កម្ពុជាធ្វើជាម្ចាស់ផ្ទះលើកទី១ ក្នុងការរៀបចំព្រឹត្តិការណ៍ពិព័រណ៍ទេសចរណ៍អន្តរជាតិ នៅមជ្ឈមណ្ឌលពិព័រណ៍ពាណិជ្ជកម្មកោះពេជ្រ រាជធានីភ្នំពេញ រយៈពេលបីថ្ងៃ គឺចាប់ពីថ្ងៃទី១៧ ដល់ថ្ងៃទី ១៩ កញ្ញា។
ព្រឹត្តិការណ៍ពិព័រណ៍នេះ កម្ពុជាបានសហការជាមួយ សមាគមទេសចរណ៍តំបន់អាស៊ីបាស៊ីហ្វិច ហៅកាត់ថា ប៉ាតាត្រាវែលម៉ាត (Pacific Asia Tourism Association, PATA Travel Mart) បង្កើតឡើងតាំងពីឆ្នាំ១៩៥១ និងមានសមាជិកប្រមាណជាង ៦០ប្រទេសក្នុងពិភពលោក ឯកម្ពុជាបានចូលជាសមាជិកសមាគមនេះនៅឆ្នាំ ២០០៣។
ការដាក់បង្ហាញក្នុងពិព័រណ៍នេះ ប្រទេសជាសមាជិកទាំងអស់ នាំយកប្រភេទផលិតផល និងសេវាកម្មទេសចរ ដូចជា សណ្ឋាគារ ភោជនីយដ្ឋាន ក្រុមហ៊ុនអាកាសចរ សេវាកម្មភ្នាក់ងារទេសចរជាដើម សម្រាប់ទីភ្នាក់ងារក្នុងស្រុក និងក្រៅប្រទេសជាលក្ខណៈស្តង់ដារអន្តរជាតិ រវាងម្ចាស់ផលិតផល សេវាកម្ម និងទីភ្នាក់ងារ ដែលហៅកាត់ថា ប៊ីធូប៊ី (B2B, Business To Business) ឬហៅម៉្យាងទៀតថា ពិព័រណ៍ទីផ្សារណាត់ជួប។
លោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា (CATA) ឲ្យដឹងថាកម្ពុជាពិតជាមានមោទនភាព ដែលកម្ពុជាអាចរៀបចំពិព័រណ៍ទេសចរណ៍អន្តរជាតិ ដ៏ធំមួយនេះ ហើយកម្ពុជាពិតជាអាចទាក់ទាញភ្ញៀវទេសចរ ក្រុមហ៊ុន ឬភ្នាក់ងារទេសចរធំៗ លើពិភពលោកបន្ថែមទៀត។ លើសពីនេះទៀត មានប្រតិបត្តិករជាច្រើនមកពីគ្រប់ប្រទេស ដែលផ្សព្វផ្សាយពីព្រឹត្តិការណ៍នេះ តាមរយៈភ្នាក់ងារសារព័ត៌មាននៃប្រទេសទាំងនោះ។
ក្រៅពីព្រឹត្តិការណ៍ពិព័រណ៍ទេសចរណ៍អន្តរជាតិនេះ កម្ពុជាធ្លាប់បានរៀបចំពិព័រណ៍ច្រើនមកហើយ ដូចជាពិព័រណ៍អង្គរ អ៊ីនធើណេសឺណល ត្រាវែល អ៊ិចស្ប៉ូ (Angkor International Travel Expo) និងវេទិកាទេសចរអាស៊ានវិលជុំ ក្នុងក្របខណ្ឌប្រទេសជាសមាជិកអាស៊ីអាគ្នេយ៍ទាំង១០ ( Asean Tourism Forum ) ពីរដងមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។