កញ្ញា សេង ធារី ធ្វើ​កូដកម្មអត់​អាហារ ​១០ថ្ងៃ​ទាមទារ​ឱ្យ​ដោះលែង​កញ្ញា និង​អ្នកទោស​នយោបាយ​ដទៃ​ទៀត

ដោយ មាន ឫទ្ធិ
2023.07.17
កញ្ញា សេង ធារី ធ្វើ​កូដកម្មអត់​អាហារ ​១០ថ្ងៃ​ទាមទារ​ឱ្យ​ដោះលែង​កញ្ញា និង​អ្នកទោស​នយោបាយ​ដទៃ​ទៀត (រូបឯកសារ) ឆ្វេង៖ កញ្ញា សេង ធារី នៅក្នុងពន្ធនាគារ​ខេត្តព្រះវិហារ កាល​ពី​ថ្ងៃ​ទី១៥ ខែមិថុនា ឆ្នាំ២០២២ និង​ស្ដាំ៖ កញ្ញា សេង ធារី តែង​ខ្លួន​ជា​ធីតា​សេរីភាព ក្នុង​ពេល​តវ៉ា​នៅ​ខាង​មុខ​សាលាដំបូង​រាជធានី​ភ្នំពេញ កាល​ពី​ថ្ងៃ​ទី១៤ ខែមិថុនា ឆ្នាំ២០២២ ប្រឆាំង​នឹង​ការ​ផ្ដន្ទាទោស​កញ្ញា។
រូបពីពលរដ្ឋ

មេធាវី​ខ្មែរ​អាមេរិកាំង និង​ជា​សកម្មជន​សិទ្ធិមនុស្ស​ល្បី​ឈ្មោះ កញ្ញា សេង ធារី ចាប់ផ្តើម​ធ្វើ​កូដកម្ម​បង្អត់​អាហារ​រយៈពេល​១០ថ្ងៃ​ក្នុង​គុក​ខេត្តព្រះវិហារ ដើម្បី​ទាមទារ​ឱ្យ​ដោះលែង​កញ្ញា និងអ្នកទោស​នយោបាយ​ដទៃ​ទៀត។ នេះ​បើ​តាម​ការឱ្យ​ដឹង​របស់​មេធាវី​សិទ្ធិមនុស្ស​អន្តរជាតិ​របស់​កញ្ញា សេង ធារី គឺ​លោក ចារិត ហ្គិនស័រ (Jared Genser) តាមរយៈ​សេចក្តីប្រកាស​ព័ត៌មាន​មួយ​ផ្សាយ​នៅ​ថ្ងៃទី១៧ ខែកក្កដា។ ការធ្វើ​កូដកម្ម​បង្អត់​អាហារ​នេះ ក៏​ដើម្បី​ទាញ​ចំណាប់អារម្មណ៍​ពី​សហគមន៍​អន្តរជាតិ​ពាក់ព័ន្ធនឹង​ការធ្លាក់ចុះ​ដុនដាប​នៃ​ស្ថានភាព​សិទ្ធិមនុស្ស និង​លទ្ធិប្រជាធិបតេយ្យ​​ក្រោម​របប​លោក ហ៊ុន សែន។

ការប្រកាស​ចាប់ផ្តើម​ធ្វើ​កូដកម្ម​បង្អត់​អាហារ​របស់​កញ្ញា សេង ធារី នៅ​ថ្ងៃ​ទី១៧ ខែកក្កដា ធ្វើឡើង​ក្រោយ​សំណុំ​រឿង​របស់​កញ្ញា ត្រូវបាន​ក្រុមការងារ​អង្គការ​សហប្រជាជាតិ​ប្រឆាំង​នឹង​ការ​ឃុំ​ខ្លួន​តាម​ទំនើង​ចិត្ត រក​ឃើញ និង​ចាត់​ទុក​ក្នុង​​សេចក្ដី​សម្រេច​មួយ កាល​ពី​ថ្ងៃ​ទី១២ ខែ​កក្កដា​ថា ជា​ការ​ឃុំខ្លួន​តាម​ទំនើងចិត្ត ជា​រឿង​នយោបាយ និង​រំលោភ​ច្បាប់​អន្តរជាតិ។

កញ្ញា សេង ធារី អំពាវនាវ​ដល់​សហរដ្ឋអាមេរិក និង​សហគមន៍​អន្តរជាតិ​ជា​រួម ឱ្យ​និយាយ​រិះគន់​ចំពោះ​ការធ្លាក់ចុះ​ដុនដាប​នៃ​លទ្ធិប្រជាធិបតេយ្យ​នៅ​មុន​ការ​បោះឆ្នោត​ជ្រើសតាំង​តំណាងរាស្ត្រ​កម្ពុជា ថ្ងៃ​ទី២៣ ខែកក្កដា ដែល​រងនូវ​ការ​ថ្កោលទោស​ដោយសារ​ការមិន​ឱ្យ​គណបក្ស​ប្រឆាំង​ធំជាងគេ គឺ​គណបក្ស​ភ្លើងទៀន ចូលរួម។ កញ្ញា​ក៏​អំពាវនាវ​ដល់​រដ្ឋបាល​លោក​ប្រធានាធិបតី ប៊ៃឌិន (Biden Administration) ឱ្យ​ចាត់​នូវ​ជំហាន​បន្ថែម​ទៀត ដើម្បី​ធានា​ឱ្យមាន​ការ​ដោះលែង​អ្នកទោស​នយោបាយ​ទាំងអស់​នៅ​កម្ពុជា។

បងប្រុស​កញ្ញា សេង ធារី គឺ​លោក សេង ម៉ារឌី ថ្លែង​ក្នុង​សេចក្តីប្រកាស​ព័ត៌មាន​ដដែល​ថា ក្រុម​គ្រួសារ​របស់​លោក​ព្រួយបារម្ភ​ជាខ្លាំង​ចំពោះ​សុខភាព​របស់​កញ្ញា សេង ធារី។ ក៏ប៉ុន្តែ ពួក​គេ​យល់​ពី​បំណង​ប្រាថ្នា​របស់​កញ្ញា​ដែល​ចង់​សម្តែងមតិ​រិះគន់​ទង្វើ​អយុត្តិធម៌​ទាំង​នេះ។ លោក​ថា ក្រុមគ្រួសារ​របស់​លោក​អំពាវនាវ​ដល់​ប្រធានាធិបតី​អាមេរិក លោក ចូ ប៊ៃឌិន និង​រដ្ឋមន្ត្រី​ការ​បរទេស​អាមេរិក លោក អែនថូនី ប៊ី្លនឃិន (Antony Blinken) ឱ្យ​ចាត់បញ្ចូល​សំណុំ​រឿង​របស់​កញ្ញា​ជា​សំណុំរឿង «ឃុំខ្លួន​ពលរដ្ឋ​អាមេរិកាំង​ខុស​ច្បាប់» ស្ថិត​ក្រោម​ច្បាប់ «ឡឺវីនសុន» (Levinson Act) ជា​បន្ទាន់។ តាម​រយៈ​ច្បាប់​នេះ សំណុំរឿង​របស់​កញ្ញា​នឹង​ត្រូវ​ផ្ទេរទៅ​ឱ្យ​បេសកជន​ប្រធានាធិបតី​អាមេរិក​ស្តីពី​កិច្ចការ​ចំណាប់​ខ្មាំង ជា​អ្នក​ទទួល​ខុសត្រូវ និង​កំណត់​អាទិភាព​ស្វែងរក​ដំណោះស្រាយ​ឱ្យ​មាន​ការ​ដោះលែង​កញ្ញា សេង ធារី។

ដោយឡែក មេធាវី​សិទ្ធិមនុស្ស​អន្តរជាតិ​របស់​កញ្ញា សេង ធារី គឺ​លោក ចារិត ហ្គិនស័រ (Jared Genser) ពន្យល់​ថា ការធ្វើ​កូដកម្ម​បង្អត់​អាហារ​របស់​កញ្ញា សេង ធារី នេះ គឺ​ជា​ការ​តស៊ូ​ដោយ​សន្តិវិធី និង​ដ៏​មាន​ឥទ្ធិពល​ដើម្បី​បង្ហាញ​ពី​ការរឹតត្បិត​ដ៏​ធ្ងន់ធ្ងរ​មក​លើ​គណបក្ស​នយោបាយ​ប្រឆាំង​នៅ​កម្ពុជា និង​ថា​ការ​បោះឆ្នោត​ថ្ងៃ​ទី២៣ ខែកក្កដា នឹង​មិន​សេរី និង​យុត្តិធម៌​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
ព្រះចៅ​អធិការ​វត្ត​ដំរីស ខេត្ត​បាត់ដំបង បណ្ដេញ​ព្រះសង្ឃ​មួយ​អង្គ​ចេញ​ពី​វត្ត​បន្ទាប់​ពី​ចូលរួម​បុណ្យ​ខួប​បាញ់សម្លាប់​បណ្ឌិត កែម ឡី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។