មេដឹកនាំគណបក្សកាន់អំណាចសំខាន់ៗ ជាពិសេស ក្រុមលោក សាយ ឈុំ លោក ស ខេង លោក ទៀ បាញ់ និងអ្នកស្រី ម៉ែន សំអន ជាដើម រក្សាភាពស្ងៀមស្ងាត់ នៅមុនពេលរដ្ឋសភាគ្រោងបោះឆ្នោតតែងតាំងលោក ហ៊ុន ម៉ានី ជាឧបនាយករដ្ឋមន្ត្រី។ មន្ត្រីបក្សកាន់អំណាចអះអាងថា គណបក្សនេះពុំមានទំនាស់ផ្ទៃក្នុងនោះទេ ខណៈមន្ត្រីបក្សប្រឆាំងវិញយល់ថា ភាពស្ងៀមស្ងាត់អាចមកពីមេដឹកនាំទាំងនោះមិនពេញចិត្ត។
មេដឹកនាំគណបក្សប្រជាជនកម្ពុជាសំខាន់ៗ រួមមានលោក សាយ ឈុំ លោក ស ខេង លោក ទៀ បាញ់ និងអ្នកស្រី ម៉ែន សំអន មិនទាន់បង្ហាញមតិយោបល់ ជាសាធារណៈនៅឡើយជុំវិញផែនការលើកបន្តុបលោក ហ៊ុន ម៉ានី ឱ្យឡើងធ្វើជាឧបនាយករដ្ឋមន្ត្រី បន្ទាប់ពីបងប្រុសគឺលោក ហ៊ុន ម៉ាណែត កំពុងកាន់កាប់តំណែងជានាយករដ្ឋមន្ត្រីស្រាប់។
កាលពីពេលថ្មីៗ នេះ លោក ហ៊ុន ម៉ាណែត បានស្នើតែងតាំងប្អូនប្រុសបង្កើត គឺលោក ហ៊ុន ម៉ានី ធ្វើជាឧបនាយករដ្ឋមន្ត្រី និងស្នើតែងតាំងទេសរដ្ឋមន្ត្រីទទួលបន្ទុកបេសកកម្ម ២រូបបន្ថែមទៀត គឺលោក ស្រ៊ី ថាមរុង្គ និងលោក ប៉ែន វិបុល។ បើសិនគ្មានការប្រែប្រួលអ្វីនោះទេ រដ្ឋសភាដែលគ្រប់គ្រងដោយគណបក្សកាន់អំណាចនឹងបើកកិច្ចប្រជុំវិសាមញ្ញ ដើម្បីបោះឆ្នោតផ្តល់សេចក្តីទុកចិត្តលើសមាសភាពពួកគេ នៅថ្ងៃទី២១ ខែកុម្ភៈ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់វិទ្យុអាស៊ីសេរីថា ការដែលមេដឹកនាំបក្សមិនបានចេញសារណាមួយទាក់ទងការដំឡើងតំណែង លោក ហ៊ុន ម៉ានី ជាឧបនាយករដ្ឋមន្ត្រីមិនមែនមានន័យថា បក្សនេះកំពុងមានជម្លោះផ្ទៃនោះទេ។ លោកអះអាងថា ការជ្រើសរើសលោក ហ៊ុន ម៉ានី ឱ្យធ្វើជា ឧបនាយករដ្ឋមន្ត្រីកន្លងមកផ្អែកលើស្នាដៃ និងសមត្ថភាព ហើយការសម្រេចជារួមដោយគណៈកម្មាធិការអចិន្ត្រៃយ៍គណបក្សចំនួន ៥៧នាក់ ដែលក្នុងនោះ ក៏មានថ្នាក់ដឹកនាំ ៤រូប គឺលោក សាយ ឈុំ លោក ស ខេង លោក ទៀ បាញ់ និងអ្នកស្រី ម៉ែន សំអន ជាអ្នកសម្រេចផងដែរ។
លោក សុខ ឥសាន៖ «ការតែងតាំងមន្ត្រី ឬឥស្សរជននៅក្នុងត្រកូលទេវតា ត្រកូលគណបក្សប្រជាជនកម្ពុជា ដូច្នេះអត់គិតថា តែងតាំងអ្នកនេះកូនរបស់អ្នកនេះ អ្នកនេះកូនរបស់អ្នកនោះគឺអត់ទេ អត់យកអាហ្នឹងមកនិយាយទេ និយាយពីលក្ខណសម្បត្តិបុគ្គល ដែលត្រូវតែងតាំងថា តើមានលក្ខខណ្ឌគ្រប់គ្រាន់ ស្របតាមសំណូមពរត្រូវការរបស់ប្រទេសជាតិដែរ ឬទេ? អាហ្នឹងទើបគេសម្រេចតែងតាំងអ្នកក្រោយមានគុណសម្បត្តិដែរ តែគេយកជន ដែលឆ្នើមជាងគេសិន»។
ក្រៅពីតែងតាំងលោក ហ៊ុន ម៉ានី នោះ កន្លងទៅលោក ហ៊ុន ម៉ាណែត ក៏បានតែងតាំងលោក នេត សាវឿន ដែលត្រូវជាបងថ្លៃជីដូនមួយរបស់លោកឡើងជា ឧបនាយករដ្ឋមន្ត្រី និងទទួលបន្ទុកជានាយករដ្ឋមន្ត្រីស្ដីទីនៅពេលអវត្តមានរបស់លោកដែរ ខណៈឪពុកក្មេករបស់លោក គឺលោក ពេជ សោភ័ន តែងតាំងជាទេសរដ្ឋមន្ត្រី។
ចំណែកលោក ហ៊ុន សែន ដែលជាឪពុកបង្កើត ក៏នឹងក្លាយជាប្រធានព្រឹទ្ធសភា ហើយទទួលភារកិច្ចជាប្រមុខរដ្ឋស្ដីទី ដោយមិនទាន់គិតដល់បងប្អូន និងបងប្អូន សាច់ថ្លៃជាច្រើននាក់ទៀតរបស់លោក ហ៊ុន ម៉ាណែត ដែលកំពុងកាន់តួនាទីសំខាន់ៗ នៅតាមក្រសួងស្ថាប័នរដ្ឋ ទាំងស៊ីវិល និងកងកម្លាំងប្រដាប់អាវុធផង។
អតីតតំណាងរាស្ត្រខេត្តសៀមរាប និងជាមន្ត្រីជាន់ខ្ពស់គណបក្សសង្គ្រោះជាតិ លោក អ៊ំ សំអាន អាះអាងថា លោកបានទទួលដំណឹងជាបន្តបន្ទាប់ ពីផ្ទៃក្នុងបក្សកាន់អំណាច ជាពិសេស ទាក់ទងការតែងតាំងលោក ហ៊ុន ម៉ានី ជាឧបនាយករដ្ឋមន្ត្រី ដែលធ្វើឱ្យមន្ត្រីនៅក្នុងជួរគណបក្សនេះមួយចំនួនមិនពេញចិត្តឡើយ។ ទោះជាយ៉ាងណាក្ដី លោកថា មូលហេតុ ដែលពួកគេរក្សាភាពស្ងៀមស្ងាត់ ឬមិនហ៊ាន ជំទាស់ដោយបើកចំហនោះ ដោយសារតែបច្ចុប្បន្នលោក ហ៊ុន សែន និងបក្ខពួក កំពុងក្តោបក្តាប់អំណាចពេញដៃ ដែលគ្រោះថ្នាក់ដល់ពួកគេ។
លោក អ៊ំ សំអាន៖ «នៅក្នុងជួរគណបក្សប្រជាជនកម្ពុជានៅក្នុងប្រទេស គឺគេផ្តល់ព័ត៌មានមកឱ្យ គេអត់សប្បាយចិត្តទេ ដែលតែងតាំងលោក ហ៊ុន ម៉ាណែត ជានាយករដ្ឋមន្ត្រី ហើយឥឡូវតែងតាំងលោក ហ៊ុន ម៉ានី ជាឧបនាយករដ្ឋមន្ត្រីទៀត គឺគេកាន់តែមិនសប្បាយចិត្តហើយ ទោះបីគេអត់បានសម្ដែងចេញជាសាធារណៈ តែផ្ទៃក្នុង គេអត់សប្បាយចិត្ត គេអត់ហ៊ានសម្ដែងជាសាធារណៈខ្លាចត្រកូលហ៊ុនបង្ក្រាបដោយគេសម្ងំសុខសិនទៅ ប៉ុន្តែប្រសិនបើអត់ពីលោក ហ៊ុន សែន ទៅគេនឹងរើបម្រាស់ហើយ»។
រដ្ឋាភិបាលរបស់លោកនាយករដ្ឋមន្ត្រី ហ៊ុន ម៉ាណែត មានឧបនាយករដ្ឋមន្ត្រីចំនួន ១០នាក់ និងទេសរដ្ឋមន្ត្រី ២១នាក់រួចហើយ។ ដូចនេះ ប្រសិនបើរាប់ទាំងលោក ហ៊ុន ម៉ានី ទៀតនឹងធ្វើឱ្យចំនួនឧបនាយករដ្ឋមន្ត្រីឡើងដល់ ១១នាក់ ហើយទេសរដ្ឋមន្ត្រីនឹងកើនដល់ទៅ២៣នាក់។ ចំណែកមន្ត្រីជាន់ខ្ពស់រដ្ឋាភិបាល ចាប់ពីអនុរដ្ឋលេខាធិការ រហូតដល់នាយករដ្ឋមន្ត្រីមានចំនួនប្រហែល ១ពាន់ ៦រយនាក់ (១.៦០០នាក់) ដោយមិនទាន់គិតពីចំនួនទីប្រឹក្សា ជំនួយការរាប់ពាន់នាក់ទៀតនៅឡើយ។មន្ត្រីបក្សប្រឆាំង និងអ្នកឃ្លាំមើលបញ្ហាសង្គមយល់ថា ការពង្រឹងអំណាចដើម្បីធានានូវអំណាចតវង្សត្រកូលបែបនេះ បើសិនពលរដ្ឋខ្មែរមិនបានទប់ស្កាត់ឱ្យទាន់ពេលនោះទេ នឹងគ្រោះថ្នាក់ដល់ជោគវាសនាជាតិទៅថ្ងៃខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។