ភាគី​វៀតណាម​បដិសេធ​ថា អ្នក​ជេរ​ប្រមាថ​លោក ហ៊ុន សែន មិន​តំណាង​ឱ្យ​រដ្ឋាភិបាល​ទេ

ដោយ ខាន់ លក្ខិណា
2024.05.24
ភាគី​វៀតណាម​បដិសេធ​ថា អ្នក​ជេរ​ប្រមាថ​លោក ហ៊ុន សែន មិន​តំណាង​ឱ្យ​រដ្ឋាភិបាល​ទេ អតីតនាយករដ្ឋមន្ត្រី ហ៊ុន សែន ថ្លែងក្នុងពិធីជួបអ្នកកាសែតក្នុងស្រុក កាលពីថ្ងៃទី១៤ មករា ២០១៧។
រូប៖ អង្គភាព​ប្រតិកម្មរហ័ស

មន្ត្រី​ជាន់ខ្ពស់​ក្រសួង​ការបរទេស​វៀតណាម​អ្នកស្រី ផាំ ធូ ហាង (Pham Thu Hang) ទទួល​ស្គាល់​ថា​គណនី​មួយ​ចំនួន​ដែល​រិះគន់​ប្រធាន​ព្រឹទ្ធសភា​លោក ហ៊ុន សែន នៅ​លើ​បណ្ដាញ​សង្គម​តិកតុក (TikTok) មាន​ប្រភព​ចេញ​ពី​ប្រទេស​វៀតណាម ពិត​ប្រាកដ​មែន ប៉ុន្តែ​មិន​តំណាង​ឱ្យ​រដ្ឋាភិបាល​វៀតណាម​នោះ​ទេ។ ការ​ឆ្លើយ​តប​របស់​ភាគី​វៀតណាម​នេះ អ្នក​ឃ្លាំមើល​យល់​ថា ដើម្បី​ឱ្យ​លោក ហ៊ុន សែន ស្ងប់​ចិត្ត។

សារព័ត៌មានVietnam Express ដក​ស្រង​ការ​លើក​ឡើង​របស់​អ្នក​នាំ​ពាក្យ​ក្រសួង​ ការ​បរទេស​វៀតណាម​អ្នកស្រី ផាំ ធូ ហាង នៅ​ក្នុង​សន្និសីទ​សារព័ត៌មាន​កាល​ពី​ថ្ងៃ​ទី​២៣ ខែឧសភា ថា គណនី​មួយ​ចំនួន​ដែល​រិះគន់​លោក ហ៊ុន សែន គឺ​ជា​ការ​បញ្ចេញមតិ​ផ្ទាល់​ខ្លួន មិន​តំណាង​ឱ្យ​រដ្ឋាភិបាល និង​ប្រជាជន​វៀតណាម​ទាំង​មូល​ឡើយ។

អ្នកស្រី​ការពារ​ថា រដ្ឋាភិបាល​វៀតណាម មិន​គាំទ្រ​ចំពោះ​ការ​បញ្ចេញមតិ​ញុះញង់​ និង​ធ្វើ​ឱ្យ​ប៉ះពាល់​ដល់​ទំនាក់ទំនង​រវាង​ប្រជាជន​នៃ​ប្រទេស​ទាំង​ពីរ​នោះ​ទេ។

ជុំវិញ​ការ​ឆ្លើយ​តប​នេះ វិទ្យុ​អាស៊ី​សេរី​មិន​អាច​សុំ​ការ​អត្ថាធិប្បាយ​ពី​អ្នក​នាំ​ពាក្យ​ ក្រសួង​បរទេស​កម្ពុជា​លោក ជុំ សន្ទរី  បាន​ទេ នៅ​ថ្ងៃទី២៤ ខែ​ឧសភា ដោយ​ទូរស័ព្ទ​ចូល​គ្មាន​អ្នក​ទទួល។

កាល​ពី​ថ្ងៃ​ទី​២០ ខែ​ឧសភា រដ្ឋមន្ត្រី​ការបរទេស​កម្ពុជា បាន​កោះហៅ​ឯកអគ្គរដ្ឋទូត​វៀតណាម​ប្រចាំ​កម្ពុជា​មក​សួរ​នាំ ជុំវិញ​រឿង​ខ្លឹមសារ​ជេរប្រមាថ​លោក ហ៊ុន សែន នៅ​លើ​បណ្ដាញ​សង្គម​តិកតុក (TikTok)

ការ​កោះហៅ​នេះ ធ្វើ​ឡើង​បន្ទាប់​ពី​ប្រធាន​ព្រឹទ្ធសភា​លោក ហ៊ុន សែន កាល​ពី​ថ្ងៃ​ទី១៩ ខែ​ឧសភា ស្នើ​ឱ្យ​សមត្ថកិច្ច​កម្ពុជា​សហការ​ជាមួយ​វៀតណាម​ស្រាវជ្រាវ​រក​មុខ​អ្នក​ដែល​បាន​បង្ហោះ​ខ្លឹមសារ​ជេរ​ប្រមាថ​លោក ពាក់ព័ន្ធ​នឹង​គម្រោង​ព្រែក​ជីក​ហ្វូណន។

ទោះជា​យ៉ាងណា អ្នក​នាំ​ពាក្យ​ព្រឹទ្ធសភា​មក​ពី​គណបក្ស​ប្រជាជន​កម្ពុជា​អាណត្តិ​មុន គឺ​លោក ម៉ម ប៊ុននាង សុំ​មិន​ធ្វើ​អត្ថាធិប្បាយ​ដោយ​ថា អាណត្តិ​ទី៥នេះ មិន​ទាន់​មាន​ការ​តែងតាំង​អ្នកនាំពាក្យ​ថ្មី​នៅ​ឡើយ

ប្រធាន​ក្រុម​ប្រឹក្សា​ឃ្លាំមើល​កម្ពុជា លោក ម៉ែន ណាត ប្រាប់​វិទ្យុ​អាស៊ី​សេរី​នៅ​ថ្ងៃទី២៤ ខែឧសភា ថា ការ​ឆ្លើយ​របស់​ភាគី​វៀតណាម​នេះ គឺ​ដើម្បី​ការពារ​ ប្រយោជន៍​ប្រជាពលរដ្ឋ​ខ្លួន​ផង និង​បង្ហាញ​ពី​ការ​គួរ​សម​ក្នុង​កម្រិត​ការ​ទូត​ឱ្យ​លោក ហ៊ុន សែន ស្ងប់​ចិត្តលោកថា រដ្ឋាភិបាល​វៀតណាម មិន​ហ៊ាន​ចាត់​វិធានការ​ឬ​ធ្វើអ្វី​ឱ្យ​ប្រជាពលរដ្ឋ​ខ្លួន​ថ្នាំង​ថ្នាក់​ចិត្ត​ឡើយ

លោក ម៉ែន ណាត៖ «បើ​ប៉ះពាល់​ដល់​កម្មវិធី​នយោបាយ​ផ្ទៃ​ក្នុង​ជាតិ​របស់​គេ! គេ​អាច​ចាត់​វិធានការ​លើ​ពលរដ្ឋ​គេ​ដែរ ក៏​ប៉ុន្តែ​បើ​សិន​ទិតៀន​ហ្នឹង ប៉ះពាល់​ដល់​ផ្ទៃ​ក្នុង​ជាតិ​របស់​បរទេស​ជិត​ខាង​របស់​វៀតណាម គឺ​វៀតណាម​គេ​ធ្វើ​មិន​ដឹង មិន​ឮ​ទេ។ អាហ្នឹង​ជា​ពិសោធ​មួយ ដែល​ពួក​ជន​ជាតិ​វៀតណាម​ធ្វើ​បាតុកម្ម​ដុត​រោង​ចក្រ​ចិន​ប៉ុន្មាន​ឆ្នាំមុន កាល​ពី​ឆ្នាំ២០១៨។ ដុត​ហើយ​វៀតណាម​ចាប់​មនុស្ស២ ទៅ ៣ នាក់​យក​ទៅ​អប់រំ រៀនសូត្រ បន្ទាប់​មក​ដោះលែង​វិញ។ គេ​ការពារ​ប្រជាពលរដ្ឋ​គេ​តើ គេ​គ្រាន់​តែ​ធ្វើ​បំពេញ​មុខ​ការ​ទូត»

កាល​ពី​ពេល​ថ្មីៗ​ភាគី​វៀតណាម ក៏​បាន​ទាមទារ​ឱ្យ​រដ្ឋាភិបាល​កម្ពុជា​ផ្ដល់​ព័ត៌មាន​ លម្អិត​អំពី​គម្រោង​ព្រែក​ជីក​ហ្វូណន​ដល់​ខ្លួន។ ការ​ទាមទារ​នេះ ក្រោយ​ពី​អ្នក​ជំនាញ​ របស់​រដ្ឋាភិបាល​វៀតណាម​វាយ​តម្លៃ ថា ព្រែក​ជីក​ហ្វូណន​នេះ មិន​ត្រឹម​តែ​បម្រើ​ឱ្យ​ សេដ្ឋកិច្ច-សង្គម​កម្ពុជា​ប៉ុណ្ណោះ​ទេ ប៉ុន្តែ​ក៏​បង្ក​ផល​ប៉ះពាល់​ដល់​បរិស្ថាន និង​ថែម​ទាំង​បម្រើ​ឱ្យ​វិស័យ​យោធា​របស់​ចិន​ទៀត​ផង។

ក្រុម​អ្នក​វិភាគ​មួយ​ចំនួន​អះអាង​ថា ការ​ធ្វើ​ដូច្នេះ គឺ​ជា​នយោបាយ​ប្រជាភិថុតិ​របស់​ ត្រកូល«ហ៊ុន» និង​គណបក្ស​ប្រជាជន​កម្ពុជា ដើម្បី​លាង​ជម្រះ​កម្អែល​ដាន​ប្រវត្តិ​ សាស្ត្រ ដែល​ក្រុម​មេ​ដឹក​នាំ​កម្ពុជា និង​គណបក្ស​កាន់​អំណាច​បច្ចុប្បន្ន​ជា «អាយ៉ង» របស់​វៀតណាម។ ប៉ុន្តែ​អ្នក​សង្កេត​ការណ៍​មួយ​ចំនួន ក៏​នៅ​តែ​គាំទ្រ​កម្ពុជា​ឱ្យ​ជីក​ព្រែក​ជីក​ហ្វូណន​ជា​ប្រវត្តិ​សាស្ត្រ​នេះ​ដែរ ដើម្បី​ឱ្យ​កម្ពុជា​ឈប់​ពឹង​ផ្អែក​លើ​ការ​ដឹក​ជញ្ជូន​ផ្លូវ​ទឹក​ឆ្លង​កាត់​តាម​វៀតណាម

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។