របប​ក្រុងភ្នំពេញ​ថា ជនសង្ស័យ​ដែល​ប្រព្រឹត្តិ​អំពើ​ហិង្សា​លើ​សកម្មជន​បក្ស​ប្រឆាំង​បាន​រត់​គេច​ខ្លួន

ដោយ ហេង រស្មី
2019-10-02
អ៊ីម៉ែល
មតិ
Share
បោះពុម្ព
លោក ស៊ិន បូណា ជា​សកម្មជន​គណបក្ស​សង្គ្រោះ​ជាតិ​ទី​១២​ហើយ ដែល​ត្រូវ​ជន​មិន​ស្គាល់​តាម​វាយ​ធ្វើបាប​តាម​ដង​ផ្លូវ​ នៅ​ថ្ងៃ​ទី២៥ កញ្ញា ២០១៩។
លោក ស៊ិន បូណា ជា​សកម្មជន​គណបក្ស​សង្គ្រោះ​ជាតិ​ទី​១២​ហើយ ដែល​ត្រូវ​ជន​មិន​ស្គាល់​តាម​វាយ​ធ្វើបាប​តាម​ដង​ផ្លូវ​ នៅ​ថ្ងៃ​ទី២៥ កញ្ញា ២០១៩។
Photo courtesy of Um SamAn Facebook

អាជ្ញាធរ​របប​ក្រុងភ្នំពេញ​អះអាង​ថា ជនសង្ស័យ​ដែល​បាន​ប្រើប្រាស់​អំពើ​ហិង្សា​លើ​ចៅសង្កាត់​ខាង​គណបក្ស​ប្រឆាំង បាន​រត់​គេច​ខ្លួន​បាត់​ដោយ​មិន​ដឹង​ថា កំពុង​លាក់ខ្លួន​នៅ​ក្នុង​ប្រទេស ឬ កំពុង​ស្នាក់នៅ​ឯ​ក្រៅ​ប្រទេស​ទេ។ មន្ត្រី​ការពារ​សិទ្ធិមនុស្ស​មិន​ជឿ​លើ​ការ​អះអាង​នេះ​ទេ ដោយ​បាន​រិះគន់​ថា កម្ពុជា​នៅតែ​អនុវត្ត​ស្តង់ដារ​ពីរ​រវាង​អ្នកគាំទ្រ​គណបក្ស​ប្រឆាំង និង​អ្នកគាំទ្រ​រដ្ឋាភិបាល។

អ្នកនាំពាក្យ​អគ្គស្នងការ​នគរបាល​ជាតិ​លោក ឆាយ គឹមឃឿន ប្រាប់​អាស៊ីសេរី​ថា អាជ្ញាធរ​កំពុងតែ​ស្វែងរក​ចាប់ខ្លួន​ជនសង្ស័យ​ដែល​ជាប់​ពាក់ព័ន្ធ​នឹង​ការប្រើប្រាស់​អំពើ​ហិង្សា​មក​លើ​សកម្មជន​គណបក្ស​សង្គ្រោះ​ជាតិ ដោយ​មិន​ប្រកាន់​និន្នាការ​នយោបាយ​ទេ។

លោក​បញ្ជាក់​ថា បើ​ទោះ​បី​ដំណឹង​ចុងក្រោយ​សមត្ថកិច្ច​ទើប​ទទួល​បាន​ថា ជនសង្ស័យ​បាន​រត់​ភៀសខ្លួន​ក៏​ដោយ ក៏​អាជ្ញាធរ​មិន​បញ្ចប់​ការស៊ើបអង្កេត​របស់​ខ្លួន​ទេ​។ លោក​និយាយ​ថា នឹង​នាំ​ខ្លួន​ជនសង្ស័យ​មក​ផ្ដន្ទាទោស​តាមច្បាប់​ដើម្បី​បញ្ឈប់​ការ​ចោទប្រកាន់​មក​លើ​រដ្ឋាភិបាល​ថា ការអនុវត្ត​ច្បាប់​មាន​ភាព​លំអៀង៖ «ទុក​ឱ្យ​ខ្ញុំ​ធ្វើការ​បន្តិច សុំ​កុំ​ធ្វើការ​ស៊ើបអង្កេត​ខាង​ខ្ញុំ​វិញ​អី។ ក្រុម​សមត្ថកិច្ច​កំពុង​ការពារ​សិទ្ធិ​សេរីភាព​របស់​គាត់​ណាស់។ គេ​មិន​បណ្ដែតបណ្ដោយ​ឱ្យ​ធ្វើ​ផ្ដេសផ្ដាស​ទេ។លទ្ធភាព​ក្នុង​ការ​ស្រាវជ្រាវ​មិនមែន​តែ​រាប់​ខែ​រក​មិន​ឃើញ​នោះ​ទេ ពីព្រោះ​គាត់​មិន​នៅ​មួយ​កន្លែង​ឱ្យ​យើង​ចាប់​ឯណា»

ចៅសង្កាត់​កោះដាច់​មកពី​គណបក្ស​សង្គ្រោះជាតិ​លោក ស៊ិន បូណា កាលពី​នៅ​ថ្ងៃ​ទី​២៥ ខែ​កញ្ញា​កន្លង​ទៅ​នេះ ត្រូវ​ជន​មិន​ស្គាល់​មុខ​ពីរ​នាក់ យក​ដំបង​ដែក​ដេញ​វាយ​សំពង​រហូត​បាក់​ដៃ​ខាង​ឆ្វេង។ ហេតុការណ៍​ហិង្សា​នេះ បាន​កើត​ឡើង​ក្នុង​ពេល​សកម្មជន​គណបក្ស​ប្រឆាំង​រូប​នេះ កំពុង​ជិះ​ម៉ូតូ​តាម​ផ្លូវ​ជាតិ​៦A ម្តុំ​វត្ត​គៀនឃ្លាំង ស្ថិត​ក្នុង​សង្កាត់​ជ្រោយចង្វារ ខណ្ឌ​ជ្រោយចង្វារ រាជធានី​ភ្នំពេញ។

ជន​ដៃដល់​មាន​គ្នា​ពីរ​នាក់​ពាក់មួក​សុវត្ថិភាព និង​បិទមុខ​ជិត បាន​ធាក់​ម៉ូតូ​ជនរងគ្រោះ​ឱ្យ​ដួល​ក្នុង​ពេល​កំពុង​បើកបរ​ទិសដៅ​ស្របគ្នា។ ក្រោយមក​មាន​ជន​ដៃ​ដល់​ម្នាក់​ក្នុងចំណោម​ពីរ​នាក់ ដោយមាន​កាំភ្លើង​នៅ​ចង្កេះ​ទៀត​ផង បាន​យក​ដំបង​ដែក​មក​វាយ​ជនរងគ្រោះ​រហូត​ដល់​រង​របួស​បាក់ឆ្អឹង​ដៃ​ខាង​ឆ្វេង។

ចៅសង្កាត់​កោះដាច់​ខាង​គណបក្ស​សង្គ្រោះជាតិ លោក ស៊ិន បូណា ថា លោក​បាន​ចេញ​ពី​មន្ទីរពេទ្យ​មក​ស្នាក់នៅ​ក្នុង​ផ្ទះ​ហើយ​តែ​របួស​របស់​លោក មិន​ទាន់​ជាសះស្បើយ​នៅឡើយ​ដោយសារតែ​របួស​មាន​សភាព​ធ្ងន់ធ្ងរ​ពេក។

លោក​ទាមទារ​ឱ្យ​របប​ក្រុងភ្នំពេញ​ចាប់​ជនសង្ស័យ​មក​ផ្ដន្ទាទោស​ឱ្យ​បាន ដើម្បី​បញ្ជាក់​ឱ្យ​ដឹង​ថា អ្នកណា​នៅ​ពីក្រោយ​ខ្នង​ដែរ​បញ្ជា​ឱ្យ​វាយប្រហារ​មក​លើ​លោក​បែបនេះ។ តែ​រហូត​មក​ដល់​ពេល​នេះ​បាន​ត្រឹមតែ​សមត្ថកិច្ច​មក​ធ្វើ​កំណត់ហេតុ​ប៉ុណ្ណោះ៖ «ឱ្យ​អាជ្ញាធរ​ជួយ​វែកមុខ​រក​ជន​ដៃដល់​អ៊ីចឹង​ទៅ ហើយ​ខ្ញុំ​វា​បាន​ធូរ​ខ្លះ​ហើយ តែ​វា​នៅ​មាន​ការ​ចុកចាប់​ដោយសារតែ​ដៃ​ខាង​ឆ្វេង​គេ​វ៉ៃ​តាំងពី​ស្មា​រហូតដល់​ចុង​ដៃ»

អំពើ​ហិង្សា​ទៅលើ​សកម្មជន​គណបក្ស​សង្គ្រោះ​ជាតិ​ជា​បន្តបន្ទាប់​នេះ​បាន​កើតមានឡើង​ក្នុង​ខណៈ​ពេល​ដែល​ថ្ងៃ​កំណត់​នែ​ការ​វិល​ត្រឡប់​របស់​លោក សម រង្ស៊ី វិល​ចូល​មក​កាន់​មាតុប្រទេស​វិញ​កាន់តែ​ខិត​ជិត​ចូល​មក​ដល់​នៅ​ថ្ងៃ​ទី៩ វិច្ឆិកា ខាងមុខនេះ។

រាល់​ករណី​អំពើ​ហិង្សា​មក​លើ​សកម្មជន​គណបក្ស​សង្គ្រោះ​ជាតិ​ម្តងៗ​អាជ្ញាធរ​របប​ក្រុងភ្នំពេញ​មិន​ដែល​ចាប់​ជនសង្ស័យ​ណា​ម្នាក់​យក​មក​កាត់ទោស​តាមច្បាប់​ទេ។

មន្ត្រី​នាំ​ពាក្យ​សមាគម​អាដហុក (Adhoc) លោក ស៊ឹង សែនករុណា បញ្ជាក់​ថា លោក​គ្មាន​ជំនឿ​ថា​សមត្ថកិច្ច​កម្ពុជា​ហ៊ាន​ចាប់​ជនសង្ស័យ​ទៅ​ផ្ដន្ទាទោស​ទេ ដោយសារតែ​លោក​សង្កេត​ឃើញ​ថា រាល់​អំពើ​ហិង្សា​ម្តងៗ​ដែល​កើតមាន​ទៅលើ​ក្រុម​អង្គការ​សង្គម​ស៊ីវិល សកម្មជន​ដីធ្លី និង គណបក្ស​នយោបាយ​មិនដែល​ឃើញ​អាជ្ញាធរ​ចាប់​ជនសង្ស័យ​ទៅ​ផ្ដន្ទាទោស​បាន​ម្នាក់​ទេ៖ «ក្នុង​រឿង​គណបក្ស​នយោបាយ​ដែល​មាន​និន្នាការ​ផ្សេង​ពី​គ្នា​ហើយ​បង្ហាញ​ឱ្យ​ឃើញ​ថា អត់​បាន​យកចិត្តទុកដាក់​បែបនេះ​វា​ជា​ការ​ឱ្យ​កាន់តែ​ឃើញច្បាស់​ថា សមត្ថកិច្ច​ទាំងអស់​ហ្នឹង​អត់​បាន​យកចិត្តទុកដាក់​ទៅលើ​ការ​អនុវត្ត​ច្បាប់​ទៅលើ​អ្នក​ដែល​រងគ្រោះ​ដែល​មាន​និន្នាការ​នយោបាយ​ដែល​ផ្ទុយ​ពី​ខ្លួន​ហ្នឹង។ អ៊ីចឹង​យើង​ឃើញ​ហើយ វា​ធ្វើ​ឱ្យ​ការអនុវត្ត​ច្បាប់​ហ្នឹង​មានការ​ចោទប្រកាន់​ទៅលើ​ថា ជា​ការ​អនុវត្ត​ដោយ​ស្តង់ដារ​ពីរ​កន្លងមក​រហូត​មក​ដល់​រឿង​នយោបាយ​អី​ជាដើម»

ករណី​ហិង្សា​ទៅលើ​លោក ស៊ិន បូណា ជា​ករណី​ទី​១២ ហើយ​ដែល​ជន​ដៃដល់​វាយ​សំពង​សកម្មជន​គណបក្ស​ប្រឆាំង ហើយ​គ្មាន​សំណុំរឿង​មួយ​ណា​ដែល​សមត្ថកិច្ច​បាន​រក​ឃើញ​ជន​ប្រព្រឹត្ត​នោះ​ទេ។អ្នកឃ្លាំមើល​សិទ្ធិមនុស្ស​ព្រមាន​ថា បើ​កម្ពុជា​នៅតែ​អនុវត្ត​ច្បាប់​តាម​ស្តង់ដារ​ពីរ​នោះ កម្ពុជា​អាច​នឹង​ជួប​វិបត្តិ​នយោបាយ​ដោះស្រាយ​មិន​ចេញ​នា​ពេល​អនាគត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល