លោកនាយករដ្ឋមន្ត្រី ហ៊ុន ម៉ាណែត អះអាងថា រដ្ឋាភិបាលថ្មីរបស់លោកទទួលបានការអបអរពីសហគមន៍អន្តរជាតិកាន់តែច្រើន បើទោះជាមេដឹកនាំប្រទេសសេរីធំៗ មិនទាន់ផ្ញើសារអបអរក្ដី។ ទោះយ៉ាងណាក្ដី អ្នកជំនាញ កិច្ចការអន្តរជាតិ យល់ថា រដ្ឋាភិបាល លោក ហ៊ុន ម៉ាណែត គួរចាប់ផ្ដើមស្ដាប់សំណើរបស់ក្រុមប្រទេសលោកសេរី ដែលទាមទារឱ្យមានការគោរពសិទ្ធិមនុស្ស និងប្រជាធិបតេយ្យ ដើម្បីធ្វើឱ្យប្រទេសសេរីទាំងនោះផ្ដល់តម្លៃឱ្យរដ្ឋាភិបាល លោក ហ៊ុន ម៉ាណែត។
បើទោះជាក្ដី លោក ហ៊ុន ម៉ាណែត អះអាងដដែលៗថា ការឡើងកាន់តំណែងជា នាយករដ្ឋមន្ត្រីរបស់លោកមានពលរដ្ឋជាង ៦លាននាក់បោះឆ្នោតឱ្យក្ដី ក៏នាយករដ្ឋមន្ត្រីរូបនេះ ហាក់នៅតែបារម្ភពីភាពស្របច្បាប់នៃរដ្ឋាភិបាលរបស់លោក ក្នុងឆាកអន្តរជាតិ ជាពិសេសការទទួលស្គាល់ ឬការស្វាគមន៍ពីក្រុមប្រទេសលោកសេរី។ លោក ហ៊ុន ម៉់ាណែត អះអាងថា នៅពេលនេះ មានមេដឹកនាំ និងអតីតមេដឹកនាំប្រទេសនានា មន្ត្រីជាន់ខ្ពស់សហភាពអឺរ៉ុប រួមទាំងសមាជិកព្រឹទ្ធសភាសហរដ្ឋអាមេរិក បានអបអររដ្ឋាភិបាលថ្មីរបស់លោក និងបានហៅលោកថា ជានាយករដ្ឋមន្ត្រី។
លោក ហ៊ុន ម៉ាណែត៖«គាត់ថា គ្មានអន្តរជាតិណាគាំទ្រព្រោះគេមិនផ្ញើលិខិតអបអរសាទររឿងអបអរសាទរមិនមែនជាកាតព្វកិច្ចដែលប្រទេសមួយៗត្រូវផ្ញើឱ្យប្រទេសទៅប្រទេសណាទេ គឺជាមនោសញ្ចេតនា បើគេដកទូតចេញបានគេអត់ទទួលធ្វើការជាមួយ បើគេផ្ដាច់ចំណងការទូត»។
លោក ហ៊ុន ម៉ាណែត អួតអាងបែបនេះ ក្រោយពេលប្រធានគណៈកម្មការអឺរ៉ុបអ្នកស្រី អួរស៊ូឡា វ៉ុនឌែរ ឡេយែន (Ursula von der Leyen) បានផ្ញើសារអបអរសាទរជូន លោក កាលពីថ្ងៃទី២៥ ខែសីហា ក្នុងឱកាសដែលលោកចូលកាន់តំណែងជានាយករដ្ឋមន្ត្រី។ ចំណែកក្រុមសមាជិកព្រឹទ្ធសភាសហរដ្ឋអាមេរិក រួមទាំងឯកអគ្គរដ្ឋទូតសហរដ្ឋអាមេរិកប្រចាំកម្ពុជាផង ក៏បានជួបលោកដែរ។
ទោះបែបនេះក្ដីលោក ហ៊ុន ម៉ាណែត មិនបានបង្ហាញឱ្យសាធារណជនដឹងពីសំណើរបស់ក្រុមសមាជិកព្រឹទ្ធសភា ដែលទាមទារទៅរដ្ឋាភិបាលរបស់លោកឱ្យលទ្ធិប្រជាធិបតេយ្យ គោរពសិទ្ធិមនុស្ស និងដោះលែងអ្នកទោសនយោបាយនោះទេ។
ស្ថានទូតសហរដ្ឋអាមេរិកប្រចាំកម្ពុជាឱ្យដឹងថា មន្ត្រីបំពេញទស្សនកិច្ចមកពីគណៈកម្មាធិការបែងចែកថវិកាជាតិនៃព្រឹទ្ធសភាអាមេរិក ដែលមកជួបលោក ហ៊ុន ម៉ាណែត កាលពីថ្ងៃទី២៨ ខែសីហា បានជំរុញទៅរដ្ឋាភិបាលលោក ហ៊ុន ម៉ាណែត បើកឡើងវិញនូវលំហសេរីភាពពលរដ្ឋ និងប្រព័ន្ធផ្សព្វផ្សាយឯករាជ្យ ធ្វើឱ្យមានវឌ្ឍនភាពលើលទ្ធិប្រជាធិបតេយ្យ និងការគោរពសិទ្ធិមនុស្សដោយធានាថាពលរដ្ឋកម្ពុជាទាំងអស់អាចចូលរួមបាន ដោយសេរីក្នុងដំណើរការនយោបាយ។ ទំព័រហ្វេសប៊ុកស្ថានទូតសហរដ្ឋអាមេរិកប្រចាំកម្ពុជា ឱ្យដឹងទៀតថា សហរដ្ឋអាមេរិក ជំរុញឱ្យមានការដោះលែងបុគ្គល និងសកម្មជននយោបាយ រួមមានលោក កឹម សុខា និងកញ្ញា សេង ធារី ជាដើម។ ភាគីសហរដ្ឋអាមេរិកសង្កត់ធ្ងន់ទៀតថា ការប្ដេជ្ញាចិត្តដ៏យូរអង្វែងរបស់សហរដ្ឋអាមេរិកចំពោះពលរដ្ឋកម្ពុជា និងបំណងប្រាថ្នារបស់ពួកគេ សម្រាប់ប្រទេសដែលមានវិបុលភាព ប្រជាធិបតេយ្យ និងឯករាជ្យ ដែលគ្រប់សំឡេងត្រូវបានស្ដាប់ និងគោរព។
ទាក់ទងរឿងនេះដែរ អ្នកជំនាញផ្នែកវិទ្យាសាស្ត្រនយោបាយ និងកិច្ចការអន្តរជាតិ លោក ឯម សុវណ្ណារ៉ា សង្កេតឃើញថា រដ្ឋាភិបាលរបស់លោក ហ៊ុន ម៉ាណែត មិនទទួលបានការស្វាគមន៍ពីគ្រប់ប្រទេសក្នុងតំបន់អាស៊ាន និងក្រុមប្រទេសមហាអំណាចនៃលោកសេរីនៅឡើយទេ។ លោកបន្តទៀតថា មកដល់ពេលនេះ ប្រទេសភាគច្រើនដែលផ្ដល់តម្លៃដល់រដ្ឋាភិបាលលោក ហ៊ុន ម៉ាណែត ច្រើនតែប្រទេសកុម្មុយនិស្ត។ អ្នកជំនាញកិច្ចការអន្តរជាតិរូបនេះ យល់ថា ដើម្បីឱ្យក្រុមប្រទេសសេរីផ្ដល់តម្លៃដល់រដ្ឋាភិបាល លោក ហ៊ុន ម៉ាណែត លុះត្រាតែរដ្ឋាភិបាលលោក ហ៊ុន ម៉ាណែត ពិនិត្យមើលឡើងវិញ នូវសំណើរបស់សហរដ្ឋអាមេរិក និងសហភាពអឺរ៉ុប ដែលទាមទារឱ្យកម្ពុជាមានការគោរពសិទ្ធិមនុស្ស ប្រជាធិបតេយ្យ និងដោះលែងអ្នកទោសនយោបាយជាដើម។
លោកា ឯម សុវណ្ណារ៉ា៖«គេលើកឡើងឱ្យរដ្ឋាភិបាលកម្ពុជា បើកលំហសេរីភាពបញ្ហាសិទ្ធិមនុស្ស ប្រជាធិបតេយ្យហ្នឹងឱ្យទូលាយ បើសិនបើរដ្ឋាភិបាលថ្មីមិនងាក ឬឆ្លើយតបនឹងបញ្ហាហ្នឹងទេ អត្ថប្រយោជន៍ពាណិជ្ជកម្មGSPឬក៏EBAអាចប្រឈមការបាត់បង់ដែរបាទ»។
ជុំវិញការលើកឡើងនេះ វិទ្យុអាស៊ីសេរីមិនអាចសុំការបកស្រាយពីប្រធានអង្គភាពអ្នកនាំពាក្យរដ្ឋាភិបាល ប៉ែន បូណា បានទេនៅថ្ងៃទី២៩ ខែសីហា។ រីឯ អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏លើកឡើងមិនខុសពីលោក ហ៊ុន ម៉ាណែត ដែរថា រដ្ឋាភិបាលរបស់គណបក្សប្រជាជនកម្ពុជា ដែលដឹកនាំដោយលោក ហ៊ុន ម៉ាណែត កំពុងទទួលបានការអបអរពីបណ្ដាប្រទេសនានា។ លោកសុខ ឥសាន អះអាងទៀតថា ចំពោះជំហរនយោបាយការបរទេសនៃរដ្ឋាភិបាលថ្មី ក៏មិនខុសពីរដ្ឋាភិបាលមុនដែរ គឺនៅតែពង្រឹងលទ្ធិប្រជាធិបតេយ្យ តែលោកថា ចំពោះជនណាប្រព្រឹត្តិល្មើសច្បាប់ គឺត្រូវអនុវត្តតាមច្បាប់ដោយគ្មានការលើកលែង។
លោក សុខ ឥសាន៖«ប្រទេសណាក៏ដោយមិនអាចដោះលែងអ្នកទោសអ្នកប្រព្រឹត្តិល្មើសច្បាប់ទេ ហើយក៏មិនអាចអនុគ្រោះឱ្យអ្នកប្រព្រឹត្តិល្មើសច្បាប់បានដែរ»។
លោក ហ៊ុន ម៉ាណែត បានឡើងមកធ្វើជានាយករដ្ឋមន្ត្រី តាមរយៈការបោះឆ្នោតកាលពីថ្ងៃទី២៣ ខែកក្កដាកន្លងទៅ ដែលរងការរិះគន់ពីសហគមន៍ជាតិនិងអន្តរជាតិថា លោក ហ៊ុន សែន ធ្វើឡើងដោយបង្គ្រប់កិច្ច ព្រោះគ្មានគណបក្សប្រឆាំងចូលរួម។
ក្រុមអ្នកឃ្លាំមើលថា បើរដ្ឋាភិបាលលោក ហ៊ុន ម៉ាណែត មិនព្រមស្ដារសិទ្ធិមនុស្ស ប្រជាធិបតេយ្យទេ រដ្ឋាភិបាលនេះអាចរងទណ្ឌកម្មពីសហភាពអឺរ៉ុប ដែលគេអាចនឹងផ្ដាច់ប្រព័ន្ធអនុគ្រោះពន្ធEB ១០០% ហើយសហរដ្ឋអាមេរិក ក៏មិនផ្ដល់ប្រព័ន្ធអនុគ្រោះពន្ធទូទៅ GSP ដល់កម្ពុជាវិញដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។