កម្ពុជាបានស្នើឲ្យថៃជួយពង្រឹងយន្តការត្រួតពិនិត្យគ្រឿងញៀន ពង្រឹងសមត្ថភាពមន្ត្រីតាមតំបន់ព្រំដែន។ សំណើនេះធ្វើឡើងក្នុងជំនួបរវាង ប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន និងឯកអគ្គរាជទូតប្រទេសថៃប្រចាំប្រទេសកម្ពុជាលោក ប៉ានយ៉ារ៉ាក់ ពុលថាប់ (Panyarak Poolthup) កាលពីថ្ងៃទី៦ វិច្ឆិកា។ លោក កែ គឹមយ៉ាន ក៏ស្នើឲ្យភាគីថៃបន្តចូលរួមអនុវត្តគម្រោងសុវត្ថិភាពទន្លេមេគង្គ បន្តជួយកសាងហេដ្ឋារចនាសម្ព័ន្ធមជ្ឈមណ្ឌលជាតិផ្ដល់សេវាព្យាបាលស្ម័គ្រចិត្ត និងផ្អែកលើសហគមន៍ខេត្តព្រះសីហនុ។
កម្ពុជាស្នើឲ្យថៃបន្តជួយពង្រឹងសមត្ថភាពមន្ត្រីជំនាញ និងផ្ដល់ឧបករណ៍ដល់មន្ទីរពិសោធន៍គ្រឿងញៀន បន្តកម្មវិធីទស្សនកិច្ចសិក្សាដើម្បីដកពិសោធការងារត្រួតពិនិត្យគ្រឿងញៀនដល់មន្ត្រីកម្ពុជា។
ប្រធានគ្រប់គ្រងការិយាល័យឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានប្រាប់អាស៊ីសេរីកាលពីពេលថ្មីៗនេះ ថាស្ថានភាពចង្អៀតណែនក្នុងពន្ធនាគារ កើតឡើងក្រោយមានយុទ្ធនាការប្រយុទ្ធប្រឆាំងគ្រឿងញៀន របស់របបក្រុងភ្នំពេញ និងដោយមានការអនុវត្តនីតិវិធីឃុំខ្លួនបណ្ដោះអាសន្ន ដែលមិនចាំបាច់ជាច្រើនករណី៕