ពលរដ្ឋរងគ្រោះដែលស្លាប់និងរងរបួស ដោយសារជាន់គ្រាប់មីន និងគ្រាប់យុទ្ធភណ្ឌមិនទាន់ផ្ទុះ រយៈពេល១០ខែ ឆ្នាំ២០២២ បានធ្លាក់ចុះ៥% បើធៀបរយៈពេលដូចគ្នា កាលពីឆ្នាំ២០២១។របាយការណ៍របស់អាជ្ញាធរមីន និងសង្គ្រោះជនរងគ្រោះ ហៅកាត់ថា ស៊ីម៉ាក (CMAA) ឲ្យដឹងថា ជនរងគ្រោះទាំង៤០នាក់នោះ មានស្លាប់ចំនួន១០នាក់ បាត់បង់អវយវៈ ៧នាក់ និង២៣នាក់ផ្សេងទៀតរងរបួសស្រាល។
ហេតុការណ៍គ្រោះថ្នាក់កើតឡើងទាំងនោះ គឺកើតឡើងនៅខេត្តចំនួន១១ រួមមានខេត្តព្រះវិហារ បាត់ដំបង កំពង់ធំ ស្វាយរៀង ពោធិ៍សាត់ បន្ទាយមានជ័យ រតនគីរី ក្រចេះ ប៉ៃលិន សៀមរាប និងខេត្តព្រះសីហនុ។
ចាប់ពីឆ្នាំ១៩៧០ ដល់ខែតុលា ឆ្នាំ២០២២ ចំនួនអ្នកស្លាប់ដោយសារជាន់គ្រាប់មីន និងគ្រាប់យុទ្ធភណ្ឌមិនទាន់ផ្ទុះ មានចំនួន ជិត២ម៉ឺននាក់ (១៩,៨១៨) រងរបួសជាង ៤ម៉ឺន ៥ពាន់នាក់ (៤៥,១៨៦)។
រដ្ឋាភិបាលកម្ពុជា បេ្តជ្ញាបោសសំអាតមីន និងគ្រាប់មិនទាន់ផ្ទុះ ដែលសេសសល់ពីសង្គ្រាមឲ្យអស់នៅឆ្នាំ២០២៥ ខាងមុខ។ ប្រទេសដែលផ្តល់ថវិកាសំរាប់វិស័យបោសសំអាតមីន ច្រើនជាងគេ រួមមានប្រទេសជប៉ុន ចិន កូរ៉េ អូស្ត្រាលី អឺរ៉ុប និងអាមេរិកជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។