនឹងគោលជំហររបស់គាត់នៅតែមានគោលជំហររឹងមាំបើទោះបីជានៅខណៈនេះគាត់ស្ថិតនៅក្នុងពន្ធនាគារក៏ពិតមែន ប៉ុន្តែខ្ញុំជឿថា គាត់ស្ថិតនៅតែខ្លួនទេនៅក្នុងពន្ធនាគារប៉ុន្តែចិត្តរបស់គាត់ប្រាកដជានៅខាងក្រៅគិតពីសុខទុក្ខរបស់ប្រជាពលរដ្ឋគិតពីបញ្ហាជាតិដែលកំពុងកើតមានឡើង។ ទោះបីជាថ្ងៃនេះគាត់នៅក្នុងពន្ធនាគារគាត់មិនពាក់ស្បែកជើងប៉ុន្តែថ្ងៃក្រោយគាត់ចេញពីពន្ធនាគារនៅតែបន្តមិនពាក់ស្បែកជើងហើយបន្តការងារទៅមុខទៀត»។
តុលាការកំពូលកាលពីថ្ងៃទី៣១ ខែកក្កដា បានបើកសវនាការលើបណ្ដឹងសុំនៅក្រៅឃុំរបស់លោក កើត សារ៉ាយ ពាក់ព័ន្ធនឹងបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងមិនរាងចាលក្នុងបទមជ្ឈិម» ទាក់ទិនករណីលោក ចុះទៅជួបពលរដ្ឋរងគ្រោះដីធ្លីនៅខេត្តព្រះវិហារដែលរត់ពួនក្នុងព្រៃ ក្រោយអាជ្ញាធរ បានបំផ្លាញផ្ទះសម្បែង និងដេញតាមចាប់ខ្លួនពួកគាត់។ ទោះជាយ៉ាងណា សាច់ញាតិលោក កើត សារ៉ាយ អះអាងថា តុលាការ បានបើកសវនាការនោះដោយមានតែវត្តមានលោក កើត សារ៉ាយ ម្នាក់គត់ ខណៈសាច់ញាតិ និងមេធាវីការពារក្តី ពុំបានដឹងនោះទេ។ ពួកគាត់ចាត់ទុកថា នេះគឺជាការរំលោភសិទ្ធិ និងប៉ះពាល់ដល់ផលប្រយោជន៍របស់លោក កើត សារ៉ាយ។
ចៅក្រមតុលាការកំពូលនឹងប្រកាសសាលដីកាសំណុំរឿងសុំនៅក្រៅឃុំរបស់ លោក កើត សារ៉ាយ នៅថ្ងៃទី៧ ខែសីហា ខាងមុខ។ ដោយឡែកនៅថ្ងៃទី២២ ខែសីហា សាលាដំបូងរាជធានីភ្នំពេញនឹងបើកសវនាការជំនុំជម្រះលើអង្គសេចក្ដីក្នុងសំណុំរឿងនេះ។
អគ្គលេខាធិការសមាគមសម្ពន្ធនិស្សិតបញ្ញវន្តខ្មែរ កញ្ញា រៀម ស្រីពេជ្ររតនា ថ្លែងថា ការណ៍ដែលតុលាការកំពូលបើកសវនាការលើលោក កើត សារ៉ាយ ស្ងាត់ៗបែបនេះគឺបង្ហាញថា សវនាការនោះធ្វើឡើងមិនស្របតាមនីតិវិធីច្បាប់ និងមានភាពមិនប្រក្រតី។ កញ្ញាទាមទារឱ្យតុលាការដោះលែង លោក កើត សារ៉ាយ ដោយឥតលក្ខខណ្ឌពីព្រោះ លោក កើត សារ៉ាយ មិនបានប្រព្រឹត្តខុសដូចការចោទប្រកាន់របស់តុលាការនោះឡើយ។
កញ្ញា រៀម ស្រីពេជ្ររតនា៖ «សោកស្ដាយត្រង់ថាពួកយើងជាក្រុមការងារយ៉ាងហោចណាស់ផ្ដល់ដំណឹងដល់ពួកយើង ឬក៏ផ្ដល់ដំណឹងដល់មេធាវីវាជារឿងសោកស្ដាយបំផុតដែលតុលាការធ្វើរឿងបែបនេះបំបិទទាំងសិទ្ធិបុគ្គលថែមទាំងធ្វើឱ្យយើងអ្នកដែលនៅក្រៅមានភាពសោកស្ដាយ។ មានរឿងលាក់បាំងនៅពីក្រោយខ្នងដែលមិនចង់ឱ្យពួកយើងទៅមើលហើយជាពិសេសមិនចង់ឱ្យយុវជនបានដឹងពីសវនាការរបស់លោក កើត សារ៉ាយ»។
វិទ្យុអាស៊ីសេរីមិនអាចទាក់ទងអ្នកនាំពាក្យតុលាការកំពូល អ្នកស្រី ម៉ៅ ធីតា ដើម្បីសាកសួរជុំវិញរឿងនេះបានទេ នៅថ្ងៃទី២ ខែសីហា។
សមត្ថកិច្ចបានចាប់ខ្លួនលោក កើត សារ៉ាយ កាលពីថ្ងៃទី៥ ខែមេសា នៅទីស្នាក់ការសមាគមសម្ពន្ធនិស្សិតបញ្ញវន្តខ្មែរ ស្ថិតក្នុងសង្កាត់ក្រាំងធ្នង់ រាជធានីភ្នំពេញ ក្រោយពេលលោកបានចុះទៅជួបពលរដ្ឋមួយចំនួនរស់នៅឃុំស្រយ៉ង់ ដែលកំពុងលាក់ខ្លួនក្នុងព្រៃ បន្ទាប់ពីអាជ្ញាធរខេត្តព្រះវិហារបានបង្ក្រាបដោយហិង្សា និងបណ្ដេញពួកគាត់ចេញពីលំនៅឋានដោយបង្ខំ។
លោក កើត សារ៉ាយ មានមេធាវីចំនួន២រូបដើម្បីជួយការពារក្ដី គឺម្នាក់មកពីអង្គការលីកាដូ (LICADHO) និងម្នាក់ទៀតមកពីសមាគមការពារសិទ្ធិមនុស្សអាដហុក (Adhoc)។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត មានប្រសាសន៍ថា សំណុំរឿរបស់លោក កើត សារ៉ាយ នេះគឺមេធាវីរបស់លោក មិនទទួលបានដីកាហោះហៅពីតុលាការឡើយ។ លោកបញ្ជាក់ថា តាមនីតិវិធីច្បាប់ជនជាប់ចោទគ្រប់រូបគឺមានសិទ្ធិមានមេធាវីការពារក្ដីដើម្បីធានាថា ការជំនុំជម្រះក្ដីមានភាពយុត្តិធម៌ និងស្មើភាពគ្នានៅចំពោះមុខច្បាប់។
លោក អំ សំអាត៖ «រឿងហ្នឹងខ្ញុំឃើញថា ករណីលោក កើត សារ៉ាយ ឥឡូវហ្នឹងគឺគ្រាន់តែជាសវនាការសុំនៅក្រៅឃុំបណ្ដោះអាសន្ន យើងឃើញថាអង្គសេចក្ដីត្រូវបានបញ្ចប់ការស៊ើបសួរនៅចៅក្រមស៊ើបសួរហើយ។ អ៊ីចឹងអ្វីសំខាន់ត្រូវតែពិនិត្យដាក់កាលបរិច្ឆេទក្នុងការបើកសវនាការឱ្យបានឆាប់រហ័ស»។
ថ្វីត្បិត លោក កើត សារ៉ាយ កំពុងជាប់នៅក្នុងពន្ធនាគារក្ដី ក៏ប៉ុន្តែលោកតែងតែផ្ដាំឱ្យក្រុមការងារ និងយុវជនផ្សេងទៀតកុំភិតភ័យ ហើយក្រោកឈរឡើងដើម្បីបន្តការងារសង្គមដើម្បីជួយជាតិមាតុភូមិ។
គ្រួសារ និងមន្ត្រីសង្គមស៊ីវិលទទូចឱ្យតុលាការទម្លាក់ចោទ និងដោះលែងលោក កើត សារ៉ាយ ឱ្យមានសេរីភាពឡើងវិញពីព្រោះសកម្មភាពរបស់លោក កើត សារ៉ាយ ធ្វើកន្លងមកគឺដើម្បីជំរុញឱ្យរដ្ឋាភិបាលជួយដោះស្រាយបញ្ហាដីធ្លីដល់ពលរដ្ឋគឺមិនមែនជាញុះញង់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
នយោបាយ
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»
- ពលរដ្ឋខ្មែរប្រកាសនាំគ្នាតវ៉ាប្រឆាំងលោក ហ៊ុន សែន នៅមុខអគាររៀបចំវេទិកាចំណេះដឹងពិភពលោកក្នុងប្រទេសកូរ៉េខាងត្បូង
- ពលរដ្ឋខ្មែរនៅកូរ៉េនឹងធ្វើបាតុកម្មប្រឆាំងវត្តមានលោក ហ៊ុន សែន ដែលនឹងចូលរួមវេទិកានៅកូរ៉េ
- អ្នកប្រើប្រាស់បណ្ដាញសង្គមថា គ្រួសារ ហ៊ុន សែន ជាគ្រួសារនាំគ្រោះដល់ប្រទេសជាតិ
- គណបក្សកម្លាំងជាតិ នឹងធ្វើសមាជវិសាមញ្ញ នៅថ្ងៃទី១៥ ខែកញ្ញា