ក្នុងការផ្សាយនេះ បានលើកឡើងថា ពលរដ្ឋរងគ្រោះក្នុងជម្លោះដីធ្លីជាមួយក្រុមហ៊ុនសូគីម៉ិច (Sokimex) នៅខេត្តកំពង់ស្ពឺ បានប្រាប់វិទ្យុនោះថា តំណាងរាស្ត្រគណបក្សប្រជាជនមួយរូប គឺលោក សាយ ឈុំ បានសន្យាជួយដោះស្រាយបញ្ហាផ្ដល់ជម្រកដល់ពួកគេ។
លោក ម៉ម ឡេងយ៉ានី មានប្រសាសន៍នៅព្រឹកថ្ងៃ៣១ ខែមីនា ឆ្នាំ២០១១ ថា តាមពិត កាលពីថ្ងៃ២៤ ខែមីនា មានពលរដ្ឋជាង ៣០នាក់ តំណាងឲ្យពលរដ្ឋ ៧៣គ្រួសារ នៅភូមិ៣ ឃុំត្រែងត្រយឹង បានទៅដល់គេហដ្ឋានលោក សាយ ឈុំ ដើម្បីសុំឲ្យលោកជួយអន្តរាគមន៍ក្នុងបញ្ហាទំនាស់ដីធ្លីជាមួយក្រុមហ៊ុនសូគីម៉ិច។ ក្នុងឱកាសនោះ លោក សាយ ឈុំ មិនមានវត្តមាននៅគេហដ្ឋានទេ ដោយលោកជាប់បំពេញការងារនៅមូលដ្ឋាន។
លោក ម៉ម ឡេងយ៉ានី បន្ថែមថា គឺរូបលោកជានាយកខុទ្ទកាល័យទេ ដែលបានជួបជាមួយពលរដ្ឋទាំងនោះ។ ហេតុនេះ លោក សាយ ឈុំ មិនបានជួបជាមួយតំណាងពលរដ្ឋនោះទេ និងមិនបានសន្យាជួយដោះស្រាយបញ្ហាផ្ដល់ជម្រកដល់ពលរដ្ឋទាំងនោះដែរ។
កាលពីថ្ងៃ២៥ ខែមីនា ផ្ទះពលរដ្ឋមានលំនៅតាមផ្លូវទៅកាន់រមណីយដ្ឋានគិរីរម្យ ក្នុងភូមិលេខ៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ត្រូវអាជ្ញាធរខេត្តនោះអនុវត្តសាលក្រមសាលាដំបូងខេត្ត ដោយបានឲ្យពលរដ្ឋរុះរើផ្ទះ ដើម្បីប្រគល់ដីឲ្យក្រុមហ៊ុនសូគីម៉ិច ដែលបានឈ្នះក្តី។ នៅថ្ងៃ២៩ ខែមីនា ពលរដ្ឋទាំងនោះ បានប្រាប់វិទ្យុអាស៊ីសេរី ពីស្ថានភាពរស់នៅក្រោយការរុះរើផ្ទះ ធ្វើឲ្យពួកគាត់កំពុងខ្វះជម្រក ស្បៀងអាហារ និងប្រាប់ទៀតថា តំណាងរាស្ត្រខេត្តកំពង់ស្ពឺ គណបក្សប្រជាជនមួយរូប គឺលោក សាយ ឈុំ បានសន្យាជួយដោះស្រាយបញ្ហាផ្ដល់ជម្រក ទើបពលរដ្ឋទាំងនោះយល់ព្រមរុះរើផ្ទះ មិនតវ៉ានឹងការអនុវត្តសាលក្រមតុលាការខេត្ត កាលពីថ្ងៃ២៥ ខែមីនា ឆ្នាំ២០១១៕