តំណាងនិវត្តជនការិយាល័យផែនការ ការិយាល័យធនធានទឹក និងការិយាល័យអប់រំ នៅខេត្តតាកែវ មានប្រសាសន៍ថា ប្រាក់ចូលនិវត្តន៍ប្រចាំខែមីនា និងខែមេសា មិនទាន់បានបើកឲ្យពួកគាត់ជាជនចាស់ជរានៅឡើយ។
នាយករងខុទ្ទកាល័យនាយករដ្ឋមន្ត្រី ហ៊ុន សែន លោក មុត ខៀវ មានប្រសាសន៍ថា លោកនឹងជួយជំរុញឲ្យមន្ត្រីសង្គមកិច្ចជួយបើកប្រាក់ខែចូលនិវត្តន៍ដល់មន្ត្រីទាំងនោះបានទាន់ពេលវេលា និងទៀងទាត់។
លោកបានសំណូមពរឲ្យមន្ត្រីរាជការចូលនិវត្តន៍ទាំងអស់ មេត្តាទាក់ទងលោកផ្ទាល់តាមទូរស័ព្ទលេខ ០១២ ៨៦៧ ៧៧៧ ដើម្បីសាកសួរព័ត៌មានជុំវិញប្រាក់ចូលនិវត្តន៍របស់ពួកគាត់។
អភិបាលស្រុកត្រាំកក់ លោកស្រី គា សុភូ មានប្រសាសន៍ថា ចំពោះមន្ត្រីរាជការទើបចូលនិវត្តន៍ ការធ្វើលិខិតបែបបទបើកប្រាក់ចូលនិវត្តន៍ត្រូវរង់ចាំប្រមាណ ៣ ទៅ ៥ខែ។ ប្រាក់បើកយឺតមិនទាន់ពេលវេលានោះ នឹងបើករំឭកជូនវិញទេ នៅពេលដែលចាប់ផ្ដើមបើកប្រាក់ដំបូង។ ប៉ុន្តែចំពោះប្រាក់មន្ត្រីចូលនិវត្តន៍ច្រើនឆ្នាំហើយ លោកស្រីនឹងតាមដានរឿងនោះ៕